Category: بلاگ

آزادی کا دکھ یا دکھ کی آزادی؟
تحریر:ڈاکٹرغلام مصطفی بڈانی
اگست کا مہینہ شروع ہوتے ہی سرکاری سطح پر جشن آزادی شایان شان منانے کیلئے میٹنگز اور اقدامات شروع کر دئے جاتے ہیں اور بازاروں میں بھی قومی پرچم اور رنگ برنگی جھنڈیوں اور بچوں سے لیکر بڑوں تک کے لباس اور مختلف اشیاء کے سٹال سج جاتے ہیں ،آج جب ہم اپنی آزادی کا جشن منانے جا رہے ہیں تو دیکھنا ہوگا کہ کیا ہم واقعی آزاد ہیں؟ یا پھر ہم مہنگائی، بے روزگاری اور بجلی کے بل کی زنجیروں میں جکڑے ہوئے ہیں؟ ہمارے نوجوان ملک چھوڑ کر جا رہے ہیں اور ہمارے عوام خودکشیاں کر رہے ہیں۔ کیا یہی آزادی ہے جس کے لیے ہمارے بزرگوں نے قربانیاں دی تھیں؟آزادی کا مطلب صرف سیاسی آزادی نہیں ہوتا بلکہ اس میں معاشی آزادی بھی شامل ہے۔

آج جب ہمارے ملک میں مہنگائی آسمان کو چھوچکی ہے اورروزانہ کی بنیاد پر مہنگائی میں اضافہ سے عام آدمی کے لیے دو وقت کی روٹی کمانا بھی مشکل ہو گیا ہے،بے روزگاری کا مسئلہ بھی شدت اختیار کر رہا ہے اور ہمارے نوجوانوں کو روزگار کے مواقع نہیں مل پا رہے۔ نتیجتاََ وہ مایوسی کا شکار ہو رہے ہیں اور ملک چھوڑ کر جا رہے ہیں۔بھاری بھرکم بجلی کے بل بھی عوام کیلئے ایک بڑا مسئلہ بن چکے ہیں، گرمیوں میں لوگ بجلی کے بل ادا کرنے میں بہت مشکل محسوس کرتے ہیں، اور خودکشیوں کا بڑھتا ہوا رجحان بھی ایک تشویشناک صورتحال ہے۔

آبادی کے لحاظ سے دنیا کا پانچواں بڑا ملک پاکستان ہے، اکنامک سروے 2023-2024 کے مطابق پاکستان میں تقریبا 45 لاکھ سے زائد افراد بے روزگار ہیں جن میں 15 سے 24 سال کی عمر کے نوجوانوں میں بے روزگاری کی شرح سب سے زیادہ ہے،بے روزگاری کی وجہ سے نوجوانوں کو روزگار کے مواقع نہیں مل پا رہے اور وہ مایوسی کا شکار ہوچکے ہیں،ملک میں بیروزگاری اور مایوسی کی وجہ سے پاکستانی نوجوان غیرقانونی طریقے سے باہر جانے پر مجبورہوچکے ہیں ،غیرقانونی طریقے سے دیار غیرجانے والے نوجوان اکثروبیشترحادثات شکارہوجاتے ہیں ،ماہرین کے مطابق حکومت پاکستان نوجوانوں کے غیر قانونی طریقے سے باہر جانے کے اسباب پر توجہ ہی نہیں دے رہی ہے۔

پاکستان کا شمار بھی ان ممالک میں ہوتا ہے جہاں خودکشی کے بارے میں کوئی سرکاری اعداد و شمار موجود نہیں ہیں،اعداد و شمار کے تجزیہ کے مطابق ملک میں ہر گھنٹے میں 3افراد اپنے ہی کسی عمل سے اپنی سانس کی ڈور کو توڑ لیتے ہیں، ملک میں خودکشی کے اعداد و شمار ایک سنگین تصویر پیش کر رہے ہیںایک رپورٹ کے مطابق پاکستان خودکشی کے اعتبار سے دنیا میں 16ویں نمبر پر آ چکا ہے ،تشویش ناک حقیقت یہ ہے کہ پاکستان میں 15سے 29 سال کی عمر کے افراد میں خودکشی موت کی چوتھی بڑی وجہ کے طور پر سامنے آئی ہے۔ عمر کا وہ گروپ جسے امید، صلاحیت اور موقع کی علامت ہونا چاہیے اس دل دہلا دینے والی حقیقت سے دو چار ہے۔

مہنگی بجلی تمام پاکستانیوں کے لیے ناقابل برداشت ہو چکی ہے،بجلی کی زیادہ قیمت شہریوں کو غربت میں دھکیل رہی ہے اور کاروبارکو دیوالیہ کر رہی ہے، بجلی پاکستان کی صنعتوں کے لیے سب سے اہم مسئلہ ہے اور یہ براہ راست 240 ملین لوگوں کی زندگیوں کو متاثر کرتی ہے، توانائی کے مسئلے پر ہمیشہ سے عوام کوبے وقوف بنایاجاتا رہاہے اور پاکستان کی اشرافیہ نے ڈیم نہیں بننے دئے اور سستی بجلی کا جھانسہ دیکر بجلی فراہم کرنے کیلئے پرائیوٹ IPP بنائیں اور پاکستان اور عوام کو دونوں ہاتھوں سے لوٹااور تاحال لوٹ رہے ہیں ان اداروں کے مالکان حکومت میں رہے ہیں اور ہیں، عوام کیلئے بجلی کابحران پیدا کرنے والے پاکستان کے 40 خاندان ہیں کوئی ادارہ ، کوئی عدلیہ ان پر ہاتھ نہیںڈال سکتی ۔

آزادی ایک قیمتی نعمت ہے، ہمیں اس نعمت کی قدر کرنی چاہیے لیکن یہ جشن صرف خوشیوں کا نہیں ہونا چاہیے بلکہ اس میں ہمیں اپنی مشکلات اور چیلنجوں پر بھی غور کرنا چاہیے۔کیا ہم جشن منانے کے قابل ہیں؟ذرا غور کریں جس ملک میں مہنگائی، بے روزگاری، سیاسی عدم استحکام اور دیگر مسائل نے عوام کی زندگی کو اجیرن بنا دیا ہوتواس سب کے باوجود ہم آزادی کا جشن کیسے منا سکتے ہیں؟ کیا یہ آزادی کا جشن ہے یا پھر یہ دکھ کا جشن ہے؟

22 خاندانوں سے آئی پی پیز تک،کب تک چلے گی یہ لوٹ مار؟
تحریر:ڈاکٹرغلام مصطفی بڈانی
14اگست1947ء کو برصغیر کی تقسیم کی بعد پاکستان معرض وجود میں آیا، اس آزادی کی جنگ میں بہت سے لوگوں نے اپنی قیمتی جانوں کا نذرانے پیش کئے جوکہ پاکستان آزاد ہونے کے بعد بھی پاکستانیوں کی قربانیوں کا سلسلہ آج بھی جاری ہے، آئیے ذرا اس بات کاجائزہ لینے کی کوشش کرتے ہیں ہمارے اسلاف کی بیمثال قربانیوں کے نتیجے میں قائم ہونے والی عظیم مملکت پاکستان میں کیا واقعی پاکستانیوں کو حقیقی آزادی میسر ہے یاجس امید کی بنیاد پر اسلاف نے قربانیاں دی تھیں ان قربانیوں کا پھل ان کی نسلوں کاملا ؟

سب سے پہلے ذکر کرتے جنرل ایوب خان کے دور حکومت کا جسے پاکستان کی ترقی کا سنہری دور کہاجاتا ہے اس سنہری دور میں کس طرح پاکستان کی دولت پر ہاتھ صاف کئے گئے اور کیسے کرپشن کی ابتداء ہوئی 15جون 1964 کو ممبر قومی اسمبلی اور ماہر اقتصادیات ڈاکٹر محبوب الحق نے بجٹ تقریر کے دوران انکشاف کیا کہ پاکستان( جو اس وقت متحدہ پاکستان تھامشرقی پاکستان علیحدہ نہیں ہواتھا)کی 60 سے 80 فیصد دولت پر صرف” 22 خاندان” قابض ہیں۔ ان کے مطابق 66 فیصد صنعتیں ، 79 فیصد بیمہ کمپنیاں اور 80 فیصد بینکوں کا سرمایہ صرف "بائیس خاندانوں” کے قبضے میں ہیں، محبوب الحق کے اس انکشاف کی بنیاد وزارت مالیات کے ایک اعلی افسر ظہیر الدین کی کریڈٹ کمپنی کی رپورٹ پر استوار کی گئی تھی۔ انہوں نے انکشاف کیا تھا کہ بینکوں نے عوام کی امانتوں میں سے جو روپیہ کاروباری طبقے کو ادھار دینے کے لیے مخصوص کر رکھا ہے اس میں بڑی بڑی رقوم چند خاندان کے افراد نکلوا کر لے جاتے ہیں اور نام بدل بدل کر ان سے استفادہ کرتے رہتے ہیں (بعد میں لی گئی رقوم معاف کرائی جاتی رہیں)

ایک اور رپورٹ میں بتایا گیا کہ 22 دسمبر 1957 کو صرف 23 شخصیات ایسی تھیں، جنہیں 33 کروڑ 83 لاکھ روپے بطور قرض دیا گیا تھا۔ 31 مارچ 1959 تک ان افراد کی تعداد بڑھ کر 31 اور 31 دسمبر 1961 تک41 ہو گئی۔ ان 41 افراد کو جو رقوم بطور قرض دی گئی تھیں وہ 62کروڑ کے لگ بھگ تھی۔ 1961 میں اسی بات کو منصوبہ بندی کمیشن کے شعبہ تحقیق کے سربراہ مسٹر آر ایچ کھنڈیکر نے آگے بڑھایا اور ان کی تحقیق کی بنیاد پر 64-1963 کے بجٹ میں وزیر خزانہ مسٹر محمد شعیب نے انکشاف کیا کہ بینکوں نے جو رقم ادھار کے لیے علیحدہ کر رکھی ہے اس سے صرف 20 خاندان مستفیض ہو رہے ہیں۔

ڈاکٹر محبوب الحق کے اس انکشاف کا ذو الفقار علی بھٹو نے بھرپور فائدہ اٹھایا اور جب انہوں نے 1968 میں صدر ایوب خان کے خلاف تحریک کا آغاز کیا تو ڈاکٹر محبوب الحق کی اس تقریر کو اپنی تحریک کا مرکزی نکتہ بنادیا۔ایوب خان کے خلاف چلنے والی تحریک کا ایک اہم نعرہ بھی یہی تھا کہ اس ملک پر بائیس خاندانوں کا قبضہ ہے۔ یہ نعرہ اس قدر مقبول تھا کہ ذو الفقار علی بھٹو جیسا بڑا زمیندار جس کی پارٹی میں مصطفی جتوئی، مخدوم طالب المولی اور مصطفی کھر جیسے لاتعداد بڑے بڑے زمیندار تھے، اس نے بھی ووٹ کی سیاست اور عوامی مقبولیت کے لیے سرمایہ داری کے خلاف پارٹی پوزیشن اس حد تک لی کہ پیپلز پارٹی کے منشور کے چار بنیادی نکات میں سے تیسرا نکتہ یہ تھا کہ سوشلزم ہماری معیشت ہے۔ ملک پر بائیس خاندانوں کا قبضہ ہے، یہ فقرہ بھٹو کی تقریروں کا جزوِلاینفق تھا۔ اور اس نعرے سے وہ اپنے جلسوں میں عوام کا لہو گرماتا تھا۔ آج نصف صدی گزرنے کے بعد اب ان بائیس خاندانوں کا دائر اثر بڑھ کر اس ملک کی ایک فیصد آبادی تک پھیل چکا ہے۔ یعنی24 کروڑ سے زائدلوگوں کی آبادی میں سے بائیس لاکھ لوگ ایسے ہیں جو اس ملک کے نوے فیصد سے زیادہ سرمائے پر قابض ہیں۔ اس کیفیت کو دنیا بھر میں "Elite Capture” یعنی اشرافیہ کی لوٹ کھسوٹ کہتے ہیں۔

اس وقت پاکستان میں بجلی کےبھاری بلوں کے سبب عوام کی خودکشیاں معمول بن چکی ہیں ،مہنگی بجلی اور آئی پی پیز معاہدے درد سر بن گئے ، عوامی مشکلات اور ردعمل شدیدہوتاجارہاہے،پی ٹی آئی دور حکومت 2021 میں آئی پی پیز کے ساتھ معاہدوں کی تجدید پاور ڈویژن نے کی تھی۔پاور ڈویژن نے 2021 میں معاہدوں کی تجدید کیلئے مذاکرات کیے تھے

اب ذرا تھوڑی سی نگاہ ادھر بھی ڈال لیتے ہیں کہ کس دورِ حکومت میں آئی پی پیز کے ساتھ سب سے زیادہ معاہدے کیے گئے تو مسلم لیگ ن کے 2013 سے 2018 کے دور حکومت میں سب سے زیادہ 130 بجلی بنانے والی کمپنیوں کے ساتھ معاہدے کیے گئے۔ جنرل پرویز مشرف کے دور حکومت میں 48 کمپنیوں، پیپلز پارٹی کے دور حکومت میں 35 کمپنیوں جبکہ پاکستان تحریک انصاف کے دور حکومت میں 30 کمپنیوں کے ساتھ بجلی بنانے کے طویل معاہدے کیے گئے۔انڈیپنڈنٹ پاورپلانٹس یعنی آئی پی پیز کے ساتھ ہونے والے معاہدوں کے باعث ہر سال اربوں روپے کی ادائیگی عوام سے وصول کیے گئے بجلی کے بلوں کے ذریعے کی جاتی ہے۔ حکومت کی جانب سے نیپرا نے آئی پی پیز کے ساتھ معاہدے کیے ہیں اور کچھ کمپنیوں کے ساتھ 2057 تک کے معاہدے کیے گئے ہیں یعنی آئندہ 33 سال تک ان کمپنیوں کو ادائیگیاں جاری رہیں گی۔وزارت توانائی کے مطابق، گزشتہ 10 سال یعنی 2013 سے 2024 تک کیپیسٹی پیمنٹ کی مد میں آئی پی پیز کو 8 ہزار 344 ارب روپے کی ادائیگی کی گئی۔ دستاویز کے مطابق گزشتہ مالی سال میں آئی پی پیز کو کیپیسٹی پیمنٹ کی مد میں 1300 ارب ادا کیے گئے جبکہ رواں سال 2 ہزار 10 ارب روپے ادا کرنا ہوں گے۔

پاکستانی عوام شاید یہ نہیں جانتی کہ ان آئی پی پیزکمپنیوں کے اصل مالکان کون ہیں؟ 68فیصدکمپنیاں تو حکمرانوں(شریف ، زرداری، اسٹبلشمنٹ)کی ملکیت ہیں ان کے علاوہ 8 فیصد پیپلز پارٹی رہنما 10 فیصد اسٹبلشمنٹ، 8 فیصد چین کے سرمایہ کار اور7 فیصدقطری عرب اور7 فیصد پاکستانی سرمایہ دارشامل ہیں ۔اب عوام سے ایک سوال ہے جب 68فیصدآئی پی پیزکمپنیوں کے تین مالک شریف ، زرداری، اسٹبلشمنٹ ہوں توان سے کئے گئے معاہدوں کے خلاف کون لب کشائی کرے گا؟

قیام پاکستان کے بعد سے اب تک جتنی بھی حکومتیں آئی ہیں چاہے وہ فوجی ہوں یا سویلین انہوں نے کوئی بھی ایسا منصوبہ شروع نہیں کیا جو عوامی مفاد میں ہو یا عوام کے دکھوں کامداواکرنے کی کوشش کی گئی ہو،جنرل ایوب خان دور کے 22 خاندانوں اور موجودہ آئی پی پیزتک ہردور میں صرف عوام کوقربانی کابکرابنایا گیا ہے اور عوام کو شدید مشکلات کا سامنا کروایا گیاہے۔ 22 خاندان ملک کی معیشت پر قبضہ جما کر قیمتوں میں اضافہ، بے روزگاری اور بنیادی سہولیات کی کمی کا باعث بنے۔ دوسری جانب آئی پی پیز کے مہنگے معاہدوں سے بجلی کے بل آسمان کوچھوگئے، لوڈشیڈنگ کا مسئلہ پیدا کیا اور قومی خزانے پر بوجھ ڈالاگیا دونوں صورتوں میں عوام کی قربانیاں بڑھتی رہیں جبکہ چند افراد جو صرف حکمران خاندان ہیں یاپھر ان کے رشتے دار نے اپنی جیبیں بھریں.

ملک کی دولت چند خاندانوں اور سیاسی گٹھ جوڑوں کی لوٹ مار کا شکار ہوتی رہی ہے، تاریخ گواہ ہے کہ عوام کی خاموشی نے اس ظلم کو پروان چڑھایا ہے، آئی پی پیز جیسے سیاسی گروہوں نے بھی اس میں اپنا کردار ادا کیا ہے، یہ لوٹ مار کا سلسلہ کب تک جاری رہے گا؟ سوال یہ نہیں کہ ملک کے وسائل کہاں جا رہے ہیں بلکہ اصل سوال یہ ہے کہ عوام کب تک اس بے انصافی کو برداشت کرے گی؟ تبدیلی صرف نعرے سے نہیں بلکہ عملی اقدامات کا تقاضا کرتی ہے۔عوام کی خاموشی ان ظالموں کی طاقت کا باعث ہے، جب تک عوام بیدار نہیں ہوں گے، یہ لوٹ مار کا سلسلہ جاری رہے گا،ملک کے وسائل عوام کی امانت ہیں، اس امانت کی خیانت کرنے والوں کو عبرت کا نشان بنانا ہوگا، قانون سب کے لیے برابر ہونا چاہیے،تاریخ گواہ ہے کہ ظالم ہمیشہ شکست خوردہ ہوتے ہیں، یہ لوٹ مار کا دور بھی ایک نہ ایک دن ختم ہوگا، لیکن اس کے لیے عوام کو متحد ہو کرتوانا آواز بلند کرناہوگی،ورنہ یہ سلسلہ اسی طرح چلتا رہے گا اور عوام یونہی سسکتی،جلتی ،کٹتی اور خودکشیاں کرکے مرتی رہے گی۔

قوم کو خودار بنائیں بھکاری نہیں
ازقلم غنی محمود قصوری
ہمارے ہاں ایک بہت بڑا المیہ ہے کہ ہمارے حکمران عوام کو نا تو شعور دیتے ہیں نا ہی سہولیات بس جسطرح خود ان کو مانگنے کی عادت ہے بالکل اسی طرح عوام کو بنانے پر تلے ہوئے ہیں،دوسرا بڑا ہمارے ہاں یہ المیہ ہے کہ غریب کیلئے چند سہولیات جو دکھلاوے کے طور پر دی جاتی ہے وہ بھی سیاسی سطح پر ملتی ہیں جو حکومت میں ہوتا ہے اس کے حمایتی اس سے مستفید ہوتے ہیں باقی بیچارے منہ دیکھتے رہتے ہیں اور اپنی پارٹی کی گورنمنٹ بننے کی دعا اور تگ و دو کرتے ہیں تاکہ ان کو بھی کچھ نا کچھ مل سکے.

ہمارے ملک میں مس مینجمنٹ بہت ہے یعنی ہم انتظامی امور درست طریقے سے نہیں کر پاتے یاں پھر ایسا کہہ لیں ہم درست کرنا ہی نہیں چاہتے تاکہ جو ہمارے لیڈران کے دکھلاوے کے احسانات تلے دبے ہوئے ہیں وہ دبے ہی رہیں اور ہماری جماعتوں اور لیڈران کے نعرے لگتے ہی رہیں،ماہ جون میں وفاقی بجٹ میں بے نظیرانکم سپورٹ پروگرام کے لئے 27 فیصد اضافہ کیا گیا ہے اور اس پروگرام سے استفادہ حاصل کرنے والوں کی تعداد 93 لاکھ سے بڑھا کر 1 کروڑ کر دی گئی ہے یعنی کہ ملک کی تقریباً کل آبادی 25 کروڑ میں سے 1 کروڑ لوگ 10500 روپیہ سہ ماہی بےنظیر انکم سپورٹ پروگرام سے لے رہے ہیں بلحساب 116 روپیہ یومیہ فی صارف وصولی کر رہا ہے وہ الگ بات ہے کہ ان میں سے حقداروں کو بہت کم اور پہلے سے مضبوط لوگوں کو زیادہ طور پر پیسے ملتے ہیں جس کا تذکرہ اوپر ہوچکاہے

یہاں میں ایک باتقابل ذکر ہے شاید بہت سے قارئین کوناگوارلگے مگر بطور عام پاکستانی شہری سوال ہے کہ جب ہمارے ہاں عشر و زکوٰۃ کا محکمہ موجود ہے اس ادارے کا ڈائریکٹر جنرل اور وزیر و مشیر و سارا عملہ موجود ہے تو پھر ہمیں بےنظیر انکم سپورٹ کے نام پر غریبوں کو پیسے دینے کی نوبت کیوں آئی؟کیا محکمہ عشر و زکوٰۃ غریبوں کی فلاح و بہبود اور ان کی ضروریاتِ زندگی کو دیکھ کر ان کی مدد کرنے کے لئے نہیں بنایا گیا؟کیا اس ادارے کے ملازمین کروڑوں روپیہ ماہانہ تنخواہیں نہیں لیتے؟کیا محکمہ عشر و زکوٰۃ اور بیت المال میں کرپٹ لوگ ہیں جو حقداروں تک ان کا نہیں پہنچنے دیتے؟
بالفرض وہ محکمہ اگر درست کام نہیں کر رہا اور غرباء تک ان کا حق نہیں پہنچا رہا تو اس محکمے کو درست کرنے کی بجائے ایک اور محکمہ کیوں لایا گیا؟

اب ایک طرف بےنظیر انکم سپورٹ پروگرام کا محکمہ اور عملہ ہے تو دوسری طرف عشر و زکوٰۃ کا محمکہ و عملہ ہے، دونوں کی تنخواہیں سرکاری کھاتے سے جاتی ہیں جبکہ کام دونوں کا ایک ہی غرباء کی مدد کرنا.

اسی طرح ہمارے صحت کارڈ پر علاج کی سہولت کا طریقہ کار ہے صحت کارڈ کے حامل افراد اپنی پسند کے ہسپتال سے جو کہ منظور ہوں گورنمنٹ سے، علاج کروانے کے اہل ہیں یہاں یہ بات قابل غور ہے کہ پاکستان کے ہر ضلع میں ڈسٹرکٹ ہیڈ کوارٹرز ہسپتال ہر تحصیل میں تحصیل ہیڈ کوارٹرز ہسپتال ہر میونسپل کمیٹی میں رورل ہیلتھ سنٹر اور ہر یونین کونسل میں بی ایچ یو یعنی بیسک ہیلتھ یونٹ موجود ہے تو پھر ہزاروں گورنمنٹ اداروں کے ہوتے ہوئے آپ اپنی ریاست کے شہریوں کو اتنا بھی اعتماد میں نا لے سکے کہ وہ اپنے سرکاری ہسپتالوں سے علاج کروائیں یا کہ سرکاری ہسپتال اس قابل ہی نہیں کہ وہ لوگوں کا علاج کر سکیں؟

کیا حکومت جو پیسہ عوام کے علاج کے نام پرعام پرائیویٹ ہسپتالوں کو دے رہی ہے ، کیا وہ پیسہ سرکاری ہسپتالوں پر لگا کر وہاں ہر قسم کی سہولیات مہیا نہیں کی جا سکتیں کہ ریاست پاکستان کا ہر شہری علاج معالجہ اس ہسپتال سے کروائے کہ جہاں کے ڈاکٹرز اور عملہ گورنمنٹ سے لاکھوں روپیہ تنخواہیں لے رہا ہے ،ایک طرف گورنمنٹ ان ڈاکٹروں و سٹاف کی تنخواہیں بھی ادا کرے اور دوسری طرف صحت کارڈ پر منتخب شدہ شہریوں کے علاج کی ادائیگی بھی پرائیویٹ ہسپتالوں کو کرے

عام پاکستانی کو اس سے کوئی سرو کار نہیں کہ کونسی پارٹی نے کونسا منصوبہ شروع کیا ہے عام شہری کو عزت کے ساتھ حکومت وقت سے ریلیف چاہئے اس کے برعکس سیاسی مداری اپنے ووٹ پکے کرنے کے ڈھونگ رچاتے ہیں وگرنہ پاکستان میں ہر محکمہ موجود ہے جس کا وزیر بھی ہے مشیر بھی اور ڈائریکٹر جنرل کیساتھ ہر ضلع و تحصیل کی سطح پر بھی عملہ جن کی تنخواہیں ہم عوام کی جیبوں سے ٹیکس نکلوا کر دی جاتی ہیں

کیا عجیب صورتحال بنا کر رکھ دی ہے کہ اشرافیہ کو ڈبل ڈبل سہولیات بھی دی گئی ہیں اور بطور سربراہ ڈبل محکمے بھی انجائے کررہے ہیں،

کاش کہ ہماری گورنمنٹ سمجھے کہ لوگوں کو 116 روپیہ یومیہ دینے کی بجائے بلا سود قرض دیئے جائیں اور ان کو ہنر مند بنایا جائے تاکہ قوم اپنے پاؤں پر کھڑی ہوسکے اور مفت میں مال لے کر کھانے کی بجائے کمانے کا شعور آئے مگر افسوس ایسا نا تو سوچا جاتا ہے نا ہی سوچنے کے قابل چھوڑا گیا ہے.کیونکہ بھکاری حکمرانوں کو خودار قوم کسی صورت قبول نہیں ہے.