شروع سے ہی انسان کی جبلت میں لڑنا قبضہ کرنا شامل ہے۔اپنے لوگوں کے لیے اپنے مذہب کے لیےاپنے جذبات کے لیےاپنے اندر پیدا ہونے والی نفرت کے لیے وہ دوسرے انسان پر حملہ کرتا ہے۔گروہوں میں لڑنے لگا تو جنگیں شروع ہو گئیں۔ اب تک بڑی بڑی عظیم جنگیں ہو چکی ہیں۔اب جو جدید دور آیااُس میں پانچ جنریشنز بنائی گئیں جو جنگ کی اقسام ہیں۔دو جنگیں جب بھی ہوئی ان کے درمیانی وقفے کو امن کہتے ہیں، اور یہ وقت انسانوں کو بہت کم نصیب ہوا۔کیوں کہ جب سے دنیا بنی ہے جنگیں ہوتی چلی آ رہی ہیں۔اربوں انسان اب تک اس کی بھینٹ چڑھ چکے ہیں، بے شمار انسانیت کا قتل ہو چکا ہے۔انسانوں نے ہی انسانوں کو قتل کیا ہے۔اس کیے کہتے ہیں کہ انسان ہی انسان کا سب سے بڑا دشمن ہے۔
فرسٹ جنریشن وار 1648 میں شروع ہوتی ہے۔اس وقت یورپ کے عیسائی آپس میں لڑ رہے تھے۔ اس دور میں مذہبی رہنماؤں کےکنٹرول میں فوجیں ہوا کرتی تھیں۔ چرچ فیصلہ کرتا تھا کہ کدھر حملہ کرنا ہے اور کیسے جنگ لڑنی ہے۔ آج کل پاکستان میں ترقی ڈرامہ ارطغرل بہت شوق سے دیکھا جا رہا ہے اس میں بھی کافی حد تک چرچ سے فوج کو کنٹرول کیا گیا ہے۔تب بادشاہ کٹپتلی کے طور پر استعمال ہوتے تھے۔1648 میں پہلی بار ایسا ہوا کہ مذہب کو انہوں نے جنگ سے الگ کر دیا۔فوجیں پھر ریاست اور ان کے حکمرانوں کے پاس چکی گئیں۔فوجیوں کو پہلی مرتبہ باقائدہ یونیفورم دیاگیا۔فوجی اور عام آدمی میں واضح فرق نظر آتا تھا۔ اس وقت پیدل فوج اور بنیادی ہتھیاروں کے ساتھ جنگ لڑی جاتی تھی، یہ بنیادی ہتھیار تلوار، تیر اور نیزےیا ایسے ہی دیگر ہتھیار تھے۔فرسٹ جنریشن وار کے آخر میں بندوق کا استعمال بھی کیا گیا۔یہ بندوقیں آج کی جدید بندوقوں سے مختلف ہوا کرتی تھیں۔ اسے بہت مشکل سے استعمال کیا جاتا تھا۔تب جنگیں خالی میدانوں میں جا کر لڑی جاتی تھیں۔ اس دور میں فوجی جرنیل اپنی فوج کے ساتھ ہی میدانِ جنگ میں موجود ہوتے تھے ۔
سیکنڈ جنریشن وارکا آغاز انیسویں صدی میں ہوا۔ اس جنریشن میں فرسٹ جنریشن وار کو موڈیفائی کیا گیا۔پہلے اگر بندوق کی رینج 10،20یا 50 میٹر تک تھی تو اب اس کی رینج 100،200یہاں تک کہ 500 میٹر تک ہو گئی تھی۔ فوجیں دور سے ہی اپنے دشمنوں پر حملہ کرتی تھی۔اب ان بندوقوں کو استعمال کرنا آسان ہو گیا تھا۔ان ہتھیاروں نے جنگ کا طریقہ کار ہی بدل دیا ۔اس دور میں ہی پہلی مرتبہ کیموفلج کپڑوں کا استعمال کیا گیا جسے فوجی پہن کر گردونواح کے مطابق خود کو ڈھال کر چھپ جاتے تھے۔فوج کو چھوٹے چھوٹے یونٹس میں بانٹ دیا گیا ۔جو جلدی حملہ کر کے چھپ جانے کی صلاحیت رکھتے تھے۔ تھرڈ جنریشن وار میں بھی یہ طریقے استعمال کیے گے اور اب بھی یہ طریقے استعمال کیے جاتے ہیں۔
گولہ باری ،ایٹم بم اور راکٹ بھی اسی دور کے آخر میں استعمال کیے گئے۔ جبکہ اس دور میں جرنیل فوجیوں کے ساتھ نہیں ہوتے تھے ،بلکہ محفوظ جگہ سے ریڈیو پر احکامات دیے جاتے تھے۔ اسی دور میں ہی پہلی بارکوڈ وارڈ استعمال کیے گئے تاکہ دشمن کو حکمتِ عملی کا پتہ نہ چل سکے۔
امریکی سول وار ، سپینش سول وار اس کے علاوہ ایرن اور عراق کی جنگ 1980 سے 1988 تک سیکنڈ جنریشن وارکی مثالیں ہیں۔
اب چلتے ہیں تھرڈ جنریشن وار کی طرف۔ تھرڈ جنریشن وار میں مزید جدت آ گئی۔اب صنعتی انقلاب بھی آ گیا تھا۔دنیا اور ٹیکنالوجی بہت آگے بڑھ چکی تھی۔جنگ لڑنے والے ممالک نے یہ محسوس کیا کہ رفتار کی بڑی اہمیت ہے۔جتنی تیزی سے آپ جاتے ہیں اور جتنا آپ سرپرائز دیتے ہیں اُتنا زیادہ آپ اچھا لڑ سکتے ہیں۔اس جنریشن نے تیزی سے حملہ کرنے کے لیے ٹینکس بنائے۔ ہیلی کاپٹراورجہاز بنائے جواوپر سے بم پھینکتے تھے ۔ خطرناک میزائل استعمال کیے گئے۔ تھرڈ جنریشن وار زیادہ خطرناک تھی ۔اس میں ایک آدمی سیکڑوں لوگوں کو مار سکتا تھا۔جس فوج کے پاس ٹیکنالوجی کم ہوتی تھی اس کا فائدہ دوسری افواج اُٹھا لیتی تھیں۔رفتارحد سے بڑھ چکی تھی،دنوں کے فاصلے گھنٹوں اور منٹوں میں طے ہونا شروع ہو گئے تھے۔
پاکستان اور انڈیا کی جتنی بھی جنگیں ہوئی ہیں وہ سیکنڈ اور تھرڈ جنریشن وار فیئر کی جنگیں ہیں۔ کوریاکی جنگ،سوویت یونین ،امریکہ کی سرد جنگ ، اسرائیل اور عربوں کی جنگ اور افغانستان میں امریکہ کی جنگ تھرڈ جنریشن وار فیئر کی مثالیں ہیں ۔
آج بھی اگر کوئی ایک ملک کسی دوسرے ملک سے بَراہِ راست لڑے گا تو تھرڈ جنریشن وار کو ہی استعمال کرے گا۔ اس وقت ترقی اور یونان کے درمیان جنگ کا خطرہ ہے اگر جنگ ہوئی تو یہ تھرڈ جنریشن وار ہی ہو گی۔
اب دیکھتے ہیں کہ فورتھ جنریشن وار کیا ہے۔اس میں فوج اور عام عوام کے درمیان فرق ختم کر دیا جاتا ہے۔اس میں سیاست اور جنگ مکس ہو جاتی ہے۔ فورتھ جنریشن وار میں یہ کیا جاتا ہے کہ پروپیگنڈہ کے ذریعےسے،فنڈنگ کے ذریعے سے،لوگوں کے مذہبی جذبات کو بھڑکا کر ،لوگوں کی غربت ، محرومیوں اور ناانصافیوں کا فائدہ اُٹھاتے ہوئے،نوجوانوں کو گمراہ کر کے ایسا لٹریچر دیا جاتا ہےجس پر اُن کے جذبات بھڑکتے ہیں اور پھر وہ ایک ایسے گروہ میں تبدیل ہو جاتے ہیں جو اپنی ہی ریاست کے خلاف جنگ کر دیتے ہیں یا پھر ایسا گروپ بن جاتا ہے جو کسی خاص مقصد کے تحت خاص قسم کے لوگوں کو مارنا شروع کر دیتے ہیں۔اس کو کہتے ہیں فورتھ جنریشن وارفیئر۔اس کا آغاز 1989 میں امریکہ نے اپنی شاطر ذہنیت کے ساتھ کیا تھا۔
ٹی ٹی پی (تحریک طالبان پاکستان) فورتھ جنریشن وار کی مثال ہے جس نے پاکستان پر حملے کیے۔ایک وقت ایسا تھا کہ چالیس حملے ہوے پاکستان میں۔کبھی جی ایچ کیو پر حملہ کیا تو کبھی مساجد پر ،کبھی امام بارگاہ پر حملہ کیا تو کبھی بازاوں میں بم دھماکے۔یہ حملے فورتھ جنریشن وارفیئر کے حصہ تھے۔ٹی ٹی پی اور دوسرے گروہوں کو باقائدہ انڈیا ،اسرائیل اور سی آئی ای کی جانب سے فنڈنگ کی گئی۔
فورتھ جنریشن وار فیئر میں آج تک صرف ایک ملک ہے جس نے یہ جنگ جیتی ہے باقی ساری ریاستیں ہاری ہیں ۔ جہاں جہاں یہ جنگ چھڑی کوئی اس کو نہیں جیت سکا سوائے ایک ملک کے اور وہ ملک ہے پاکستان۔اس میں پاکستان کا بہت نقصان بھی ہوا اور فورتھ جنریشن وار ہے ہی مسلمانون کے خلاف کیونکہ اسے امریکہ نے شروع کیا تھا اپنے اتحادیوں کے ساتھ مل کے اور مسلمانوں کے خلاف شروع کیا۔لیکن پاکستان اس سےکامیابی کے ساتھ لڑا اور اپنی جیت ثابت کی۔
یہ تو تھیں پہلی چار جنریشنز وار پانچوی بہت اہم ہے اس پر الگ سے تفصیل سے لکھوں گا اور انشاءاللہ بہت جلد آپ باغی ٹی وی کی ویب سائٹ پر پڑھ سکیں گے۔ تب تک کے لیے اَللہ نِگَہبان۔
@iamAsadLal
twitter.com/iamAsadLal

وہ جب پیدا ہوا تو سارے خاندان میں خوشیاں منائی گئیں ،آخر کو دو بیٹیوں کے بعد دنیا میں آیا تھا خوشی تو بنتی ہی تھی۔
لاڈلا بیٹا ماں کی آنکھوں کا تارا اور بہنوں کا راج دلارا،
ابھی ساتویں دن سر کے بال بھی نہیں مونڈے گئے تھے کہ ماں نے لاڈلے کے سر پر سہرا سجانے کے خواب بننا شروع کر دئیے۔
ماں کا ایک ہی ارمان تھا کہ کب میرا لاڈلا اس قابل ہوگا کہ میں خوبصورت سی بہو لیکر آؤں گی،،،،
وقت کا پہیہ گھومتا رہا اور وہ وقت قریب آ ہی گیا جس کا لاڈلے کی ماں اور بہنوں کو انتظار تھا،
جی ہاں! آپ ٹھیک سمجھے
سر پر سہرا سجانےکی گھڑی بالآخر آن پہنچی تھی۔
ماں اور بہنوں کو نازک سی گورے رنگت والی بہو خوب بھائی تھی کہ چٹ منگنی پٹ بیاہ والا معاملہ ہوا۔
وہ بھی آنکھوں میں ڈھیروں خواب سجائے اپنے پیا دیس سدھار گئی اور دل میں خود یہ یہ عہد کئے کہ اپنی سیرت اور اخلاق سے سب کو جلد ہی اپنا گرویدا کر لے گی لیکن ہائے،،،،
ہائے یہ قسمت بھی عجیب کھیل کھیلتی ہے،
سسرال ایک ایسی جگہ ہے جہاں پر بعض اوقات اچھی شکل ،اچھا اخلاق، نیک سرت اور باکردار ہونا بھی آپکا بسنے میں ساتھ نہیں دیتا اور آپکی ہر ریاضت بے کار چلی جاتی ہے۔
اسکی چھوٹی چھوٹی بے ضرر سی نادانیاں اسکا عیب اور گناہ بنا دی گئی تھیں۔
اسکا ہنسنا، بولنا اور سب سے گھل مل جانے والی عادات اسکا گناہ بن گئی تھیں۔
لاڈلا تو اپنا بیٹا تھا نا اب اسکی نادانی کی سزا بھی بہو رانی بھگت رہی تھی کیونکہ دل اتنے تنگ تھے کہ یہ قبول ہی نہ کر پائے کہ لاڈلا پہلے بیٹا اور بھائی تھا تو اب ایک شوہر بھی بن چکا ہے۔
لاڈلا بیوی کے ساتھ بیٹھے تو بیوی بے حیا،،،
لاڈلا کبھی مسکرا کر بیوی کی طرف دیکھ لے تو "بہو کے لچھن ٹھیک نہیں بازاری کہیں کی مردوں کو رجھانا خوب جانتی یے”
لاڈلا بیوی کے ساتھ ایک پلیٹ میں کھانا کھائے تو ” گھر میں جوان بہنیں ہیں ان کے دل پر کیا گزرے گی یہ دیکھ کر”
لاڈلا بیوی کو موٹر سائیکل پر ساتھ بٹھا لے تو "کیسے چپک کر میاں کے ساتھ بیٹھی ہے کیا اپنے باپ کیساتھ بھی ایسے بیٹھتی تھی”
ارے یہ تو جھلکیاں ہیں مکمل داستان آپ کیلئے سننا دشوار ہو جائے گی۔
بہو رانی ماں سے ایک چپ سو سکھ کا سبق سیکھ کر آئی تھی سو ایک لمبا عرصہ خاموشی سے یہ سب دیکھتی رہی اور یہ سوچتی رہی کہ محبت تو فاتح عالم ہے ،دلوں کو مسخر لیتی ہے اور ایک دن وہ بھی سب کے دلوں کو جیت لے گی لیکن وہ یہاں بھی غلط تھی،،،،بدکرداری، چوری، ماں باپ کی گندی تربیت کے الزاموں سے لیکر شوہر کا اولاد نہ دینا تک سہ لیا اور اسکا ساتھ دیتی رہی لیکن،،،،
لیکن دل نہیں جیت پائی اور پھر ایک دن تھک ہار کر لاڈلے کو اسکی ماں کی آغوش کو
میں سونپ کر پھر سے اپنے کچے پکے آشیانے میں واپس آگئی ،،،،
یہ جو ٹوٹے پھوٹے بے ترتیب الفاظ میں کہانی لکھی گئی ہے یہ کسی بہت اپنے کی حرف حرف حقیقت داستان ہے،،،،یہ کسی کی آٹھ سالہ ذندگی کے وہ بہترین سال تھے جو چھوٹے دلوں کی کم ظرفی کی نظر ہو گئے،،،یہ اس آٹھ سالہ کہانی کا صرف دس فیصد حصہ ہے ۔
یہ ہمارے پاکستانی معاشرے کے ہر دوسرے گھر کی کہانی ہے جہاں بڑے ارمانوں سے کسی کی بیٹی کو لایا جاتا ہے اور پھر اسکو تھوڑ دلی، کم ظرفی اور شک و شبے کی ایسی آگ میں دھکیل دیا جاتا ہے جسکا اس نے کبھی تصور بھی نہ کیا ہو۔
خدارا 🙏
جب کسی کی بیٹی کو اپنے گھر کی عزت بنا کر لائیں تو اسکو عزت سمجھیں اور عزت دیں ، کوئی بھی انسان خامیوں سے پاک نہیں ہوتا اور اس رشتے کی یہی خوبصورتی ہے کہ فریقین اسکو ایکدوسرے کی خوبیوں اور خامیوں سمیت قبول کریں۔
جیسے اپنی بیٹی کو اسکی چھوٹی چھوٹی باتوں کیلئے معاف کردیتے ہیں ویسے ہی بہو کیلئے بھی دل بڑا کرنا سیکھیں۔
یہ ایک پہلو ہے جو میں نے سنا اور اسکو اپنے الفاظ میں لکھ دیا ،اور بہت سے واقعات اس سے الٹ بھی ہیں جہاں نئی نویلی دلہنیں گھروں کو توڑنے کا اور فتنہ و فساد کا سبب بن جاتی ہیں تو دونوں طرف ہی اصلاح کی شدید ضرورت ہے،،،
جو لڑکیاں بیاہ کر اگلے گھر جائیں وہ بھی شوہر کو اپنی ملکیت نہ بنائیں اور جو لوگ دوسروں کی بیٹیاں بیاہ کے لائیں وہ انکو اور کچھ نہ سہی تو انسان ضرور سمجھیں🙏
چونکہ ہمارے یہاں  پاکستان میں ذیادہ تر مڈل کلاس اور اس سے بھی نیچے کا طبقہ آباد ہے اور ایسے میں جوائینٹ فیملی سسٹم کا ہی رواج ہے تو دونوں طرف سے دل بڑا کر کے ایک دوسرے کو قبول کرنے کی ضرورت ہے، اعلی ظرفی سے گھر میں نئے اضافے کی صورت آئے فرد کو کھلے دل سے قبول کرنے کی ضرورت ہے،
سسرال والے نئی نویلی دلہن کو گھر میں جگہ بنانے کا موقع دیں اور بہو سب کے احترام کو ملحوظ خاطر رکھے۔
اپنے خاندانی نظام کو پرسکون طریقے سے چلانے کیلئے جیو اور جینے دو کے فلسفے کو اپنانے کی ضرورت ہے کیونکہ ایک دوسرے کی خواہشات کا احترام کر کے ہی ایک خوشحال گھرانہ تشکیل پا سکتا ہے کیونکہ ایک دوسرے کی عزت کے ساتھ جذبات کا احترام اور احساسات کا خیال کر کے ہی بہتر زندگی گزاری جاسکتی ہے۔

خواہش سے مراد کسی مادّی شے یا
مرتبہ و مقام جسے پانےکیلیے بندہ ( مومن) ہر قانونی، غیر قانونی آئینی و غیر آئینی اور شرعی و غیر شرعی ( یعنی قانون ، آئین و دین کے متعین کردہ حدود) کو پھلانگتا ہے۔
خواہشات کی تکمیل انسان کو خوشی اور تسکین دیتی ہے۔
عقل و منطق کے برعکس ، اپنی خواہشات سے والہانہ محبت کے نتیجے میں انسان معاشرے میں بھی خوار و ذلیل (ریاستی مجرم)ہوجاتا ہے۔ اور ایمان ( شرعی لحاظ سے )بھی خطرے میں پڑھ جاتا ہے۔
انسانی خواہشات انسانی ضروریات کی پیداوار ہیں۔
انسان فطرتاً خواہشات کے اگے ڈھیر ہوتا ہے۔
دراصل نفس ہی انسان میں خواہشات پیدا کرتا ہے اور اسی نفس ہی کے ذریعےانسان خواہشات کا غلام بنتا ہے ۔
دنیا کی رنگینیوں میں ایسی کشش و جاذبیت موجود ہے جو بنی نوع انسان کو زیر کرنے اور اسے اپنی طرف راغب کرنے کیلیے کافی ہے۔
اور فطرت انسانی میں بھی ایسے عناصر پائے جاتے ہیں جو دنیا کی کشش سے میل کھاتے ہیں۔
"” اسلام اور خواہشات "”
خواہش اور ضرورت دو الگ چیزیں ہیں۔
بھوک اگر ضرورت ہے تو ذائقہ خواہش۔
محبت اگر ضرورت ہے تو قربت تمنا۔
خواہشوں کا سفر دراصل خود شناسی سے
شروع ہوتا ہے۔اگر احتیاط سے کام نا لیا جائے اوراسلام کے وضع کردہ حدود و قیود سے تجاوز ہوتی ہے تویہ خود پرستی کی اس انتہا تک پہنچ جاتاہے جہاں انسان کی جھولی میں سوائے نقصان کے کچھ نہیں رہتا۔
پس۔۔۔! جس نے خود کو جانا اس نے ربّ کو جانا۔
اسلام کی بنیاد قرآن و سنت پر ہے- اسلام کے معنی تابع ہونا ہے یعنی خود کو خدا کا تابعدار و فرمانبردار بنانا ہے۔ الله کے احکامات سے دور ہو کر انسان گمراہ اور باغی بن جاتا ہے ۔ 
ہر مومن ، ہر وقت خدا کو حاضر سمجھتا ہے۔ لہٰذا ﷲ کے احکام کی پیروی کرنے والا مسلمان ہے اور نفس کی پیروی کرنے والا شیطان کے راستہ پر نکل پڑتا ہے۔
نفس کا تابع قیامت کی مطلق پروا نہیں کرتا۔
نبی پاک ﷺ فرماتے ہیں کہ دنیا مومن کیلیے قید خانہ ہے
 کبھی تم نے اُس شخص کے حال پر غور کیا ہے جس نے اپنی خواہش ِ نفس کو اپنا خدا بنا لیا ہو؟ 
کیا تم ایسے شخص کو راہِ راست پر لانے کا ذمّہ لے سکتے ہو؟
کیا تم سمجھتے ہو کہ ان میں سے اکثر لوگ سُنتے اور سمجھتے ہیں؟
یہ تو جانوروں کی طرح ہیں، بلکہ  اُن سے بھی گئے گُزرے۔ 
(القُرآن ، سورت الفرقان ایت نمبر 43 )
انسان کو اللہ تعالیٰ نے عقل و شعور کے ذریعے اشرف المخلوقات بنا کر ،فرشتوں اور تمام مخلوقات پرفوقیت دے کرافضل بنایا ِاِنسان کو
"”لَقَد خلقنا الا نسان فی احسن تقویم””
کہ ہم نے انسان کو بہترین ساخت پر پیدا کیا کسی بھی دوسری مخلوق کے لئے اللہ تعالیٰ نے یوں نہیں فرمایا۔
اب چونکہ نفس ہی دراصل انسانوں میں خواہشات پیدا کرتا ہے اور اِسی نفس ہی کے ذریعے ہم خواہشات کے غلام بنتے ہیں اور ہماری نفسی خواہشات ہی ہمیں تباہی کی طرف لے جاتی ہیں ۔ انسان کی سب سے بڑی دشمن اُس کی خواہشات ہوتی ہیں ۔ حضور اقدسﷺ کا فرمان مبارک ہے کہ جو کچھ سابق اُمتوں نے کیا ہو گا میری اُمت میں بھی وہ برائیاں ضرور ظاہر ہو نگی ۔
اللہ تبارک تعالیٰ قران میں فرماتے ہیں
بکثرت لوگوں کا حال یہ ہے کہ علم کے بغیر محض اپنی خواہشات کی بنا پر گمراہ کن باتیں کرتے ہیں، ان حد سے گزرنے والوں کو تمہارا رب خوب جانتا ہے ۔
 [قرآن ، سورت الانعام ، آیت نمبر 119​]
ہم مسلمان ہیں اور کلمہ پڑھنے کے بعد ہماری تمام خواہشات ایک خاص حدود میں آکر قید ہو جاتی ہیں۔نفس کی ہر خواہش کا اُلٹا کرنا ہی دراصل تقویٰ ہے۔
آج پوری دنیا میں سب سے زیاہ خواہشات کے شکار ہم مسلمان ہو رہے ہیں ۔ حالانکہ ہمارے لیے تو یہ دنیا قید خانہ ( جیل ) کی طرح ہے اور ہم نے زندگی رسول اللہؐ کی شریعت رسول اللہ ﷺکے مطابق گُزارنی ہے ۔
تقویٰ کے معنی ایک مومن مسلمان نے اپنی روح کو پاک رکھنے کے لیے تمام برائیوں اور خواہشات سے اپنے آپ کو بچانا ہے اُن سے پرہیز کرنا ہوتا ہے۔ نفس بڑا ہی ظالم ہوتا ہے ۔غصہ ، جھوٹ ، غیبت ،حسد یہ سب دراصل نفس کی اصل بیماریاں ہیں اور تمام خواہشات انہی کے کوکھ سے جنم لیتی ہیں ۔
اللہ تعالیٰ ہم سب کوعمل کرنے کی توفیق عطا فرمائے۔ امین

ٹویٹر ہینڈل : @chalakiyan