Blog

‎امریکی صدر ڈونلڈ ٹرمپ نے اپنے دوسرے صدارتی دور کے پہلے اسٹیٹ آف دی یونین خطاب میں دعویٰ کیا ہے کہ امریکا ایک “سنہری دور” میں داخل ہوچکا ہے اور ملک کے حالات مختصر وقت میں بدترین سے بہترین سطح تک پہنچ گئے ہیں۔
‎کانگریس سے خطاب کرتے ہوئے انہوں نے کہا کہ صرف ایک سال میں نمایاں تبدیلیاں لائی گئی ہیں، امریکی سرحدیں پہلے سے زیادہ محفوظ ہوچکی ہیں اور غیرقانونی امیگریشن کو مؤثر انداز میں روکا گیا ہے۔ ان کے مطابق گزشتہ نو ماہ کے دوران کوئی غیرقانونی تارک وطن امریکا میں داخل نہیں ہوا، جبکہ قانونی امیگریشن کا نظام برقرار رکھا جائے گا۔
‎صدر ٹرمپ کا کہنا تھا کہ مہنگائی میں نمایاں کمی آئی ہے اور گزشتہ 12 ماہ کے دوران 18 کھرب ڈالر کی سرمایہ کاری کے وعدے حاصل کیے گئے۔ انہوں نے دعویٰ کیا کہ امریکا جو پہلے معاشی مشکلات کا شکار تھا، اب دنیا کا سب سے پسندیدہ ملک بنتا جا رہا ہے۔
‎انہوں نے بتایا کہ وینزویلا سے روزانہ لاکھوں بیرل تیل حاصل کیا جا رہا ہے اور توانائی کے شعبے میں پیداوار بڑھانے کا وعدہ پورا کیا گیا ہے۔ صدر کے مطابق انتظامیہ نے سرکاری اداروں میں ڈی ای آئی پروگرام ختم کر دیے ہیں اور ملک کی مجموعی صورتحال مضبوط ہو رہی ہے۔
‎ٹرمپ نے ٹیکس پالیسی کا ذکر کرتے ہوئے کہا کہ ریپبلکن اراکین کی حمایت سے ٹیکس میں کمی ممکن بنائی گئی، جبکہ ڈیموکریٹس نے اس کی مخالفت کی۔ انہوں نے کہا کہ ٹپس اور اوور ٹائم آمدن پر ٹیکس ختم کیا گیا اور ٹیرف پالیسی کے باعث دیگر ممالک امریکا کے ساتھ تجارتی معاہدے برقرار رکھنے پر مجبور ہیں۔
‎اپنے خطاب میں انہوں نے انتخابی اصلاحات پر زور دیتے ہوئے کہا کہ ووٹرز کے لیے شہریت کا ثبوت ضروری ہونا چاہیے اور میل اِن بیلٹس کو محدود کیا جانا چاہیے، سوائے مخصوص حالات کے۔ انہوں نے الزام لگایا کہ ڈیموکریٹس ووٹر آئی ڈی قوانین کی مخالفت کرتے ہیں۔
‎خطاب کے دوران متعدد ڈیموکریٹ اراکین خاموش دکھائی دیے، جبکہ صدر نے توانائی، سوشل سیکیورٹی اور میڈی کئیر کے تحفظ کا وعدہ بھی دہرایا۔ انہوں نے ٹیکنالوجی کمپنیوں پر زور دیا کہ وہ بجلی کی لاگت کم کرنے کے لیے اپنے پاور پلانٹس قائم کریں اور کانگریس سے سنگل فیملی گھروں کے تحفظ کے لیے قانون سازی کا مطالبہ کیا۔

‎چین میں ایک کمپنی کے مالک نے اپنے ملازمین کے لیے ایسا انوکھا ایونٹ منعقد کیا کہ ہر کسی کی آنکھیں کھلی کی کھلی رہ گئیں۔ ہینان کی کوانگ شان کرین کو لمیٹڈ کمپنی کے مالک چوئی پی جون نے اپنے ملازمین میں 18 کروڑ یوآن (تقریباً 7 ارب پاکستانی روپے) نقد رقم تقسیم کی۔
‎کمپنی کے سالانہ ایونٹ کے موقع پر 6 کروڑ یوآن (تقریباً 2 ارب پاکستانی روپے) نقد بونس کے طور پر دیے گئے، جبکہ تقریب کے لیے تقریباً 7 ہزار ملازمین کے لیے 800 میزیں لگائی گئیں۔ ایونٹ میں ملازمین کو سٹیج پر بلا کر انعامات دیے گئے اور باقی افراد کو کہا گیا کہ میزوں پر موجود جتنی رقم وہ اٹھا سکتے ہیں، اٹھا کر اپنے گھر لے جائیں۔
‎تقریب کے دوران کمپنی کے مالک نے فنانس ڈیپارٹمنٹ سے کہا کہ “ہم واشنگ مشینیں کیوں دیں؟ کیا آپ کو معلوم نہیں سونا کتنا مہنگا ہوگیا ہے؟” اور اضافی 20 ہزار یوآن بھی ہر ملازم کو نقد فراہم کیے گئے۔
‎یہ کمپنی ستمبر 2002 میں قائم ہوئی تھی اور کرینیں بنانے کے ساتھ ساتھ دیگر مصنوعات بھی تیار کرتی ہے اور 130 سے زائد ممالک میں اس کا کاروبار موجود ہے۔ چوئی پی جون نے اس سے قبل 2024 میں بھی 17 کروڑ یوآن اپنے ملازمین میں بونس کے طور پر تقسیم کیے تھے۔
‎یہ تقریب نہ صرف ملازمین کے لیے حوصلہ افزائی کا باعث بنی بلکہ کاروباری دنیا میں نقد انعامات دینے کے منفرد طریقے کے طور پر بھی خبروں میں رہی۔

‎گزشتہ ڈھائی سال کے دوران پاکستان میں مقیم 20 لاکھ سے زائد افغان شہری اپنے وطن واپس جا چکے ہیں، اور حکومت و بین الاقوامی اداروں کے مطابق یہ عمل بدستور جاری ہے۔
‎اقوام متحدہ ہائی کمشنر برائے مہاجرین (یو این ایچ سی آر) کے ترجمان قیصر خان آفریدی نے بتایا کہ ستمبر 2023 سے طورخم سمیت مختلف سرحدی گزرگاہوں کے ذریعے مجموعی طور پر 20 لاکھ 75 ہزار افغان شہری افغانستان واپس لوٹ چکے ہیں۔ ان میں وہ افراد شامل ہیں جو رضاکارانہ طور پر واپس گئے اور وہ جنہیں قانونی کارروائی کے بعد ملک بدر کیا گیا۔
‎صوبائی محکمہ داخلہ کے مطابق لنڈی کوتل ٹرانزٹ کیمپ سے تازہ ترین اعداد و شمار میں اے سی سی (افغان سٹیزن کارڈ) رکھنے والے 29 خاندانوں کے 130 افراد واپس روانہ کیے گئے۔ اس کے علاوہ پی او آر (پروف آف رجسٹریشن) کارڈ ہولڈرز کے 174 خاندانوں یعنی 784 افراد بھی حالیہ دنوں میں افغانستان لوٹ گئے۔ غیر قانونی مقیم 21 خاندانوں سمیت 108 افراد کو بھی واپس بھیجا گیا۔
‎یو این ایچ سی آر کے مطابق اس عرصے کے دوران تقریباً 2 لاکھ 4 ہزار افغان شہریوں کو جبری طور پر ملک بدر کیا گیا، جبکہ دیگر نے رضاکارانہ طور پر وطن واپسی اختیار کی۔ حکام کا کہنا ہے کہ افغان مہاجرین کی مرحلہ وار واپسی کا سلسلہ مستقبل میں بھی جاری رہے گا۔

‎تہران: ایران نے اپنے بیلسٹک میزائل پروگرام اور جوہری سرگرمیوں کے حوالے سے امریکی الزامات کو بلا بنیاد قرار دیتے ہوئے شدید رد عمل ظاہر کیا ہے۔
‎ایرانی وزارتِ خارجہ کے ترجمان اسماعیل بقائی نے سوشل میڈیا پر جاری بیان میں کہا کہ امریکی دعوے محض بڑے جھوٹ ہیں اور ان میں کوئی حقیقت نہیں۔ انہوں نے جنوری میں ہونے والے احتجاجی مظاہروں میں ہلاکتوں کی تعداد سے متعلق امریکی الزامات کو بھی رد کیا اور کہا کہ یہ دعوے حقیقت سے عاری ہیں۔
‎واضح رہے کہ امریکی صدر ڈونلڈ ٹرمپ نے گزشتہ روز ایک بیان میں کہا تھا کہ ایران کے میزائل یورپی ممالک اور خطے میں امریکی اڈوں کے لیے خطرہ ہیں اور ایران ایسے میزائل تیار کر رہا ہے جو جلد ہی امریکا تک پہنچ سکتے ہیں۔ ایران نے اس بیان کو سختی سے مسترد کرتے ہوئے اسے جھوٹا اور بے بنیاد قرار دیا۔

بھارتی ریاست اترآکھنڈ میں ایک مسلمان نوجوان کو کھلے میدان میں نماز پڑھنے کے جرم میں ہندو انتہاپسندوں نے شدید تشدد کا نشانہ بنایا۔ اطلاعات کے مطابق اروند شرما نامی حملہ آور نے نوجوان پر زبردستی ہندو دیوتاؤں کے نعرے لگوائے اور کان پکڑ کر معافی منگوائی۔
‎حملہ آور کی شناخت ہونے کے باوجود مقامی پولیس نے کوئی کارروائی نہیں کی اور بھارتی حکام کی جانب سے بھی مذمت نہیں سامنے آئی۔ اقلیتوں کے ساتھ ناروا سلوک بھارت میں اب معمول بن چکا ہے۔