کسی بھی معاشرے کی ترقی اور امن وامان کے لئے سزاء و جزا کا ہونا انتہائی لازمی ہے. کوئی بھی معاشرہ کسی بھی طریقے سے چل سکتا ہے مگر عدل کے بغیر نہیں چل سکتا. جب عدل ہی نہیں ہوگا تو سزا اور جزا کا تصور ہی ختم ہو جائے گا. جب کسی معاشرے سے سزا اور جزا کا تصور ختم ہو جائے تو وہ معاشرہ تباہ ہو جاتا ہے. پاکستان میں سزا اور جزا ہی نہیں بلکہ کمزور مظلوم کو مجرم ثابت کیا جاتا ہے اور طاقتور ظالم کو مظلوم ثابت کیا جاتا ہے.

نبی کریم صلی اللہ علیہ وآلہ وسلم نے فرمایا کہ اللہ کی قسم اگر میری بیٹی فاطمہؓ بھی چوری کرتی تو میں اس کے بھی ہاتھ کاٹ دیتا. تم سے پہلی قومیں اس لئے برباد ہوئیں کہ جب ان میں سے کوئی امیر اور طاقتور جرم کرتا تو اس کو چھوڑ دیا جاتا اور جب کوئی غریب جرم کرتا تو اس کو سزاء دی جاتی. تم لوگ عدل سے کام لینا. عدل جو کہ اسلام کا اہم ترین اور بنیادی ترین اصول ہے اس کے مطابق عمل کر کے یورپ اور دوسرے غیر اسلامی معاشرے ترقی کر گئے ہیں اور ہم اسلامی جمہوریہ پاکستان ہو کر بھی اس اصول کو نہ اپنا سکے.

بدقسمتی سے ہمارا اسلامی جمہوریہ پاکستان اسلام کے اس بنیادی اور اہم ترین اصول سے بالکل خالی ہے. ہمارے ہاں بھی قدیم قوموں والا نظام عدل رائج ہے. بہت ساری مثالیں بلکہ حقائق موجود ہیں کہ طاقتور آزاد گھوم رہے ہیں. بااثر اور سیاسی یا حکومتی اثرورسوخ والے مجرم اعتراف جرم کرنے کے باوجود معصوموں کی طرح آزاد اور بے خوف و خطر گھوم رہے ہیں. 258 لوگوں کو زندہ جلانے والے نے اعتراف جرم کیا مگر اس کو سزا نہیں دی گئی. تقریباً 120 سے زیادہ لوگوں کے قتل کا اعتراف کرنے والا بھی ابھی تک انجام کو نہیں پہنچا.

پاکستان میں طاقتور کے لئے اور کمزور کے لئے علیحدہ علیحدہ قانون ہیں. پچھلے دنوں مظفرگڑھ کے ڈپٹی کمشنر امجد شعیب نے اپنی گاڑی سے ایک غریب اور کمزور موٹر سائیکل سوار کو کچل دیا. کچلنے کے بعد اس کو مرنے کے لئے ٹرپتے ہوئے چھوڑ کر فرار ہو گئے. عینی شاہدین کے مطابق گاڑی خود ڈپٹی کمشنر صاحب چلا رہے تھے اور سراسر غلطی بھی ڈپٹی کمشنر صاحب کی تھی. پولیس نے فوراً ڈپٹی صاحب کو دوسری گاڑی میں بٹھا کر موقع سے فرار کروا دیا. مرنے والا کمزور اور غریب تھا، کمزوری اور غربت کی موت مر گیا اور ڈپٹی کمشنر صاحب معمول کے مطابق مزے میں ہیں.

عدل و انصاف اور سزاء و جزا کے لئے پولیس اور عدلیہ دو اہم ترین ادارے ہیں. ان دونوں اداروں میں اصلاحات کی اشد ضرورت ہے. اسلامی جمہوریہ پاکستان میں حکمرانوں، سیاستدانوں اور بیوروکریٹس کے لئے کوئی قانون نہیں، ان کی مرضی جب چاہیں اور جیسا چاہیں کر گزریں. مالدار اور جاگیر دار اپنے پیسے کے بل بوتے پر قانون اور پولیس کو خرید لیتے ہیں. قانون کی بالادستی کے لئے باقی عام غریب اور کمزور پاکستانی رہ جاتا ہے. جس کی آدھی عمر یا بعض دفعہ ساری زندگی عدالتوں اور تھانوں کے چکر لگانے میں گزر جاتی ہے. آخر کب کمزور اور طاقتور دونوں ایک ہی قانون کے تحت سزا جزا کے مستحق ٹھہریں گے. آخر کب غریب اور جاگیر دار کے لئے ایک قانون ہوگا؟

@mian_ihsaan

پاکستان ایک عظیم نظریاتی ملک ہے۔ جو ہمارے عظیم رہنماؤں کی انتھک کوششوں اور قربانیوں کی مرہونِ منت ہے۔
ہمارے آباؤ اجداد نے قیامِ پاکستان میں اپنی قیمتی جانوں کا نذرانہ پیش کیا۔ اپنے مال ودولت، زمین، کاروبار کی فکر چھوڑی آنے والی نسلوں کا سوچا اور ہجرت کر کے پاکستان آ گئے۔
برصغیر میں مسلمانوں کو مذہبی آزادی نہ تھی۔ مسلمان اور ہندو دو الگ الگ قومیں تھیں جن کا ساتھ رہنا ممکن نہ تھا اور یہی نظریہ قیام پاکستان کا موجب بنا۔
چناچہ ١٤ اگست ١٩٤٧ کو پاکستان دنیا کے نقشے پر ابھرا۔ بحیثیت مسلمان ہم پاکستانی جداگانہ حیثیت رکھتے ہیں۔ ہماری اپنی منفرد تہذیب و ثقافت ہے۔
پھر کیوں ہم دوسروں کی شخصیت سے متاثر ہو جاتے ہیں؟؟ کیوں یورپ کی ثقافت ہمیں اپنی طرف مائل کرتی ہے؟؟ کیوں ہمسایہ ملک کی رسم و رواج کو ہم نے خود میں بسایا ہوا ہے؟؟
یہ سب دین سے دوری کا نتیجہ ہے۔ اگر ہم غور کریں تو زندگی گزارنے کے سنہری اصول آج سے چودہ سو سال پہلے بیان کر دیے گئے ہیں۔
قرآن و حدیث کا اگر مطالعہ کریں تو حقوق اللہ اور حقوق العباد مفصل انداز میں بتا دیے گئے ہیں۔

وہ معزز تھے زمانے میں مسلماں ہو کر
اور ہم خار ہوئے تارک قرآں ہو کر

اب یہ ہم پہ ہے کہ قولی کے ساتھ ساتھ کتنا فعلی مسلمان بھی بنا جائے۔ کیونکہ یہی تو دو قومی نظریہ تھا۔ یہی تو قیامِ پاکستان کا موجب تھا۔
ہمارے قومی دن جیسے یومِ قرار داد پاکستان، یومِ آزادی، یومِ دفاع اس لئے تو نہیں آتے کہ جھنڈیاں لگا لی جائیں، باجے بجا لیے جائیں یا پھر منچلوں کی ایک ریلی نکال لی جائے۔
یہ تو نئی نسل کو متحرک کرنے کا دن ہے۔ تاریخ دہرانے کا دن ہے کہ ہم کتنی دلیر اور جرات مند قوم ہیں۔
مگر افسوس کچھ لوگ ان دنوں کی اہمیت سے نا آشنا ہیں۔
پاکستان ہمارے لیے سب سے بڑھ کر ہونا چاہیے۔ دینی مصروفیات کے بعد، دنیاوی فکرات میں پاکستان ہماری اولین ترجیح ہونا چاہیے۔ کیونکہ پاکستان ہے تو ہم ہیں۔ ہمیں لسانیت کو ترک کرکے قومیت کو فروغ دینا ہوگا۔

یہ وطن تمھارا ہے، تم ہو پاسباں اس کے

دنیا میں ہم جہاں بھی ہوں پاکستان کے سفیر کی حیثیت سے ہوں۔ ہمارے قول و فعل میں تضاد نہ ہو۔ ہم صرف قولی نہیں بلکہ عملی پاکستانی ہوں۔ ہمارے رہن سہن، چال چلن اور ہمارے اطوار پاکستانی ثقافت کی عکاسی کرتی ہو۔
ہم ایک عظیم تاریخ رکھتے ہیں۔ ہمیں بھلا کسی کو فالو کرنے کی کیا ضرورت۔ جسے آج ہم فیشن یا آزادی کا نام دیتے ہیں وہ بے حیائی اور اسلام سے دوری کے علاوہ کچھ نہیں۔
ہر چیز اعتدال میں اچھی لگتی ہے اگر اس سے تجاوز کرو تو وہ اپنی اصل کھو دیتی ہے۔ اسی لیے اگر کسی غیر ملکی سے ہم متاثر ہوکر ہم وہی اطوار اپنانے کی کوشش کرتے ہیں تو اعتدال سے کریں کیونکہ اگر اس سے تجاوز کر گئے تو ہم اپنی اصل کھو دیں گے۔
پیچھے ہماری کیا شناخت بچے گی؟؟
خود کو پاکستان کا سفیر سمجھیں، پاکستان کا محافظ سمجھیں جسے پاکستان کی نظریاتی حدود کی رکھوالی کرنے ہے، جسے پاکستانیت کو فروغ دینا ہے۔
فضول کے رسم و رواج میں پڑنے سے بہتر ہے کہ دین سمجھیں اس سے ہم قربِ الہی بھی حاصل کرسکتے ہیں۔
اردو اور انگریزی زبان میں فرق ختم ہونا چاہیے۔ دونوں زبانوں میں کوئی مقابلہ نہیں۔ اردو ہماری قومی زبان ہے جس کی اپنی اہمیت ہے اور اس کی جگہ کوئی بھی زبان نہیں لے سکتی اور پاکستانی ہونے کے ناطے ہمارا اردو زبان سیکھنا بولنا اور استعمال کرنا لازم ہے۔

آئیں اس ١٤ اگست عہد کرتے ہیں کہ پاکستان کا وقار بلند کرنے کے لیے ہر ممکن کوشش کریں گے کیونکہ پاکستان ہے تو ہم ہیں۔

خدا کرے کہ مری ارض پاک پر اترے
وہ فصلِ گل جسے اندیشۂ زوال نہ ہو
یہاں جو پھول کھلے وہ کِھلا رہے برسوں
یہاں خزاں کو گزرنے کی بھی مجال نہ ہو
(آمین)

@AmnaKhanPK

پودے کاربن ڈائی آکسائڈ کو اپنے اندر جذب کرتے ہوئے ہمیں آکسیجن فراہم کرنے کے ساتھ ساتھ ہوا کو آلودگی سے بھی پاک کرتے ہیں۔ آج جو ہمارے اردگرد ہوا موجود ہے وہ ذہر اور گندگی سے بھرپور ہے جسے جب ہم سانس لیتے ہوئے اپنے جسم میں اتارتے ہیں تو ان گنت بیماریوں کا شکار ہوجاتے ہیں۔

ماحول کو گندگی اور بیماریوں سے پاک صاف رکھنے کے لیے شجرکاری کی اشد ضرورت ہے۔ ایک تو یہ ماحول کو صاف ستھرا رکھتے ہیں اور دوسرا پودے انسانی صحت کے لیے بہت مفید ہوتے ہیں۔

ہمارے ہاں جیسے ملک کے موجودہ حالات چل رہے ہیں عوام کی کثیر تعداد ذہنی دباؤ کا شکار ہورہی ہے۔ ایسے حالات میں پودے بہت خوبصورتی سے کام آتے ہیں۔ یہ ہمارے درد اور تکلیف کو اپنے اندر اتارتے ہوئے ہمیں ذہنی دباؤ سے باہر نکالتے ہیں۔

پھر پودوں کے اور بھی بہت سے فوائد موجود ہیں ایک تو اس کی جڑیں بوٹیوں سے ہم بےشمار ادوایات حاصل کرسکتے ہیں۔ اس کے علاؤہ یہ ماحول کو شور جیسی آلودگی سے بھی پاک کرتے ہیں۔ کبھی توجہ فرماتے ہوئے محسوس کیجیئے گا کہ جن مقامات پر پودے موجود ہوں وہاں کس قدر سکون ہوتا ہے۔

پچھلے کئی سالوں کی نسبت آج ہمارے ملک میں کافی حد تک شجرکاری ہوچکی ہے اور مزید بھی ہورہی ہے۔ اس ملک میں بہت سی حکومتیں آئیں اور بہت سے وزرائے اعظم بھی آئے پر موجودہ حکومت سے پہلے کبھی بھی سابقہ حکمرانوں میں سے کسی نے بھی شجرکاری پر توجہ نا دی۔

پر ملک میں بڑھتی ہوئی ماحولیاتی الودگی پر توجہ دیتے ہوئے شجرکاری کی مہم کے آغاز کا سہرا بھی وزیراعظم پاکستان عمران خان کو جاتا ہے۔ جنہوں نے حکومت سنبھالتے ساتھ ہی شجرکاری کے حوالے سے پاکستانی عوام کو شعور دیا اور کثرت سے پودے لگانے کی درخواست کی۔ آج ملک میں کافی حد تک پودے لگائے جاچکے ہیں۔

پر ملک کو مزید سرسبز و شاداب بنانے کے لیے ضروری ہے کہ شجرکاری کا یہ سلسلہ کسی قیمت رکنا نہیں چاہیے اور دوسرا یہ کہ جب بھی کوئی پودا لگایا جائے تو اس کا صحیح حق ادا کرتے ہوئے چند ماہ تک پودے کی بھرپور حفاظت کی جائے یہاں تک کہ وہ اپنے جڑیں مضبوطی سے زمین میں گاڑھ لے۔

@SeharSulehri