Blog

امریکا اور ایران کے درمیان نئی جھڑپوں کے بعد عالمی منڈی میں خام تیل کی قیمتوں میں ایک بار پھر اضافہ ریکارڈ کیا گیا ہے۔

عالمی مارکیٹ میں برینٹ کروڈ کی قیمت تقریباً ڈھائی فیصد اضافے کے بعد 96 ڈالر 63 سینٹ فی بیرل تک پہنچ گئی۔ اس سے ایک روز قبل برینٹ کروڈ کی قیمت میں 5 اعشاریہ 31 فیصد کمی دیکھی گئی تھی۔دوسری جانب ویسٹ ٹیکساس انٹرمیڈیٹ خام تیل کی قیمت بھی تقریباً اسی شرح سے بڑھ کر 100 ڈالر فی بیرل تک جا پہنچی۔ بدھ کے روز ڈبلیو ٹی آئی کی قیمت میں تقریباً 6 فیصد کمی ریکارڈ کی گئی تھی۔

ماہرین کے مطابق مشرقِ وسطیٰ میں بڑھتی ہوئی کشیدگی اور امریکا، ایران تنازع کے باعث عالمی توانائی مارکیٹ میں غیر یقینی صورتحال پیدا ہو رہی ہے، جس کے اثرات تیل کی قیمتوں پر نمایاں طور پر دیکھے جا رہے ہیں۔

عالمی سطح پر تیل کی قیمتوں میں اضافے کے بعد پاکستان میں بھی تیل کی قیمتیں بڑھنے کا امکان ہے،

اقوامِ متحدہ نے اسرائیلی اداروں کو جنگ کے دوران جنسی تشدد کے الزامات کے تحت بلیک لسٹ میں شامل کرلیا، جس کے بعد اسرائیل نے شدید ردِعمل دیتے ہوئے اس فیصلے کو “سیاسی اور حقائق سے عاری” قرار دیا ہے۔

اسرائیل کے اقوامِ متحدہ میں سفیر نے سوشل میڈیا پر بیان دیتے ہوئے کہا کہ اقوامِ متحدہ کا یہ اقدام “سیاسی فیصلہ” ہے جس کا حقیقت اور زمینی حقائق سے کوئی تعلق نہیں۔ انہوں نے دعویٰ کیا کہ اسرائیل نے اقوامِ متحدہ کو ایسے شواہد فراہم کیے تھے جو ان رپورٹس کی تردید کرتے ہیں۔اسرائیلی میڈیا کے مطابق اسرائیلی جیل سروس سمیت کئی اسرائیلی اداروں کو 2026 کی اس بلیک لسٹ میں شامل کیا گیا ہے، جبکہ بعض دیگر اداروں کو نگرانی کے فریم ورک میں رکھا گیا ہے تاکہ مستقبل میں ان کے خلاف مزید کارروائی کی جاسکے۔

اقوامِ متحدہ کی اس فہرست میں وہ ممالک، مسلح گروہ اور تنظیمیں شامل کی جاتی ہیں جن پر جنگی یا تنازعاتی علاقوں میں جنسی تشدد کے الزامات ہوں۔

اسرائیل کے مطابق گزشتہ ایک سال کے دوران اس کے سفارتی وفد نے اقوامِ متحدہ کے حکام سے متعدد ملاقاتیں کیں اور مبینہ الزامات سے متعلق دستاویزات، ڈیٹا اور تفصیلی جوابات فراہم کیے۔ اسرائیل نے اقوامِ متحدہ کے اہلکاروں کو ملک اور حملوں سے متاثرہ مقامات کا دورہ کرنے کی دعوت بھی دی تاکہ “جھوٹے دعوؤں” کا جائزہ لیا جاسکے، تاہم اس کے باوجود اسرائیلی اداروں کو فہرست میں شامل کردیا گیا۔

اس فیصلے کے ردِعمل میں اسرائیل نے اقوامِ متحدہ کے سیکریٹری جنرل کے دفتر کے ساتھ تعلقات منجمد کرنے کا اعلان کردیا ہے۔ اسرائیلی حکومت کا کہنا ہے کہ جب تک انتونیو گوتریس اقوامِ متحدہ کے سربراہ رہیں گے، سیکریٹری جنرل کے دفتر کے ساتھ رابطہ نہیں رکھا جائے گا۔ گوتریس کی مدتِ ملازمت 31 دسمبر 2026 کو ختم ہورہی ہے۔

یہ فیصلہ ایسے وقت میں سامنے آیا ہے جب اقوامِ متحدہ اپنی 80 سالہ تاریخ کے شدید ترین مالی بحران کا سامنا کررہی ہے۔ ادارے کے مطابق رکن ممالک کی جانب سے 1.56 ارب ڈالر کے واجبات تاحال ادا نہیں کیے گئے۔

یہ پیش رفت امریکی اخبار نیویارک ٹائمز میں ایک مضمون کے بعد سامنے آئی، جس میں اسرائیلی فوجیوں، آبادکاروں اور سیکیورٹی اہلکاروں پر فلسطینی مردوں، خواتین اور بچوں کے خلاف مبینہ جنسی تشدد کے الزامات عائد کیے گئے تھے۔مضمون میں دعویٰ کیا گیا تھا کہ اگرچہ اسرائیلی قیادت کی جانب سے ریپ کے احکامات کے شواہد موجود نہیں، تاہم سیکیورٹی نظام میں ایسی فضا پیدا ہوگئی ہے جہاں جنسی تشدد “معمول کا طریقۂ کار” بنتا جارہا ہے۔

بھارت کے دارالحکومت دہلی سے تعلق رکھنے والے ایک پجاری کو خاتون کی جعلی اور نازیبا تصاویر و ویڈیوز مصنوعی ذہانت (اے آئی) کے ذریعے تیار کرکے سوشل میڈیا پر پھیلانے کے الزام میں گرفتار کر لیا گیا۔

بھارتی میڈیا رپورٹس کے مطابق 27 سالہ ملزم سمت نیم چند شرما مذہبی ویڈیوز بنانے اور مختلف سوشل میڈیا پلیٹ فارمز پر مذہبی بیانات دینے کے لیے جانا جاتا تھا۔ پولیس کا کہنا ہے کہ ملزم نے آسانی سے دستیاب اے آئی ٹولز استعمال کرتے ہوئے ایک خاتون اور اس کی والدہ کی تصاویر کو تبدیل کیا اور انہیں متعدد جعلی اکاؤنٹس پر اپ لوڈ کر دیا۔احمد آباد سٹی سائبر کرائم برانچ نے کارروائی کرتے ہوئے ملزم کو دہلی سے گرفتار کیا۔ اس مہم کا مقصد خواتین کو آن لائن ہراسانی اور سائبر جرائم سے تحفظ فراہم کرنا ہے۔پولیس کے مطابق متاثرہ خاتون، جو گجرات سے تعلق رکھتی ہے، کی ملزم سے سوشل میڈیا کے ذریعے جان پہچان ہوئی تھی۔ ملزم نے ابتدا میں انسٹاگرام پر مذہبی موضوعات پر گفتگو شروع کی، تاہم بعد ازاں اس نے خاتون سے دوستی کی کوشش کی جسے خاتون نے مسترد کر دیا۔

شکایت کے مطابق دوستی سے انکار کے بعد ملزم نے دسمبر 2025 سے 6 اپریل تک خاتون کا آن لائن تعاقب کیا۔ اس دوران اس نے خاتون اور اس کی والدہ کی تصاویر انسٹاگرام سے ڈاؤن لوڈ کیں اور انٹرنیٹ پر “AI Remove Clothes” جیسے ٹولز تلاش کرکے ان تصاویر کو نازیبا شکل دی۔پولیس حکام کے مطابق ملزم نے اے آئی ٹیکنالوجی کی مدد سے 100 سے زائد جعلی نازیبا تصاویر اور ویڈیوز تیار کیں۔ اس نے خاتون کے نام اور تصاویر استعمال کرتے ہوئے تین جعلی انسٹاگرام اکاؤنٹس اور ایک یوٹیوب چینل بھی بنایا، جہاں یہ مواد اپ لوڈ کیا گیا۔تحقیقات کے دوران یہ بھی سامنے آیا کہ ملزم نے ایکس، فیس بک، انسٹاگرام اور یوٹیوب سمیت مختلف پلیٹ فارمز پر 8 سے 10 جعلی اکاؤنٹس بنا رکھے تھے۔پولیس کا کہنا ہے کہ ملزم کا مقصد خاتون اور اس کے خاندان کی ساکھ کو نقصان پہنچانا اور ذہنی اذیت دینا تھا۔

متاثرہ خاتون نے بعد ازاں احمد آباد سائبر کرائم ٹیم سے رابطہ کیا، جس کے بعد انسپکٹر ایم ایچ بھیتاریا کی سربراہی میں ٹیم نے ڈیجیٹل ٹریکنگ اور خفیہ معلومات کی مدد سے ملزم کو شمال مشرقی دہلی کے علاقے عثمان پور سے گرفتار کر لیا۔پولیس نے ملزم کے خلاف بھارتیہ نیائے سنہتا اور انفارمیشن ٹیکنالوجی ایکٹ کی متعلقہ دفعات کے تحت مقدمہ درج کر لیا ہے جبکہ مزید تحقیقات جاری ہیں۔