Blog

‎نیویارک: دنیا کے امیر ترین شخص اور ٹیکنالوجی کی دنیا کی معروف شخصیت ایلون مسک اپنی کھرب پتی (ٹریلین ایئر) حیثیت سے محروم ہو گئے ہیں۔ اسپیس ایکس اور ٹیسلا کے حصص میں نمایاں کمی کے باعث ان کی مجموعی دولت میں بڑا نقصان ریکارڈ کیا گیا ہے۔
‎غیر ملکی میڈیا رپورٹس کے مطابق صرف دو ہفتے قبل اسپیس ایکس کے حصص کی کامیاب لسٹنگ کے بعد ایلون مسک دنیا کے پہلے کھرب پتی بن گئے تھے، تاہم مارکیٹ میں حالیہ گراوٹ نے ان کی دولت کو نمایاں طور پر متاثر کیا ہے۔
‎بلوم برگ بلینیئرز انڈیکس کے مطابق ایلون مسک کی مجموعی دولت 1.11 ٹریلین ڈالر سے کم ہو کر 957 ارب ڈالر رہ گئی ہے، جس کے بعد وہ کھرب پتی شخصیات کی فہرست سے باہر ہو گئے ہیں۔
‎رپورٹس کے مطابق اسپیس ایکس اور ٹیسلا کے شیئرز میں تیزی سے آنے والی کمی کے ساتھ دیگر بڑی ٹیکنالوجی کمپنیوں کے حصص بھی دباؤ کا شکار رہے، جس نے سرمایہ کاروں کے اعتماد کو متاثر کیا۔
‎ماہرین کے مطابق مصنوعی ذہانت سے وابستہ منصوبوں کے طویل مدتی منافع کے حوالے سے بڑھتے ہوئے خدشات اور سرمایہ کاری کے اخراجات میں اضافے نے ٹیکنالوجی سیکٹر میں فروخت کا رجحان بڑھایا، جس کے اثرات ایلون مسک کی دولت پر بھی پڑے۔
‎اگرچہ ایلون مسک کی دولت میں نمایاں کمی آئی ہے، تاہم وہ اب بھی دنیا کے امیر ترین شخص ہیں اور ان کی مجموعی دولت اپنے قریب ترین حریفوں سے کہیں زیادہ ہے۔

‎سڈنی: ایک نئی تحقیق میں انکشاف ہوا ہے کہ آسٹریلیا میں 16 سال سے کم عمر بچوں پر سوشل میڈیا کے استعمال کی پابندی کے باوجود 80 فیصد سے زائد بچے اب بھی مختلف سوشل میڈیا پلیٹ فارمز استعمال کر رہے ہیں۔
‎تحقیق کے مطابق آسٹریلیا دنیا کا پہلا ملک تھا جس نے دسمبر 2025 میں 16 سال سے کم عمر بچوں کے لیے سوشل میڈیا کے استعمال پر پابندی نافذ کی تھی۔ اس قانون کے تحت ٹک ٹاک، فیس بک، انسٹاگرام، ایکس (سابقہ ٹوئٹر)، یوٹیوب اور اسنیپ چیٹ سمیت متعدد پلیٹ فارمز پر کم عمر بچوں کے اکاؤنٹس بنانے یا استعمال کرنے پر پابندی عائد کی گئی تھی۔
‎تاہم نیو کیسل یونیورسٹی کی حالیہ تحقیق سے معلوم ہوا ہے کہ اس قانون پر مؤثر عملدرآمد نہیں ہو سکا۔ تحقیق میں 12 سے 17 سال کی عمر کے 408 بچوں اور نوجوانوں کا جائزہ لیا گیا، جس سے ظاہر ہوا کہ پابندی کے باوجود کم عمر افراد کی بڑی تعداد بدستور سوشل میڈیا استعمال کر رہی ہے۔
محققین کا کہنا ہے کہ انہیں ایسے شواہد نہیں ملے جن سے ثابت ہو کہ حکومتی پابندی کے بعد 16 سال سے کم عمر بچوں کے سوشل میڈیا استعمال میں نمایاں کمی آئی access ہو۔
تحقیق میں مزید کہا گیا کہ یہ نتائج اس لیے بھی اہم ہیں کیونکہ کئی دیگر ممالک بھی بچوں کے سوشل میڈیا استعمال کو محدود کرنے کے لیے آسٹریلیا کے ماڈل پر غور کر رہے ہیں۔
‎ماہرین کے مطابق صرف پابندی لگانا بچوں کو نقصان دہ آن لائن مواد سے بچانے کے لیے کافی نہیں، بلکہ مؤثر نگرانی، والدین کی رہنمائی، ڈیجیٹل تعلیم اور مضبوط حفاظتی اقدامات کی بھی ضرورت ہے۔
‎یہ تحقیق پابندی نافذ ہونے کے بعد ابتدائی تین ماہ کے دوران اس کے اثرات کا جائزہ لینے کے بعد جاری کی گئی۔

‎دنیا کی تاریخ میں آنے والے طاقتور ترین زلزلوں نے نہ صرف بڑے پیمانے پر تباہی مچائی بلکہ لاکھوں انسانوں کی زندگیاں بھی متاثر کیں۔ شدت کے اعتبار سے اب تک ریکارڈ کیے گئے پانچ سب سے بڑے زلزلوں میں سرفہرست 1960 کا چلی کا والڈیویا زلزلہ ہے، جس کی شدت 9.5 ریکارڈ کی گئی تھی اور اسے تاریخ کا طاقتور ترین زلزلہ قرار دیا جاتا ہے۔
‎دوسرے نمبر پر 1964 میں امریکی ریاست الاسکا کے علاقے پرنس ولیم ساؤنڈ میں آنے والا 9.2 شدت کا زلزلہ ہے، جو شمالی امریکا کی تاریخ کا سب سے طاقتور زلزلہ تھا۔ اس کے نتیجے میں شدید زمینی دراڑیں پڑیں اور تباہ کن سونامی نے ساحلی علاقوں کو بری طرح متاثر کیا۔
‎تیسرے نمبر پر 2004 میں انڈونیشیا کے جزیرہ سماٹرا کے قریب آنے والا 9.1 شدت کا سمندری زلزلہ ہے، جس نے باکسنگ ڈے سونامی کو جنم دیا۔ اس آفت کے نتیجے میں 14 ممالک متاثر ہوئے اور 2 لاکھ 30 ہزار سے زائد افراد جان کی بازی ہار گئے، جسے جدید تاریخ کی مہلک ترین قدرتی آفات میں شمار کیا جاتا ہے۔
‎چوتھے نمبر پر 2011 میں جاپان کے توہوکو علاقے میں آنے والا 9.0 شدت کا زلزلہ ہے، جس کے بعد آنے والی سونامی نے مشرقی جاپان میں وسیع تباہی مچائی اور فوکوشیما دائیچی جوہری پاور پلانٹ میں بھی سنگین حادثہ پیش آیا۔
‎پانچویں نمبر پر 1952 میں روس کے جزیرہ نما کامچاٹکا میں آنے والا 9.0 شدت کا زلزلہ ہے۔ اس زلزلے نے تقریباً 15 میٹر بلند سونامی لہریں پیدا کیں، جن سے بحرالکاہل کے مختلف ساحلی علاقوں، خصوصاً ہوائی میں بڑے پیمانے پر مالی نقصان ہوا، تاہم اس واقعے میں براہ راست انسانی ہلاکتیں ریکارڈ نہیں ہوئیں۔
‎اگرچہ شدت کے اعتبار سے یہ زلزلے تاریخ کے سب سے بڑے تھے، لیکن انسانی جانوں کے نقصان کے لحاظ سے 1556 میں چین کے صوبہ شانشی میں آنے والا زلزلہ سب سے تباہ کن سمجھا جاتا ہے، جس میں 8 لاکھ 30 ہزار سے زائد افراد ہلاک ہوئے تھے۔

کاراکاس: وینزویلا میں تباہ کن زلزلوں کے بعد عالمی برادری کی جانب سے امداد اور اظہارِ یکجہتی کا سلسلہ جاری ہے۔ یوکرین نے متاثرہ عوام سے ہمدردی کا اظہار کیا ہے، جبکہ سوئٹزرلینڈ نے 80 رکنی امدادی ٹیم اور بھاری ریسکیو سامان بھیجنے کا اعلان کیا ہے۔
یوکرین کے وزیر خارجہ آندری سیبیہا نے سوشل میڈیا پلیٹ فارم ایکس پر اپنے پیغام میں زلزلے میں جاں بحق ہونے والوں کے اہل خانہ سے تعزیت کرتے ہوئے زخمیوں کی جلد صحت یابی کی دعا کی۔ انہوں نے امدادی کارروائیوں میں مصروف ریسکیو اہلکاروں کی خدمات کو سراہتے ہوئے کہا کہ یوکرین کو امید ہے کہ متاثرہ علاقے جلد اس سانحے سے بحال ہو جائیں گے۔
دوسری جانب سوئس حکومت نے اعلان کیا ہے کہ وہ سوئس ریسکیو چین کے تحت 80 ماہر ریسکیو اہلکار، 8 تربیت یافتہ ریسکیو کتے اور 18 ٹن امدادی و ریسکیو سامان فوری طور پر وینزویلا روانہ کرے گی تاکہ ملبے تلے دبے افراد کو نکالنے اور امدادی سرگرمیوں میں مدد فراہم کی جا سکے۔
وینزویلا میں چند سیکنڈ کے وقفے سے آنے والے دو طاقتور زلزلوں نے بڑے پیمانے پر تباہی مچا دی، جہاں اب تک 167 افراد کی ہلاکت اور 971 سے زائد کے زخمی ہونے کی تصدیق کی گئی ہے، جبکہ امریکی جیولوجیکل سروے نے ہلاکتوں کی تعداد 10 ہزار سے تجاوز کرنے کا خدشہ ظاہر کیا ہے۔
‎رپورٹس کے مطابق زلزلوں کی شدت بالترتیب 7.1 اور 7.5 ریکارڈ کی گئی، جن کے جھٹکے نہ صرف وینزویلا بلکہ پڑوسی ممالک کولمبیا اور برازیل کے بعض علاقوں میں بھی محسوس کیے گئے۔
‎دارالحکومت کاراکاس اور ساحلی شہر لا گوئیرا سب سے زیادہ متاثر ہوئے ہیں، جہاں متعدد رہائشی اور تجارتی عمارتیں منہدم ہو گئی ہیں۔ ریسکیو ٹیمیں ملبے تلے دبے افراد کو نکالنے کے لیے امدادی کارروائیاں جاری رکھے ہوئے ہیں، جبکہ کئی مقامات سے زندہ افراد کی آوازیں سنائی دینے کی اطلاعات بھی موصول ہوئی ہیں۔
‎وینزویلا کی قائم مقام صدر ڈیلسی روڈریگز نے ملک میں ہنگامی حالت نافذ کرتے ہوئے بتایا کہ آفٹر شاکس کے خدشے کے باعث ہزاروں شہری گھروں سے نکل کر کھلے مقامات اور سڑکوں پر موجود ہیں۔ انہوں نے مزید کہا کہ دارالحکومت کاراکاس اور لا گوئیرا میں بنیادی ڈھانچے کو شدید نقصان پہنچا ہے، جبکہ مائی کیٹیا کا مرکزی بین الاقوامی ہوائی اڈہ بھی نقصان کے باعث عارضی طور پر بند کر دیا گیا ہے۔
‎حکام کے مطابق زخمیوں کو قریبی اسپتالوں میں منتقل کیا جا رہا ہے، جبکہ متاثرہ علاقوں میں امدادی سرگرمیوں کو تیز کر دیا گیا ہے۔ حکومت نے شہریوں سے غیر ضروری سفر سے گریز اور حفاظتی ہدایات پر عمل کرنے کی اپیل کی ہے۔
‎دوسری جانب صدر مملکت آصف علی زرداری اور وزیراعظم شہباز شریف نے زلزلے پر گہرے دکھ اور افسوس کا اظہار کرتے ہوئے وینزویلا کے عوام اور حکومت سے اظہارِ یکجہتی کیا ہے۔