Category: بلاگ

خدارا ! مساجد کو چرچ نہ بنائیں
تحریر: ڈاکٹر غلام مصطفی بڈانی
مساجد مسلمانوں کے لیے اللہ کی عبادت کا مرکز اور روحانی اجتماع کی جگہ ہیں۔ یہ وہ مقدس مقامات ہیں جہاں تمام مسلمان ایک صف میں کھڑے ہو کر، کندھے سے کندھا ملا کر اللہ کی بارگاہ میں جھکتے ہیں۔ یہاں نہ کوئی بڑا ہے، نہ چھوٹا، سب برابر ہیں۔ لیکن حالیہ دور میں مساجد میں ایک نیا رجحان دیکھنے میں آیا ہے، جسے "کرسی کلچر” کہا جاتا ہے۔ یہ رجحان نہ صرف اسلامی تعلیمات بلکہ مساجد کی اصل روح کے بھی خلاف ہے۔

اسلام نے نماز کو عبادت کے ساتھ ساتھ اتحاد، مساوات اور اجتماعیت کی عملی تصویر بنایا ہے۔ صف بندی میں تمام مسلمانوں کو کندھے سے کندھا ملا کر کھڑے ہونے کا حکم دیا گیا ہے تاکہ کسی قسم کی تفریق باقی نہ رہے۔ لیکن کرسی کلچر کے بڑھتے ہوئے رجحان نے اس اجتماعیت کو متاثر کرنا شروع کر دیا ہے۔ بعض افراد معمولی تھکن یا ذاتی سہولت کے لیے کرسیوں پر نماز پڑھتے ہیں حالانکہ ان کے لیے کھڑے ہو کر نماز ادا کرنا ممکن ہوتا ہے۔

یہ رجحان نماز کے اصولوں کے خلاف ہے کیونکہ کرسیوں کی موجودگی سے صفوں میں خلا پیدا ہوتا ہے اور اجتماعیت کی روح متاثر ہوتی ہے۔ مزید برآں یہ رویہ مساجد کو چرچ کی مشابہت دینے لگا ہے، جہاں عبادات زیادہ تر نشستوں پر بیٹھ کر کی جاتی ہیں۔ چرچ کا طرز عبادت اسلامی ثقافت اور مساجد کے روحانی ماحول سے مختلف ہے اور مساجد کو اس سے مماثل بنانا اسلامی اقدار کے لیے نقصان دہ ہے۔

اسلام ایک ایسا دین ہے جو عبادت میں سہولت فراہم کرتا ہے۔ معذور افراد کے لیے کرسی یا بیٹھ کر نماز پڑھنے کی اجازت دی گئی ہے، جیسا کہ قرآن پاک میں اللہ تعالی نے فرمایا "اللہ کسی جان پر اس کی طاقت سے زیادہ بوجھ نہیں ڈالتا (البقرہ 286 )اور رسول اللہ ۖ نے فرمایا "نماز کھڑے ہو کر پڑھو، اگر استطاعت نہ ہو تو بیٹھ کر اور اگر اس کی بھی طاقت نہ ہو تو پہلو کے بل لیٹ کر(صحیح بخاری)لیکن یہ رعایت صرف حقیقی ضرورت کے تحت دی گئی ہے نہ کہ ذاتی سہولت کے لیے۔

مساجد میں کرسی کلچر کا بڑھتا ہوا رجحان ایک ایسے عمل کو فروغ دے رہا ہے جو مساجد کے روحانی ماحول کو چرچ کے طرز عبادت سے قریب کر رہا ہے۔ یہ تبدیلی نہ صرف مساجد کی ثقافت بلکہ اسلامی تعلیمات کے بنیادی اصولوں یعنی مساوات اور اتحادکو بھی متاثر کر رہی ہے۔ کرسیوں کے غیر ضروری استعمال سے مساجد کی صف بندی متاثر ہوتی ہے اور ایک ناپسندیدہ تفریق پیدا ہو جاتی ہے جو اسلامی روح کے خلاف ہے۔

یہ وقت ہے کہ علما ء و آئمہ کرام اس مسئلے پر توجہ دیں اور عوام کو مساجد کے اصل مقصد اور عبادات کے اصولوں سے آگاہ کریں۔ کرسی کا استعمال صرف ان افراد تک محدود ہونا چاہیے جو واقعی معذور ہیں اور کھڑے ہو کر یا زمین پر بیٹھ کر نماز ادا نہیں کر سکتے۔ اس کے علاوہ معذور افراد کو زمین پر بیٹھ کر نماز پڑھنے کی حوصلہ افزائی کی جانی چاہیے، جیسا کہ نبی کریم ۖ کے زمانے میں ہوتا تھا۔

مساجد کو ان کے اصل مقصد کے لیے محفوظ رکھنا ہم سب کی ذمہ داری ہے۔ مساجد عبادت، مساوات اور اتحاد کی علامت ہیں اور ان کی اس حیثیت کو برقرار رکھنا ضروری ہے۔ خدارا ! مساجد کو چرچ نہ بنائیں۔ عبادات کو ان کی اصل روح کے مطابق ادا کریں اور اسلامی اقدار پر عمل کرتے ہوئے مساجد کے روحانی اور اجتماعی ماحول کو محفوظ رکھیں۔ اللہ تعالی ہمیں دین کی صحیح سمجھ اور اس پر عمل کرنے کی توفیق عطا فرمائے۔ آمین۔

سال بدلے لیکن ہم نہ بدل سکے؟
تحریر:فیصل رمضان اعوان

جنوری کی کچھ صبحیں اور کچھ شامیں گزر چکی ہیں۔ سال نو 2025ء کا آغاز ہو چکا ہے۔ یکم جنوری کو بہت دیر تک نئے سال کی مبارکباد کے فون آتے رہے۔ لفظ "مبارک” چونکہ خیر کا لفظ ہے، طبیعت پر گراں نہیں گزرتا اور اچھا لگتا ہے۔ لیکن مسلسل دن بھر اس جشنِ بے ہودہ کو یاد کرواتے رہنا اور شہر میں رات بھر شرلیاں چھوڑنے اور چھچھورے پن سے ہمیں سخت نفرت اور چڑھ ہے۔ نئے آنے والے سال کا اس طرح بے ہودہ طریقے سے استقبال کرنا اور جشن منانا ہماری سمجھ سے باہر ہے۔ بس یہی کہنا کافی ہے کہ اللہ آپ کی زندگی میں آنے والے نئے سال کو آپ کے لئے خیر و برکت اور عافیت کا سال بنائے۔ ہم تو نئے سال کو بس اتنا ہی اہم سمجھتے ہیں۔ نئے سال کے استقبال کا طریقہ ہی انوکھا ہے۔ ہم بھی نجانے کس معاشرے کے پیروکار بن بیٹھے ہیں۔ پٹاخے، آتشبازی، رنگ رلیاں، مہ نوشیاں، ہمارے کرنے کے کام نہیں تو ہم ایسا کیوں کر کریں؟ لیکن خیر، ہم جدید اور تیزترین ترقی کی شاہراہوں پر ہیں۔

ہمارے گزرے ماہ و سال کیسے بیتے ہیں، ہم سب اس ستم کا شکار رہے۔ سیاسی ماحول پر ہم سے نہیں لکھا جاتا اور آج کل کا گرما گرم سیاسی ماحول تو ویسے بھی فل گرم ہے۔ ایسے میں ہمارے تخیل میں دھواں سا بھر جاتا ہے۔ ان حالات میں ہم تو کچھ لکھنے سے بھی گئے ہیں، لکھنے کی کیفیت اب بنتی ہی نہیں، تو کیسے لکھا جائے؟ آزادی رائے کا حق مکمل طور پر چھینا جا چکا ہے۔

پیارے وطن کا معاشرہ بھی کچھ عجیب سا ہوگیا ہے۔ آپ کسی بھیڑ میں چلے جائیں، جاکر کسی سے پوچھنے کی ضرورت ہی نہیں، ان مایوس چہروں کو ہی پڑھ لیں، اتنا ہی کافی ہے۔ کچھ عرصہ پہلے دنیا بھر میں آنے والے مہلک وائرس کرونا نے تباہی مچائی۔ اس سے معاشی طور پر انتہائی مضبوط ممالک بھی متاثر ہوئے۔ سب سنبھل گئے اور بدقسمتی سے جس خطے میں ہمارا ٹھکانہ ہے، ہم آج تک نہ سنبھل سکے۔ تنکوں کی طرح بکھر کر رہ گئے۔ ہمارے ہاں اقتدار کے حصول کے لئے وہ شیطانی کھیل کھیلا جاتا ہے جسے عام آدمی سمجھ ہی نہیں سکتا۔ اور اس عام بے بس طبقے کو ایسے خوار کیا جاتا ہے کہ ان کا جینا مشکل ہو جاتا ہے۔

بجلی کے ظالمانہ بلوں کی بات کی جائے تو عام آدمی کی جان نکال دی گئی ہے۔ اتنی بے تحاشہ ناجائز دولت جمع کرکے بندر بانٹ کا شکار کی جارہی ہے۔ یہ بدترین ڈاکہ ڈال کر صرف اپنی جیبیں بھری جا رہی ہیں۔ اس ظلم کی وجہ سے صنعتیں بند ہو گئی ہیں، معاشی اعداد و شمار کو پڑھیں، آنکھیں کھل جائیں گی۔ عملی طور پر اس وقت ہم مافیا کے مکمل نرغے میں ہیں اور اس طاقتور مافیا کی سرپرستی بھی کمال سے کی جارہی ہے۔ بادشاہت کا کہنا ہے کہ مہنگائی کم ہو رہی ہے، ہمارے میڈیا کے کنٹرولڈ چینل بھی یہی بتا رہے ہیں، لیکن مہنگائی کم نہیں ہوئی بلکہ مزید بڑھ رہی ہے۔ ہمارے لوگ تو ان اذیت ناک ماہ و سال سے گزر رہے ہیں، پھر کیسے جشن؟

سال نو کے ایسے بے ہودہ استقبال سے بہتر ہے رہنے دیں، بس یونہی گزرتے جائیں، گزرے اور آنے والے سال کے قصوں کو چھوڑیں۔ وقت اتنی برق رفتاری سے آگے بڑھ رہا ہے کہ اب تو خوف محسوس ہوتا ہے۔ ہر گزرتے سال کے ساتھ وقت کی دھول میں کھو جانے کا احساس مزید گہرا ہونے لگتا ہے۔ جو گزر گیا، وہ واپس نہیں آئے گا اور جو آنے والا ہے اس کی خبر نہیں، کیسے گزرے گا۔ رہنے دیں صاحبو، ہم ایسے جشن مناتے ہی نہیں۔ ہر گزرتے سال کے ساتھ ہمارے کندھے جھکتے جا رہے ہیں، توانائیاں، طاقت آہستہ آہستہ ختم ہوتی جا رہی ہیں۔ کیا ہم آنے والے ان اذیت ناک لمحات کو پر مسرت بنانے کا یہ طریقہ درست کہہ دیں؟ ہرگز نہیں، کیونکہ زندہ رہے تو یہ ہوشیاریاں، یہ توانائیاں آنے والے سالوں میں ہمیں محتاج، کمزور، اور بیمار بنا دیں گی۔ یہ سب کتنا تکلیف دہ ہوگا؟ سال نو کے یہ جشن، یہ خوشیاں ہمیں راس نہیں آئیں گی۔

دعا ہے کہ نیا سال پوری قوم کے لیے خوشیوں کا باعث بنے، یہ گلشن مہکنے لگے اور ہم سب امن و سکون میں رہیں۔ یہ ملک امن کا گہوارا بن جائے۔ اللہ رب العزت اس ملک پر رحم فرمائے اور جینا آسان ہو جائے۔ یہ سال ہمیشہ بدلتے رہتے ہیں، لیکن نجانے ہمارے دن کیوں نہیں بدلتے؟ اب تو رہبر رہزن لگتے ہیں، مسیحا فرعون بن جاتے ہیں۔
الٰہی تو کرم فرمائے
خدا کرے کہ میری ارض پاک پر اترے
وہ فصل گل جسے اندیشہ زوال نہ ہو۔

نیا سال 2025، آؤ محبتیں بانٹنے کا عہد کریں
تحریر:شاہد نسیم چوہدری
سال 2025 کی آمد ایک نئی صبح، نئی امیدوں، اور نئے عزم کے ساتھ ہوئی ہے۔ یہ وقت ہے کہ ہم اپنی زندگی کی کتاب میں ایک نیا باب شروع کریں۔ میرے لیے یہ موقع ذاتی اور قومی سطح پر اہمیت رکھتا ہے۔ میں اپنے دل کے جذبات کو لفظوں میں سمیٹتے ہوئے ان سب لوگوں کے لیے نیک تمنائیں پیش کرنا چاہتا ہوں جو میری زندگی کا حصہ ہیں اور جنہوں نے میری زندگی کو محبت، خلوص، اور خوشیوں سے بھر دیا ہے۔

سب سے پہلے میں اپنی شریکِ حیات کا ذکر کرنا چاہوں گا، جو میری زندگی کی بنیاد ہیں۔ وہ نہ صرف میری شریکِ حیات ہیں بلکہ میری بہترین دوست، میرے خوابوں کی ساتھی، اور میرے مشکل وقت کی طاقت ہیں۔ ان کی محبت اور خلوص نے مجھے وہ اعتماد دیا ہے جس کی بدولت میں اپنی زندگی میں آگے بڑھ پایا ہوں۔

میرے دل سے دعا ہے کہ اللہ انہیں ہمیشہ خوش رکھے، صحت مند رکھے، اور ان کی زندگی میں ہر لمحہ خوشیوں کا گزر ہو۔ ان کی دعائیں میرے لیے ہر میدان میں کامیابی کی وجہ بنی ہیں۔ ان کی محبت کا قرض کبھی ادا نہیں ہو سکتا، لیکن نئے سال پر میرا عزم ہے کہ میں انہیں مزید خوشیاں دوں اور ان کے لیے اپنی محبت اور خلوص کو مزید مضبوط بناؤں۔

میرے بچے میری زندگی کا سب سے بڑا اثاثہ ہیں۔ ان کے ہنستے چہرے اور معصوم باتیں میرے دل کو خوشی اور سکون عطا کرتی ہیں۔ ان کی تعلیم و تربیت، بہتر مستقبل، اور خوشحال زندگی میری اولین ترجیح ہے۔
2025 میں میری دعا ہے کہ اللہ میرے بچوں کو علم، عقل، اور نیک اعمال کی دولت سے نوازے۔ میں ان کے لیے محبت، تربیت، اور بہترین مواقع فراہم کرنے کی کوشش جاری رکھوں گا تاکہ وہ ایک بہترین انسان بن سکیں اور معاشرے میں مثبت کردار ادا کریں۔

میرے والدین میری دعاؤں کا محور ہیں۔ ان کی قربانیوں اور محبت نے مجھے آج یہاں تک پہنچایا ہے۔ ان کی دعاؤں کے بغیر میرا کوئی قدم کامیاب نہیں ہو سکتا۔ میرے بہن بھائی بھی میری زندگی کی خوشیوں کا حصہ ہیں۔ ان کے ساتھ گزرا ہوا ہر لمحہ میری زندگی کے خوبصورت ترین لمحات میں شامل ہے۔2025 میں میری دعا ہے کہ اللہ میرے والدین کو صحت اور سکون عطا کرے اور میرے بہن بھائیوں کو خوشیوں اور کامیابیوں سے نوازے۔ ان کے لیے میری محبت کبھی کم نہیں ہو سکتی اور میں ہمیشہ ان کے لیے دعاگو رہوں گا۔

میرے دوست اور احباب میری زندگی کا ایک اہم حصہ ہیں۔ ان کے ساتھ گزرے ہوئے لمحات میری زندگی کو رنگین اور خوشگوار بناتے ہیں۔ میں ان سب کا شکر گزار ہوں جنہوں نے ہر موقع پر میرا ساتھ دیا، مجھے سمجھا، اور میرے دکھ سکھ کے ساتھی بنے۔
2025 میں میری دعا ہے کہ میرے دوست اور رشتہ دار ہمیشہ خوشحال رہیں۔ ان کے لیے میری محبت اور خلوص کبھی کم نہیں ہوگا۔ میں امید کرتا ہوں کہ ہمارا تعلق مزید مضبوط ہوگا اور ہم ہمیشہ ایک دوسرے کے لیے سہارا بنیں گے۔

ادب میری زندگی کا ایک اہم حصہ ہے، اور میرے ادبی ساتھی میری سوچ اور خیالات کو نکھارنے کا ذریعہ ہیں۔ ان کے ساتھ کی گئی گفتگو، تبادلہ خیال، اور ادبی نشستیں ہمیشہ مجھے تحریک دیتی ہیں۔میری دعا ہے کہ 2025 میں تمام ادبی ساتھی مزید کامیاب ہوں۔ ان کا قلم مزید طاقتور ہو، اور وہ اپنی تحریروں کے ذریعے معاشرے میں مثبت تبدیلی لانے میں کامیاب ہوں۔ میں دعا کرتا ہوں کہ وہ ادب کی دنیا میں نئی بلندیوں کو چھوئیں اور اپنے کام سے لوگوں کے دل جیتیں۔

میرا ادارہ "پہچان پاکستان نیوز” اور "ورلڈ کالمسٹ کلب” میری زندگی کے اہم ستون ہیں۔ ان کے ذریعے میں نے اپنی آواز کو لوگوں تک پہنچانے اور معاشرے میں مثبت کردار ادا کرنے کا موقع پایا۔ 2025 میں میری دعا ہے کہ یہ دونوں ادارے مزید ترقی کریں اور اپنی خدمات کے ذریعے ملک و قوم کے لیے بہترین کردار ادا کریں۔ میری نیک تمنائیں ان تمام لوگوں کے ساتھ ہیں جو ان اداروں کا حصہ ہیں اور جو ان کی کامیابی کے لیے دن رات محنت کرتے ہیں۔

پاکستان ہماری پہچان ہے، ہماری جان ہے۔ اس وطن کی محبت ہمارے دلوں میں رچی بسی ہوئی ہے۔ یہ ملک ہمیں ہر طرح کی آزادی اور مواقع فراہم کرتا ہے، اور اس کا تحفظ ہماری ذمہ داری ہے۔ پاک فوج ہماری سرحدوں کی محافظ ہے، ہماری آزادی کی ضامن ہے۔ ان کے بغیر ہم اپنی زندگی کے بارے میں تصور بھی نہیں کر سکتے۔ میں پاک فوج کے جوانوں کو سلام پیش کرتا ہوں جو اپنی جانوں کا نذرانہ پیش کر کے ہمارے لیے سکون اور تحفظ یقینی بناتے ہیں۔

2025 میں میری دعا ہے کہ ہمارا ملک ترقی کی راہ پر گامزن ہو اور دنیا کے صفِ اول کے ممالک میں شامل ہو۔ میں دعا کرتا ہوں کہ پاک فوج ہمیشہ مضبوط اور کامیاب رہے، اور ہمارے جوان اپنی عظیم قربانیوں کے بدلے میں عزت اور محبت کے حقدار بنیں۔

نیا سال محبت، امید، اور خلوص کے جذبات کے بغیر مکمل نہیں ہو سکتا۔ یہ وہ عناصر ہیں جو زندگی کو خوبصورت اور کامیاب بناتے ہیں۔ محبت دلوں کو جوڑتی ہے، انسانیت کو قریب لاتی ہے، اور معاشرے میں ہم آہنگی پیدا کرتی ہے۔ امید زندگی کی مشکلات کا مقابلہ کرنے کی طاقت دیتی ہے اور نئے خواب دیکھنے کی جرات پیدا کرتی ہے۔
خلوص ہر عمل کو خوبصورت اور کامیاب بناتا ہے۔

2025 میں ہمیں ان تین عناصر کو اپنی زندگی کا حصہ بنانا ہوگا۔ ہمیں اپنے اردگرد محبت پھیلانی ہوگی، ایک دوسرے کے لیے امید کا باعث بننا ہوگا، اور اپنے اعمال میں خلوص کا مظاہرہ کرنا ہوگا۔ سال 2025 کی آمد ہمیں موقع فراہم کرتی ہے کہ ہم اپنی زندگی کو بہتر بنانے، اپنے تعلقات کو مضبوط کرنے، اور اپنے ملک کی ترقی میں حصہ ڈالنے کے لیے نئے عزم کے ساتھ آگے بڑھیں۔ یہ وقت ہے کہ ہم اپنی غلطیوں سے سیکھیں اور اپنی زندگی کو محبت، امید، اور خلوص سے بھرپور بنائیں۔

میری دعا ہے کہ نیا سال سب کے لیے خوشیوں، کامیابیوں، اور سکون کا سال ثابت ہو۔ اللہ سب کو صحت، خوشحالی، اور کامیابی عطا کرے اور ہمیں اپنے وطن پاکستان کی خدمت کا موقع فراہم کرے۔ آمین!
آؤ ہم سب محبتیں بانٹنے کا عہد کریں۔۔۔!!

پاک روس مضبوط ہوتے رشتے اور امریکی پابندیاں
تحریر:ڈاکٹرغلام مصطفی بڈانی
پاکستان اور روس کے تعلقات میں حالیہ پیش رفت نے دونوں ممالک کے روابط کو ایک نئے دور میں داخل کر دیا ہے، جس سے سوال اٹھتا ہے کہ کیا امریکہ اس بڑھتے ہوئے اتحاد کو روکنے میں کامیاب ہو پائے گا؟

روس پاکستان کے لیے ایک اہم شراکت دار بن کر ابھرا ہے جو نہ صرف اقتصادی اور تجارتی شعبوں میں مدد فراہم کر رہا ہے بلکہ پاکستان کی آزاد خارجہ پالیسی کو بھی مستحکم بنانے میں اہم کردار ادا کر سکتا ہے۔ روس کی جانب سے توانائی کے شعبے میں پیش کیے جانے والے وسیع مواقع، جیسے گیس پائپ لائن منصوبے اور خام تیل کی برآمد، پاکستان کے لیے فائدہ مند ثابت ہو رہے ہیں۔ مزید برآں روس اور پاکستان کے درمیان تجارتی روابط کو مضبوط بنانے کے لیے کارگو ٹرین منصوبے جیسے اقدامات کیے جا رہے ہیں جو پاکستان کو عالمی تجارتی نیٹ ورک کا حصہ بنانے میں مددگار ثابت ہو سکتے ہیں۔

پاکستان کے آزاد خارجہ تعلقات کے تناظر میں روس کے ساتھ تعلقات کی یہ نئی پیش رفت نہ صرف اقتصادی استحکام بلکہ دفاعی تعاون میں بھی اہمیت رکھتی ہے۔ دونوں ممالک نے مشترکہ فوجی مشقوں اور دفاعی معاہدوں پر بھی کام کیا ہے جو ان کے رشتہ کو مزید مستحکم کرتا ہے۔

تاہم امریکہ نے حالیہ دنوں میں پاکستان پر اقتصادی پابندیاں عائد کی ہیں، خاص طور پر اس کے میزائل پروگرام پرتاکہ پاکستان کو روس کے قریب جانے سے روکا جا سکے۔ امریکہ کے اس اقدام کا مقصد جوہری ہتھیاروں کے پھیلا ئوکو روکنا بتایا جا رہا ہے لیکن حقیقت یہ ہے کہ یہ ایک ناکام کوشش معلوم ہوتی ہے جو پاکستان کی خودمختاری میں مداخلت کی غماز ہے۔

پاکستان کی وزارت خارجہ نے ان پابندیوں کو تعصب پر مبنی اور بدقسمتی قرار دیتے ہوئے کہا ہے کہ یہ خطے کے استحکام کو نقصان پہنچائیں گی۔ ان پابندیوں کے باوجود پاکستان نے روس کے ساتھ اپنے اقتصادی، تجارتی اور دفاعی تعلقات کو مزید مستحکم کرنے کے لیے کئی اہم اقدامات کیے ہیں، جیسے نارتھ سائوتھ ٹرانسپورٹ کوریڈور میں شمولیت اور دیگر مشترکہ منصوبوں کی منصوبہ بندی۔

پاکستانی تھنک ٹینکس اور پالیسی سازوں کو چاہیے کہ وہ پاکستان کی آزاد خارجہ پالیسی، قومی مفادات اور خطے میں روس کے کردار کو مدنظر رکھتے ہوئے اپنی خارجہ پالیسی تشکیل دیں اور امریکی پابندیوں کو خاطر میں نہ لائیں۔ امریکی پابندیوں کی پاکستان پر ایک طویل تاریخ ہے، اور امریکہ ہمیشہ اپنے مفادات کے لیے پاکستان کو قربانی کا بکرا بناتا آیا ہے۔ اس لیے اب ان پابندیوں کو نظر انداز کرتے ہوئے پاکستان کو
اپنے مفادات کو ترجیح دینی چاہیے اور ایسی پالیسی مرتب کرنی چاہیے جو نہ صرف موجودہ حالات بلکہ مستقبل میں آنے والے چیلنجز کا مقابلہ کرنے کے لیے بھی مضبوط ہو۔

امریکہ کا طویل مدتی مقصد ہمیشہ اپنے مخالفین کو اقتصادی پابندیوں کے ذریعے دبائو میں لانا رہا ہے، لیکن پاکستان اور روس کے درمیان بڑھتے ہوئے تعلقات ایک واضح اشارہ ہیں کہ پاکستان اب اپنی خارجہ پالیسی میں مزید خودمختاری حاصل کرنے کی جانب گامزن ہے۔ ان پابندیوں کے باوجود پاکستان اور روس کے تعلقات کا نیا دور نہ صرف اقتصادی ترقی کے لیے بلکہ جغرافیائی استحکام کے لیے بھی اہم ثابت ہو سکتا ہے۔ اس صورتحال میں سوال یہ ہے کہ آیا امریکہ اس نئے اتحاد کو روکنے میں کامیاب ہو گا یا نہیں؟

پاکستان اور روس کے مضبوط ہوتے تعلقات خاص طور پر امریکی دبائو اور پابندیوں کے باوجود اس بات کی علامت ہیں کہ پاکستان اپنے قومی مفادات کو ترجیح دیتے ہوئے ایک آزاد خارجہ پالیسی کی تشکیل میں کامیاب ہو رہا ہے۔ یہ شراکت نہ صرف خطے میں جغرافیائی استحکام کو فروغ دے سکتی ہے بلکہ عالمی طاقتوں کے توازن میں بھی ایک اہم کردار ادا کر سکتی ہے۔ امریکی پابندیوں کے اثرات کو کم کرنے اور اپنے اقتصادی و دفاعی شعبوں کو مستحکم کرنے کے لیے پاکستان کو روس جیسے قابل اعتماد شراکت داروں کے ساتھ تعلقات کو مزید وسعت دینی ہوگی۔ موجودہ حالات اس بات کا تقاضا کرتے ہیں کہ پاکستان سفارتی سطح پر مضبوطی سے اپنے مفادات کا دفاع کرے اور مستقبل کے چیلنجز کا سامنا کرنے کے لیے ایک متوازن اور پائیدار حکمت عملی اختیار کرے۔