Blog

‎دنیا کی تاریخ میں آنے والے طاقتور ترین زلزلوں نے نہ صرف بڑے پیمانے پر تباہی مچائی بلکہ لاکھوں انسانوں کی زندگیاں بھی متاثر کیں۔ شدت کے اعتبار سے اب تک ریکارڈ کیے گئے پانچ سب سے بڑے زلزلوں میں سرفہرست 1960 کا چلی کا والڈیویا زلزلہ ہے، جس کی شدت 9.5 ریکارڈ کی گئی تھی اور اسے تاریخ کا طاقتور ترین زلزلہ قرار دیا جاتا ہے۔
‎دوسرے نمبر پر 1964 میں امریکی ریاست الاسکا کے علاقے پرنس ولیم ساؤنڈ میں آنے والا 9.2 شدت کا زلزلہ ہے، جو شمالی امریکا کی تاریخ کا سب سے طاقتور زلزلہ تھا۔ اس کے نتیجے میں شدید زمینی دراڑیں پڑیں اور تباہ کن سونامی نے ساحلی علاقوں کو بری طرح متاثر کیا۔
‎تیسرے نمبر پر 2004 میں انڈونیشیا کے جزیرہ سماٹرا کے قریب آنے والا 9.1 شدت کا سمندری زلزلہ ہے، جس نے باکسنگ ڈے سونامی کو جنم دیا۔ اس آفت کے نتیجے میں 14 ممالک متاثر ہوئے اور 2 لاکھ 30 ہزار سے زائد افراد جان کی بازی ہار گئے، جسے جدید تاریخ کی مہلک ترین قدرتی آفات میں شمار کیا جاتا ہے۔
‎چوتھے نمبر پر 2011 میں جاپان کے توہوکو علاقے میں آنے والا 9.0 شدت کا زلزلہ ہے، جس کے بعد آنے والی سونامی نے مشرقی جاپان میں وسیع تباہی مچائی اور فوکوشیما دائیچی جوہری پاور پلانٹ میں بھی سنگین حادثہ پیش آیا۔
‎پانچویں نمبر پر 1952 میں روس کے جزیرہ نما کامچاٹکا میں آنے والا 9.0 شدت کا زلزلہ ہے۔ اس زلزلے نے تقریباً 15 میٹر بلند سونامی لہریں پیدا کیں، جن سے بحرالکاہل کے مختلف ساحلی علاقوں، خصوصاً ہوائی میں بڑے پیمانے پر مالی نقصان ہوا، تاہم اس واقعے میں براہ راست انسانی ہلاکتیں ریکارڈ نہیں ہوئیں۔
‎اگرچہ شدت کے اعتبار سے یہ زلزلے تاریخ کے سب سے بڑے تھے، لیکن انسانی جانوں کے نقصان کے لحاظ سے 1556 میں چین کے صوبہ شانشی میں آنے والا زلزلہ سب سے تباہ کن سمجھا جاتا ہے، جس میں 8 لاکھ 30 ہزار سے زائد افراد ہلاک ہوئے تھے۔

کاراکاس: وینزویلا میں تباہ کن زلزلوں کے بعد عالمی برادری کی جانب سے امداد اور اظہارِ یکجہتی کا سلسلہ جاری ہے۔ یوکرین نے متاثرہ عوام سے ہمدردی کا اظہار کیا ہے، جبکہ سوئٹزرلینڈ نے 80 رکنی امدادی ٹیم اور بھاری ریسکیو سامان بھیجنے کا اعلان کیا ہے۔
یوکرین کے وزیر خارجہ آندری سیبیہا نے سوشل میڈیا پلیٹ فارم ایکس پر اپنے پیغام میں زلزلے میں جاں بحق ہونے والوں کے اہل خانہ سے تعزیت کرتے ہوئے زخمیوں کی جلد صحت یابی کی دعا کی۔ انہوں نے امدادی کارروائیوں میں مصروف ریسکیو اہلکاروں کی خدمات کو سراہتے ہوئے کہا کہ یوکرین کو امید ہے کہ متاثرہ علاقے جلد اس سانحے سے بحال ہو جائیں گے۔
دوسری جانب سوئس حکومت نے اعلان کیا ہے کہ وہ سوئس ریسکیو چین کے تحت 80 ماہر ریسکیو اہلکار، 8 تربیت یافتہ ریسکیو کتے اور 18 ٹن امدادی و ریسکیو سامان فوری طور پر وینزویلا روانہ کرے گی تاکہ ملبے تلے دبے افراد کو نکالنے اور امدادی سرگرمیوں میں مدد فراہم کی جا سکے۔
وینزویلا میں چند سیکنڈ کے وقفے سے آنے والے دو طاقتور زلزلوں نے بڑے پیمانے پر تباہی مچا دی، جہاں اب تک 167 افراد کی ہلاکت اور 971 سے زائد کے زخمی ہونے کی تصدیق کی گئی ہے، جبکہ امریکی جیولوجیکل سروے نے ہلاکتوں کی تعداد 10 ہزار سے تجاوز کرنے کا خدشہ ظاہر کیا ہے۔
‎رپورٹس کے مطابق زلزلوں کی شدت بالترتیب 7.1 اور 7.5 ریکارڈ کی گئی، جن کے جھٹکے نہ صرف وینزویلا بلکہ پڑوسی ممالک کولمبیا اور برازیل کے بعض علاقوں میں بھی محسوس کیے گئے۔
‎دارالحکومت کاراکاس اور ساحلی شہر لا گوئیرا سب سے زیادہ متاثر ہوئے ہیں، جہاں متعدد رہائشی اور تجارتی عمارتیں منہدم ہو گئی ہیں۔ ریسکیو ٹیمیں ملبے تلے دبے افراد کو نکالنے کے لیے امدادی کارروائیاں جاری رکھے ہوئے ہیں، جبکہ کئی مقامات سے زندہ افراد کی آوازیں سنائی دینے کی اطلاعات بھی موصول ہوئی ہیں۔
‎وینزویلا کی قائم مقام صدر ڈیلسی روڈریگز نے ملک میں ہنگامی حالت نافذ کرتے ہوئے بتایا کہ آفٹر شاکس کے خدشے کے باعث ہزاروں شہری گھروں سے نکل کر کھلے مقامات اور سڑکوں پر موجود ہیں۔ انہوں نے مزید کہا کہ دارالحکومت کاراکاس اور لا گوئیرا میں بنیادی ڈھانچے کو شدید نقصان پہنچا ہے، جبکہ مائی کیٹیا کا مرکزی بین الاقوامی ہوائی اڈہ بھی نقصان کے باعث عارضی طور پر بند کر دیا گیا ہے۔
‎حکام کے مطابق زخمیوں کو قریبی اسپتالوں میں منتقل کیا جا رہا ہے، جبکہ متاثرہ علاقوں میں امدادی سرگرمیوں کو تیز کر دیا گیا ہے۔ حکومت نے شہریوں سے غیر ضروری سفر سے گریز اور حفاظتی ہدایات پر عمل کرنے کی اپیل کی ہے۔
‎دوسری جانب صدر مملکت آصف علی زرداری اور وزیراعظم شہباز شریف نے زلزلے پر گہرے دکھ اور افسوس کا اظہار کرتے ہوئے وینزویلا کے عوام اور حکومت سے اظہارِ یکجہتی کیا ہے۔

‎واشنگٹن: مائیکروسافٹ کے بانی بل گیٹس نے امریکی کانگریس کی ایک کمیٹی کے سامنے اہم انکشافات کرتے ہوئے دعویٰ کیا ہے کہ بدنام زمانہ مجرم جیفری ایپسٹن انہیں ان کے ماضی کے ذاتی تعلقات کی بنیاد پر بلیک میل کرنے کی کوشش کر رہا تھا۔
‎غیر ملکی میڈیا کے مطابق امریکی کانگریس کی کمیٹی نے بند کمرے میں دیے گئے بل گیٹس کے بیان کا متن جاری کیا، جس میں انہوں نے کہا کہ جیفری ایپسٹن ان کے ماضی کے غیر ازدواجی تعلقات سے متعلق معلومات کو استعمال کرتے ہوئے انہیں دباؤ میں لانا چاہتا تھا۔ بل گیٹس کے مطابق ایپسٹن کے تیار کردہ ای میل مسودوں سے ظاہر ہوتا ہے کہ وہ انہیں دھمکانے کی منصوبہ بندی کر رہا تھا۔
‎بل گیٹس نے اعتراف کیا کہ ماضی میں ان کے تین خواتین کے ساتھ تعلقات رہے، جبکہ جیفری ایپسٹن کو ان میں سے دو تعلقات کے بارے میں معلومات حاصل تھیں۔
‎انہوں نے واضح کیا کہ ان کا ایپسٹن کے مجرمانہ سرگرمیوں سے کسی قسم کا تعلق نہیں تھا۔ بل گیٹس کے مطابق چار برس کے دوران ان کی ایپسٹن سے تقریباً 12 سے 14 ملاقاتیں اور دو ویڈیو کالز ہوئیں، جن کا مقصد زیادہ تر فلاحی منصوبوں اور ممکنہ عطیہ دہندگان کے حوالے سے بات چیت تھا۔
‎بل گیٹس نے کمیٹی کو بتایا کہ وہ اس وقت جیفری ایپسٹن کے مجرمانہ ماضی سے لاعلم تھے اور بعد میں انہیں احساس ہوا کہ اس سے ملاقات کرنا ان کی زندگی کی سب سے بڑی غلطی تھی۔
‎واضح رہے کہ امریکی کانگریس کی کمیٹی اس وقت جیفری ایپسٹن کے بااثر عالمی شخصیات سے روابط اور ممکنہ نیٹ ورک کی تحقیقات کر رہی ہے، جس کے دوران متعدد اہم شخصیات کے بیانات ریکارڈ کیے جا رہے ہیں۔

‎منامہ: امریکی وزیر خارجہ مارکو روبیو نے کہا ہے کہ امریکا اور ایران کے درمیان جوہری پروگرام اور پابندیوں سے متعلق تکنیکی مذاکرات کا اگلا دور 30 جون کو سوئٹزرلینڈ میں منعقد ہوگا، جہاں دونوں ممالک کی تکنیکی ٹیمیں مذاکرات کو آگے بڑھائیں گی۔
‎بحرین میں خلیج تعاون کونسل (جی سی سی) کے وزرائے خارجہ سے گفتگو کرتے ہوئے مارکو روبیو نے کہا کہ امریکا ایک ایسا پائیدار اور حقیقی امن چاہتا ہے جو نہ صرف خطے بلکہ امریکا اور اس کے اتحادیوں کی سلامتی اور خوشحالی کو بھی یقینی بنائے۔
‎انہوں نے کہا کہ واشنگٹن اس بات کو یقینی بنائے گا کہ ایران کے ساتھ ہونے والے کسی بھی ممکنہ معاہدے میں اتحادی ممالک کے مفادات کو مکمل طور پر مدنظر رکھا جائے اور کوئی ایسا فیصلہ نہ کیا جائے جو ان کی سلامتی یا مفادات کے خلاف ہو۔
‎امریکی وزیر خارجہ کا کہنا تھا کہ امریکا ایران کے ساتھ مذاکرات کو کامیاب بنانا چاہتا ہے اور اس مقصد کے لیے ہر ممکن سفارتی کوشش جاری رکھی جائے گی۔ انہوں نے زور دیا کہ جوہری پروگرام اور پابندیوں سے متعلق معاملات مذاکرات کے ذریعے حل کیے جائیں گے۔
‎مارکو روبیو نے آبنائے ہرمز کا حوالہ دیتے ہوئے کہا کہ امریکا یہ مؤقف قبول نہیں کرے گا کہ اس اہم عالمی آبی گزرگاہ پر کسی ایک ملک کی اجارہ داری ہو۔ ان کے مطابق آبنائے ہرمز بین الاقوامی تجارت اور توانائی کی ترسیل کے لیے انتہائی اہم راستہ ہے اور اس میں آزادانہ جہاز رانی کو ہر صورت یقینی بنایا جائے گا۔
‎امریکی وزیر خارجہ کے بیان کو ایران اور امریکا کے درمیان جاری سفارتی عمل میں ایک اہم پیش رفت قرار دیا جا رہا ہے، جبکہ عالمی برادری بھی ان مذاکرات کے نتائج پر گہری نظر رکھے ہوئے ہے۔