Blog

تہران: ایران نے خبردار کیا ہے کہ اگر متحدہ عرب امارات کے شہروں سے امریکی میزائل ایران کے خلاف داغے گئے تو ان مقامات کو براہ راست نشانہ بنایا جائے گا۔

ایرانی فوج کے مرکزی ہیڈکوارٹر خاتم الانبیاء سینٹرل ہیڈکوارٹر کے ترجمان ابراہیم ذوالفقاری نے کہا ہے کہ ایران اپنی خودمختاری اور علاقائی سالمیت کے دفاع کے لیے ایسے تمام مقامات کو ہدف بنانے کا حق محفوظ رکھتا ہے جہاں سے امریکی حملے کیے جا رہے ہیں۔ہفتہ کے روز جاری بیان میں ابراہیم ذوالفقاری نے الزام لگایا کہ امریکی فوج کو خطے میں اپنے اڈوں پر نقصانات اٹھانے کے بعد اب متحدہ عرب امارات کے شہروں میں موجود بندرگاہوں، ڈاکس اور خفیہ ٹھکانوں سے ایران کے علاقوں پر میزائل حملے کرنے پر مجبور ہونا پڑا ہے۔ ان کے مطابق ان حملوں کا ہدف جزیرہ ابو موسیٰ اور جزیرہ خارگ کے بعض حصے بنائے گئے۔

ایرانی ترجمان نے کہا کہ ایران واضح طور پر اماراتی قیادت کو آگاہ کر رہا ہے کہ اگر امریکی افواج اماراتی شہروں کو ایران کے خلاف کارروائیوں کے لیے استعمال کرتی رہیں تو ایران ان مقامات کو نشانہ بنانے کو اپنا جائز دفاعی حق سمجھتا ہے۔ انہوں نے دعویٰ کیا کہ امریکی فورسز شہری علاقوں میں بندرگاہوں، گودیوں اور پناہ گاہوں کو بطور لانچنگ پوائنٹ استعمال کر رہی ہیں۔ایران نے متحدہ عرب امارات کے شہریوں کو بھی متنبہ کرتے ہوئے کہا کہ وہ اپنی حفاظت کے لیے بندرگاہوں، ڈاکس اور ان علاقوں سے دور رہیں جہاں امریکی افواج کی موجودگی یا سرگرمیوں کی اطلاعات ہیں تاکہ ممکنہ جوابی کارروائی کے دوران کسی جانی نقصان سے بچا جا سکے۔

امریکی صدر ڈونلڈ ٹرمپ کو ان کے مشیر جنگ ختم کرنے کا مشورہ دینے لگے۔

امریکی اخبار فنانشل ٹائمز کے مطابق ٹرمپ کے مشیروں نے مشورہ دیا ہے کہ فتح کا اعلان کریں اور جنگ سے نکل جائیں۔رپورٹ کے مطابق ٹرمپ انتظامیہ میں ایران جنگ کے حوالے سے سخت تشویش پائی جاتی ہے۔ حکام نے خدشہ ظاہر کیا ہے کہ طویل جنگ مہنگی ثابت ہوسکتی ہے۔

دوسری جانب امریکی سینٹرل کمانڈ نے طیارہ بردار بحری جہاز یو ایس ایس ابراہم لنکن غیر فعال ہونے کی تردید کردی۔سینٹ کام سے جاری بیان میں کہا گیا ہے کہ پاسداران انقلاب بحری بیڑے کو ناکارہ بنانے کا دعویٰ کررہے ہیں، اس سے پہلے بھی وہ اس جہاز کو تباہ کرنے کا دعویٰ کرچکے ہیں، یہ دعویٰ غلط ہے۔سینٹ کام کا کہنا ہے کہ ابراہم لنکن کیریئر اسٹرائیک گروپ اب بھی ایران کے خلاف فعال ہے۔ سینٹ کام نے بحری جہاز پر طیاروں کی آمد و رفت کی ویڈیو بھی جاری کردی۔

علاوہ ازیں یورپ کو تیل اور گیس کی شدید قلت کا سامنا ہے، فرانس اور اٹلی نے آبنائے ہرمز سے محفوظ راستے کے حصول کیلئے ایران سے مذاکرات شروع کردیے۔فنانشل ٹائمز کی رپورٹ کے مطابق دونوں ملک مشرق وسطیٰ سے تیل اور گیس درآمد کرنا چاہتے ہیں اور اپنے ٹینکرز کو بحفاظت آبنائے ہرمز سے گزارنے کیلئے ایران سے بات چیت کررہے ہیں۔

خلیجی ممالک کو امریکہ اور اسرائیل کی ایران کے خلاف جنگ کے آغاز سے اب تک توانائی کی آمدنی میں تقریباً 15.1 ارب ڈالر کا نقصان ہوا ہے۔ فنانشل ٹائمز کی رپورٹ کے مطابق، ہرمز آبنائے کی تقریباً مکمل بندش کی وجہ سے لاکھوں بیرل خام تیل عالمی منڈیوں تک پہنچنے سے محروم ہو گئے ہیں، جس سے روزانہ تقریباً 1.2 ارب ڈالر مالیت کی تیل، ریفائنڈ پروڈکٹس اور مائع قدرتی گیس کی برآمدات متاثر ہوئی ہیں۔ سعودی عرب، جو دنیا کا سب سے بڑا تیل برآمد کنندہ ہے، کو سب سے زیادہ نقصان پہنچا ہے اور اسے تقریباً 4.5 ارب ڈالر کا خسارہ ہوا ہے، جبکہ عراق جیسے ممالک میں جہاں حکومتی آمدنی کا 90 فیصد تیل پر منحصر ہے، معاشی دباؤ شدید ہے۔یہ اعداد و شمار تجزیاتی فرموں Wood Mackenzie اور Kpler کی تحقیق پر مبنی ہیں، جو بتاتے ہیں کہ خلیجی ممالک (سعودی عرب، عراق، متحدہ عرب امارات، کویت اور بحرین) کو مجموعی طور پر تیل کی فروخت اور ٹیکس آمدنی میں 13.3 ارب ڈالر کا تاخیر سے ادائیگی کا سامنا ہے۔ سعودی عرب بحر احمر کے راستے برآمدات بڑھانے کی منصوبہ بندی کر رہا ہے، جبکہ دیگر ممالک جیسے قطر اور کویت اپنے sovereign wealth funds سے مختصر مدت کے اثرات کو کم کرنے کی کوشش کر رہے ہیں۔ یہ جنگ خلیجی ریاستوں کے لیے معاشی طور پر انتہائی مہنگی ثابت ہو رہی ہے، جو توانائی کی برآمدات پر انحصار کر کے اپنی حکومتیں چلاتی ہیں۔