تحریک انصاف کی کور کمیٹی کا اجلاس منعقد ہوا، پی ٹی آئی کور کمیٹی نے جبری لاپتہ کیے گئے کارکنان اور ذمہ داران کی فوری بازیابی و رہائی کا مطالبہ کیا۔ کمیٹی نے کہا کہ الیکشن کمیشن کی بلے کے نشان سے محروم کرنے کی کوشش شرانگیز منصوبہ ہے۔ پی ٹی آئی اعلامیہ کے مطابق کور کمیٹی نے چیئرمین پی ٹی آئی کیلئے محفوظ فیصلوں کے ذریعے انصاف کے دروازے بند کرنے کی بھی مذمت کی اور کہا کہ جھوٹی پروپیگنڈا مہم چیئرمین پی ٹی آئی کو سیاست سے دستبردار کرنے کی مایوس کن کوشش ہے۔
اس موقع پر کمیٹی نے چیئرمین پی ٹی آئی کو متنازعہ عدالتی کارروائی کے ذریعے انصاف سے محروم کرنے کی مذمت کی .
کمیٹی نے کہا کہ سزا یافتہ شخص کی اقتدار تک رسائی کی راہ ہموار کرنے کی ریاستی کوششیں تباہ کن ہیں۔ اجلاس میں انتخابات میں شرکت اور امیدواروں کے تعیّن کی حکمتِ عملی پر بھی گفتگو کی گئی۔

وزیر اعلیٰ محسن نقوی نے پنجاب بار کونسل کیلئے ڈسپنسری 10دن میں فنکشنل کرنے کا اعلان کردیا، محسن نقوی نے کہاکہ اپنا کام ختم کرکے گھر جانا ہے، اپنے پروفیشن پر واپس لوٹ جائیں گے،ہم نگران سیٹ اپ کے لئے آئے لیکن عرصہ کچھ لمبا ہوگیا۔ خیبرپختونخوااور سندھ میں وکیل وزیر اعلیٰ ہیں،وکلا پروٹیکشن ایکٹ کیلئے ایڈووکیٹ جنرل کی مشاورت سے کمیٹی قائم کی جائے گی،بار کونسل سے ملحقہ پلاٹ پر کام شروع کرنے کیلئے دن مقرر کریں، معاملات طے کرکے سنگ بنیاد رکھ دیں گے۔
وزیراعلیٰ پنجاب نے کہاکہ وکلاکام شروع کرنے کیلئے دن مقرر کریں،چیک لیکر سنگ بنیاد رکھنے کیلئے آجائیں گے،تقریب میں مدعو کرنے پر چاروں صوبے، اسلام آباد، آزاد جموں کشمیر اور گلگت بلتستان کے وکلارہنماو¿ں کا شکریہ ادا کرتا ہوں۔
محسن نقوی نے کہاکہ بین الصوبائی بار کونسلز اجلاس کی تقریب میں شمولیت میرے لئے اعزاز کی بات ہے،چیئرمین احسن بھون کے ساتھ دیرینہ تعلقات ہیں،میرا فرض ہے کہ وکلابرادری کی جائزخواہشات پوری کرنے کی کوشش کروں،آج رات تک پولیس کے فوکل پرسن کا نوٹیفکیشن جاری ہوجائے گا۔
ان کا کہناتھا کہ میرے بہت سے فیملی ممبر وکالت کے پیشے سے وابستہ ہیں،کوشش ہے کہ جتناوقت میسر ہے ریلیف دینے کیلئے جو کچھ کرسکتے ہیں کرلیں،محسن نقوی نے کہاکہ نگران حکومت کو اپنا کام کرنا ہے اور وقت مکمل ہونے پر گھر چلے جانا ہے،خیبر پختونخوا اور سندھ کے وز رااعلیٰ وکلا برادری سے ہیں جو بہت زبردست کام کررہے ہیں،پنجاب کے لائرز کا ڈیٹا مرتب کرنے کیلئے پی آئی ٹی بی کی معاونت کریں گے،یہ حکومت سے لائرز سے محبت کرنے والی حکومت ہے،کوشش ہے کہ وکلافرینڈلی حکومت ہوں اسی میں کامیابی ہے،

190 ملین پاؤنڈ اسکینڈل میں نیب نے چیئرمین پاکستان تحریک انصاف سے آج بھی تفتیش کی گئی ،نیب ٹیم نے عدالتی احکامات پر 15 نومبر کو جیل میں تفتیش کا آغاز کیا تھا، آج بھی نیب کی ٹیم تفتیش کیلئے جیل پہنچی تھی۔ جیل ذرائع کا کہنا ہے کہ اڈیالہ جیل میں نیب کی تین رکنی ٹیم نے چیئرمین پی ٹی آئی سے ڈھائی گھنٹے تک تفتیش کی۔نیب کی ٹیم تفتیش کرکے واپس روانہ ہوگئی۔
یاد رہے کہ اڈیالہ جیل میں احتساب عدالت کے جج محمد بشیر نے القادر ٹرسٹ اور 190 ملین پاؤنڈ کیس کی سماعت کرتے ہوئے نیب کو چیئرمین پی ٹی آئی سے جیل میں تفتیش کی اجازت دی۔
عدالت نے بشریٰ بی بی کی عبوری ضمانت میں 21 نومبر تک توسیع کر دی اور کیس کی سماعت بھی اسی روز تک ملتوی کر دی۔

امیر جماعت اسلامی سراج الحق نے کہا ہے کہ حکومت ملی تو ملک میں کو ایجوکیشن ختم کر کے خواتین کےلیے علیحدہ اسکولز، کالجز اور جامعات بنائیں گے۔ انہوں نے ان خیالات کا اظہار لیہ میں خواتین ورکرز کنونشن سے خطاب کے دوران کیا۔
سراج الحق نے کہا کہ جب سے پاکستان بنا ہے جنوبی پنجاب میں جاگیر داروں کی حکمرانی ہے۔ جنہوں نے جاگیر داروں کو چیلنج کیا ہے ان کی دعوت پر لیہ آیا ہوں۔
امیر جماعت اسلامی سراج الحق کا کہنا تھا کہ لیہ کی تاریخ میں خواتین کا سب یہ سےبڑا ورکرز کنونشن ہے۔ امیر جماعت اسلامی نے کہا کہ غزہ میں فلسطینی بچے اسرائیلی ٹینکوں کے سامنے کھڑے ہیں۔ ہم نے فلسطین کےلیے اسلام آباد میں امریکی سفارتخانہ کے باہر احتجاج ریکارڈ کرایا۔
انہوں نے کہا کہ جماعت اسلامی کی حکومت ہوتی تو نہ ڈاکٹر عافیہ قید ہوتی نہ کشمیر پر قبضہ ہوتا۔
انہوں نے کہا کہ جب پاکستان میں جماعت اسلامی کی حکومت ہوگی تعلیم مفت ہوگی۔ ہماری حکومت میں جو والد اپنی بچی کو تعلیم سے محروم کرے گا وہ جیل جائے گا۔ ہم یکساں تعلیمی نظام متعارف کرائیں گے۔امیر جماعت اسلامی نے کہا حکومت ملی تو سودی نظام کا خاتمہ کریں گے۔ خواتیں کے لیے علیحدہ اسکولز، کالجز اور جامعات بنائیں گے۔ سراج الحق نے کہا کہ کرپشن ختم کرکے 300 یونٹ تک بجلی مفت فراہم کریں گے۔

جیل خانہ جات پنجاب نے سابق وزیر اعلی کے بیان پر وضاحت دی ہے انکا کہنا ہے کہ اڈیالہ جیل میں ایسی کسی ملاقات کا کوئی سوال نہیں، چیئرمین پی ٹی آئی اور پرویز الہٰی کو اڈیالہ جیل میں الگ الگ جگہ رکھا گیا ہے، چیئرمین پی ٹی آئی سے پرویز الہٰی کی بھی اڈیالہ جیل میں کوئی ملاقات ہوئی نہ رابطہ ہوا۔سابق وزیر اعلیٰ پنجاب چوہدری پرویز الہٰی کی جانب سے چیئرمین پاکستان تحریک انصاف (پی ٹی آئی) سے یورپی یونین اور انٹرنیشنل مانیٹری فنڈ (آئی ایم ایف) نمائندگان کی ملاقاتوں کے دعویٰ پر جیل حکام کا مؤقف سامنے آگیا۔
ترجمان جیل خانہ جات کا کہنا ہے کہ چیئرمین پی ٹی آئی سے ان کی فیملی اور وکلاء کے سوا کسی کی ملاقات نہیں ہوئی، فیملی اور وکلاء سے ملاقاتوں کا باقاعدہ ریکارڈ بنایا جاتا ہے، اڈیالہ جیل کی سیکیورٹی کیلئے 300 سے زائد سی سی ٹی وی کیمروں کے ذریعے انسپکٹر جنرل (آئی جی) آفس میں نگرانی بھی کی جاتی ہے۔

پاکستان شوگر ملز ایسوسی ایشن پنجاب زون نے نگراں وزیر تجارت کو خط لکھ کرچینی کی برآمد کیلئےمدد مانگ لی خط کے متن میں کہا گیا ہے کہ نگراں وزیر تجارت اضافی چینی کی برآمد کا معاملہ وفاقی حکومت سے اٹھائیں، شوگرملز مالکان نے مزید ڈھائی لاکھ میٹرک ٹن چینی برآمد کرنے کی اجازت مانگ لی، خط میں مزید کہا گیا ہے کہ شوگر انڈسٹری سے 5 لاکھ میٹرک ٹن چینی کی برآمد کا وعدہ کیا گیا تھا۔ اس سال جنوری میں ڈھائی لاکھ ٹن چینی برآمد کی اجازت دی گئی تھی۔خط میں کہا گیا ہے کہ اضافی چینی کی برآمد سے 40 کروڑ ڈالر زرمبادلہ حاصل ہوگا۔پاکستان شوگر ملز ایسوسی ایشن نے اپنے خط میں کہا کہ شوگر ملز کے پاس31 اکتوبر 2023 تک11 لاکھ 30 ہزار ٹن چینی کا ذخیرہ تھا، چینی کا اضافی اسٹاک 2 ماہ سے زائد عرصے تک چلے گا۔