Category: بلوچستان

بلوچستان حکومت نے آئندہ مالی سال 2024-2025 کیلیے 930 ارب روپے سے زائد بجٹ پیش کردیا، جس میں گریڈ 1 سے 16 تک کے سرکاری ملازمین کی تنخواہوں میں 25 فیصد جبکہ ریٹائرڈ ملازمین کی تنخواہوں میں 15 فیصد اضافہ تجویز کیا گیا ہے۔بلوچستان اسمبلی کے اجلاس میں صوبائی وزیر خزانہ شعیب نوشیروانی نے آئندہ مالی سال کا بجٹ پیش کیا۔ اپنی تقریب میں انہوں نے کہا کہ آئندہ مالی سال میں شعبہ تعلیم کیلیے 146.9 ارب روپے مختص کئے ہیں جبکہ 535 نئی اسامیاں پیدا کی جائیں گی اور 3.45 ارب روپے وفاقی گرانٹ سے تعلیم پر خرچ کیے جائیں گے۔انہوں نے بتایا کہ صوبے میں امن وامان کے لئے 84ارب مختص کئے گئے ہیں، پولیس اورلیویز میں7ہزار نئی اسامیاں تخلیق کی جائیں گی جبکہ لوکل گورنمنٹ کیلئے 5.2ارب روپے مختص کئے گئے ہیں، اسی طرح زراعت کے شعبے کیلیے 6 ارب 81 کروڑ روپے مختص کئے گئے ہیں جبکہ غیر ترقیاتی بجٹ 16 ارب روپے مختص کیا گیا ہے۔
شعیب نوشیروانی نے بتایا کہ محکمہ زراعت میں 147 اسکیمات متعارف کرائی گئی ہیں جبکہ امورحیوانات میں 8 ارب 47 کروڑ روپے مختص کیے گئے ہیں، امور حیوانات کا غیر ترقیاتی بجٹ 8ارب روپے جبکہ ترقیاتی بجٹ 9 ارب 17 کروڑ روپے ہے۔بجٹ میں ماہی گیری کے لیے بجٹ میں 5 ارب روپے مختص کئے گئے جبکہ محکمہ خوراک کے 1.2ارب روپے مختص کئے ہیں، اسکے علاوہ جنگلات کیلئے 2ارب 6 کروڑ روپے مختص کئے گئے ہیں، صنعت وحرفت کیلئے 3.7ارب روپے مختص کئے گئے ہیں۔صوبائی حکومت نے شعبہ توانائی کیلئے 7 ارب روپے مختص، آبنوشی کیلئے 43.3 ارب روپے، مواصلات وتعمیرات کیلئے 51ارب روپے مختص کئے گئے ہیں جبکہ شعبے کا ترقیاتی بجٹ 17 ارب روپے تجویز کیا گیا ہے۔
آئندہ مالی سال میں آب نوشی اسکمیات کیلئے 240ملین روپے مختص کئے گئے جبکہ سماجی بہبود کیلئے 8 ارب روپے مختص کئے گئے ہیں جبکہ ثقافت کے شعبہ کے لئے 255ملین روپے مختص کئے گئے، علاوہ ازیں اطلاعات اورانفارمیشن ٹیکنالوجی 613 ملین روپے مختص کئے گئے جبکہ محکمہ کھیل اور امور نوجوانان کیلئے 3ارب روپے مختص کئے گئے ہیں۔صوبائی وزیر خزانہ شعیب نوشیروانی نے بتایا کہ صوبے میں معدنی وسائل کے لئے 10ارب مختص کئے گئے ہیں جبکہ سرمایہ کاری فنڈز میں 2ارب روپے کا اضافہ کرکے اسے 5 ارب روپے کردیا گیا ہے۔انہوں نے بتایا کہ ریٹائرڈ ملازمین کی پنشن میں 15 فی صد اضافہ جبکہ گریڈ ایک سے 16 گریڈ کے ملازمین کی تنخواہوں میں 25 فیصد، گریڈ 17 سے گریڈ بائیس کے سرکاری ملازمین کی تنخواہوں میں 22 فیصد اضافے اور قابل طالب علموں کے لئے 2 ارب روپے کی سرمایہ کاری تجویز کی گئی ہے۔
انہوں نے کہا کہ اسکولوں کی تعمیر کے لئے 118 ارب مختص کئے جبکہ22 پسماندہ اضلاع میں 5 سالوں میں 3ارب 45 کروڑروپے خرچ کئے جائیں گے، 44 اضلاع میں اسکولوں کو اپ گریڈ اور3 ہزاراسکولوں میں بنیادی سہولیات فراہم کی جائیں گی۔ صوبائی وزیر خزانہ نے بتایا کہ صحت کے شعبے میں گزشتہ مالی سال کے مقابلے میں 30 فیصد بجٹ بڑھا کر 67 ارب روپے مختص کیے گئے ہیں جبکہ آئندہ مالی سال کے دوران 242 نئی اسامیاں پیدا کی جائیں گی۔شعیب نوشیروانی نے بتایا کہ صوبے کی 11 جامعات کیلئے 4ارب 80 کروڑروپے مختص کئے گئے ہیں، تعلیم کے شعبے میں ترقیاتی بجٹ کی مد میں 32 ارب روپے مختص کیے گئے جبکہ محکمہ تعلیم کے غیر ترقیاتی بجٹ کاحجم 114 ارب روپے رکھا گیا ہے۔

وزیر داخلہ بلوچستان میر ضیاء لانگو نے کہا ہے کہ گوادر شہر کے گرد باڑ لگانے کی بے بنیاد افواہوں میں کوئی صداقت نہیں ہے۔اپنے ایک بیان میں وزیر داخلہ کا کہنا تھا کہ گوادر میں باڑ لگانے کے حوالے سے نہ کوئی فیصلہ ہوا ہے اور نہ ہی کوئی اجلاس، یہ محض ایک پروپگینڈا ہے، غلط بیانیے کے ذریعے ریاست اور نوجوانوں میں خلیج پیدا کی جا رہی ہے۔انہوں نے کہا کہ ذاتی رائے کو زمینی حقائق اور سچائی کے پیمانے سے ناپنا ضروری ہے، دشمن قوتوں کو گوادر اور سی پیک کی ترقی ہضم نہیں ہو رہی ہے اس لیے تو وایلا اور شور مچایا جا رہا ہے۔
میر ضیاء لانگو نے کہا کہ گوادر کے حوالے سے جو بھی اقدامات اٹھائے جائیں گے وہاں کے عوام کی منشاء اور مفاد میں کیے جائیں گے کیونکہ گوادر پر سب سے پہلے گوادر کے لوگوں کی ہی حق ہے۔صوبائی وزیر داخلہ کا کہنا تھا کہ گوادر میں باڑ لگانے کے حوالے سے ریاست کے خلاف عوام کو ورغلانے کی کوشش کی جا رہی ہے جبکہ ریاست کے خلاف جھوٹے اور منفی پروپیگنڈا کرکے گوادر کے عوام کو بدظن کیا جا رہا ہے۔

بلوچستان کے 14 اضلاع میں انسدادِ پولیو مہم کل سے شروع ہو گی۔ کوآرڈینیٹر ایمرجنسی آپریشن سینٹر زاہد شاہ کا کہنا ہے کہ کوئٹہ، پشین، قلعہ عبداللّٰہ، چمن، دکی، لسبیلہ اور خضدار 14 اضلاع میں شامل ہیں۔زاہدشاہ نے بتایا کہ حب، چاغی، ژوب، نوشکی، قلعہ سیف اللّٰہ، لورالائی اور مستونگ میں بھی کل سے پولیم مہم کا آغاز ہو گا۔انہوں نے بتایا کہ 18 لاکھ 84 ہزار سے زائد بچوں کو اس 7 روزہ انسداد پولیو مہم میں پولیو سے بچاؤ کے قطرے پلائےجائیں گے، جس میں 7 ہزار سے زائد ٹیمیں حصہ لیں گی۔ان کا کہنا ہے کہ 6 اضلاع میں ہیٹ ویو کی پیش گوئی کے باعث مہم 5 روز کے لیے مؤخر ہے، ان اضلاع میں انسدادِ پولیو مہم 8 جون سےشروع ہو گی۔کوآرڈینیٹر ایمرجنسی آپریشن سینٹر نے بتایا کہ نصیر آباد، سبی، جعفر آباد، اوستہ محمد، ڈیرہ بگٹی اور صحبت پور میں 8 جون سے پولیو مہم شروع ہو گی۔زاہد شاہ نے یہ بھی بتایا ہے کہ بلوچستان میں رواں سال پولیو کے 3 کیسز قلعہ عبداللّٰہ، چمن اور ڈیرہ بگٹی سے رپورٹ ہوئے ہیں، انسدادِ پولیو مہم ماحول میں پولیو وائرس کی موجودگی پر شروع کی جا رہی ہے۔

وزیراعلیٰ بلوچستان میر سرفراز بگٹی نے کہا ہے کہ تعیناتیوں میں میرٹ ہر صورت برقرار رکھا جائے گا، محکمہ تعلیم میں بھرتیوں کے ٹیسٹ کے رزلٹ کا اعلان کرنے جا رہے ہیں۔ کوئٹہ میں پریس کانفرنس سے خطاب کرتے ہوئے وزیراعلیٰ بلوچستان نے کہا کہ سینئر بیورو کریٹس پر مشتمل کمیٹی کامیاب امیدواروں کے انٹرویو کرے گی۔وزیراعلیٰ نے کہا کہ بلوچستان کے غیر ترقیاتی اخراجات کے بجٹ کا گراف تیزی سے اوپر جا رہا ہے۔ یہ سلسلہ اسی طرح جاری رہا تو ترقیاتی بجٹ کےلیے رقم نہیں ہوگی۔
سرفراز بگٹی نے کہا کہ 21 یا 22 جون کو بلوچستان کا بجٹ پیش کریں گے۔ بجٹ کی تیاری کے پیش نظر محکمہ خزانہ اور منصوبہ بندی و ترقیات کے عملے کی چھٹیاں منسوخ کردی گئی ہیں۔
سرفراز بگٹی کا کہنا تھا کہ یہاں عجیب ماحول ہے کہ جو بھرتی ہوگیا وہ گریڈ 20، 21 تک جائے۔ تعلیم میں اصلاحات کرنے جا رہے ہیں۔ وزیراعلیٰ نے کہا کہ بھرتیوں کےلیے رقم لینے سے متعلق شکایات ملتی ہیں، ہم نوکریاں میرٹ پر دینے کی کوشش کریں گے۔ انہوں نے کہا کہ اگر ٹیچرز کی بھرتی پر کمپرومائیز کرلیا تو نوجوان نسل کو تباہ کریں گے۔ انہوں نے کہا کہ بھرتیوں میں میرٹ ہر صورت یقینی بنائیں گے، تمام محکموں میں بھرتیاں کنٹریکٹ کی بنیاد پر ہوں گی۔ دنیا بھر میں بھرتیاں کارکردگی کی بنیاد پر ہوتی ہیں۔ وزیراعلیٰ نے کہا کہ بلوچستان میں درجہ حرارت 52 ڈگری سینٹی گریڈ تک ہے اور بجلی دو تین گھنٹے مل رہی ہے، وزیراعظم کو بلوچستان میں بجلی کی صورتحال پر خط لکھا ہے۔ دریں اثنا وزیراعلیٰ بلوچستان کی پریس کانفرنس کے دوران سی ایم سیکریٹریٹ کی بجلی چلی گئی۔

بلوچستان کے چار اضلاع میں 2600 سے زائد لیویز اہلکار پولیس میں ضم ہونے کے بعد ڈیوٹی سے غائب ہونے کی اطلاعات سامنے آئی ہے، کوئٹہ گوادر حب اور لسبیلہ کے غائب اہلکاروں کو تخواہ کی مد میں ہر ماہ 8کروڑ روپے سے زائد رقم جاری ہونے کا انکشاف ہوا ہے، معتبر ذرائع سے ملنے والی اطلاعات کے مطابق بلوچستان کے چار اضلاع کے 2600 سے زائد لیویز فورس کے اہلکار گزشتہ چار سال سے اپنی جائے تعیناتی سے مبینہ طور پر غیر حاضر ہیں لیکن ہر ماہ 8 کروڑ روپے سے زائد کی رقم ان کی تنخواہوں کی مد میں جاری ہوتی رہی ہے 2020 میں وزیر اعلی جام کمال خان کے دور میں بلوچستان کے تین اضلاع کوئٹہ، گوادر اور لسبیلہ سے لیویز فورس پر مشتمل بی ایریا ختم کر کے ان کو محکمہ پولیس میں ضم کر دیا گیا لسبیلہ سے گزشتہ سال حب کو ایک نیا ضلع بنایا گیا ذرائع کے مطابق پولیس میں ضم ہونے والے لیویز کے 2600 سے زائد اہلکار کبھی اپنی ڈیوٹی پر نظر نہیں آئے لیکن ان کی تنخواہوں کی مد میں ہر ماہ 8 کروڑ روپے سے زائد کی رقم قومی خزانے سے جاری کی جاتی رہی ہے بلوچستان کے سیاسی و سماجی حلقوں نے گورنر اور بلوچستان سے اس معاملے کی انکوائری کا مطالبہ کیا گیا ہے