Blog

مشرقِ وسطیٰ میں جاری کشیدگی نے ایک بار پھر شدت اختیار کرلی ہے جہاں ایران، اسرائیل اور امریکا کے درمیان بڑھتی ہوئی محاذ آرائی کے باعث خطے کی صورتحال نہایت سنگین ہوتی جا رہی ہے۔

مختلف ذرائع سے موصول ہونے والی اطلاعات کے مطابق میزائل حملوں، فضائی کارروائیوں کے باعث کئی ممالک براہ راست اس تنازع کے اثرات سے متاثر ہو رہے ہیں۔امریکی خبر رساں ویب سائٹ ے مطابق امریکی وزیر خارجہ مارکو روبیو نے عرب ممالک کے وزرائے خارجہ کو آگاہ کیا ہے کہ امریکا کا مقصد ایران میں حکومت کی تبدیلی نہیں بلکہ خطے میں کشیدگی کو محدود رکھنا ہے۔ اس بیان کو سفارتی سطح پر ایک اہم اشارہ قرار دیا جا رہا ہے کیونکہ حالیہ دنوں میں ایران اور امریکا کے درمیان کشیدگی مسلسل بڑھ رہی ہے۔

دوسری جانب اسرائیلی اخبار کے مطابق جنوبی لبنان میں جھڑپوں کے دوران حزب اللہ کی جانب سے فائرنگ کے نتیجے میں اسرائیلی فوج کی گیواتی بریگیڈ کے متعدد اہلکار شدید زخمی ہو گئے جنہیں فوری طور پر طبی امداد کے لیے منتقل کیا گیا۔اسی دوران اسرائیلی فضائیہ نے لبنان کے دارالحکومت بیروت کے جنوبی مضافاتی علاقوں پر ایک اور فضائی حملہ کیا ہے۔ بیروت کے جنوبی علاقے حزب اللہ کے مضبوط گڑھ سمجھے جاتے ہیں اور ماضی میں بھی اسرائیل یہاں متعدد فضائی کارروائیاں کر چکا ہے۔

اطلاعات کے مطابق ایران کی جانب سے میزائل حملوں کی ایک نئی لہر بھی شروع ہو چکی ہے۔ اس بار اسرائیل میں حملوں سے قبل صرف چار منٹ کی پیشگی وارننگ دی گئی جبکہ اس سے پہلے عموماً سات سے آٹھ منٹ کا وقت ملتا تھا۔ تل ابیب میں خطرے کے سائرن بجنے کی اطلاعات بھی موصول ہوئی ہیں تاہم فوری طور پر کسی بڑے نقصان کی تصدیق نہیں ہو سکی۔ایران کے مرکزی فضائی دفاعی ہیڈکوارٹر خاتم الانبیاء کے ترجمان نے دعویٰ کیا ہے کہ دشمن کے ریڈار نظام تباہ ہونے کے بعد ایرانی مسلح افواج کو کارروائیوں میں زیادہ آزادی حاصل ہو گئی ہے اور حملوں کی کامیابی کی شرح میں اضافہ ہوا ہے۔

سعودی عرب میں امریکی اڈے کو نشانہ بنانے کا دعویٰ
رپورٹس کے مطابق ایک ایرانی بیلسٹک میزائل پرنس سلطان ایئربیس (سعودی عرب) پر جا گرا جس کے نتیجے میں وہاں موجود امریکی فوجیوں کے زخمی ہونے کی اطلاعات ہیں۔ سیٹلائٹ تصاویر میں اس اڈے پر امریکی فضائیہ کے متعدد ری فیولنگ طیاروں کی موجودگی بھی دیکھی گئی ہے۔مزید برآں سیٹلائٹ اور ڈرون تصاویر میں ایئر بیس کے قریب ایک ریڈار سائٹ سے دھواں اٹھتے ہوئے بھی دیکھا گیا ہے۔

متحدہ عرب امارات میں امریکی دفاعی اڈے پر حملہ
امریکی صحافی ریان گِرم کی جانب سے حاصل کی گئی تصاویر میں متحدہ عرب امارات میں قائم امریکی THAAD میزائل دفاعی نظام کے ایک اڈے پر ایرانی حملوں کے بعد کے مناظر دکھائے گئے ہیں۔ تاہم اس حملے کے نقصانات کے بارے میں مکمل تفصیلات ابھی سامنے نہیں آئی ہیں۔

ایران کی وزارتِ انٹیلیجنس نے ایک بیان میں کہا ہے کہ اس نے ایسے علیحدگی پسند گروپ کے خلاف کارروائی کی ہے جسے ایرانی حکام کے مطابق امریکا اور اسرائیل کی حمایت حاصل تھی۔ حکام کے مطابق یہ گروپ کئی ماہ سے ایران کے مغربی علاقوں میں بدامنی پھیلانے کی منصوبہ بندی کر رہا تھا۔

ذرائع کے مطابق اسرائیل اور متحدہ عرب امارات میں جنگ سے متعلق ویڈیوز اور تصاویر جاری کرنے پر سخت پابندیاں عائد کی جا رہی ہیں اور ایسی معلومات پھیلانے والوں کو قید کی سزاؤں کی دھمکیاں دی جا رہی ہیں۔ اس وجہ سے جنگ سے متعلق زیادہ تر ویڈیوز لبنان اور ایران سے سامنے آ رہی ہیں۔

جنگی صورتحال کے باعث عالمی معیشت بھی متاثر ہو رہی ہے۔ امریکی اسٹاک مارکیٹ میں تقریباً 2 فیصد کمی دیکھی گئی جبکہ تیل کی قیمتیں تیزی سے بڑھ رہی ہیں۔ برینٹ کروڈ آئل کی قیمت 93 ڈالر فی بیرل تک پہنچ گئی ہے جو 2023 کے بعد بلند ترین سطح قرار دی جا رہی ہے۔

سیکیورٹی تجزیہ کاروں کے مطابق موجودہ جنگ اور جون میں ہونے والی 12 روزہ جنگ کے درمیان ایک بڑا فرق یہ بتایا جا رہا ہے کہ ایران کے اندر اسرائیلی خفیہ ایجنسی موساد کے نیٹ ورک کی سرگرمیاں اس بار نہایت محدود نظر آ رہی ہیں۔ بعض رپورٹس کے مطابق گزشتہ مہینوں میں موساد کے متعدد خفیہ سیلز کو نقصان پہنچا ہے۔


ایرانی ہلال احمر نے ایران میں امریکی اور اسرائیلی حملوں سے ہونے والے نقصانات سے متعلق تفصیلات جاری کر دی ہیں۔
ہلال احمر کے مطابق اب تک ایران پر مجموعی طور پر 1332 حملے کیے گئے جن میں 636 مختلف مقامات کو نشانہ بنایا گیا۔
‎رپورٹ کے مطابق ان حملوں کے نتیجے میں 21 امدادی اور طبی مراکز کو شدید نقصان پہنچا جبکہ 24 اسپتال بھی متاثر ہوئے ہیں۔ اس کے علاوہ 3090 رہائشی مکانات تباہ یا شدید متاثر ہوئے۔
‎ایرانی ہلال احمر کا کہنا ہے کہ فضائی حملوں کے باعث 528 تجارتی مراکز اور سروس سینٹرز کو بھی نقصان پہنچا ہے۔
‎رپورٹ کے مطابق ہلال احمر کے 9 مراکز بھی امریکی اور اسرائیلی حملوں کی زد میں آئے ہیں جس سے امدادی سرگرمیوں کو مشکلات کا سامنا کرنا پڑ رہا ہے۔


حکومت نے مشرق وسطیٰ میں بڑھتی ہوئی کشیدگی کے باعث پیٹرولیم مصنوعات کی قیمتوں میں بڑا اضافہ کر دیا ہے۔
نائب وزیراعظم اسحاق ڈار، وزیر خزانہ محمد اورنگزیب اور وزیر پیٹرولیم علی پرویز ملک نے مشترکہ پریس کانفرنس میں اعلان کیا کہ پیٹرول اور ڈیزل کی قیمت میں فی لیٹر 55 روپے اضافہ کیا گیا ہے۔
‎اعلان کے مطابق اضافے کے بعد پیٹرول کی نئی قیمت 321 روپے 17 پیسے فی لیٹر جبکہ ڈیزل کی قیمت 335 روپے 86 پیسے فی لیٹر مقرر کر دی گئی ہے۔
‎نائب وزیراعظم اسحاق ڈار نے کہا کہ خطے میں جنگی صورتحال کے باعث عالمی سطح پر پیٹرولیم مصنوعات کی قیمتیں تیزی سے بڑھ رہی ہیں۔ انہوں نے بتایا کہ وزیراعظم شہباز شریف نے اس صورتحال پر خصوصی اجلاس کی صدارت کی جس میں قیمتوں کے تعین سے متعلق مختلف پہلوؤں کا جائزہ لیا گیا۔
‎اسحاق ڈار کا کہنا تھا کہ حکومت نے صورتحال کو متوازن رکھنے کے لیے فیصلہ کیا ہے اور پاکستان کشیدگی کم کرانے کے لیے مختلف ممالک کے ساتھ سفارتی رابطے بھی کر رہا ہے۔
انہوں نے مزید کہا کہ وزیراعظم اور عسکری قیادت بھی دیگر ممالک کے رہنماؤں سے رابطے میں ہیں تاکہ خطے میں کشیدگی کو کم کیا جا سکے۔


متحدہ عرب امارات کی وزارت دفاع نے کہا ہے کہ یو اے ای کے فضائی دفاعی نظام نے آج 9 بیلسٹک میزائل کامیابی سے تباہ کر دیے۔
وزارت دفاع کے مطابق ایئر ڈیفنس سسٹم نے 112 ڈرونز کی نشاندہی کی جن میں سے 109 کو فضا میں ہی تباہ کر دیا گیا جبکہ تین ڈرون مختلف مقامات پر گرے تاہم کسی بڑے نقصان کی اطلاع نہیں ملی۔
‎حکام کا کہنا ہے کہ ایرانی حملوں کے آغاز سے اب تک یو اے ای پر مجموعی طور پر 205 بیلسٹک میزائل داغے گئے جن میں سے 190 کو فضائی دفاعی نظام نے فضا میں ہی تباہ کر دیا۔
‎وزارت دفاع کے مطابق 13 بیلسٹک میزائل سمندر میں گرے جبکہ 2 میزائل یو اے ای کی حدود میں گرے۔ اسی طرح 1184 ایرانی ڈرونز میں سے 1110 ڈرونز کو بھی فضاء میں تباہ کیا جا چکا ہے۔
‎حکام نے بتایا کہ 8 کروز میزائل بھی تباہ کیے گئے ہیں اور یو اے ای کا دفاعی نظام کسی بھی ممکنہ خطرے سے نمٹنے کے لیے مکمل طور پر تیار ہے۔


امریکی اخبار واشنگٹن پوسٹ نے دعویٰ کیا ہے کہ روس مشرق وسطیٰ میں ایران کو امریکی فوجی اہداف کے بارے میں انٹیلی جنس فراہم کر رہا ہے۔
رپورٹ کے مطابق امریکی انٹیلی جنس کے تین قریبی ذرائع نے اس بات کی تصدیق کی ہے کہ روس خطے میں موجود امریکی بحری جہازوں اور طیاروں کی لوکیشن سے متعلق معلومات ایران تک پہنچا رہا ہے۔
‎اخبار کے مطابق ایران نے حالیہ حملوں میں امریکی ریڈارز اور دیگر تنصیبات کو درست نشانہ بنایا ہے جبکہ کئی مواقع پر ایرانی حملے امریکا اور اسرائیل کے دفاعی نظام پر بھی بھاری پڑے۔
‎رپورٹ میں یہ بھی کہا گیا ہے کہ ایران امریکی کمانڈ اینڈ کنٹرول مراکز کو خاص طور پر نشانہ بنا رہا ہے اور اس کے میزائل حملوں کی صلاحیت گزشتہ سال کے مقابلے میں بہتر ہوئی ہے۔
‎واشنگٹن پوسٹ کے مطابق امریکی فضائی دفاع کے لیے استعمال ہونے والے انٹرسیپٹر میزائل بھی تیزی سے کم ہو رہے ہیں جس سے امریکی دفاعی حکمت عملی پر دباؤ بڑھ سکتا ہے۔


ہالی ووڈ اداکار کیانو ریوز کے ساتھ ایک کنسرٹ کے بعد پیش آنے والا عجیب واقعہ سامنے آیا ہے جس کا ذکر بینڈ کے رکن روب میل ہاؤس نے کیا۔
روب میل ہاؤس کے مطابق کنسرٹ کے بعد کیانو ریوز نے کہا کہ انہیں پانی کی بوتل اٹھا کر پھینکنے جانا ہے، تاہم اسی دوران کسی شخص نے بتایا کہ ایک لڑکی اس بوتل کو اٹھا کر لے گئی ہے۔ وہ بوتل جسے وہ پیشاب کرنے کیلئے استعمال کر رہے تھے۔
روب کا کہنا تھا کہ جب انہیں معلوم ہوا کہ ایک مداح وہ بوتل لے کر بھاگ گئی ہے تو سب حیران رہ گئے۔ انہوں نے اس واقعے کو بینڈ کے سفر کے دوران پیش آنے والے عجیب ترین مداحانہ واقعات میں سے ایک قرار دیا۔


سوشل میڈیا پر پھیلائی جانے والی یہ خبر کہ سعودی عرب نے پاکستان کے لیے تمام امداد اور سرمایہ کاری فوری طور پر معطل کر دی ہے، فیکٹ چیک کے بعد جھوٹی قرار دی گئی ہے۔
رپورٹس کے مطابق اس دعوے کے ساتھ شیئر کی جانے والی ویڈیو دراصل جنوری 2023 کی پرانی ویڈیو ہے جس کا 2026 میں پاکستان اور سعودی عرب کے موجودہ تعلقات سے کوئی تعلق نہیں۔
‎حقیقت یہ ہے کہ پاکستان اور سعودی عرب کے درمیان تعلقات بدستور مضبوط اور فعال ہیں اور دونوں ممالک مختلف شعبوں میں تعاون جاری رکھے ہوئے ہیں۔
‎ماہرین کے مطابق یہ گمراہ کن مواد سوشل میڈیا پر بعض بھارتی پروپگینڈا اکاؤنٹس کی جانب سے پھیلایا جا رہا ہے تاکہ پاکستان اور سعودی عرب کے تعلقات کے بارے میں غلط تاثر پیدا کیا جا سکے۔


متحدہ عرب امارات کے دارالحکومت ابوظبی کے ائیرپورٹ سے آج سے محدود کمرشل پروازوں کا دوبارہ آغاز کیا جا رہا ہے۔
یو اے ای حکام کے مطابق سکیورٹی صورتحال کا جائزہ لینے اور متعلقہ اداروں سے مشاورت کے بعد 6 مارچ سے پروازیں مرحلہ وار بحال کرنے کا فیصلہ کیا گیا ہے۔ ابتدائی مرحلے میں ابوظبی کی ایک ائیرلائن چند اہم شہروں کے لیے محدود پروازیں چلائے گی۔
‎ائیرلائن حکام کا کہنا ہے کہ جن مسافروں کی پہلے سے بکنگ موجود ہے انہیں نئی پروازوں میں ایڈجسٹ کیا جائے گا جبکہ حالات میں بہتری آنے کے بعد مزید شہروں کے لیے بھی پروازیں بحال کی جائیں گی۔
‎حکام کے مطابق 28 فروری تک جاری کیے گئے ٹکٹ رکھنے والے مسافر بغیر کسی اضافی فیس کے اپنی بکنگ تبدیل کروا سکتے ہیں جبکہ 21 مارچ تک کی پروازوں کے مسافر ریفنڈ کے لیے بھی درخواست دے سکتے ہیں۔
‎ابوظبی ائیرپورٹ انتظامیہ نے مسافروں کو ہدایت کی ہے کہ تصدیق شدہ ٹکٹ یا ائیرلائن کی باقاعدہ اطلاع کے بغیر ائیرپورٹ آنے سے گریز کریں۔


ایران کی پارلیمنٹ کے اسپیکر ڈاکٹر محمد باقر قالیباف نے دعویٰ کیا ہے کہ امریکا کا طیارہ بردار بحری جہاز یو ایس ایس ابراہم لنکن میدان جنگ سے پیچھے ہٹ گیا ہے۔
عرب میڈیا رپورٹس کے مطابق ڈاکٹر محمد باقر قالیباف نے کہا کہ ایرانی میزائلوں اور ڈرونز کے ابتدائی حملوں کے بعد امریکی طیارہ بردار جہاز ابراہم لنکن کو پیچھے ہٹنا پڑا۔
‎انہوں نے کہا کہ جس بحری بیڑے کو امریکی اتحادیوں کے دفاع کے لیے تعینات کیا گیا تھا وہ خود اپنا دفاع بھی نہیں کر سکا۔
‎ایرانی پارلیمنٹ اسپیکر نے مزید کہا کہ امریکا کے اتحادیوں کو اپنی سلامتی کو ڈونلڈ ٹرمپ اور اسرائیلی وزیراعظم بنیامین نیتن یاہو کے بیانات پر قربان نہیں کرنا چاہیے۔