Category: بلاگ

شانِ پاکستان
تحریر سعد فاروق
زمین کے ہر گوشے میں کوئی نہ کوئی کہانی چھپی ہوتی ہے۔ کہیں کسی پہاڑ کی چوٹی صدیوں سے ہوا کو چیرتی کھڑی ہے، کہیں کوئی دریا اپنی موجوں میں صدیوں کا سفر سمائے بہہ رہا ہے، اور کہیں کسی دھرتی کا ذرّہ بھی اپنی پہچان، اپنی عظمت اور اپنی کہانی کا امین ہوتا ہے۔ ہماری دھرتی — پاکستان — بھی ایسی ہی ایک کہانی ہے، جو وقت کے اوراق پر سنہری حروف میں لکھی گئی ہے۔ یہ سرزمین صرف ایک جغرافیائی خطہ نہیں بلکہ ایک خواب کی تعبیر، ایک قربانی کا صلہ، اور ایک ایسی روشنی کا مینار ہے جو اندھیروں میں بھٹکتے انسان کو راستہ دکھاتا ہے۔

پاکستان کی بنیاد کسی لالچ یا اقتدار کی ہوس پر نہیں رکھی گئی، بلکہ یہ ایک نظریہ تھا، ایک وعدہ تھا، اور ایک ایمان تھا۔ یہ وعدہ محمد علی جناحؒ اور ان کے ساتھیوں نے ایک ایسی قوم سے کیا، جو غلامی کی زنجیروں میں جکڑی تھی۔ یہ ایمان علامہ اقبالؒ نے اپنے اشعار میں بیدار کیا، وہ خواب جو انہوں نے دیکھا، ہر لفظ میں ایک عزم کی صدا تھی۔ اقبال کا یہ خواب محض سیاسی نقشہ نہیں بلکہ روحانی انقلاب کا پیش خیمہ تھا۔

یہ سرزمین گنگا جمنا کی تہذیب کی دھرتی بھی ہے اور قرآن کی ہدایت کا مرکز بھی۔ یہاں کے پہاڑوں میں ہمالیہ کی سادگی اور وقار جھلکتا ہے، تو صحراؤں میں ریت کے ذروں کی صدیوں پرانی دانائی چھپی ہے۔ وادیٔ سندھ کی گواہی دینے والے کھنڈرات آج بھی بتاتے ہیں کہ یہ خطہ تہذیبوں کا گہوارہ رہا ہے۔ ہڑپہ اور موہنجو داڑو کی مٹی میں نہ جانے کتنے قصے دفن ہیں، جو وقت کی زبان میں کہے جانے کے منتظر ہیں۔

پاکستان کی شان اس کے قدرتی حسن میں بھی ہے۔ شمال کے برف پوش پہاڑ، وادیٔ ہنزہ کے شفاف جھرنے، سوات کی سبز وادیاں، گلگت کے چمکتے گلیشیئرز، اور بحیرۂ عرب کے نیلگوں پانی—یہ سب مل کر قدرت کا ایسا شاہکار بناتے ہیں، جو دنیا میں نایاب ہے۔ دنیا کے دوسرے حصے میں لوگ کروڑوں خرچ کر کے ایسی فضا تلاش کرتے ہیں، جو یہاں ہر سانس میں گھلتی ہے۔

مگر پاکستان کی اصل شان صرف اس کی مٹی، پہاڑ یا دریا نہیں، بلکہ اس کے لوگ ہیں۔ وہ کسان جو دھوپ میں جل کر، پسینے کو بارش بنا کر فصل اگاتے ہیں۔ وہ مزدور جو اپنے ہاتھوں کی لکیروں میں محنت کا نقشہ کھینچتے ہیں۔ وہ سپاہی جو اپنی نیند قربان کر کے ہماری نیند کی حفاظت کرتا ہے۔ وہ استاد جو کچے سکول میں بیٹھ کر بھی علم کا چراغ جلاتا ہے۔ یہ سب پاکستان کی ریڑھ کی ہڈی ہیں۔

پاکستان کی تاریخ میں وہ لمحے بھی ہیں جب دشمن نے اس کی طرف میلی نظر ڈالی، مگر اس دھرتی کے بیٹے دیوار کی طرح کھڑے ہو گئے۔ 1965 کی جنگ میں لاہور کی فضاؤں میں گونجتے ہوئے نعرے، 1971 کی آزمائش میں بھی عزم کا مینار، اور کارگل کی برفانی چوٹیوں پر بہادری کی داستانیں—یہ سب پاکستان کے ماتھے کا جھومر ہیں۔ ہمارے سپاہی اپنی جان دے کر بھی دشمن کو یہ پیغام دیتے ہیں کہ یہ دھرتی کبھی خالی نہیں ہوگی، یہاں ہمیشہ ایک سپاہی کھڑا ہوگا، ایک جوان سانس لے گا، اور ایک ماں اپنے بیٹے پر فخر کرے گی۔

پاکستان کی شان اس کے نوجوان ہیں، جن کے خواب ستاروں سے بھی اونچے ہیں۔ یہ نوجوان جب قلم پکڑتے ہیں تو علم کے میدان میں جھنڈے گاڑ دیتے ہیں، جب ہنر دکھاتے ہیں تو دنیا حیران رہ جاتی ہے، اور جب کرکٹ کے میدان میں اترتے ہیں تو پوری قوم ایک ساتھ دھڑکتی ہے۔ عبدالستار ایدھی جیسے لوگ اس شان کو انسانیت کی معراج تک لے جاتے ہیں، جن کی زندگی ایک پیغام تھی کہ محبت اور خدمت سے بڑا کوئی ہتھیار نہیں۔

یہ سرزمین مشکلات سے بھی گزری ہے—سیلابوں کا قہر، زلزلوں کا زخم، معاشی بحرانوں کا بوجھ—مگر پاکستانی قوم نے ہر بار راکھ سے اٹھ کر نیا جنم لیا۔ یہاں کا بچہ بھی اگر کھلونا ٹوٹ جائے تو لکڑی اور ڈبے سے نیا بنا لیتا ہے، یہ قوم بھی اسی بچے کی طرح ہر مشکل میں سے راستہ نکال لیتی ہے۔

پاکستان کی شان اس کے رنگ، اس کی زبانیں، اس کی ثقافت اور اس کی محبت میں چھپی ہے۔ پنجابی کی مٹھاس، سندھی کا وقار، بلوچی کی بہادری، پشتون کا غیرت مند دل، اور کشمیری کی وفاداری—یہ سب ایک ہی پرچم کے سائے تلے جُڑ کر ایک ایسی قوسِ قزح بناتے ہیں، جسے دیکھ کر ہر دل فخر سے بھر جاتا ہے۔

پاکستان کا پرچم صرف کپڑے کا ٹکڑا نہیں، یہ قربانیوں کی چادر ہے۔ اس کا سبز رنگ امید اور ایمان کا نشان ہے، اس کا سفید رنگ اقلیتوں کی عزت اور محبت کی علامت ہے۔ جب یہ پرچم ہوا میں لہراتا ہے، تو اس کے سائے میں لاکھوں شہیدوں کی ارواح مسکراتی ہیں۔

آج کا پاکستان دنیا کے نقشے پر ایک چیلنج اور ایک موقع دونوں ہے۔ یہ ملک اپنی صلاحیت، اپنے وسائل اور اپنی نوجوان نسل کی طاقت سے وہ سب کر سکتا ہے جو بڑے بڑے ملک بھی نہیں کر پاتے۔ لیکن یہ تب ہی ممکن ہوگا جب ہم اپنی شان کو پہچانیں، اپنے اختلافات کو بھول کر ایک دوسرے کا ہاتھ تھامیں، اور اس عزم کو زندہ رکھیں جو 1947 میں ہمارے بڑوں کے دل میں تھا۔

شانِ پاکستان یہ ہے کہ ہم نہ صرف اپنی پہچان پر فخر کریں بلکہ دنیا کو دکھائیں کہ یہ قوم محنت، محبت اور قربانی سے کیا کچھ کر سکتی ہے۔ یہ شان ہمیں ورثے میں ملی ہے، اور ہمیں اسے آنے والی نسلوں تک امانت کے طور پر پہنچانا ہے۔ کیونکہ پاکستان صرف ہمارا آج نہیں، یہ ہمارے کل کا ضامن بھی ہے۔

پاکستان زندہ باد۔

شانِ پاکستان
تحریر: ردا آرزو ، ڈیرہ اسماعیل خان
14 اگست سن 1947ء کو وجودیت کے پیرائے میں ڈھلنے والی ریاستِ خداداد اسلامی جمہوریہء پاکستان تاریخی، جغرافیائی، تہذیبی، ثقافتی، اور دفاعی لحاظ سے ایک منفرد عظمت اور شان کی حامل ریاست ہے۔

اس کی تاریخ یوں منفرد ہے کہ یہ کوئی وراثتی ریاست نہیں، بلکہ ہمارے آباء واجداد کی انتھک محنت اور بے شمار قربانیوں کا نتیجہ ہے۔ یہ کوئی حادثاتی طور پر وجود میں آنے والا ملک نہیں، بلکہ اس کی بنیادوں میں لاکھوں مسلمانوں کا لہو شامل ہے اور اس کے قیام کی یہ تاریخ اس کی انفرادی شان اور بین الاقوامی پہچان کا سب سے معتبر حوالہ ہے۔
صدیوں سے ذہنی و فکری غلامی کی زنجیروں میں جکڑے برصغیر کے مسلمان انتہائی کسمپرسی کی زندگی گزارنے پر مجبور تھے۔ جہاں اُنہیں مذہبی آزادی حاصل تھی نہ ہی معاشرتی حقوق۔ ایسے میں شاعرِ مشرق علامہ اقبال نے اُن کے لیے ایک آزاد اور خود مختار ریاست کا خواب دیکھا، جسے بعدازاں قائدِ اعظم محمد علی جناح اور دیگر مسلمان رہنماؤں کی انتھک محنت اور جہدِ مسلسل نے شرمندہء تعبیر کر دکھایا۔

وہ مسلمان جو برصغیر میں بے نام و نشان زندگی گزارنے پر مجبور تھے، جب متحد ہوئے تو اس شان سے ابھرے کہ تاجِ برطانیہ سے اپنے لیے ایک علیحدہ خطّہء ارض حاصل کر کے پوری دنیا کے سامنے یہ ثابت کر دیا کہ اگر کوئی قوم متحد ہو کر کسی مقصد کے لیے جدوجہد کرے تو اسے دنیا کی کوئی طاقت اپنا مقصد پانے سے روک نہیں سکتی۔

جغرافیائی حیثیت:
جغرافیائی لحاظ سے یہ ایک انتہائی اہم خطے میں واقع ہے۔ یہ ناصرف براعظم ایشیا کے لیے بلکہ پوری دنیا کے لیے اقتصادی اور دفاعی لحاظ سے بہت اہمیت کا حامل ہے۔ پاکستان کی سرحدیں پانچ ممالک سے ملتی ہیں۔ یہ محلِ وقوع پاکستان کو براعظم ایشیا کے دل میں ایک "پل” (bridge) کی حیثیت دیتا ہے اور اسے تجارتی، دفاعی اور سفارتی لحاظ سے انتہائی اہمیت کا حامل بناتا ہے۔
اس کے علاوہ پاکستان قدرتی حسن اور وسائل سے بھی مالامال ہے۔ یہاں دنیا کی حسین ترین وادیاں، جھیلیں، خوبصورت ترین پہاڑی سلسلے، وسیع و عریض صحرا اور گلیشئرز وغیرہ موجود ہیں جو دنیا بھر کے سیاحوں کی توجہ کا مرکز ہیں۔

ایٹمی طاقت:
28 مئی سن 1998ء میں ایٹمی سائنسدان ڈاکٹر عبدالقدیر خان کی شبانہ روز محنت کے نتیجے میں پاکستان نے چاغی (بلوچستان) کے مقام پر ایٹمی دھماکے کر کے ہمیشہ ہمیشہ کے لیے اپنا دفاع ناقابلِ تسخیر بنایا۔ یہ پہلا اسلامی ایٹمی ملک بنا اور اس کی یہ ایٹمی صلاحیت ناصرف پاکستانی قوم کے لیے بلکہ پوری امت مسلمہ کے لیے تحفظ کی علامت بن گئی۔ یہ اعزاز 57 اسلامی ممالک میں صرف پاکستان کے حصے میں آیا۔
اس ایٹمی صلاحیت کی بدولت امریکہ جیسی سوپر پاورز

کثیر ثقافتی ریاست:
ہمارا پاکستان ایک کثیر ثقافتی ریاست ہے۔ یہاں مختلف قوموں اور مذاہب کے لوگ آباد ہیں۔ یہاں مختلف خطوں میں مختلف زبانیں بولی اور سمجھی جاتی ہیں۔ ہر علاقے کی اپنی ایک منفرد تہذیب اور ثقافت ہے۔ رسم و رواج ایک دوسرے سے مختلف ہیں لیکن اس سب کے باوجود تمام پاکستانی آپس میں اتفاق اور اتحاد سے رہتے ہیں اور ایک دوسرے کا احترام کرتے ہیں۔ کیونکہ سب پاکستانی ہیں اور پاکستان ہی وہ کڑی ہے جو مختلف قوم، رنگ، مذہب اور نسل سے تعلق رکھنے والوں کو آپس میں اتحاد کے رشتے میں جوڑتا ہے۔

کھیلوں کا میدان:
علم و فن میں ترقی کے ساتھ ساتھ پاکستان کھیلوں کے میدان میں بھی انفرادی مقام رکھتا ہے۔ کرکٹ، ہاکی، فٹ بال اور اسکواش جیسے کھیلوں میں پاکستان کے نامور کھلاڑیوں نے اپنی صلاحیتوں کا لوہا منوایا اور اپنے ملک و قوم کا نام روشن کیا۔ کھیلوں کی مصنوعات میں بھی ہمارا پاکستان دنیا بھر میں ایک انفرادی پہچان رکھتا ہے۔ یہاں سیالکوٹ میں بننے والا کھیلوں کا سامان مثلاً فٹ بال، ہاکی، بلّے اور گیند وغیرہ اپنے اعلیٰ معیار کی وجہ سے بین الاقوامی کھیلوں کے مقابلوں میں استعمال ہوتی ہیں، جو پاکستان کے لیے باعث فخر ہے۔

افواجِ پاکستان:
امن ہو یا جنگ، دہشت گردی کا خاتمہ مقصود ہو یا قدرتی آفات جیسا کہ سیلاب اور زلزلے کی مشکلات سے نمٹنا ہو، ہماری افواج ہر محاذ پر صفِ اوّل میں وطن کی حفاظت اور خدمت کے فرائض سرانجام دیتی نظر آتی ہیں۔
حالیہ پاک بھارت جھڑپ (جسے بنیان المرصوص کا نام دیا گیا) میں ہماری افواج نے دشمن کو اینٹ کا جواب پتھر سے دے کر پوری دنیا کے سامنے ایک بار پھر اپنی اعلیٰ عسکری صلاحیتوں کا بھرپور مظاہرہ کیا اور آئندہ کے لیے دشمن کو خبردار کر دیا کہ ہم اپنے پاک وطن کی سرحدوں کی حفاظت کرنا خوب جانتے ہیں۔

حقیقی شان:
پاکستان کی اصل شان پاکستان کی وہ غیور عوام ہے، جو کبھی اعتزاز حسن کی شکل محض پندرہ سال کی عمر میں قربانی کے جذبے سے سرشار ہو کر عظمت کی اُس بلندی پر پہنچ جاتا ہے کہ اپنے سکول کے کم و بیش دو ہزار بچوں کو بچانے کی خاطر اپنی موت کو خوشی خوشی گلے لگا لیتا ہے۔

کہیں وہ ولید خان کی شکل میں چہرے اور گردن پر چھے گولیاں کھا کر بھی زندہ بچ جاتا ہے اور اُن گولیوں کے نتیجے میں اپنے چہرے اور بننے والے نشانات کو اپنی بہادری کا میڈل قرار دیتا ہے۔
فہرست طویل ہے، لیکن دامنِ تحریر مختصر ہے۔

پس قصہ مختصر، کہ وہ پاکستان جو سن 1947ء میں ایک ناتواں اور لاغر ریاست تھا، جس کا وجود قائم رہنا ہی اقوامِ عالم کے نزدیک ناممکن تھا، جس کے اِدارے، صنعتیں اور معیشت اپنے ہی وجود کا بوجھ اٹھانے سے قاصر تھے، وہی پاکستان اپنے قیام کے چند سال بعد اپنے قدم جمانے میں کامیاب ہوا اور پھر دنیا بھر میں اپنی ایک انفرادی پہچان قائم کرنے اور اُسے برقرار رکھنے کے لیے مسلسل جدوجہد کرتا نظر آیا اور آج ہم دیکھتے ہیں کہ یہ اپنی اس جدوجہد میں کافی حد تک کامیاب ہو چکا ہے اور مزید ترقی کی منزلیں زینہ بہ زینہ طے کرتا نظر آ رہا ہے۔

آج پاکستان سائنس، ٹیکنالوجی، میڈیکل، انجینئرنگ، یہاں تک کہ اسپیس ٹیکنالوجی کے میدان میں بھی دنیا کے ساتھ قدم سے قدم ملانے کے لیے کوشاں ہے۔

قائدِ اعظم کے فرمان کے مطابق ایمان، اتحاد اور تنظیم ہی اس ملک کی کامیابی اور ترقی کی ضمانت ہیں۔ یہ ہم سب کی قومی ذمے داری ہے کہ ہم اپنے وطن کی حفاظت اور ترقی کی خاطر اس اصول کو اپنی زندگیوں کا محور بنائیں اور اپنے وطن کی تعمیر و ترقی میں اپنا کردار ادا کریں۔

شانِ پاکستان
تحریر :عبدالحفیظ شاہد،مخدوم پور پہوڑاں
قیامِ پاکستان کا خواب 14 اگست 1947 کو حقیقت بنا اور ہمیں آزادی ملی۔پاکستان بنا تو اس کی بنیادوں میں لاکھوں مسلمانوں کا خون اور اس کی فضاؤں میں لا إلہ إلا اللہ کا نور شامل تھا۔ یہ مملکتِ خداداد اسلام کی تجربہ گاہ کے طور پر معرضِ وجود میں آئی۔عظیم اسلامی مملکت ، اسلامی جمہوریہ پاکستان محض ایک ملک نہیں بلکہ عشق ، محبت ، عظمت اور قربانی کی داستانوں کے ایک طویل سلسلے کانام ہے۔

لاکھوں خاندانوں نے اپنے آبا و اجداد کی قبریں، زمینیں، گھر، محلے، دکانیں، حتیٰ کہ اپنے پیارے تک قربان کر دیے۔ سکھوں کے قافلے، ہندو انتہاپسندوں کے ہجوم اور بے رحم فسادات نے مسلمانوں کی بستیاں اجاڑ ڈالیں ۔
جب 14 اگست 1947 کو پاکستان آزاد ہواتو نہ بینک تھے، نہ اپنا مرکزی نظام، نہ افسران کی بھرمار، نہ صنعتیں، نہ زرعی نظام مستحکم، نہ ہی تعلیمی ڈھانچہ۔ مگر یہ قوم عزم سے مالا مال تھی۔

پہلی کامیابی تب ملی جب اسٹیٹ بینک آف پاکستان 1948 میں قائم ہوا۔ یہ محض ایک ادارہ نہیں تھا، بلکہ خودمختاری کی جانب پہلا قدم تھا۔ پھر تعلیم کی طرف توجہ دی گئی۔ لاہور، کراچی، پشاور اور ڈھاکہ جیسے شہروں میں جامعات کا قیام عمل میں آیا۔

پاکستان کی افواج نے صرف دفاع کا فرض ہی نہیں نبھایا بلکہ ایک منظم، بہادر اور جذبہ ایمانی سے لبریز ادارہ بن کر دکھایا ۔ 1965 کی جنگ ہو یا کارگل کی جنگ یا پھر بنیان المرصوس کا موقع ہو ہر بار پاکستانی سپاہیوں نے وطن کی خاطر سینہ سپر ہو کر دنیا کو بتایا”ہم زندہ قوم ہیں، پائندہ قوم ہیں۔”

ایئر فورس کے ایم ایم عالم جیسے سپوت نے محض چند لمحوں میں پانچ بھارتی جہاز گرا کر عالمی تاریخ رقم کی۔ دشمن حیران رہ گیا کہ یہ چھوٹا سا ملک اتنی بڑی ہمت کہاں سے لایا؟
یہ ہمت، اس ماں کی دعا سے آئی جو بیٹے کو صبح اسکول ، مسجد، مدرسے بھیجتے وقت اصل میں میدان کے لیے تیار کر رہی ہوتی ہے ۔

1974 میں بھارت نے ایٹمی دھماکے کیے تو دنیا کی نظریںپاکستان پر تھیں مگر پاکستانی سائنسدانوں، خصوصاً ڈاکٹر عبدالقدیر خان کی قیادت میں پاکستان نے 28 مئی 1998 کو چاغی کے پہاڑوں میں اپنے آپ كو ایک بہادر اور غیرت مند ملک ثابت کردیا ۔

یہ صرف بم نہیں تھا، یہ ایک پیغام تھا کہ ہم امن چاہتے ہیں، مگر غلامی نہیں۔

ہاکی، اسکواش، سنوکر اور دیگر کھیلوں میں بھی پاکستانی کھلاڑیوں نے دنیا کو حیران کیا۔ جہانگیر خان، جان شیر خان جیسے نام صرف کھلاڑی نہیں قوم کے ہیرو ہیں

پاکستانی ادب، شاعری، مصوری، موسیقی، فلم اور تھیٹر نے دنیا کو بتایا کہ یہ قوم نہ صرف بہادر ہے، بلکہ حساس اور تخلیقی بھی ہے۔
فیض احمد فیض، احمد ندیم قاسمی، پروین شاکر، عمیرہ احمد، مستنصر حسین تارڑ جیسے ادیبوں نے اپنے لفظوں سے قوم کو جگایا۔
نصرت فتح علی خان، مہدی حسن، نور جہاں، عابدہ پروین جیسے فنکار صرف فنکار نہیں محبت کے امین ہیں۔
گزشتہ دہائیوں میں پاکستان نے تعلیمی میدان میں بھی غیر معمولی ترقی کی۔ ہائر ایجوکیشن کمیشن کی تشکیل، نیسپاک، پی آئی اے، پاکستان ریلوے، پاکستان نیوکلیئر انرجی کمیشن جیسے ادارے قائم ہوئے۔

پاکستانی طلبا نے بیرون ملک اسکالرشپس حاصل کر کے دنیا کو حیران کر دیا۔ انجینئرنگ، میڈیکل، سافٹ ویئر، آرٹیفیشل انٹیلیجنس، اسپیس سائنسز ہر میدان میں پاکستانی نوجوان ابھر رہے ہیں۔

نمل یونیورسٹی، نیشنل یونیورسٹی آف سائنس اینڈ ٹیکنالوجی (NUST) جیسی جامعات عالمی سطح پر مقام بنا چکی ہیں۔

عبدالستار ایدھی، ایک ایسا نام ہے جو ہر پاکستانی کے دل میں زندہ ہے۔ انھوں نے صرف ایک ایمبولینس سے آغاز کیا اور پوری دنیا میں سب سے بڑا فلاحی نیٹ ورک قائم کیا۔
ڈاکٹر رتھ فاؤ، جس نے کوڑھ جیسے موذی مرض کا پاکستان سے خاتمہ کیا، وہ ایک غیر ملکی ہوتے ہوئے بھی پاکستانی بن گئیں۔ ایسے ہی بے شمار افراد، جو خاموشی سے انسانیت کی خدمت کرتے رہے۔

آج کا پاکستان مشکلات کے باوجود آگے بڑھ رہا ہے۔ نوجوان ہاتھوں میں قلم، ٹیکنالوجی، ہنر اور حوصلہ لیے کھڑے ہیں۔

سی پیک جیسے منصوبے مستقبل کی اقتصادی ترقی کا اعلان ہیں۔بلوچستان، گلگت، خیبر پختونخوا، سندھ اور پنجاب کے دور افتادہ علاقوں میں اسکول، ہسپتال، سڑکیں، اور انٹرنیٹ سہولیات کا قیام ہو رہا ہے۔

پاکستان کا اصل چہرہ وہ مزدور ہے جو صبح سویرے روزی کے لیے نکلتا ہے۔ وہ طالبعلم ہے جو موم بتی کی روشنی میں پڑھتا ہے۔ وہ ڈاکٹر ہے جو مفت کیمپ میں لوگوں کا علاج کرتا ہے۔ وہ کسان ہے جو دھوپ میں جھلس کر بھی فصل کاٹتا ہے۔

یہ وطن ان سب کا ہے۔
یہ وطن اُن دعاؤں کا ہے جو ہر جمعے کو بوڑھی مائیں آسمان کی طرف اٹھاتی ہیں:
"یااللہ! میرے ملک کی حفاظت فرما۔”
ہمیں اب ماضی پر فخر کے ساتھ حال کی اصلاح کرنی ہے۔ نفرت، تعصب، کرپشن، جہالت اور مایوسی کے اندھیروں کو ختم کر کے ایک ایسا پاکستان بنانا ہے جو قائداعظم کے وژن کا مظہر ہو۔ ہمیں صرف شکایت نہیں کرنی، کام کرنا ہے۔

ہمیں یہ سوال خود سے پوچھنا ہے:
"ہم پاکستان کو کیا دے رہے ہیں؟”
آئیے! آج پھر ہم وہی نعرہ لگائیں جو ہمارے آباؤ اجداد نے لگایا تھا،
“پاکستان کا مطلب کیا؟ لا الہ الا اللہ!”
اور اس نعرے کو صرف زبان تک محدود نہ رکھیں، اسے دل میں اُتاریں، کردار میں ڈھالیں اور عمل سے ثابت کریں۔

ہمیں سوچنا ہوگا کہ ہم اس کے لیے کیا کردار ادا کر سکتے ہیں؟ کیا ہم اپنی ذمہ داریوں کو ایمانداری سے نبھا رہے ہیں؟ کیا ہم اس کے اداروں، اس کی اقدار اور اس کے مستقبل کو بہتر بنانے کی کوشش کر رہے ہیں؟

ضرورت اس امر کی ہے کہ ہم اپنے ذاتی مفادات سے بالاتر ہوکر اجتماعی اور قومی فلاح کا سوچیں۔ ہمیں اپنی تمام تر ذہنی، جسمانی اور اخلاقی صلاحیتیں پاکستان کی ترقی، خوشحالی اور استحکام کے لیے وقف کرنی ہوں گی۔ ہر فرد اگر یہ عزم کر لے کہ وہ اپنے حصے کی شمع جلائے گا، تو اندھیروں کو روشنی میں بدلنے سے کوئی نہیں روک سکتا۔

یاد رکھیں ہم ہی ہیں جو اسے سنوار سکتے ہیں۔ہمیں صرف خود پر یقین رکھنا ہے اور عمل کی راہ اختیار کرنی ہے۔

دعا ہے کہ اللہ تعالیٰ ہمارے دلو ں میں خلوص، ہمارے . عمل میں سچائی اور ہمارے ارادوں میں پختگی عطا فرمائے۔ اور اس پاک سرزمین کو ہمیشہ سلامت، آباد اور محفوظ رکھے۔ آمین

شان پاکستان
تحریر: ردا فاطمہ اعوان گوجرنوالہ
ہر طرف ہے روشنی، چمکتا ہے آسمان
یہ وطن ہمارا ہے، یہی ہے شانِ پاکستان”

پاکستان 14 اگست 1947 کو ایک نظریے کی بنیاد پر قائم ہوا: "پاکستان کا مطلب کیا؟ لا الہ الا اللہ”
یہ ملک آزاد زندگی گزارنے کے لیے حاصل کیا گیا۔پاکستان کی شان تو اس کے وجود میں ہے، اس کی بقا میں ہے، اس کی ترقی میں ہے۔ یہ ملک ہمارے بزرگوں کی محنت اور قربانیوں کا نتیجہ ہے۔

پاکستان کی شان اس کی نوجوان نسل میں ہے جو ملک کے مستقبل کی امید ہیں۔ پاکستان کی شان اس کی فوج میں ہے جو ہمیشہ بنا دن رات کا تعین کیے دشمنوں کو چار شانے چت کرنے کے لیے تیار رہتی ہے۔

زراعت، پانی اور جنگلات کی فراوانی سب پاکستان کی شان کا حصہ ہیں۔

قومی ہیرو:
قائداعظم محمد علی جناح، علامہ اقبال، سر سید احمد خان، اور لیاقت علی خان، ڈاکٹر عبد القدیر خان ہمارے قومی ہیرو ہیں۔

ثقافت:
پاکستان کا ثقافتی نظام قدیم جو چاروں صوبوں کی قومیتوں، زبانوں، مذہبی روایات اور تاریخی ورثے پر مشتمل ہے۔ یہ بھی تو پاکستان کی شان ہے کہ یہاں بزرگوں کا احترام، مہمان نوازی اور شرم و حیا کا نظام راج ہے۔

قدرتی حسن:
پاکستان کے شمالی علاقہ جات قدرتی حسن سے مالا مال ہیں۔ یہاں کے دلکش پہاڑ، ندیاں، جھیلیں، گلشیرز اور سرسبز وادیاں سیاحوں کو اپنی طرف متوجہ کرتی ہیں۔ وادی سوات کو پاکستان کا منی سوئزر لینڈ بھی کہا جاتا ہے۔

عوام پاکستان:
پاکستان کی عوام باہمت، محنتی، مہمان نواز اور غیرت مند ہے۔ حالات جیسے بھی ہوں، پاکستانی عوام ڈٹ کر مقابلہ کرتی ہے، اپنے ملک سے محبت ہر پاکستانی اپنے ایمان کا حصہ سمجھ کر نبھاتے ہیں۔

ایٹمی طاقت:
پاکستان نے عالمی پابندیوں اور دباؤ کے باوجود خفیہ طریقے سے ایٹم بنایا۔ یہ پہلا اسلامی ملک ہے جس کے پاس ایٹمی طاقت ہے، پاکستان کی ایٹمی طاقت اس کی خودمختاری کی ضمانت ہے۔

صنعت و زراعت:
پاکستان کی زرخیز زمینیں دنیا کے بہترین زرعی خطوں میں شامل ہیں۔ یہاں کپاس، گندم، چاول، آم، کینو اور دیگر فصلیں پیدا ہوتی ہیں۔ پاکستان کی ٹیکسٹائل انڈسٹری دنیا بھر میں مشہور ہے۔ سیالکوٹ کا سرجیکل اور اسپورٹس سامان پوری دنیا میں برآمد ہوتا ہے۔

عالمی سطح پر مقام:
پاکستان اقوامِ متحدہ، OIC، اور دیگر عالمی تنظیموں میں اہم کردار ادا کر رہا ہے۔ کھیلوں میں کرکٹ، ہاکی، فٹ بال میں عالمی کامیابیاں بھی پاکستان کی شان ہیں۔

تمہاری تہذیب اپنے خنجر سے آپ ہی خودکشی کرے گی
جو شاخِ نازک پہ آشیانہ بنے گا، ناپائیدار ہوگا

شانِ پاکستان صرف ماضی کی قربانیوں، عظمتوں نہیں بلکہ ایک وعدہ ہے کہ ہم اپنے ملک کا نام مزید بلند کریں گے اور دنیا کو دکھائیں گے کہ ہم ایک پُرامن اور عظیم قوم ہیں۔

"خودی کو کر بلند اتنا کہ ہر تقدیر سے پہلے
خدا بندے سے خود پوچھے، بتا تیری رضا کیا ہے”