Blog

چین نے ایران کے ساتھ جنگ بندی میں توسیع کے معاملے پر ردعمل دیتے ہوئے کہا ہے کہ وہ تنازعات کے حل کے لیے سفارتکاری کی مکمل حمایت کرتا ہے اور خطے میں امن کو اولین ترجیح سمجھتا ہے۔

چینی وزارتِ خارجہ کے ترجمان کے مطابق موجودہ علاقائی صورتحال نہایت نازک مرحلے میں داخل ہو چکی ہے، جہاں جنگ اور امن کے درمیان توازن برقرار رکھنا ایک بڑا چیلنج ہے۔ ترجمان نے زور دیا کہ کسی بھی قسم کی جارحیت کو دوبارہ شروع ہونے سے روکنا اس وقت سب سے اہم ہدف ہونا چاہیے۔بیان میں مزید کہا گیا کہ چین تمام فریقین سے مطالبہ کرتا ہے کہ وہ تحمل کا مظاہرہ کریں اور مسائل کے حل کے لیے مذاکرات اور سفارتی ذرائع کو ترجیح دیں۔

واضح رہے کہ امریکی صدر ڈونلڈ ٹرمپ نے اعلان کیا تھا کہ وہ ایران کے ساتھ جاری جنگ بندی کو غیر معینہ مدت تک بڑھا رہے ہیں تاکہ امن مذاکرات کے لیے مزید وقت فراہم کیا جا سکے۔

دوسری جانب تہران نے امریکی مؤقف کو مسترد کرتے ہوئے واضح کیا ہے کہ واشنگٹن کی جانب سے جنگ بندی میں توسیع کا اعلان یکطرفہ ہے۔ ایرانی حکام کا کہنا ہے کہ امریکہ کی جانب سے پیش کی گئی شرائط قابلِ قبول نہیں اور مذاکرات برابری کی بنیاد پر ہونے چاہئیں۔

یورپی یونین کی جانب سے پالتو جانوروں کے سفر سے متعلق نئے قوانین نافذ کر دیے گئے ہیں جن کے بعد برطانیہ سے یورپ جانے والے مسافروں کے لیے اہم تبدیلیاں سامنے آئی ہیں۔ نئے قواعد کے مطابق آج سے کچھ پرانے پالتو جانوروں کے پاسپورٹ غیر مؤثر ہو گئے ہیں۔

اب جو افراد اپنے کتے، بلیاں یا فیرٹس کے ساتھ یورپی یونین کے کسی بھی ملک کا سفر کریں گے، انہیں سفر سے پہلے اینمل ہیلتھ سرٹیفکیٹ حاصل کرنا لازمی ہوگا۔یہ سرٹیفکیٹ صرف ایک مستند ویٹرنری ڈاکٹر جاری کرے گا اور یہ سفر سے زیادہ سے زیادہ 10 دن پہلے جاری ہونا ضروری ہوگا۔ ہر نئے سفر کے لیے نیا سرٹیفکیٹ لینا لازمی قرار دیا گیا ہے۔تاہم یہ سرٹیفکیٹ یورپی یونین کے اندر 6 ماہ تک دوسرے سفر یا برطانیہ واپسی کے لیے استعمال کیا جا سکتا ہے۔

برطانیہ کی حکومت کی ویب سائٹ پر واضح طور پر کہا گیا ہے "اگر آپ انگلینڈ، اسکاٹ لینڈ یا ویلز میں رہتے ہیں تو 22 اپریل سے آپ پالتو جانور کا پاسپورٹ استعمال نہیں کر سکتے، چاہے وہ یورپی یونین میں جاری کیا گیا ہو۔”مزید کہا گیا ہے کہ "اگر آپ پرانے پالتو پاسپورٹ کا استعمال کریں گے تو آپ کے جانور کو یورپی یونین میں داخلے سے روک دیا جا سکتا ہے۔”یہ قوانین اسسٹنس ڈاگز (معذور افراد کی مدد کرنے والے کتوں) پر بھی لاگو ہوں گے۔

نئے قواعد کے مطابق ایک نجی گاڑی میں زیادہ سے زیادہ 5 پالتو جانور لے جانے کی اجازت ہوگی۔اگر کوئی شخص کسی دوسرے کے جانور کو سفر پر لے جا رہا ہو تو اسے تحریری اجازت نامہ فراہم کرنا ہوگا۔یورپی یونین اب صرف ان افراد کو پالتو جانوروں کے پاسپورٹ جاری کرے گی جن کا مستقل رہائش یورپی یونین میں ہو، جبکہ سیاح یا سیکنڈ ہوم رکھنے والے اس سہولت سے محروم ہوں گے۔

حکومت نے یہ بھی واضح کیا ہے کہ یورپی یونین کے پرانے پاسپورٹ اب بھی ان برطانوی شہریوں کے لیے قابل قبول ہوں گے جو اپنے پالتو جانوروں کے ساتھ واپس برطانیہ آ رہے ہوں۔

آبنائے ہرمز میں کشیدگی میں مزید اضافہ ہوگیا ہے جہاں آج صبح ایک اور تجارتی جہاز پر فائرنگ کا واقعہ پیش آیا ہے۔

برطانوی فوج کے ماتحت ادارےیوکے میری ٹائم ٹریڈ آپریشن کے مطابق ایک "آؤٹ باؤنڈ کارگو جہاز” نے اطلاع دی کہ اس پر ایران کے مغرب میں تقریباً آٹھ ناٹیکل میل کے فاصلے پر فائرنگ کی گئی۔ادارے کے مطابق فائرنگ کے بعد جہاز سمندر میں رک گیا ہے، تاہم عملے کے تمام افراد محفوظ ہیں،یوکے میری ٹائم ٹریڈ آپریشن نے خبردار کیا ہے کہ آبنائے ہرمز میں غیر معمولی سرگرمیاں جاری ہیں اور تمام بحری جہازوں کو مشکوک حرکات کی فوری اطلاع دینے کی ہدایت کی گئی ہے۔

دوسری جانب ایرانی سرکاری خبر رساں ایجنسی نے دعویٰ کیا ہے کہ ایران نے جہاز پر فائرنگ اس وقت کی جب اس نے ایرانی افواج کی وارننگز کو نظر انداز کیا۔تاہم یوکے میری ٹائم ٹریڈ آپریشن پہلے ہی یہ مؤقف دے چکا ہے کہ فائرنگ سے قبل جہاز سے کوئی رابطہ نہیں کیا گیا،