Blog

روڈ حادثہ، ٹریلر تلے آ کر نوجوان خاتون جاں بحق، دو افراد معجزانہ طور پر محفوظ رہے،،

اوچ شریف باغی ٹی وی ( نامہ نگار حبیب خان ) اوچ شریف سوئی گیس ککس موڑ کے قریب ترنڈا روڈ پر افسوسناک ٹریفک حادثے میں ایک نوجوان خاتون جاں بحق جبکہ دو افراد محفوظ رہے۔ریسکیو ذرائع کے مطابق خیرپور ڈاھا سے راجن پور شادی کی تقریب میں شرکت کے بعد موٹر سائیکل پر سوار تین افراد ایک مرد اور دو خواتین واپس اپنے گھر جا رہے تھے کہ اسی دوران ایک مسافر بس نے تیز رفتاری کے باعث موٹر سائیکل کو کراس کرتے ہوئے ٹکر مار دی۔ ٹکر کے نتیجے میں تینوں افراد روڈ پر گر گئے۔حادثے کے فوراً بعد پیچھے سے آنے والا ٹریلر ایک خاتون کے اوپر سے گزر گیا جس سے وہ موقع پر ہی جاں بحق ہو گئیں، جبکہ دیگر دو افراد معجزانہ طور پر محفوظ رہے۔جاں بحق ہونے والی خاتون کی شناخت شبانہ بی بی زوجہ محمد حمزہ (عمر 22 سال) سکنہ راجن پور کے نام سے ہوئی ہے۔ خاتون کی دونوں ٹانگیں بری طرح کچل گئیں۔

اطلاع ملتے ہی ریسکیو 1122 کی ٹیم موقع پر پہنچ گئی اور ضروری کارروائی کے بعد میت کو لواحقین کی موجودگی میں آر ایچ سی اوچ شریف منتقل کر دیا گیا۔

علاوہ ازیں اوچ شریف میں رکشہ اور ٹرک کے تصادم میں ایک شخص جاں بحق ہو گیا،اوچ شریف باغی ٹی وی نامہ نگار حبیب خان کے مطابق علی پور روڈ پر موہانے والی موری کے مقام پر ایک دلخراش حادثہ پیش آیا، جس میں ایک رکشہ اور ٹرک میں تصادم ہوا۔ ریسکیو ذرائع کے مطابق، اوچ شریف سے اپنے گھر جانے والا رکشہ پر تین افراد سوار تھے کہ پیچھے سے آتے ہوئے ٹرک نے رکشہ کو سائیڈ ماری۔ حادثے کے نتیجے میں رکشہ کا ڈرائیور، عطا حسین ولد محمد یار (عمر 40 سال)، ٹرک کے نیچے آ گیا اور اس کے نچلے پیٹ اور دونوں ٹانگوں میں شدید کرش انجری ہوئی۔ریسکیو عملے نے فوری طور پر سی پی آر کے ذریعے جان بچانے کی کوشش کی اور زخمی کو آر-ایچ-سی اوچ شریف منتقل کیا، مگر وہ وہاں پہنچنے سے قبل ہی جانبر نہ ہو سکا۔ حادثے میں رکشہ کے باقی دو افراد خوش قسمتی سے محفوظ رہے۔ پولیس نے موقع پر پہنچ کر تحقیقات کا آغاز کر دیا ہے۔

اوچ شریف باغی ٹی وی (نامہ نگار حبیب خان)اوچ شریف میں آئس کا مکروہ دھندا بے قابو، گلی محلوں میں منشیات کی منڈیاں قائم، ہوم ڈلیوری سے نوجوان نسل تباہ، شہری عدم تحفظ کا شکار

تفصیلات کے مطابق اوچ شریف، جو کبھی اولیائے کرام کی نگری، روحانیت، امن اور مذہبی اقدار کی پہچان سمجھا جاتا تھا، آج خطرناک حد تک منشیات کے عفریت کی لپیٹ میں آ چکا ہے۔ شہر اور گردونواح میں مہلک نشہ “آئس” (کرسٹل میتھ) کا کاروبار کھلے عام جاری ہے، جس نے نوجوان نسل کے مستقبل کو شدید خطرات سے دوچار کر دیا ہے۔مقامی ذرائع کے مطابق محلہ بخاری، شمیم آباد، گیلانی کالونی، بیٹ احمد رسول پور، محمد پور اور نور پور سمیت مختلف علاقوں میں منشیات فروشوں نے باقاعدہ اڈے قائم کر رکھے ہیں، جہاں سے دن رات آئس کی فروخت جاری ہے۔ شہریوں کا کہنا ہے کہ یہ دھندا اب خفیہ نہیں بلکہ اعلانیہ انداز میں چلایا جا رہا ہے۔تشویشناک امر یہ ہے کہ منشیات فروشوں نے جدید طریقہ واردات اختیار کرتے ہوئے “ہوم ڈلیوری سروس” بھی متعارف کرا دی ہے، جہاں ایک فون کال یا پیغام پر نشہ آور مواد گھروں تک پہنچایا جا رہا ہے۔ اس بے خوفی نے قانون نافذ کرنے والے اداروں کی کارکردگی پر سنگین سوالات کھڑے کر دیے ہیں۔

علاقہ مکینوں کے مطابق آئس کے عادی نوجوان کئی کئی دن جاگتے رہتے ہیں، ذہنی توازن کھو بیٹھتے ہیں اور نشے کی طلب پوری نہ ہونے پر چوری، ڈکیتی، موبائل چھیننے اور دیگر جرائم میں ملوث ہو جاتے ہیں۔ نتیجتاً شہریوں میں خوف و ہراس پایا جاتا ہے اور رات کے اوقات میں نقل و حرکت محدود ہو کر رہ گئی ہے۔شہر کے مختلف مقامات پر نشے کے عادی افراد کو گندگی کے ڈھیروں، ویران جگہوں اور کھنڈرات میں نشہ کرتے دیکھا جا سکتا ہے، جو نہ صرف معاشرتی بگاڑ بلکہ انتظامی غفلت کی واضح تصویر پیش کرتا ہے۔

والدین کا کہنا ہے کہ ان کے نوجوان بچے تعلیم اور روزگار چھوڑ کر نشے کی لت میں مبتلا ہو رہے ہیں۔ کئی گھرانوں کی جمع پونجی اس لعنت کی نذر ہو چکی ہے جبکہ ماؤں کی آہیں اور خاندانوں کی پریشانی معمول بنتی جا رہی ہے۔شہری و سماجی حلقوں نے اعلیٰ حکام سے مطالبہ کیا ہے کہ اوچ شریف میں فوری اور مؤثر کریک ڈاؤن کیا جائے، منشیات فروشوں کے نیٹ ورک کو توڑا جائے، ذمہ دار عناصر کو قانون کے کٹہرے میں لایا جائے اور نشے کے عادی افراد کی بحالی کے لیے خصوصی مراکز قائم کیے جائیں، بصورت دیگر یہ ناسور آئندہ نسلوں کو مکمل تباہی کی طرف دھکیل دے گا۔