کوئٹہ: بلوچستان کے علاقے مستونگ میں کیڈٹ کالج کراس پر سکیورٹی چوکی پر پھینکا جانے والادستی بم مسجد میں جا گرا۔
باغی ٹی وی : نامعلوم افراد کی جانب سے پھینکا گیا دستی بم مسجد کے احاطہ میں گر کر پھٹا، تاہم دھماکے کے وقت مسجد میں کوئی موجود نہیں تھا،پولیس ذرائع کے مطابق دھماکے سے کوئی نقصان نہیں ہوا۔
دوسری جانب جنوبی وزیرستان کے علاقے راغزائی میں کمرے کی چھت گرنے سے 6 افراد جاں بحق ہوگئے۔، پولیس کے مطابق چند لوگ زخمی بھی ہیں جنہیں ڈسٹرکٹ ہیڈ کوارٹر اسپتال وانا منتقل کیا گیا ہے۔ علاوہ ازیں لوگوں نے اپنی مدد آپ کے تحت امدادی سرگرمیوں میں حصہ لیا، چھت گرنے کی ابتدائی وجہ سامنے نہیں آسکی ہے تاہم علاقے میں متعدد گھر کچے پکے ہیں۔
ادھر بنوں میں پولیس موبائل پر نامعلوم افراد نے حملہ کردیا، پولیس اور حملہ آوروں کے مابین شدید فائرنگ کا تبادلہ ہوا،پولیس کے مطابق فائرنگ کا واقعہ تحصیل سب ڈویژن وزیر تھانہ اتمانزئی کی حدود میں پیش آیا ہے، حملے میں کوئی جانی نقصان نہیں ہوا، پولیس کی جوابی فائرنگ سے حملہ آور فرار ہوگئے، حملے میں پولیس وین کو نقصان پہنچا ہے، پولیس نے علاقہ گھیرے میں لے کر سرچ آپریشن شروع کردیا۔
