Category: ادب و مزاح

کسی کی یاد مرے دل میں اذاں دیتی ہے
میرے دل میں جو بسا ہے وہ مسلمان ہے کیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
معروف شاعرہ اور ادیبہ فرزانہ پروین مرحوم مشتاق انور اور امینہ خاتون کے ہاں کولکاتا میں 19 دسمبر 1999 پیدا ہوئیں، انہوں نے
ایم-اے (اردو، بی-ایڈ اور ڈی-ایل-ایڈ تک تعلیم حاصل کی اور درس و تدریس کے شعبہ سے وابستہ رہیں انہوں نے 2017 میں باقاعدی شاعری کا آغاز کیا-

ان کے پسندیدہ شاعر میر تقی میر، مرزا غالب، احمد فراز، فیض احمد فیض، پروین شاکراور احمد کمال حشمی، خورشید طلب ہیں ان کا مشغلہ شعری و نثری کتب کا مطالعہ کرنا، سیر و تفریح کرنا، کلاسیکی شعرا کی غزلیں اور پرانے گانے سننا ہے-

غزل
۔۔۔۔۔۔۔۔
پانے کا ذکر کیا کہ گنوانا بہت ہوا
دل اس کی بے رخی کا نشانہ بہت ہوا
خوابوں کی گٹھری لاد کے کب تک جئیں گے ہم
پلکوں پہ ان کا بار اٹھانا بہت ہوا
ہوتا ہے درد، جب کبھی آ جائے اس کا ذکر
گو زخمِ دل ہمارا پرانا بہت ہوا
مجھ کو نہیں قبول تمہارا کوئی جواز
اب روز روز کا یہ بہانہ بہت ہوا
اوروں کے درد و غم کا پتا چل گیا ہے نا
اب تو ہنسو کہ رونا رلانا بہت ہوا
تعبیر چاہیے مجھے، تدبیر کیجئے
آنکھوں کو خواب واب دکھانا بہت ہوا
فرزاؔنہ کوئی بات غزل میں نئی کہو
ذکرِ وصال و ہجر پرانا بہت ہوا

غزل
۔۔۔۔۔
میں منتظر ہوں، تُو کر ہجر کا گِلہ تو سہی
گزارے کیسے شب و روز یہ بتا تو سہی
میں ہم قدم ہی نہیں ہم سفر بھی ہوں تیری
میں اپنا ہاتھ بڑھاؤں گی لڑکھڑا تو سہی
پگھل نہ جاؤں ترے جذبوں کی تپش سے میں
نگاہیں اپنی مرے چہرے سے ہٹا تو سہی
لحاظ پچھلے تعلق کا اس نے کچھ تو کیا
مری صدا پہ وہ پل بھر کو ہی رکا تو سہی
میں اپنے شعروں کے پیکر میں ان کو ڈھالوں گی
تو اپنا حالِ غمِ دل کبھی سنا تو سہی
طلب نہیں نئے قول و قرار کی مجھ کو
کیا تھا مجھ سے جو وعدہ کبھی، نبھا تو سہی
میں کیسے کہہ دوں کہ الفت میں کچھ نہیں پایا
ملا نہ وہ، نہ سہی، اس کا غم ملا تو سہی

غزل
۔۔۔۔۔
کوئی بھی یہاں ہوش سے بیگانہ نہیں ہے
اس دور میں دیوانہ بھی دیوانہ نہیں ہے”
تم یاد تو آتے ہو مگر آتے نہیں ہو
یہ طور کسی طرح شریفانہ نہیں ہے
ہے دور تلک پھیلا ہوا شورِ خموشی
اس دل سے بڑا کوئی بھی ویرانہ نہیں ہے
گہرائی کا اندازہ نہیں سطح سے ممکن
جذبات کو جو ناپے وہ پیمانہ نہیں ہے
اے شمع دوانے ترے ہیں کتنے پتنگے
ہو جائے جو قربان وہ پروانہ نہیں ہے
اندازِ سخاوت مرا شاہانہ ہے لیکن
اندازِ طلب اُس کا فقیرانہ نہیں ہے
دریافت کیا میں نے کہ ہے کیوں یہ اداسی
لوگوں نے کہا بزم میں فرزاؔنہ نہیں ہے

غزل
۔۔۔۔۔
لفظوں کے جال میں کیوں الجھا ہے نادان ہے کیا
اذن ملنا غمِ دل کہنے کا، آسان ہے کیا
کسی کی یاد مرے دل میں اذاں دیتی ہے
میرے دل میں جو بسا ہے وہ مسلمان ہے کیا
آگ لگتی ہے تو ہوتا ہے دھواں بھی ہر سو
اب تلک میری محبت سے وہ انجان ہے کیا
سارے زخموں کو ہرے کرتا ہے اک تیرا خیال
یاد تیری مرے زخموں کی نگہبان ہے کیا
زخم اب کوئی نیا دیتا نہیں ہے مجھ کو
بے وفا اپنی جفاؤں پہ پشیمان ہے کیا
آشنائی کی جھلک اس کی نگاہوں میں نہیں
آنے والے کسی خطرے کا یہ امکان ہے کیا
ایک اک پل یہ جدائی کا ہے صدیوں پہ محیط
اور اس طرح سے جینا کوئی آسان ہے کیا
درد اتنا ترے لہجے میں کہاں سے آیا
تیرے کمرے میں کہیں میر کا دیوان ہے کیا
آندھی سی اٹھتی ہے فرزاؔنہ کے دل میں ہر پل
اس کے سینے میں بھی برپا کوئی طوفان ہے کیا

آخری شب دید کے قابل تھی بسمل کی تڑپ
صبح دم کوئی اگر بالائے بام آیا تو کیا

رام پرساد بسمل ہندوستان کے مجاہد آزادی اورانقلابی 11 جون 1897ء کو اتر پردیش کےگاؤں شاہ جہان پور میں پیدا ہوئے رام پرساد بسمل ہندوستان کے ایک انقلابی اور معروف مجاہد آزادی تھے نیز وہ معروف شاعر، مترجم، ماہر السنہ، مورخ اور ادیب بھی تھے ہندوستان کی آزادی کے لیے ان کی کوششوں کو دیکھ کر انگریزوں نے انہیں خطرہ جانتے ہوئے پھانسی کی سزا دے دی تھی۔

وہ کانگریس کے رکن تھے اور ان کی رکنیت کے حوالے سے کانگریسی رہنما اکثر بحث کرتے تھے، جس کی وجہ بسمل کا آزادی کے حوالے سے انقلابی رویہ تھا، بسمل کاکوری ٹرین ڈکیتی میں شامل رہے تھے، جس میں ایک مسافر ہلاک ہو گيا تھا۔

بسمل ان کا اردو تخلص تھا جس کا مطلب مجروح (روحانی طور پر ) ہے۔ بسمل کے علاوہ وہ رام اور نا معلوم کے نام سے بھی مضمون لکھتے تھے اور شاعری کرتے تھے۔ انہوں نے سن 1916ء میں 19 سال کی عمر میں انقلابی راستے میں قدم رکھا اور 30 سال کی عمر میں پھانسی چڑھ گئے۔

11 سال کی انقلابی زندگی میں انہوں نے کئی کتابیں لکھیں اور خود ہی انہیں شائع کیا۔ ان کتابوں کو فروخت کرکے جو پیسہ ملا اس سے وہ ہتھیار خریدا کرتے اور یہ ہتھیار وہ انگریزوں کے خلاف استعمال کیا کرتے۔ انہوں نے کئی کتابیں لکھیں، جن میں 11 کتابیں ہی ان زندگی کے دور میں شائع ہوئیں۔ برطانوی حکومت نے ان تمام کتابوں کو ضبط کر لیا۔

بنكم چندر چٹوپادھیائے نوشتہ وندے ماترم کے بعد رام پرساد بسمل کی تخلیق سرفروشی کی تمنا نے کارکنانِ تحریکِ آزادی میں بہت مقبولیت پائی۔

بسمل ان کا تخلص تھا بسمل کے علاوہ رام اور نامعلوم کے نام سے مضمون وغیرہ لکھتے تھےرام پرساد کو 30 سال کی عمر میں 19 دسمبر 1927ء کو برطانوی حکومت نے گورکھپور جیل میں پھانسی دے دی۔

كاكوری سانحہ کا مقدمہ لکھنؤ میں چل رہا تھا۔ پنڈت جگت نارائن ملا سرکاری وکیل کے ساتھ اردو کے شاعر بھی تھے۔ انہوں نے ملزمان کے لئے ” ملازم ” لفظ بول دیا۔ پھر کیا تھا، پنڈت رام پرساد بسمل نے جھٹ سے ان پر یہ چٹیلی پھبتی کسی:

ملازم ہم کو مت کہئے، بڑا افسوس ہوتا ہے
عدالت کے ادب سے ہم یہاں تشریف لائے ہیں
پلٹ دیتے ہیں ہم موج حوادث اپنی جرات سے
کہ ہم نے آندھیوں میں بھی چراغ اکثر جلائے ہیں

جب بسمل کو شاہی كونسل سے اپیل مسترد ہو جانے کی اطلاع ملی تو انہوں نے اپنی ایک غزل لکھ کر گورکھپور جیل سے باہر بھجوائی

مٹ گیا جب مٹنے والا پھر سلام آیا تو کیا !
دل کی بربادی کے بعد انکا پیام آیا تو کیا !

مٹ گئیں جب سب امیدیں مٹ گئے جب سب خیال ،
اس گھڑی گر نام اور لیکر پیام آیا تو کیا !

اے دل نادان مٹ جا تو بھی کوئے یار میں ،
پھر میری ناکامیوں کے بعد کام آیا تو کیا !

کاش! اپنی زندگی میں ہم وہ منظر دیکھتے ،
یوں سرے تربت کوئی محشرخرام آیا تو کیا !

آخری شب دید کے قابل تھی ‘بسمل’ کی تڑپ ،
صبح دم کوئی اگر بالائے بام آیا تو کیا !

پیدائش:16 دسمبر 1775ء
وفات:18 جولا‎ئی 1817ء
ونچیسٹر
مدفن:ونچیسٹر کیتھیڈرل
طرز وفات:طبعی موت
شہریت:مملکت برطانیہ عظمی
مادری زبان:انگریزی
کارہائے نمایاں:تکبر اور تعصب، شعور و احساس

جین آسٹن(16دسمبر 1775ء – 18جولائی 1817ء) انگریزی کے عظیم ناول نگاروں میں سے ایک، موجودہ دور کے بعض نقادوں کے نزدیک اس کے ناول ”پرائڈ اینڈ پریجوڈس“ کا شمار دنیا کے دس عظیم ناولوں میں کیا جا سکتا ہے۔
سوانح
۔۔۔۔۔۔۔۔۔۔۔۔۔۔۔۔۔۔۔۔
جین ایک پادری کی لڑکی تھی۔ اپنی زندگی کے ابتدائی 25 سال اس نے ہیمپ شائر میں اپنے باپ کے ساتھ گرجا میں گزارے۔ یہیں اس نے اپنے تین مشہور ناول تکبر و تعصب (Pride and Prejudice)، شعور و احساس (Sense and Sensibility) اور نارتھینجر ایبے (Northanger Abbey) لکھے جو بہت بعد میں شائع ہوئے۔ باپ کے انتقال کے بعد پورا خاندان ہمپ شائر میں چاٹن کاٹیج منتقل ہو گیا۔ آخر عمر تک جین یہیں رہی۔ ایک پادری کی لڑکی کے قلم سے ایسی ناول نگاری اس دور کے سماج کے لیے قابل قبول نہیں تھی۔ اس لیے یہ ناول لکھنے کے کافی عرصہ بعد چھپے اور وہ بھی فرضی نام سے البتہ قریبی دوست احباب کو اس کا علم تھا۔ اس کا ناول نارتھینجر ایبے مسز ریڈ کلف کے اسکول کے رومانوں پر ایک نہایت پر لطف اور طنزیہ ناول ہے جس کا مسودہ 1803ء میں صرف دس پاؤنڈ میں فروخت ہوا تھا۔ جین نے ان ناولوں پر خاص طور سے ان کی زبان پر کافی محنت کی تھی لیکن اس کی زندگی میں اسے کوئی شہرت نہ ملی۔ اس کے سارے ناول صوبائی سماج میں رہنے والے شرفا کے اطراف گھومتے ہیں۔ اکثر قصوں میں شادی کے قابل لڑکیوں کے لیے شوہر کی تلاش اصل موضوع ہے۔ جین اپنی اعلیٰ نثر کے لیے مشہور ہے۔ وہ اپنے ناولوں میں کرداروں کو شطرنج کے مہروں کی طرح بڑی چابک دستی کے ساتھ گھماتی ہے۔ اخلاقی قدریں بڑی گہری ہیں۔ پلاٹ میں ہلکا طنز ومزاح ہے۔ وہ بیوقوف، بر خود غلط سیدھے سادے لوگوں کا خوب مذاق اڑاتی ہے۔ اس کا شمار انگریزی زبان کے بڑے ناول نگاروں میں ہوتا ہے۔ اس کی تصنیفات الگ الگ مجموعے کی شکل میں بھی چھپتی رہتی ہیں۔ اس کی سوانح حیات بھی شائع ہوئی ہے۔
ایک نیلامی میں جین آسٹن کی ہاتھ سے لکھی ہوئی دستاویزات 993250 پاؤنڈ میں فروخت ہوئی ہیں۔
تصنیفات
۔۔۔۔۔۔۔۔۔۔۔۔۔۔۔۔۔۔۔۔
تکبر و تعصب (Pride and Prejudice)
شعور و احساس (Sense and Sensibility)
مینزفیلڈ پارک (Mansfield Park)
ایما (Emma)
نارتھینجر ایبے (Northanger Abbey)
ترغیب (Persuasion)