اسلام آباد میں آئی ایم ایف اور پاکستان کے درمیان آئندہ مالی سال 2026-27 کے بجٹ سے متعلق مذاکرات جاری ہیں، جبکہ عالمی مالیاتی ادارے نے پاکستان پر ٹیکس نیٹ بڑھانے اور ٹیکس وصولی کے نظام کو مزید مؤثر بنانے پر زور دیا ہے۔
ذرائع وزارت خزانہ کے مطابق آئی ایم ایف وفد کے ساتھ بجٹ مذاکرات اب ورچوئل انداز میں جاری رہیں گے۔ حکام کا کہنا ہے کہ کل سے ہونے والے مذاکرات میں نئے مالی سال کے اہم معاشی اہداف اور مالیاتی پالیسیوں کو حتمی شکل دی جائے گی۔
آئی ایم ایف کی جانب سے اس بات پر زور دیا گیا ہے کہ مہنگائی کو قابو میں رکھنے کے لیے اسٹیٹ بینک سخت مانیٹری پالیسی برقرار رکھے۔ اعلامیے میں کہا گیا کہ مذاکرات کے دوران توانائی کے شعبے، سرکاری اداروں میں اصلاحات اور مالیاتی نظم و ضبط پر پیشرفت کا جائزہ لیا گیا۔
ذرائع کے مطابق کلائمٹ فنڈنگ، پاور سبسڈی اصلاحات اور قدرتی آفات سے نمٹنے کے فریم ورک پر بھی تفصیلی بات چیت ہوئی۔ اس کے علاوہ مشرقِ وسطیٰ میں جاری کشیدگی کے پاکستان کی معیشت پر ممکنہ اثرات بھی زیر غور آئے۔
آئی ایم ایف نے پاکستان سے آئندہ تین سال کے لیے میکرو اکنامک فریم ورک طلب کر لیا ہے، جبکہ اگلی قرض قسط کے لیے مالیاتی اہداف پر سختی سے عمل درآمد کی شرط بھی رکھی گئی ہے۔
اعلامیے کے مطابق پاکستان نے 2027 تک جی ڈی پی کے 2 فیصد بنیادی سرپلس ہدف کو برقرار رکھنے کے عزم کا اعادہ کیا ہے۔ حکام نے توانائی کی قیمتوں میں اضافے کے اثرات پر مسلسل نظر رکھنے کا فیصلہ بھی کیا ہے۔
ذرائع کا کہنا ہے کہ آئی ایم ایف کا اگلا جائزہ مشن 2026 کے دوسرے نصف میں پاکستان کا دورہ کرے گا، جہاں معاشی اصلاحات اور بجٹ اہداف پر پیشرفت کا جائزہ لیا جائے گا۔
آئی ایم ایف کا پاکستان پر ٹیکس نیٹ بڑھانے پر زور
