Blog

‎بھارت کی ریاست اتر پردیش کے ضلع مظفر نگر میں دو سگی بیٹیوں نے مبینہ طور پر اپنے والد کو قتل کردیا، جس کے بعد پولیس نے دونوں ملزمان کو گرفتار کرلیا۔
‎پولیس کے مطابق مورنا علاقے کے رہائشی 55 سالہ رام پرساد کی لاش پیر کی صبح گھر میں چارپائی پر خون میں لت پت حالت میں ملی۔ ابتدائی معائنے میں مقتول کی گردن اور جسم پر تیز دھار آلے سے متعدد وار کے نشانات پائے گئے۔
‎واقعے کی اطلاع اس وقت ملی جب مقتول کی اہلیہ چندرکلی نے صبح تقریباً سات بجے لاش دیکھ کر شور مچایا، جس پر اہلِ محلہ موقع پر جمع ہوگئے۔ اس وقت گھر میں بیوی، دو بیٹے امیت اور سمیت، اور دونوں بیٹیاں موجود تھیں۔
‎اطلاع ملنے پر پولیس اور فرانزک ٹیم موقع پر پہنچی، شواہد اکٹھے کیے گئے اور لاش کو پوسٹ مارٹم کے لیے منتقل کردیا گیا۔ دورانِ تفتیش اہلِ خانہ کے بیانات میں تضاد سامنے آیا جس کے بعد سب سے علیحدہ علیحدہ پوچھ گچھ کی گئی۔
‎پولیس کے مطابق 32 سالہ بڑی بیٹی کومل اور اس کی 16 سالہ چھوٹی بہن دورانِ تفتیش بار بار بیانات تبدیل کرتی رہیں۔ سخت پوچھ گچھ کے بعد دونوں نے مبینہ طور پر جرم کا اعتراف کرلیا۔
‎ابتدائی بیان میں بڑی بیٹی نے مؤقف اختیار کیا کہ والد بیٹوں اور بیٹیوں میں امتیاز کرتے تھے اور اس کی غیر شادی شدہ حیثیت پر مسلسل طعنے دیتے تھے۔ ملزمہ کے مطابق والد اکثر کہتے تھے کہ بیٹیوں کی وجہ سے خاندان کی بدنامی ہو رہی ہے، جس سے گھر میں کشیدگی بڑھتی گئی۔
‎پولیس کا کہنا ہے کہ مبینہ طور پر واقعے کی رات تقریباً دو بجے دونوں بہنوں نے سوئے ہوئے والد پر درانتی سے حملہ کیا جس کے نتیجے میں وہ موقع پر ہی دم توڑ گئے۔ واردات کے بعد دونوں اپنے کمرے میں واپس جا کر سو گئیں، تاہم تفتیش کے دوران شکوک بڑھنے پر حقیقت سامنے آگئی۔
‎پولیس نے ملزمان کے خلاف مقدمہ درج کر کے مزید تحقیقات شروع کر دی ہیں۔

فرانس میں کیوبا کے سفارت خانے نے سوشل میڈیا پر وائرل ہونے والی ایک ویڈیو کے ذریعے عالمی برادری کے رویوں پر سخت تنقید کرتے ہوئے کہا ہے کہ دنیا ہمدردی کے اظہار میں دوہرا معیار اختیار کر رہی ہے۔
‎سفارت خانے کی جانب سے سوشل میڈیا پلیٹ فارم ایکس پر جاری ویڈیو میں دو مختلف مناظر دکھائے گئے۔ ایک جانب جاپان کے چڑیا گھر میں موجود پنچ نامی ننھا بندر ہے جو ماں سے جدا ہونے کے بعد ایک کھلونے کو سینے سے لگائے بیٹھا ہے۔ اس ویڈیو نے دنیا بھر میں لوگوں کو جذباتی کر دیا اور سوشل میڈیا صارفین کی بڑی تعداد نے اس سے ہمدردی کا اظہار کیا۔
‎ویڈیو کے دوسرے حصے میں غزہ کی ایک کم سن بچی کو دکھایا گیا ہے جو اسرائیلی بمباری میں اپنا گھر تباہ ہونے اور اہل خانہ کو کھونے کے بعد ملبے کے درمیان اپنی گڑیا کو تھامے کھڑی ہے۔ یہ منظر جنگ کے انسانی المیے کی عکاسی کرتا ہے۔
‎کیوبا کے سفارت خانے نے اپنی پوسٹ میں لکھا کہ دنیا ایک بندر کے کھلونا گلے لگانے پر تو جذباتی ہو جاتی ہے، مگر اسی وقت غزہ میں ہزاروں ایسے بچے موجود ہیں جو جنگ کے باعث یتیم ہو چکے ہیں اور جن کے دکھ کو نظر انداز کیا جا رہا ہے۔ سفارت خانے نے اس رویے کو منتخب ہمدردی قرار دیتے ہوئے اسے شرمناک طرز عمل کہا۔
‎یہ پوسٹ سوشل میڈیا پر تیزی سے زیر بحث آگئی ہے، جہاں مختلف صارفین اور حلقے اس مؤقف کی حمایت اور مخالفت دونوں کر رہے ہیں۔ بعض افراد نے اسے انسانی المیوں کی جانب توجہ دلانے کی کوشش قرار دیا، جبکہ کچھ نے اسے سیاسی مؤقف سے جوڑا۔
‎وائرل ویڈیو اور اس پر آنے والے ردعمل نے ایک بار پھر یہ سوال اٹھا دیا ہے کہ عالمی سطح پر انسانی درد اور سانحات پر ردعمل کیا واقعی یکساں ہوتا ہے یا نہیں۔

‎برطانیہ میں طب کے شعبے میں ایک غیرمعمولی کامیابی سامنے آئی ہے جہاں مردہ عطیہ دہندہ سے رحم کی پیوندکاری کے بعد ایک خاتون نے صحت مند بچے کو جنم دیا، جسے طبی ماہرین اہم پیش رفت قرار دے رہے ہیں۔
‎برطانوی میڈیا کے مطابق لندن کے Queen Charlotte’s and Chelsea Hospital میں پیدا ہونے والے بچے کا نام ہیوگو پاؤل رکھا گیا۔ پیدائش کے وقت بچے کا وزن 3.09 کلوگرام یعنی تقریباً 6 پاؤنڈ 13 اونس تھا۔
‎رپورٹ کے مطابق یہ پہلا موقع ہے کہ برطانیہ میں کسی خاتون نے مردہ ڈونر سے منتقل کیے گئے رحم کے ذریعے بچے کو جنم دیا ہے، جبکہ یورپ میں اس نوعیت کے چند محدود کیسز پہلے بھی رپورٹ ہوچکے ہیں۔
‎بچے کی والدہ گریس بیل ایک آئی ٹی پروگرام مینیجر ہیں جو پیدائشی طور پر ایک نایاب طبی عارضے کا شکار تھیں، جس کے باعث ان کا رحم مکمل طور پر موجود نہیں تھا۔ ڈاکٹرز نے انہیں پہلے ہی بتا دیا تھا کہ وہ قدرتی طور پر ماں نہیں بن سکیں گی۔
‎سال 2024 میں ایک انتقال کرچکی خاتون کا رحم ان میں کامیابی سے ٹرانسپلانٹ کیا گیا، جس کے بعد علاج کا مرحلہ شروع ہوا اور بالآخر دسمبر 2025 میں انہوں نے بچے کو جنم دیا۔
‎اپنے بیٹے کی پیدائش کو معجزہ قرار دیتے ہوئے گریس بیل نے کہا کہ انہوں نے کبھی تصور بھی نہیں کیا تھا کہ وہ ماں بن سکیں گی۔ انہوں نے عطیہ دہندہ اور اس کے خاندان کا شکریہ ادا کرتے ہوئے کہا کہ ایک اجنبی کی بے لوثی اور انسان دوستی نے ان کا ماں بننے کا خواب پورا کیا۔

‎واشنگٹن میں امریکی صدر ڈونلڈ ٹرمپ کے اسٹیٹ آف دی یونین خطاب کے دوران کانگریس میں ہنگامہ آرائی دیکھنے میں آئی، جہاں متعدد ڈیموکریٹ اراکین، خصوصاً مسلمان قانون سازوں نے احتجاج کیا جبکہ صدر نے ناقدین کو سخت الفاظ میں تنقید کا نشانہ بنایا۔
‎خطاب کے دوران رکن کانگریس ال گرین نے صدر کی پالیسیوں کے خلاف نعرے لگائے اور کہا کہ وہ اس لیے اجلاس میں شریک ہوئے تاکہ صدر کے سامنے “سچ” بیان کر سکیں۔ تقریر کے دوران انہوں نے بینر لہرانے کی کوشش کی جس پر سارجنٹ ایٹ آرمز نے کارروائی کرتے ہوئے انہیں ایوان سے باہر نکال دیا۔
‎اسی دوران مسلمان اراکین کانگریس الہان عمر اور رشیدہ طلیب نے بھی صدر کی پالیسیوں کے خلاف احتجاج کیا۔ صدر ٹرمپ نے الہان عمر کو مخاطب کرتے ہوئے کہا کہ انہیں خطاب کے دوران کھڑا نہ ہونے پر شرم آنی چاہیے، جس پر انہوں نے جواب دیا کہ شرمندہ ہونے کی ضرورت صدر کو ہے۔
‎اپنے خطاب میں صدر ٹرمپ نے احتجاج کرنے والے اراکین کو “پاگل” قرار دیا اور ڈیموکریٹ اراکین کے رویے کو شرمناک کہا۔ انہوں نے غیرقانونی امیگریشن کے خلاف سخت اقدامات جاری رکھنے پر زور دیتے ہوئے کہا کہ کانگریس ارکان کی ذمہ داری امریکی شہریوں کا تحفظ ہے، نہ کہ غیرقانونی تارکین وطن کی حمایت۔
‎صدر نے “سیو امریکا ایکٹ” کی حمایت کا مطالبہ کرتے ہوئے کہا کہ انتظامیہ غیرقانونی تارکین وطن کے خلاف کارروائیاں جاری رکھے گی اور انہیں امریکا میں رہنے کی اجازت نہیں دی جائے گی۔ خطاب کے دوران متعدد ڈیموکریٹ اراکین اپنی نشستوں پر بیٹھے رہے جبکہ ریپبلکن ارکان نے صدر کی حمایت میں ردعمل دیا۔

‎امریکی صدر ڈونلڈ ٹرمپ نے ایک بار پھر تیسری مدت کے لیے صدر بننے کی خواہش کا اظہار کرتے ہوئے کہا ہے کہ ان کی موجودہ مدت دوسری ہے اور مستقبل میں تیسری مدت بھی ممکن ہوسکتی ہے۔
‎اسٹیٹ آف دی یونین خطاب کے دوران انہوں نے کہا کہ امریکا مشکل معاشی دور سے نکل چکا ہے اور ملکی معیشت استحکام کی طرف بڑھ رہی ہے۔ ان کے مطابق اسٹاک مارکیٹ مسلسل نئے ریکارڈ قائم کر رہی ہے اور امریکا مختلف شعبوں میں کامیابیاں حاصل کر رہا ہے۔
‎امیگریشن پالیسی پر بات کرتے ہوئے صدر ٹرمپ نے دعویٰ کیا کہ گزشتہ نو ماہ کے دوران کوئی بھی شخص غیرقانونی طور پر امریکا میں داخل نہیں ہوا، جبکہ قانونی طریقے سے آنے والوں کو خوش آمدید کہا جاتا ہے۔
‎انہوں نے خطاب میں دھوکہ دہی کے خلاف سخت کارروائیوں کا اعلان بھی کیا اور بعض صومالی نژاد افراد پر امریکا میں مسائل پیدا کرنے کے الزامات عائد کیے۔ اس کے ساتھ انہوں نے ریاست مینیسوٹا میں مبینہ کرپشن کے واقعات کا حوالہ دیتے ہوئے احتساب کو مزید سخت بنانے کی ضرورت پر زور دیا۔