عید کے روز بھی سیاسی سوال کریں گے تو محبت کیسے بڑھے گی،مرتضیٰ وہاب

میئر کراچی مرتضیٰ وہاب نے کہا ہے کہ عیدالاضحیٰ کراچی کی انتظامیہ کے لیے ایک بڑا چیلنج ہوتی ہے اور اس دوران پانچ روز تک تمام بلدیاتی ادارے متحرک رہتے ہیں۔

پولو گراؤنڈ میں نمازِ عیدالاضحیٰ کی ادائیگی کے بعد میڈیا سے گفتگو کرتے ہوئے میئر کراچی نے تمام مسلمانوں کو عید کی مبارکباد پیش کی۔انہوں نے کہا کہ ملک بھر کی طرح کراچی میں بھی عیدالاضحیٰ مذہبی جوش و جذبے سے منائی جا رہی ہے جبکہ شہریوں کو صاف ستھرا ماحول فراہم کرنے کے لیے خصوصی انتظامات کیے گئے ہیں۔مرتضیٰ وہاب کے مطابق شہر میں تین مقامات قائم کیے گئے ہیں جہاں قربانی کے جانوروں کی آلائشوں کو ٹھکانے لگایا جا رہا ہے۔ انہوں نے بتایا کہ گزشتہ سال 98 ٹن آلائشیں تلف کی گئی تھیں جبکہ اس سال اس سے بھی زیادہ مقدار متوقع ہے۔ ان کا کہنا تھا کہ آلائشوں کو ٹھکانے لگانا سالڈ ویسٹ بورڈ کی ذمہ داری ہے۔

میئر کراچی نے شہریوں سے اپیل کی کہ اگر کسی علاقے سے آلائشیں بروقت نہ اٹھائی جائیں تو وہ 1128 ہیلپ لائن پر شکایت درج کروائیں تاکہ فوری کارروائی کی جا سکے۔ایک صحافی کے سیاسی سوال پر مرتضیٰ وہاب نے مسکراتے ہوئے کہا کہ “عید کے روز بھی سیاسی سوال کریں گے تو محبت کیسے بڑھے گی؟”انہوں نے مزید کہا کہ وہ فاروق ستار اور علی خورشیدی کی باتوں کا جواب دیتے رہتے ہیں، تاہم آج کے دن ان دونوں کو اپنی جانب سے عید مبارک دیتے ہیں اور دعا ہے کہ “دو کلیجیاں زیادہ کھائیں۔”