Category: بلاگ

28 جنوری 1987 کی سہ پہر پاکستان کے ایٹمی سائنسدان ڈاکٹر عبدالقدیر خان اسلام آباد کے علاقے E-7 میں واقع اپنی رہائش گاہ پر اپنی اہلیہ کے ہمراہ اکیلے موجود تھے کہ جب سکیورٹی افسر نے چند مہمانوں کی آمد کی اطلاع دی۔

سکیورٹی افسر نے ڈاکٹر عبد القدیر خان کو بتایا کہ مہمانوں میں سے ایک کو وہ پہچانتے ہیں کیونکہ وہ پاکستان کے معروف صحافی مشاہد حسین سید ہیں۔ جو اب سینیٹ میں پاکستان مسلم لیگ ن کی طرف سے ممبر ہیں۔  ڈاکٹر خان نے سکیورٹی افسر سے کہا کہ مہمانوں کو اندر لے آئیں اور انھیں ڈرائنگ روم میں بٹھائیں۔

ڈاکٹر عبد القدیر خان مہمانوں سے ملنے آئے تو مشاہد حسین سید نے دوسرے مہمان کا تعارف کلدیپ نیئر کے طور پر کرایا جو انڈین پنجاب سے تعلق رکھنے والے مشہور صحافی تھے۔

مشاہد حسین سید نے ڈاکٹر عبد القدیر خان کو بتایا کہ کلدیپ نیئر میری شادی کی تقریب میں شرکت کے لیے پاکستان تشریف لائے ہیں۔ یہ تقریب اس ملاقات سے ایک ہفتے بعد ہونا تھی۔ چائے پیتے ہوئے ڈرائنگ روم میں موجود تینوں افراد کے درمیان انڈیا، پاکستان تعلقات، انڈین تاریخ اور ہندو مسلم تعلقات اور پاکستان کے ایٹمی پروگرام تک کے موضوعات پر طویل بات ہوئی۔ پاکستان کا جوہری پروگرام حال ہی میں ڈاکٹر عبد القدیر خان کی زیر نگرانی شروع ہو چکا تھا۔

کلدیپ نیئر نے اپنا تعارف کرواتے ہوئے کہا کہ ‘میں سیالکوٹ سے ہوں اور اب نئی دہلی میں رہتا ہوں۔جوابا ڈاکٹر عبد القدیر خان نے کہا کہ میں بھوپال سے ہوں اور اب اسلام آباد میں رہتا ہوں۔’

جب ان تینوں مہمانوں کی پاکستان کے جوہری پروگرام پر گفتگو شروع ہوئی تو کلدیپ نیئر کا کہنا تھا کہ ‘اگر پاکستان دس بم بنائے گا تو انڈیا ایک سو بم بنائے گا۔’ اس بات کے جواب میں ڈاکٹر عبد القدیر خان نے کہا کہ ‘اتنی بڑی تعداد میں بم بنانے کی ضرورت نہیں۔ تین یا چار ہی دونوں اطراف کے لیے کافی ہوں گے۔’

ڈاکٹر عبد القدیر خان بتاتے ہیں کہ ‘میں نے اپنی بات جاری رکھتے ہوئے کہا  کہ ہم اس قابل ہیں کہ مختصر ترین مدت میں بم بنا لیں۔’

کلدیپ نیئر نے غیر ذمہ داری کا مظاہرہ کرتے ہوئے ڈاکٹر عبد القدیر خان کے ساتھ ہونے والی اس غیر رسمی گفتگو کو انٹرویو بنا کر ‘لندن آبزور’ کو 20 ہزار پاونڈز میں بیچ دیا۔ یہ انٹرویو  نہیں تھا۔ یہ تو چائے پر ہونے والی محض ایک گپ شپ تھی۔’

یہ ملاقات ایسے وقت ہوئی تھی جب پاکستان اور انڈیا کی فوجیں آنکھوں میں آنکھیں ڈالے راجستھان اور پنجاب سیکٹرز میں عالمی سرحد پر ایک دوسرے کے آمنے سامنے صف آرا تھیں۔

سرحد کے دونوں جانب حملہ کرنے والی بری افواج کے دستے جمے ہوئے تھے، فضائیہ ہائی الرٹ پر تھی جبکہ توپ خانے بھی سرحد کے قریب پہنچا دیاگیا تھا۔ اس بحران کو براس ٹیک (انڈین فوج کی جنگی مشق) کے نام سے یاد کیا جاتا ہے۔

پاکستان کو یہ خطرہ لاحق ہوا کہ ان انڈین جنگی مشقوں کا رُخ اور پیش قدمی پاکستان کی طرف ہے جو پاکستان کے سیاسی خلفشار کا شکار صوبہ سندھ پر بڑے حملے میں بدل سکتی ہے۔ یہ وہ وقت تھا جب پاکستان کا جوہری پروگرام اپنے ابتدائی مراحل میں تھا اور پاکستان باقاعدہ جوہری حیثیت حاصل کرنے سے 12 سال دور تھا۔

اس زمانے میں ‘براس ٹیک’ کو پاکستان کی سالمیت کے لیے سٹرٹیجک خطرے کے طور پر دیکھا گیا۔

کلدیپ نیئر کے نام سے لندن آبزرور میں شائع ہونے انٹرویو میں ڈاکٹر عبد القدیر خان کے نام سے منسوب کرکے لکھا گیا کہ ‘کوئی ملک پاکستان کو ختم نہیں کر سکتا اور نا ہی ہم تر نوالہ ہیں۔ ہم قائم رہنے کے لیے بنے ہیں اور کوئی شک میں نہ رہے کہ اگر ہماری بقا کو خطرہ ہوا تو ہم ایٹم بم چلا دیں گے۔’

یہ بات بھی کلدیپ نئیر نے ڈاکٹر عبد القدیر خان سے منسوب کر کے لکھی کہ پاکستان نے ہتھیاروں میں استعمال کی سطح تک یورینیم کو افزودہ کر لیا ہے اور یہ کہ لیبارٹری میں اس کا تجربہ کیا جا سکتا ہے۔

اس انٹرویو کی اشاعت کے بعد سے پاکستان میں عوام اور میڈیا نے عام طور پر یہ سمجھنا شروع کر دیا کہ کلدیپ نئیر کی خبر میں مخفی اس ‘جوہری دھمکی’ نے انڈیا کو پاکستان پر کوئی بڑا حملہ کرنے سے روکا تھا۔

بی بی سی نے اپنے انٹرویو میں جب ڈاکٹر اے کیو خان سے استفسار کیا کہ کیا کلدیپ نئیر سے ان کی گفتگو سے متعلق اخباری خبر نے کشیدگی کو ختم کرنے میں کردار ادا کیا تھا؟ ان کا جواب تھا کہ ‘بالکل۔ ایسا ہوا۔ اس کشیدگی کے خاتمے کے پیچھے ایک اور وجہ بھی تھی۔’

‘زیادہ کردار ضیاء کی دھمکی نے ادا کیا جب وہ جے پور میں راجیو گاندھی سے ملے تھے جہاں وہ کرکٹ میچ دیکھنے گئے تھے۔ ضیاء نے راجیو سے کہا کہ اگر بھارتی فوج فوری واپس نہ ہوئی تو وہ جوہری حملے کا حکم دے دیں گے۔ راجیو اس پر گھبرا گئے اور نتیجہ یہ نکلا کہ انھوں نے بھارتی فوج کی فوری واپسی کا حکم دے دیا۔’

ڈاکٹر عبد القدیر خان بتاتے ہیں کہ براس ٹیک سے چند ہفتے قبل انھوں نے جنرل ضیاء کو ایک تحریری پیغام بھجوایا تھا کہ پاکستان دس دن کے نوٹس پر جوہری بم بنانے کے قابل ہے۔ انھوں نے کہا کہ ‘اس سے ضیاء کو راجیو گاندھی سے بات کرنے اور دھمکی دینے کا اعتماد ملا تھا۔’

آج وہی ڈاکٹر عبد القدیر خان پاکستان میں بڑی دشواری کے ساتھ اپنی زندگی بسر کر رہے ہیں، سرکاری سطح پر بھی انکو عوامی مقامات پر جانے کی اجازت نہیں ہے اور حالیہ دنوں میں وہ کورونا وائرس کا شکار ہوگئے ہیں جن کو ملٹری ہسپتال راولپنڈی میں داخل کر دیا گیا ہے۔ ہماری نیک تمنائیں اور دعائیں ڈاکٹر عبد القدیر خان کے ساتھ ہیں کہ الله تعالٰی انکو جلد صحتیابی عطاء فرمائے تاکہ وہ مزید پاکستان کے لیے اچھے کام کر جائیں، جن سے آنے والی نئی نسلیں انکے کام سے استفادہ حاصل کر سکیں۔

ٹیلی ویژن دیکھیں یا اخبارات سوشل میڈیا کھولیں تو سامنے ایک جیسی خبریں گردش کرتی ہوئی نظر آتی ہیں۔جنسی تشدد ،جسمانی تشدد ،قتل اور ایسی بہت سی خبر رونگٹے کھڑے کرنے کے لیے کافی ہیں۔۔ایسا کیوں ہے؟ کون سی چیز ہے جس نے انسان کو انسان کے مرتبے سے گرا دیا اور حیوان بننے پر مجبور کر دیا ہے؟بہت سی وجوہات ہو سکتی ہیں لیکن ان میں سے ایک وجہ ہمارا خودساختہ معیار ہے۔جس کے ذمہ دار بھی ہم خود ہیں اور اس چیز کا شکار بھی ہو خود ہیں۔ہم ایک ایسا معاشرہ بن چکے ہیں جہاں انسانوں کا رہنا مشکل ہے۔جہاں لوگ روٹی کپڑے سے تنگ اور پریشان تھے اب اس بات سے پریشان ہیں کہ باہر جائیں گے تو باعزت زندہ واپس آئیں گے بھی کہ نہیں۔۔جہاں بچے ماؤں کے ساتھ محفوظ محسوس کرتے تھے اب ماٸیں ہی قومی شاہراہ پر محفوظ نہیں ہیں۔یہ اتنی شرم ناک بات ہے کہ لکھتے ہوئے قلم بھی لرز جاۓ۔۔ان سب کی وجہ ہمارا خودساختہ معیار ہے ہم نے خود کو brandsاورstandard میں اس قدر الجھا لیا ہے کہ اب ہم اس کے شکنجے میں جکڑے جاچکے ہیں۔ نکاح سنت رسول صلی اللہ علیہ وسلم ہیں اور ہم نے اس سنت کو خود سے گلے کا پھندا بنا لیا ہے۔آج کے دور میں سب سے آسان چیز زنا اور سب سے مشکل چیز نکاح ہے اور اس حقیقت سے جتنی بھی نظریں چرائی جائیں حقیقت تو یہی ہے اور نکاح کو مشکل بنانے والے بھی ہم خود ہیں ہم نے نکاح کے نام سے اتنے لوازمات جوڑ لئے ہیں کہ جب تک لاکھوں جمع نہ ہوں تو سنت پوری نہیں کر سکتے۔اور دوسری وجہ تربیت ہے والدین زمانے کی بھاگ دوڑ میں اس قدر مصروف ہو چکے ہیں کہ انہیں اولاد کی پرواہ ہی نہیں ہے۔ایسے گھروں سے نکلے ہوئے بچے جنہیں اچھے برے کی تمیز نہ سکھائی جائے حلال اور حرام میں فرق نہ سکھایا جائے تو ان کے لئے کوئی بھی گناہ ، گناہ ہی نہیں ہوتا۔انہیں رشتوں کے تقدس کا پتہ ہی نہیں ہوتا بچے کی سب سے پہلی درسگاہ ماں کی گود ہوتی ہے جب درسگاہ میں وہ گرم جوشی ہی نہیں اور وقت کی قلت ہوگئی تو بچے بھی معاشرے کے لیے ناسور ہوں گے۔۔اور تیسری وجہ ہماری بے وجہ کی خواہشات ہیں ہم نے اپنی خواہشات کو بے لگام کیا ہوا ہے کہ خواہشات کے سامنے حلال اور حرام کا فرق نہیں کر پاتے۔کہاوت ہے کہ” چادر دیکھ کر پاؤں پھیلانے چاہئیں“لیکن اب ہمیں چادر کے چھوٹے اور بڑے ہونے سے کوئی سروکار ہی نہیں ہے اس کی سب سے بڑی وجہ ہیں گھر کی خواتین۔جنہیں پتہ ہونے کے باوجود کے گھر کے سربراہ کی کمائ اتنی نہیں ہے کہ وہ بے جا خواہشات پوری کرسکیں لیکن پھر بھی وہ سب چاہیے جو امیر لوگ بآسانی خرید سکتے ہیں۔مڈل کلاس طبقے نے خود کو brandsاورstandard کی دوڑ میں خود شامل کیا ہے سارا دن کام کرکے شام کو تھکا ہارا گھر آنے والا مزدور جب حالات کا رونا روتی اور غربت کو کوستی عورت کو دیکھے گا تو دماغی بے سکونی کا مریض بنے گا۔جس کے نتیجے میں پھر ان کی درندگی کی خبریں ہم روز سنتے ہیں۔ہمیں بحیثیت مسلمان رب کی رضا پر راضی رہنا چاہیے۔بہتری کی کوشش کرتے رہنا چاہیے لیکن حلال اور حرام کی تمیز کے ساتھ۔اور دوسری طرف بچوں کی تربیت پر توجہ کی ضرورت ہے خدارا اپنے بچوں کو انسان بنائیں۔انہیں انسان کی مکمل تعریف عملی طور پر کرکے بتائیں۔انہیں عورت کا مرتبہ سمجھاٸیں۔انہیں مردکا وقار بتائیں۔اچھا انسان بنائیں۔اور والدین سے گزارش ہے کہ ذات پات امیری غریبی کے دوہرے معیار سے نکل آئیں۔دوسری ذات میں یا غریب گھر میں شادی کرنا زنا سے بہت افضل ہے۔۔ذات پات کے چکر میں بچوں کو پنکھے سے لٹکنےاور حرام موت مرنے سے بچائیں۔نکاح کو عام کریں رزق کا وعدہ میرے رب کا ہے۔اس بات پر یقین رکھیں وہ بھوکا نہیں سونے دے گاہم لوگ ہی اب اس معاشرے کو پھر سے انسانی معاشرہ بنا سکتے ہیں ورنہ رب کی پکڑ بہت سخت ہے۔

(سٹی: صادق آباد)

ڈبا تو آرڈر کردہ کواڈ کاپٹر یعنی ڈرون کا ہی تھا لیکن  اس کے اندر  کاغذ بھرے ہوئے تھے ۔ منظر تھا سوشل میڈیا پر موجود ویڈیو کا جس میں گلگت سے تعلق  رکھنے والے تین بچے پاکستان کی سب سے بڑی آن لائن شاپنگ سائٹ سے منگوائے جانے والے ڈرون کی "ان باکسنگ "کررہے تھے ۔  بچوں نے ویڈیو شروع تو جوش اور ولولے سے کی لیکن اختتام پر خالی ڈبہ دیکھ انکے منہ اتر  سے گئے۔ ننھے ولاگر کے الفاظ  "فراڈ ہے یہ سب” اس المیے کی نشاندہی کررہے تھے جو ٹیکنالوجی کی ترقی کے ساتھ ہی وجود میں آیا تھا۔ آن لائن فراڈ کا یہ کیس کس طرح اختتام پذیر ہوا اور ویڈیو وائرل ہونے پر کمپنی کی جانب سے  بچوں کو تحفے  دے کر کیسے اپنے ساکھ بہتر کرنے کی کوشش کی گئی وہ ایک علیحدہ قصہ ہے

یہ تو حال ہے پاکستان کی سب سے بڑی اور ملٹی نیشنل کمپنی کی ملکیت سائٹ کا جہاں داد رسی کا کچھ موقع موجود ہوتا ہے۔ دوسری جانب  کسی بھی آن لائن  اسٹور ، ویب سائٹ یا  اپیلی کیشن سے خریدی کسی چیز میں کوئی خرابی نکل آئے ، وہ چیز جعلی نکل آئے یا پھر ڈبا خالی ہی نکل آئے تو پھر صبر کرنا ہی واحد حل رہتا ہے۔ دنیا بھر میں آن لائن  شاپنگ کی ویب سائٹس اور اسٹوروں پر کڑے قوائد و ضوابط لاگو ہوتے ہیں۔ ٹیکس نظام سے منسلک ہونے کے باعث خرید و فروخت کا ریکارڈ  قانون نافذ کرنے والے اداروں کے پاس بھی ہوتا ہےلیکن وطن عزیز میں تو پھر "سب چلتا ہے”

سماجی رابطے کی ویب سائٹس اور ایلیکشنز  مصنوعات کے اشتہارات سے بھری ہوتی ہیں۔ یہاں کھانے پینے، پہننے اوڑھنے، اشیائے ضروریہ، اشیائےتعیش،  الیکترک سے الیکٹرانک اور سکیورٹی سے سجاوٹ تک ہر قسم کی مصنوعات ملتی ہیں۔ ان کے درمیان ہی فراڈ کرنے والے افراد موجود ہوتے ہیں۔ ایسی فراڈ ویب سائٹس  اور ویب پیجز کا نام اور ڈیزائن معروف سائٹس اور پیجز سے مشابہ رکھا جاتا ہے۔اصل مصنوعات کی تصاویر ایڈٹ کرکے لگائی جاتی ہیں تو صارف دھوکا کھا جاتاہے ۔ دیدہ زیب ڈیزائن والی گھڑی صارف تک پہنچنے پر  50 روپے درجن والی نکلتی ہے۔  خوبصورت شرٹ لنڈے کا مال نکلتی ہے اور چمڑے کا بیلٹ گھٹیا پلاسٹک کا پٹا ہوتا ہے

یہ فراڈ اور دو نمبری کا سلسلہ یہیں نہیں رکھتا بلکہ زیادہ کمائی کے لالچ میں  ایسے فراڈئیے بین الاقوامی مارکیٹ میں بھی یہ دھندا شروع کرنے کی کوشش کرتے ہیں اور  ملک و قوم کے نام کو بٹا لگاتے ہیں۔ انہی وجوہات کے بنا پر بہت سی آن لائن ادائیگی کی کمپنیاں آج بھی پاکستان کا رخ کرنے سے کتراتی ہیں۔ اس سب فراڈ میں کچھ سہولت کورئیر کمپنیاں بھی فراہم کرتی ہیں جو بغیر اتے پتے کے مشکوک پیکٹ صارف تک پہنچاتی ہیں اور کیش آن ڈیلیوری کرنے والا صارف بعد میں سر پیٹنے کے سوا کچھ نہیں کرپاتا۔  ایسے فراڈ عموماً سیکڑوں  اور ہزاروں میں کیے جاتے ہیں تاکہ صارف قابل برداشت   ہونے کے باعث نقصان پر صبر کرلے اور قانونی چارہ جوئی نہ کرے۔ اگر کوئی کوشش کربھی لے تو رقم کم ہونے کے باعث قانون نافذ کرنے والے ادارے ذمہ دار تک پہنچنے میں سنجیدگی کا مظاہرہ نہیں کرتے

اس میں کوئی شک نہیں کہ آن لائن کاروبار سے کرونا میں  معیشت کا پہیا رواں رکھنے میں مدد ملی ہے اور   مصروف افراد کو بازار جانے کی زحمت سے چھٹکارا ملا ہے۔ خواتین گھر بیٹھے ہر چیز آرڈر پر منگوا سکتی ہیں  اور  بہت سی  مشکلات سے بچ جاتی ہیں۔  لیکن یہ سب سہولیات اور آسانیاں حاصل کرنے میں آن لائن فراڈئیے  بڑی رکاوٹ ہیں ۔ اس کے سدباب میں صارف تنظیموں کو بیدار ی مہم شروع کرنے  کی ضرورت ہےتاکہ ہر آن لائن کاروبار کی رجسٹریشن اور کا سلسلہ شروع ہوسکے۔ صارفین بھی خریداری کرتے وقت کم قیمت یا  پرکشش فیچرز کے جھانسے میں نہ آئیں اور ویب سائٹ یا سیلر کے اصلی ہونے کی تسلی کرنے کے بعد ہی آرڈر کریں۔  فراڈ ہونے کی صورت میں فراڈ کرنے والےشخص کا نہ صرف اکاونٹ بند کروایا جائے بلکہ سزا  اور جرمانہ بھی ہونا چاہیے۔ رقم کم ہو یا زیادہ،  فراڈ کو فراڈ ہی سمجھا جائے تاکہ ایسے عناصر کا سدباب ہو اور صارفین مکمل اعتماد کے ساتھ ٹیکنالوجی کی نعمت کافائدہ اٹھا سکیں

@hidesidewithak