ملک بھر میں عیدالاضحیٰ مذہبی جوش و جذبے کے ساتھ منائی جا رہی ہے جبکہ مختلف شہروں میں سنتِ ابراہیمی کی ادائیگی کا سلسلہ بھی جاری ہے، تاہم وفاقی دارالحکومت اسلام آباد میں صفائی ستھرائی کے ناقص انتظامات نے شہریوں کو پریشانی میں مبتلا کر دیا۔
اسلام آباد کے مختلف علاقوں، خصوصاً سیکٹر جی سکس میں جگہ جگہ قربانی کے جانوروں کی آلائشوں کے ڈھیر دیکھنے میں آئے۔ کئی مقامات پر سی ڈی اے کا عملہ آلائشیں اٹھانے کے لیے بروقت نہ پہنچ سکا جس کے باعث صورتحال مزید خراب ہو گئی۔شدید گرمی اور تیز دھوپ کے باعث آلائشوں سے اٹھنے والے تعفن نے شہریوں کا جینا دوبھر کر دیا۔ رہائشی علاقوں، گلی محلوں اور سڑکوں کے کنارے پڑی آلائشوں سے بدبو پھیلنے کے باعث مکینوں نے انتظامیہ سے فوری کارروائی کا مطالبہ کیا ہے۔
شہریوں کا کہنا ہے کہ عید کے موقع پر صفائی کے خصوصی انتظامات کے دعوے کیے گئے تھے، تاہم کئی علاقوں میں عملی صورتحال مختلف نظر آ رہی ہے۔ انہوں نے متعلقہ اداروں سے مطالبہ کیا کہ آلائشوں کو فوری طور پر ٹھکانے لگا کر جراثیم کش اسپرے بھی کیا جائے تاکہ بیماریوں کے پھیلاؤ سے بچا جا سکے۔