Category: بلاگ

آپ نے شعبہ صحافت کے لئے کیا خدمات سر انجام دی..؟

تحریر:میاں عدیل اشرف

3مئی یوم آزادی صحافت کا دن جسے عالمی طور پر پوری دنیا میں صحافت کی آزادی کے حوالے سے منایا جاتا ہے۔ میرا ان سب صحافیوں سے سوال ہے جو بڑے بڑے عہدوں پر فائز رہے اور اب بھی موجود ہیں آپ نے جب سے صحافت کو جوائن کیا اپنی ذاتی شہرت، علاقے کی بہتری اور لوگوں کے مسائل کے حل کے لیے تو کوشش کی ہو گی

آج تک آپ نے شعبہ صحافت کی بہتری کے لیے کیا خدمات سرانجام دی جس کے تحت آپ کی شخصیت کو مستقبل میں شاندار مثال دے کر یاد کیا جائے؟؟ کیا آپ نے اپنے علاقے میں پریس کلب بنانے کی جدوجہد کی، اگر پریس کلب موجود ہے تو کیا آپ نے اس میں شامل ممبران کی دوران ڈیوٹی حفاظت کے لیے کوئی جدوجہد کی۔

کیا آپ نے صحافیوں کے مستقبل کی بہتری کے لیے میڈیکل کی سہولت فراہم کروانے کی جدوجہد کی، صحافیوں کے بچوں کی بہتر تعلیم کے لیے کسی قسم کی کوئی ایسی سہولت فراہم کرنے کے لیے کوشش کی جس کے تحت ان کے بچوں کو مستقبل میں بہتر اور فری تعلیم مل سکے۔ جس کی بہت ضرورت ہے اور یہی خدمات ہیں جن کے ذریعے آپ کی ذات کو مستقبل میں یاد کیا جا سکتا کیونکہ کسی بھی شعبہ میں ہر اس شخص کو یاد کیا جاتا جس نے اس شعبے کے لیے کچھ ایسا کیا ہو جس سے اس شعبے سے وابستہ افراد کو فائدہ ہو رہا ہو ان افراد کو ہمیشہ اچھے الفاظ میں مثال دے کر یاد کیا جاتا ہے۔

دوسری جانب پاکستان کے سوا تقریباً ہر ملک میں یوم آزادی صحافت کو صرف الفاظوں کی حد تک نہیں منایا جاتا بلکہ عملی طور پر ورکنگ صحافیوں کے لیے سہولیات فراہم کروانے کے لیے جدوجہد کرکےسہولیات حاصل کی جاتی ہیں۔ لیکن بد قسمتی سے پاکستان میں صحافیوں کی فلاح کے لیے ایساکچھ بھی نہیں کیا جاتا بلکہ حکومت کی جانب سے کسی نہ کسی طور پر کوئی ایسی پابندی ضرور عائد کر دی جاتی وہ آزادی سے سچ بول نہ سکیں حقیقت نہ دکھا سکیں اور سچ نہ لکھ سکیں۔

اس میں غلطی صرف حکومت کی نہیں بلکہ ان صحافتی تنظیموں ،پریس کلب سربراہان اور ان صحافتی اداروں کی بھی ہے جو دعوے تو صحافیوں کے حقوق دلانے کے کرتے ہیں لیکن سب کچھ دیکھ کر اپنی ہی صحافتی برادری پر پابندیوں اور جبر کے خلاف بولتے نہیں بلکہ انفرادی طور پر فوائد حاصل کرتے ہیں لیکن دیگر صحافیوں کے حقوق کو پامال ہوتے دیکھتے رہتے اور خاموش رہتے ہیں۔

صحافت کی بربادی کی سب سے بڑی وجہ بھی یہی کہ صحافی ہی اپنے آپ کو مضبوط نہیں کرنا چاہتے۔ بہت سے ایسے صحافی حضرات بلکہ پورے کے پورے پریس کلب موجود ہیں جو حکومتی اداروں کے ترجمان، منشیات فروشوں، قحبہ خانوں، ملاوٹ کرنے والوں اور دیگر جرائم میں ملوث افراد کی پشت پناہی کرنے کو صحافت سمجھتے ہیں اور جو صحافی کا اصل کام ہےاس کو کرنے سے پرہیز کرتے ہیں یہ ہیں وہ لوگ جو صحافت کی بربادی کی وجہ ہیں۔

شعبہ صحافت کے لیے بھی ایک ضابطہ اخلاق ہونا بہت ضروری ہے، پریس کلبوں میں نظم وضبط کے ذریعے ممبران کو شامل کیا جانا ضروری۔ جس کے تحت کام کرنے والے صحافی ہی شعبہ صحافت سے وابستہ رہیں نہ کہ ہر چھابڑی فروش، قصاب، ریڑی بان، دودھ فروش، وغیرہ جعلی صحافتی کارڈز کا استعمال کرکے اپنے کاروبار کو تحفظ فراہم کریں اورشعبہ صحافت کو بدنام کرتے پھریں، بلکہ صرف پڑھے لکھےصحافی ہی ملک کی علاقےکی بہتری کے لیے کام کریں تاکہ شعبہ صحافت کا وقار بڑھے۔

ایسا تب ہی ممکن ہے جب صحافی اپنے شعبہ کے لیے عملی طور پر کچھ کریں گے تاکہ آنے والے وقت میں ان کی صحافت کے لیے سرانجام دی گئی خدمات کو شاندار مثال کے طور پر جانا جائے۔ صحافیوں کو انفرادی طور پر نہیں بلکہ اجتماعی طور پر سوچنے کی ضرورت ہے اپنے علاقے میں شعبہ صحافت کے لیے ضابطہ اخلاق بنانے کے لیے جدوجہد کرنی چاہیے اور صرف ان لوگوں کو ہی پریس کلب کی ممبر شپ دینی چاہیے جو اس کے اہل ہوں نہ کے ممبران کی تعداد بڑھانے کے لیے جرائم پیشہ افراد کو بھی اپنے ساتھ شامل کریں اور خود ہی اپنے شعبہ کو برباد کریں۔

جن علاقوں میں پریس کلب موجود نہیں وہاں سرکاری طور پر پریس کلب ہونے چاہیے، کیونکہ پریس کلب کے بغیر صحافیوں کی کوئی عزت نہیں اس طرح صرف ان کے سر فروخت ہوتے ہیں جب پریس کلب ہوں گے وہاں ہر سال الیکشن ہوں گے تو پھر ان کے حقوق کے لیے کام بھی ہوں گے ان کو سہولیات بھی فراہم ہوں گی کیونکہ پھر عہدیدار وہی بنیں گے جو کچھ کر کے دیکھائیں گے۔

اس لیے تمام علاقائی صحافی سب سے پہلے اپنے علاقوں میں پریس کلب بنانے کے لیے جدوجہد کریں تاکہ آپ کا مستقبل بھی بہتر بن سکے اور اپ کےشعبہ کا وقار بھی بلند رہے۔

کہاں کی صحافت
تحریر:حاجی محمدسعید گندی
صحافت سے وابستگی کی وجہ سے روزانہ کچھ نہ کچھ لکھنا پڑتا ہےجوکہ سوشل میڈیا پلیٹ فارم اورمختلف قومی وریجنل اخبارات میں شائع ہوتا رہتا ہے۔ آج جی چاہا کہ اپنے شہر کی صحافت پر بات کروں ،ڈیرہ غازیخان 25 لاکھ سے زائد نفوس کی آبادی پرمشتمل شہر ہے یہاں کم و بیش پانچ سے سات پریس کلب اور درجنوں صحافی کہلانے والے معزز دوست موجودہیں۔

حقیقت یہ ہے کہ ڈیرہ غازیخان کے اکثر صحافی پر خلوص جذبوں والے دوست ہیں لیکن کچھ لوگ ہماری صفوں میں بلیک میلر بھی ہیں جو اپنی دیہاڑی لگانے کے لیے پوری محنت کرتے ہیں وہ بھی ایمانداری کے ساتھ ۔

ڈیرہ غازی خان ایک قدیمی شہر ہونے کی وجہ سے یہاں صحافتی سلسلہ بھی قدیم ہے۔ ڈیرہ غازیخان کی دھرتی نے نامور قلم کاراور دانشور پیداکئے ہیں اس وقت شہر وگرد نواح کے اکثر صحافیوں کی تیسری نسل اسی پیشہ سے منسلک ہےاور صحافیوں کے حوالے سے یہ ایک تلخ حقیقت ہے کہ یہاں بمشکل درجن بھر صحافیوں نے صحافت کی تعلیم حاصل کی ہوئی ہے ۔صحافی بننے کے لئے دوسرے ملکوں باقاعدہ قانون ہیں،ان ممالک میں لوگ کٹھن مراحل سے گزر کر صحافی بنتے ہیں

اگر بات کریں اسلامی ملک سعودی عرب کی تو آپ سعودی شہری ہیں، صحافی بننا چاہتے ہیں تو آپ کو انتہائی سخت مراحل سے گزرنا ہوگا،سب سے پہلے آپ کی صحافت میں تعلیمی ڈگری اوراہلیت چیک ہوگی ، اس کے بعد آپ کی فصاحت، بلاغت، کتابت، اِملاء، کے ساتھ ساتھ وطن سے محبت کا معیار تک چیک کیا جاتا ہے کہ آیا یہ شخص وطن دشمن ایجنسیوں کا ایجنٹ تو نہیں ہےپھر سعودی وزارتِ اطلاعات و نشریات آپ کا تمام ڈیَٹا، ہاتھ پاؤں کے فنگر پرنٹ لےکرکمپیوٹرائزڈ کارڈ جاری کرتا ہےاتنے طویل صبر آزما مراحل کے بعد سعودی حکومت آپ کو اپنے متعلقہ اخبار / چَینل کے ساتھ کام کرنے کی باقاعدہ اجازت دے دیتی ہے۔

اگر آپ امریکی شہری ہیں اور صحافی بننا چاہتے ہیں تو امریکی حکومت کو جرنلزم میں ماسٹر ڈگری یا اس کے مساوی ڈگری پیش کرنا ہوگی، پھر اس کے بعد مختلف قسم کے تحریری امتحانات کے بعد آپ کو گورنمنٹ آف امریکہ کارڈ جاری کرتی ہے۔جس میں سٹیٹ سے وفاداری کا حلف نامہ بھی شامل ہوتا ہے۔

اگر آپ سکینڈے نیون کنٹریز (ناروے، سویڈن، ڈنمارک) کے شہری ہیں اور صحافی بننا چاہتے تو آپ کو سب سے پہلے صحافت میں 70فیصد مارکس کے ساتھ شعبہ صحافت کی ماسٹر ڈگری ،وزارت اطلاعات کو دکھانا ہوگی، وزارت اطلاعات جانچ پڑتال کے بعد آپ کو کسی بھی اخبار چینل کا رپورٹر بننے سے پہلے 180 دن کے تربیتی کورس پہ بھیجتی ہے جس کا خرچہ کورس کرنے والا خود اٹھاتا ہے

اب ذراہمارے پیارے ملک پاکستان کا معیار بھی دیکھ لیں، آپ کے پاس صحافتی ڈگری نہ بھی ہو، حتی کہ آپ اَن پڑھ ہیں، ویسے ان پڑھ صحافیوں کی تعداد اس وقت بہت زیادہ ہے اور انہوں نے بڑے بڑے اخبارات کی نمائندگی بھی حاصل کی ہوئی ہے انہوں نے خبروں کیلئے پرائیوٹ منشی بھی رکھے ہوئے ہیں۔

بہرحال آج کے دور میں پاکستان میں صحافی بننا کوئی مسئلہ ہی نہیں ہے،آپ کے پاس ایک اچھا سا موبائل فون کیمرہ والا ہونا چاہئے, اور کِسی بھی برسوں سے بند پمفلٹ ٹائپ دَو وَرقی یا پی ڈی ایف اخبار کی یا ڈمی چینل کی نمائندگی جس کے لیے آپ کو دو فوٹو اور چند ہزار روپے ایڈیٹر کو بطور نذرانہ دینا ہونگے، اگلے روز آپ کا کارڈ بن کر آجائے گا،جلد مشہور ہونے کے لئے قریبی دوستوں سے مبارکباد کی پینافلیکس بنوا کے چوک چوراہوں میں لگوا دینے سے چند ماہ نہیں بلکہ چند دنوں میں سینئر صحافی تیارہوکر مارکیٹ میں آجاتا ہے

توبات ہورہی تھی ڈیرہ غازیخان کی صحافت کی یہاں صحافیوں کی تعداد سینکڑوں میں ہے ۔ان سینکڑوں صحافیوں میں سے اخبارات میں ریگولر کالم لکھنے یا لائیوٹاک شو زمیں بیٹھ کر قومی و بین الاقوامی ایشوز پر بات کرنےوالے نا ہونے کے برابر ہیں،شہر گردو نواح میں بہت اچھے صحافی بھی موجود ہیں جو لگن کے ساتھ ہر مسئلہ اجاگر کرتے رہتے ہیں ۔

ایسے صحافی بھی موجود ہیں زیادہ ہیں جنہوں نے اپنے ذمہ یا دوسرے لفظوں میں کچھ محکموں کا ٹھیکہ لے رکھا ہے، محکمہ بلڈنگ، تھانوں, بجلی , گیس و کھالوں اورنالیوں کی کوریج و نبض شناسی شہر میں گٹر اوبل رہے ہیں متعلقہ محکمہ سے زیادہ ان صحافیوں سے بہتر کوئی نہیں جانتا

کچھ صحافی انکی کارکردگی کو سراہتے ہیں تو کوئی انکی کارکردگی کا منہ بولتا ثبوت پیش کررہے ہوتے ہیں کسی نے دبنگ تو کسی نے کرپٹ لکھا ہوتا ہے ۔اگر آپ کو کوئی مسئلہ یا کام ہوتو صحافی ڈھونڈنے کی یا کہیں دور جانے کی بالکل ضرورت نہیں یہ ڈیرہ غازی خان کے ہر گلی محلہ کالونیوں چوک چوراہوں میں صحافی با آسانی وافر تعداد میں آپکو میسر ہوں گے ۔

زیادہ تر بے چارے بےروزگار صحافی ہیں جن کی گزر بسر دوسروں کی جیبوں سے ہوتی ہے، صحافت میں کالی بھڑیں بھی موجود ہیں جوکہ انتہائی طاقتور ہیں غلط دھندوں کی وجہ سے صحافت کا معیار روز بروز گرتا ہی جارہا ہے،آدھے درجن کے قریب مختلف ناموں سے پریس کلب بھی بنے ہوئے ہیں جبکہ ڈیرہ غازی خان شہر میں صرف ایک رجسڑڈ پریس کلب ہے جسکی اپنی عمارت بھی ہے

باقی ماندہ پریس کلب چوباروں، دکانوں ،ہوٹلوں یاکسی کی بیٹھک میں بنے ہوئے ہیں۔ جہاں آدھے درجن ڈمی اخبارات یا ڈمی چینل کے نام نہاد صحافی اکٹھے ہوں وہاں پریس کلب بنا کر صدر بن بیٹھتے ہیں پھر فلاں زندہ باد… فلاں زندہ باد کے نعرے لگائے جاتے ہیں

مزدور کے نام پر چھٹی لیکن مزدور اج بھی کام پر۔۔
تحریر:میاں عدیل اشرف
ہر سال یکم مئی کو پاکستان میں مزدور کے دن کے طور پر منایا جاتا ہے۔ بد قسمتی اس دن سوائے مزدور کے سب کو چھٹی ہوتی ہے۔ اور غریب مزدور اپنی اجرت حاصل کرنے کے لیے کام پر جاتا ہے۔ جب سے پاکستان بنا ہے بہت سی حکومتیں بنتی اور ختم ہو تی رہیں لیکن غریب مزدوروں کے حالات کوئی نہیں بدل سکے۔

آئے روز پاکستان میں مہنگائی بڑھتی جا رہی اور تمام تر اشیاء مزدور کی اجرت سے مہنگی ہو چکی ہیں۔ غریب مزدور کا اپنی اجرت میں خود کا اور بچوں کا پیٹ پالنا بھی مشکل ہو گیا ہے۔ غریب مزدورں کو کوئی پوچھنے والا نہیں، بڑے بڑے کاروباری لوگ، بیوروکریٹس، آفیسرز ہر کوئی یکم مئی کو چھٹی پر ہوتے ہیں، اپنے بچوں کیساتھ سیر کرتے، مختلف کھانے پکا کے کھاتے ہیں، لیکن بد قسمتی سے جس غریب مزدور کے نام پر چھٹی کی جاتی وہ اپنی اجرت حاصل کرنے کے لیے کام کرنے جاتا ہے۔

مزدور اگر چھٹی کرے تو وہ خود بھی بھوکا رہے گا اور اس کے بچے بھی۔ اس لیے حکومت وقت کو چاہیے مکارانہ طور پر مزدوروں کی اجرت میں اضافے کے جھوٹے دعوے کرنے کی بجائے ملک میں مہنگائی کم کریں، روز مرہ اشیاء سستی کریں، تاکہ مزدور اپنی اجرت میں باآسانی اپنا گزر بسر کر سکے، خود کا اور اپنے بچوں کا پیٹ پال سکے، اپنے بچوں کو تعلیم دلا سکے.

مزدور بھی اپنے بچوں کو اس مقام پرپہنچا سکے جہاں وہ خود نہیں پہنچ سکا۔ جب مزدور کو اس کی اجرت کیمطابق ہر چیز مہیا ہو گی تو وہ خوشحال بھی ہو گا اور کچھ رقم بچوں کے مستقبل کے لیے بچا سکے گا۔ اور جس ملک کے مزدور خوشحال ہوں وہ ملک ترقی کے سفر میں کبھی ناکام نہیں ہوتا۔

شرمندگی آداب رسومات کے باعث
ازقلم غنی محمود قصوری
گذشتہ دن میڈیا پرایک رپورٹ آئی جس کے مطابق اس وقت پاکستان میں 1 کروڑ عورتوں کی تعداد ایسی ہے جو کہ 35 سال سے زیادہ عمر کی ہو چکی ہیں اور ان کی ابھی تک شادی نہیں ہوئی

بطور ایک مسلمان ملک یہ بہت حیرت و تشویش والی بات ہے کہ اتنی عمر میں بھی نکاح نا ہو سکنا کس قدر غلط اور خطرناک ہے،آئیے پہلے ہم بات کرتے ہیں پاکستان کی آبادی پر

اس وقت پاکستان کی کل آبادی تقریباً ساڑھے 24 کڑور کے قریب ہے جس میں مردوں کی تعداد 51 فیصد،عورتوں کی تعداد 48.76 فیصد اور خواجہ سراؤں کی تعداد 0.24 فیصد ہےیعنی اعداد و شمار کے مطابق 100 خواتین واسطے 105 مرد موجود ہیں

اس وقت پاکستان کی کل آبادی کا 64 فیصد 30 سال سے کم عمر جوانوں پرمشتمل ہے ، 20 فیصد کی عمریں 15 اور 25 سال کے درمیان ہیں یعنی وہ نوجوان ہیں،اس کے باوجود 36 فیصد خواتین کنواری بیٹھی ہیں جو کہ بہت تشویش کی بات ہے

اس کے بعد بہت زیادہ تعداد بیوہ اور طلاق یافتہ عورتوں کی ہے کہ دوسری شادی نا کرسکی کہ جن کا اسلامی و قانونی حق ہے دوسری شادی کرنا مگر ان کو ان کا حق نہیں ملتا اور وہ دوسروں پر بوجھ بن کر زندہ رہتی ہیں

جوان مرد و عورت کے کنوارے رہنے کا نتیجہ معاشرے میں زناء کی صورت میں نکلتا ہے اور زناء ایسا قبیح فعل ہے جس سے معاشرے میں فسق و فجور کیساتھ نت نئی بیماریاں جنم لیتی ہیں اور معاشرے میں بے حیائی کیساتھ بربادی و تنزلی کا طوفان آتا ہے

اب سوچئے کہ 1 کروڑ عورتیں جن کی شادی کی اصل عمر بھی گزر چکی وہ ہر روز کس قرب و اذیت سے گزرتی ہونگیں؟

آج کے حالات تو ہم نے رسم و رواج کے تابع ہو کر یہ بنا لئے کہ نوجوان لڑکیوں کی شادی بہت بڑا مسئلہ بن چکا ہے جس کے باعث والدین کو نیند نہیں آتی اور سوچ سوچ کر کئی والدین خودکشی کر لیتے ہیں تو وہاں ان بڑی عمر کی خواتین سے کون شادی کرے گا؟

در اصل ہمارے معاشرے کی بربادی کا آغاز دین سے دوری سے ہوا اور دین سے دوری کے باعث ہم نے رسم و رواج کو پروان چڑھا کر اپنے حلال کاموں کو مشکل بنا لیا جس میں سے ایک اہم ترین فرضی کام نکاح بھی ہے
نکاح اس قدر اہم ہے کہ اس بابت حدیث رسول ہے

"من قدر علی أن ینکح فلم ینکح فلیس منا "
ترجمہ۔ رسول اللہ صلی اللہ علیہ وسلم نے فرمایا:،جو شخص قدرت نکاح کے باوجود نکاح (شادی) نہ کرے وہ ہم میں سے نہیں
یعنی اس کا نبی کریم صلی اللہ علیہ اور دین اسلام سے کوئی تعلق ہی نہیں

آج نکاح بہت مشکل ہو چکا ہے
غریب بندہ بھی دس لاکھ تک لڑکی کی شادی کر پاتا ہے،سب سے بڑی لعنت جہیز ہے پھر اس کے بعد دیگر فضول رسم و رواج کہ جن کا دین اسلام سے دور کا بھی کوئی تعلق نہیں

دوسرا سب سے بڑا المیہ ہماری بے جا ذاتی خواہشات ہیں
جیسے کہ ہر لڑکے کو بہت خوبصورت،پڑھی لکھی اور جوان لڑکی چائیے اور اسی طرح ہر لڑکی کو خوبصورت ،پڑھا لکھا اور بہت پیسے والا مرد چائیے جس کے باعث زیادہ تر لڑکیاں شادی سے محروم رہ جاتی ہیں کیونکہ اکثر مردوں کو بڑی عمر میں بھی کم عمر لڑکیاں مل جاتی ہیں اور ان کا گھر بس جاتا ہے مگر اس کے برعکس بڑی عمر کی عورت کو کم عمر مرد قبول نہیں کرتا ،ہاں اگر بڑی عمر کی عورت کے پاس پیسہ ہو تو پھر وہ عورت حور لگتی ہے مطلب محبت عورت سے نہیں پیسے سے ہے

شادی کرتے وقت بطور مسلمان ہمیں اس حدیث کی رو سے یہ حکم ہے کہ ابن مسعود رضی اللہ عنہ سے مروی ہے کہ نکاح کے ذریعے دولت تلاش کرو

جگہ ارشاد ربانی ہے کہ تم میں سے جو مرد و عورت بے نکاح ہوں ان کا نکاح کر دو اور اپنے نیک بخت غلام لونڈیوں کا بھی، اگر وہ مفلس بھی ہوں گے تو اللہ تعالی انہیں اپنے فضل سے غنی بنا دے گا ،اللہ تعالی کشادگی والا علم والا ہے، النور 32

یعنی اسلام نے نکاح کے ذریعے سے امیر ہونے کا طریقہ بتایا اور ہم نے لالچ میں اسے پس پشت ڈال کر جہیز کی لالچ میں نکاح کو مشکل بنا لیا
جبکہ حکم ہمیں ہے دینداری دیکھنے کا اور ہم نے حسن و جمال کیساتھ اعلی خاندان و پیسے کو حجت بنا لیا

ہماری عادت ہے کہ ہم مارکیٹ سے کوئی چیز خریدنے جائیں تو مطلوبہ برینڈ کی چیز اگر میسر نہیں تو اس کے متبادل کوئی اور چیز خرید لیتے ہیں،اگر اس چیز میں کوئی کمی کوتاہی ہو بھی تو ہم اس چیز کو ضائع نہیں کرتے بلکہ اس سے کام لیتے ہیں اور گزارہ کرتے ہیں مگر نکاح کے معاملات میں ہمارا یہ حال ہے کہ رشتہ دیکھنے جاتے وقت ہماری ڈیمانڈز پوری نا ہو تو ہم جواب دے دیتے ہیں اور ساری زندگی اسی طرح اپنے لئے دیکھتے دکھاتے گزار دیتے ہیں مگر کسی کی بیٹی سے گزارہ نہیں کر پاتے

اگر کوئی مرد و عورت ایسا کر بھی لے تو کچھ عرصہ بعد نوبت طلاق تک پہنچ جاتی ہے اور پھر طلاق یافتہ مرد و عورت خاص طور پر عورت زمانے کی نظروں میں بیکار ہو جاتی ہے اور بقیہ زندگی ماں باپ،بہن بھائیوں کی چوکھٹ پر بوجھ بن کر گزار دیتی ہے

یہی ہماری اخلاقی،سماجی،اسلامی زوال کا اصل سبب ہے،دوسرا بڑا مسئلہ دوسری،تیسری اور چوتھی شادی کو جرم قرار دینا ہے

سوچیئے اگر جو مرد قدرت و طاقت رکھتے ہیں وہ دوسری یا اس سے زیادہ شادی اسلام کی رو سے کرنا شروع کر دیں تو کیا پاکستان میں کنواری بیٹھی 1 کروڑ عورتیں بیاہی نا جائیں گیں؟
جی بالکل مگر یہاں بھی سب سے بڑی رکاوٹ عورت کے راستے میں عورت ہے اور وہ عورت یہ ڈکٹیشن فلموں اور ڈراموں سے لیتی ہے
اگر ہم نے نکاح کو عام کرنا ہے تو ان فضول رسموں کو ختم کرکے اسلامی طریقہ اپنانا ہو گا بصورت دیگر بن بیاہی 1 کروڑ عورتوں کی بدعائیں نا تو ہمارے گھروں میں خوشحالی آنے دینگیں نہ ہی ہمارے اعمال میں برکت ہوگی،