Blog


لبنان پر اسرائیلی حملوں کے نتیجے میں جاں بحق افراد کی تعداد بڑھ کر 394 ہو گئی ہے جن میں 83 بچے بھی شامل ہیں۔
لبنانی حکام کے مطابق حملوں میں ایک ہزار 130 افراد زخمی بھی ہوئے ہیں جنہیں مختلف اسپتالوں میں طبی امداد فراہم کی جا رہی ہے۔
‎حکام کا کہنا ہے کہ اسرائیلی فضائی حملوں کے باعث متعدد رہائشی علاقوں کو شدید نقصان پہنچا ہے جبکہ امدادی ٹیمیں متاثرہ علاقوں میں امدادی کارروائیاں جاری رکھے ہوئے ہیں۔
‎لبنانی حکام نے عالمی برادری سے مطالبہ کیا ہے کہ وہ شہری آبادی کو نشانہ بنانے کے واقعات کا نوٹس لے اور خطے میں بڑھتی ہوئی کشیدگی کو کم کرنے کے لیے کردار ادا کرے۔


دفاعی چیمپئن بھارت نے ٹی ٹوئنٹی ورلڈ کپ 2026 کا ٹائٹل جیت لیا اور فائنل میں نیوزی لینڈ کو شکست دے کر تاریخ رقم کر دی۔
بھارتی ٹیم نے مسلسل دوسری جبکہ مجموعی طور پر تیسری بار ٹی ٹوئنٹی ورلڈ کپ اپنے نام کیا۔ اس کے ساتھ ہی بھارت ہوم گراؤنڈ پر یہ ٹائٹل جیتنے والی پہلی ٹیم بھی بن گیا۔
‎فائنل میں بھارت کے 256 رنز کے ہدف کے تعاقب میں نیوزی لینڈ کی ٹیم 159 رنز پر آؤٹ ہو گئی اور بھارت نے میچ 96 رنز سے جیت لیا۔
‎نیوزی لینڈ کی جانب سے ٹم سائفرٹ نے 52 اور مچل سینٹنر نے 43 رنز بنائے جبکہ دیگر بلے باز نمایاں کارکردگی نہ دکھا سکے۔
‎بھارت کی جانب سے جسپریت بمرا نے شاندار بولنگ کرتے ہوئے 4 وکٹیں حاصل کیں جبکہ اکشر پٹیل نے 3 اور ورون چکرورتی اور ہاردک پانڈیا نے ایک ایک کھلاڑی کو آؤٹ کیا۔
‎اس سے قبل بھارت نے پہلے بیٹنگ کرتے ہوئے مقررہ اوورز میں 5 وکٹوں کے نقصان پر 255 رنز بنائے تھے جس میں سنجو سیمسن نے 89 رنز کی نمایاں اننگ کھیلی۔


ایران کی جانب سے اسرائیل اور خطے میں موجود امریکی تنصیبات پر میزائل اور ڈرون حملوں کی نئی لہر داغی گئی ہے۔
ایرانی پاسداران انقلاب کے مطابق آپریشن وعدہ صادق کی اٹھائیسویں لہر کے تحت تل ابیب، حیفا اور یروشلم کو میزائلوں اور ڈرونز سے نشانہ بنایا گیا۔
‎رپورٹس کے مطابق حملوں کے نتیجے میں متعدد اسرائیلی زخمی ہوئے جبکہ کئی عمارتوں کو نقصان پہنچا۔
‎دوسری جانب مشرق وسطیٰ میں بھی امریکی تنصیبات کو نشانہ بنایا گیا۔ اطلاعات کے مطابق عراق کے شہر اربیل میں امریکی فوجی اڈے اور کویت میں عریفجان بیس پر حملے کیے گئے جہاں دو کویتی فوجیوں کی ہلاکت کی اطلاع ہے۔
‎ادھر متحدہ عرب امارات نے دعویٰ کیا ہے کہ اس کے فضائی دفاعی نظام نے ایران کی جانب سے داغے گئے 16 بیلسٹک میزائل اور 117 ڈرونز کو فضا میں تباہ کر دیا۔


وفاقی وزیر اطلاعات عطا تارڑ نے کہا ہے کہ پاکستان نے افغانستان کے اندر جاری آپریشن ’غضب للحق‘ کے دوران اب تک 583 افغان طالبان کو ہلاک جبکہ 795 سے زائد کو زخمی کر دیا ہے۔
اتوار کو سوشل میڈیا پر جاری بیان میں عطا تارڑ نے بتایا کہ آپریشن کے دوران پاکستان کی کارروائیوں میں بڑی تعداد میں طالبان جنگجوؤں کو نشانہ بنایا گیا۔
‎انہوں نے کہا کہ اس آپریشن کے دوران 242 چیک پوسٹیں تباہ کی گئیں جبکہ 38 چیک پوسٹوں پر قبضہ کر کے انہیں بھی مسمار کر دیا گیا۔
‎وزیر اطلاعات کے مطابق کارروائیوں میں 213 ٹینک اور بکتر بند گاڑیاں تباہ کی گئیں جبکہ افغانستان میں 64 مختلف مقامات کو فضائی حملوں میں نشانہ بنایا گیا۔
‎واضح رہے کہ پاکستان اور افغانستان کے درمیان سرحدی جھڑپیں 26 فروری کو اس وقت شروع ہوئیں جب افغان فورسز نے سرحد کے قریب پاکستانی فوجی تنصیبات پر حملہ کیا۔ افغانستان کا مؤقف ہے کہ یہ کارروائی پاکستان کی جانب سے افغانستان میں عسکریت پسندوں کے مبینہ کیمپوں پر فضائی حملوں کے ردعمل میں کی گئی تھی۔


ٹی 20 ورلڈ کپ کے فائنل میں بھارت نے نیوزی لینڈ کو جیت کے لیے 256 رنز کا بڑا ہدف دے دیا ہے۔
احمد آباد کے کرکٹ اسٹیڈیم میں کھیلے جا رہے فائنل میچ میں بھارتی ٹیم نے پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 255 رنز اسکور کیے۔
‎بھارت کی جانب سے سنجو سیمسن نے شاندار بیٹنگ کرتے ہوئے 89 رنز بنائے جبکہ ایشان کشن نے 54 اور ابھیشیک شرما نے 52 رنز کی اہم اننگز کھیلی۔
‎دیگر کھلاڑیوں میں ہاردک پانڈیا نے 18 اور تلک ورما نے 8 رنز اسکور کیے جبکہ شیوَم دوبے نے صرف 8 گیندوں پر جارحانہ انداز میں 26 رنز بنائے۔
‎نیوزی لینڈ کی جانب سے جیمی نیشم سب سے کامیاب بولر رہے جنہوں نے 3 کھلاڑیوں کو آؤٹ کیا۔


امریکی صدر ڈونلڈ ٹرمپ نے کہا ہے کہ ایران کے ساتھ جاری جنگ میں امریکا کو برطانیہ کے طیارہ بردار بحری جہازوں کی ضرورت نہیں ہے۔
سوشل میڈیا پر جاری بیان میں ٹرمپ نے کہا کہ امریکا مشرق وسطیٰ میں اپنی فوجی صلاحیت کے ساتھ کارروائی کرنے کی مکمل اہلیت رکھتا ہے اور اسے برطانیہ کی اضافی فوجی مدد درکار نہیں۔
‎یہ بیان برطانوی وزارت دفاع کے اس اعلان کے بعد سامنے آیا جس میں کہا گیا تھا کہ برطانیہ اپنے دو بڑے طیارہ بردار بحری جہازوں میں سے ایک ایچ ایم ایس پرنس آف ویلز کو ہائی الرٹ پر رکھ رہا ہے۔
‎ٹرمپ نے اپنی پوسٹ میں لکھا کہ برطانیہ، جو کبھی امریکا کا عظیم اتحادی تھا، اب مشرق وسطیٰ میں دو طیارہ بردار بحری جہاز بھیجنے پر غور کر رہا ہے۔ انہوں نے کہا کہ اگرچہ یہ اقدام ٹھیک ہے مگر امریکا کو اس کی ضرورت نہیں۔
‎امریکی صدر نے مزید کہا کہ امریکا کو ایسے اتحادیوں کی ضرورت نہیں جو جنگ کے اختتام کے بعد اس میں شامل ہونے کی کوشش کریں۔
‎سیاسی مبصرین کے مطابق ٹرمپ کے اس بیان سے امریکا اور برطانیہ کے تعلقات میں بڑھتی ہوئی کشیدگی کی جھلک ملتی ہے جو ٹرمپ کے دوبارہ اقتدار میں آنے کے بعد سے نمایاں ہوئی ہے۔

‎سعودی عرب نے پہلی بار ایران کو خبردار کیا ہے کہ اگر حملے جاری رہے تو ریاض جوابی کارروائی کرنے پر مجبور ہو سکتا ہے۔
‎برطانوی خبر ایجنسی کے مطابق ذرائع کا کہنا ہے کہ سعودی عرب نے تہران کو پیغام دیا ہے کہ اگر ایران کے حملے جاری رہے تو سعودی حکومت امریکا کو اپنے فوجی اڈے ایران کے خلاف استعمال کرنے کی اجازت دے سکتی ہے۔
‎رپورٹ کے مطابق خلیجی ممالک نے اب تک ایران پر حملوں کے لیے امریکا کو اپنی فضائی حدود استعمال کرنے کی اجازت نہیں دی۔
‎ادھر قطر کے امیر نے بھی امریکی صدر سے رابطہ کیا اور واضح کیا کہ قطر اپنی قومی سلامتی کے تحفظ کے لیے ضروری اقدامات کرنے سے نہیں ہچکچائے گا۔
‎متحدہ عرب امارات کے صدر محمد بن زاید النہیان نے بھی سخت بیان دیتے ہوئے کہا کہ یو اے ای آسان ہدف نہیں اور اپنے ملک کے دفاع میں کسی قسم کی کوتاہی نہیں کی جائے گی۔
‎دوسری جانب ایران کا مؤقف ہے کہ اس کے حملوں کا ہدف خلیجی ممالک نہیں بلکہ خطے میں موجود امریکی مفادات ہیں اور اس نے مطالبہ کیا ہے کہ خطے میں امریکی فوجی موجودگی ختم کی جائے۔


انسانی حقوق کی عالمی تنظیم ہیومن رائٹس واچ نے جنوبی ایران میں ایک اسکول پر ہونے والے حملے کو ممکنہ جنگی جرم قرار دیتے ہوئے اس کی فوری اور مکمل تحقیقات کا مطالبہ کیا ہے۔
تنظیم کے مطابق 28 فروری 2026 کو صوبہ ہرمزگان کے شہر مناب میں واقع شجرہ طیبہ پرائمری اسکول کو نشانہ بنایا گیا جس کے نتیجے میں تقریباً ڈیڑھ سو بچوں سمیت مجموعی طور پر 160 افراد جان سے گئے۔
‎یہ حملہ اس وقت ہوا جب ایران کے مختلف علاقوں میں امریکا اور اسرائیل کی جانب سے فضائی حملوں کی لہر جاری تھی۔ تاہم امریکا اور اسرائیل نے اس حملے کی ذمہ داری قبول نہیں کی جبکہ اسرائیلی فوج کے ترجمان نے کہا کہ انہیں اس علاقے میں کسی کارروائی کا علم نہیں۔
‎ہیومن رائٹس واچ کے مطابق اسکول پاسداران انقلاب کی بحریہ کے ایک کمپاؤنڈ کے قریب واقع ہے لیکن معلومات سے ظاہر ہوتا ہے کہ اسکول اس کمپاؤنڈ سے الگ تھا اور اس کا اپنا داخلی راستہ تھا۔
‎تنظیم کی ڈیجیٹل انویسٹیگیشنز لیب کی محقق صوفیہ جونز نے کہا کہ حملے کے انداز سے ظاہر ہوتا ہے کہ عمارتوں کو درست نشانے والے گائیڈڈ ہتھیاروں سے نشانہ بنایا گیا۔ ان کے مطابق ضروری ہے کہ تحقیقات میں یہ معلوم کیا جائے کہ حملہ کرنے والوں کو کیا اس بات کا علم تھا کہ اس عمارت میں اسکول موجود ہے اور وہاں بچے اور اساتذہ موجود ہوں گے۔
‎ہیومن رائٹس واچ نے مطالبہ کیا ہے کہ اگر حملہ غیر قانونی ثابت ہو تو اس کے ذمہ دار افراد کے خلاف جنگی جرائم کے تحت کارروائی کی جائے۔


ناروے کے دارالحکومت اوسلو میں امریکی سفارت خانے کے قریب ایک زور دار دھماکے کی اطلاع ملی ہے جس کے بعد علاقے میں خوف و ہراس پھیل گیا۔
ناروے پولیس کے مطابق دھماکے کے نتیجے میں قریبی عمارت کے داخلی دروازے کو معمولی نقصان پہنچا ہے تاہم کسی جانی نقصان کی اطلاع نہیں ملی۔
‎رپورٹس کے مطابق واقعے کے فوراً بعد پولیس نے علاقے کو گھیرے میں لے کر بڑے پیمانے پر تفتیش شروع کر دی ہے۔ ملزمان کی تلاش کے لیے ڈرونز اور ہیلی کاپٹروں کی مدد سے سرچ آپریشن جاری ہے۔
‎پولیس حکام کا کہنا ہے کہ وہ امریکی سفارت خانے کے حکام کے ساتھ مسلسل رابطے میں ہیں اور واقعے کے تمام پہلوؤں کا جائزہ لیا جا رہا ہے۔ اب تک کسی گروپ نے دھماکے کی ذمہ داری قبول نہیں کی۔
‎میڈیا رپورٹس کے مطابق دھماکا سفارت خانے کی عمارت کے عوامی داخلی دروازے کے قریب ہوا جس سے معمولی نقصان ہوا۔ پولیس کارروائی کی قیادت کرنے والے افسر مائیکل ڈیلمیر نے ناروے کے سرکاری نشریاتی ادارے کو بتایا کہ تحقیقات جاری ہیں۔
‎واضح رہے کہ امریکی سفارت خانہ اوسلو کے ضلع مورگیڈالس ویگن میں واقع ہے جو شہر کے مرکز سے تقریباً سات کلومیٹر دور ہے۔


ایرانی پاسدارانِ انقلاب نے دعویٰ کیا ہے کہ ایران موجودہ شدت کے ساتھ کم از کم چھ ماہ تک جنگ جاری رکھنے کی صلاحیت رکھتا ہے۔
یہ بیان ایسے وقت میں سامنے آیا ہے جب امریکا اور اسرائیل کی مشترکہ فوجی کارروائیاں ایران کے خلاف جاری ہیں جبکہ ایران خطے میں میزائل اور ڈرون حملوں کے ذریعے جوابی کارروائیاں کر رہا ہے۔
‎ایرانی حکام کے مطابق ملک کی دفاعی حکمت عملی کا بڑا حصہ بیلسٹک میزائل اور ڈرون پروگرام پر مشتمل ہے جس کے ذریعے طویل عرصے تک دباؤ برقرار رکھا جا سکتا ہے۔
‎بین الاقوامی رپورٹس کے مطابق ایران کے پاس ہزاروں بیلسٹک میزائل موجود ہیں اور ملک ہر ماہ بڑی تعداد میں ڈرون تیار کرنے کی صلاحیت بھی رکھتا ہے۔
ماہرین کا کہنا ہے کہ ایران کی جنگی حکمت عملی براہ راست فیصلہ کن جنگ کے بجائے طویل المدتی دباؤ اور مخالفین کو تھکا دینے والی حکمت عملی پر مبنی ہے جس میں میزائل حملے، ڈرونز، سمندری راستوں پر دباؤ اور خطے میں اتحادی گروہوں کا استعمال شامل ہے۔