Category: بلاگ

جمہوریت یا معاشی آمریت؟
تحریر: ڈاکٹر غلام مصطفیٰ بڈانی
اگر چار ہزار من گندم 2200 روپے فی من میں بک سکتی ہے تو 5500 روپے والی چینی کی بوری 9000 روپے تک کیوں جا پہنچی؟ یہ محض ایک اقتصادی سوال نہیں بلکہ پاکستان کے معاشی ڈھانچے کی گہرائیوں میں پیوست ایک تلخ سچائی ہے۔ ہمارے ہاں اشیاء کی قیمتیں نہ طلب و رسد کے اصولوں سے طے ہوتی ہیں، نہ مارکیٹ کی خودکار طاقتوں سے۔ قیمتوں کا تعین ہوتا ہے طاقتور طبقے کی مرضی، مفادات اور مافیاز کی اجارہ داری سے جو پیداوار عوام سے لیتے ہیں مگر منافع اپنی تجوریوں میں بھر لیتے ہیں۔

گندم کاشت کرنے والا کسان جو سال بھر دھوپ، گرمی، قرضوں، کھادوں، مہنگے بیج اور ناکارہ زرعی نظام کا سامنا کرتے ہوئے زمین کا سینہ چیرتا ہے۔مگر جب اس کی فصل تیار ہوتی ہے تو اسے سرکاری امدادی قیمت کے نام پر اونے پونے بیچنے پر مجبور کیا جاتا ہے۔ اگر وہ آزاد منڈی کا رخ کرے تو وہاں بیوپاریوں کی اجارہ داری، کمیشن خور مڈل مین اور منڈی کا غیر شفاف نظام اس کی ریڑھ توڑ دیتا ہے۔ کسان کی محنت پر منافع لینے والے وہی طاقتور طبقات ہیں جو پالیسی بھی خود بناتے ہیں اور قیمت بھی خود طے کرتے ہیں۔

یہی صورتحال گنے کی فصل کے ساتھ بھی پیش آتی ہے۔ گنا بھی وہی کسان کاشت کرتا ہے مگر شوگر ملز کے دروازے پر پہنچتے ہی کھیل بدل جاتا ہے۔ گنے کی قیمت، تول، کٹوتی اور ادائیگی کا نظام شوگر مافیا کے ہاتھ میں ہے جو حکمران جماعتوں اور وزارتی خاندانوں سے جڑے ہوتے ہیں۔ کسان کو کم نرخ، کٹوتی اور تاخیر کے ذریعے کمزور کیا جاتا ہے جبکہ چینی کی قیمتوں پر کوئی قانون یا ضابطہ لاگو نہیں ہوتا کیونکہ چینی "عوامی ضرورت” نہیں بلکہ "اشرافیہ کی پیداوار” بن چکی ہے۔

کھاد کی صورت حال اس سے بھی بدتر ہے۔ یوریا اور ڈی اے پی جیسی زرعی کھادیں ان کارخانوں میں تیار ہوتی ہیں جن کے مالکان اکثر وزراء، مشیر یا طاقتور خاندان ہیں۔ کسان کو یہ کھاد نہ صرف مہنگے داموں خریدنی پڑتی ہے بلکہ جعلی یا ناقص مال کا شکار بھی ہونا پڑتا ہے۔ کسان کی محنت کی لاگت بڑھتی ہے اور منافع ان صنعتکاروں کی جیب میں جاتا ہے جنہوں نے خود ہی قیمتیں بڑھانے کے طریقے ایجاد کر رکھے ہیں۔

پھر آتا ہے پٹرول اور ڈیزل جو نہ صرف کسان کے ٹریکٹر بلکہ ہر شہری کی نقل و حرکت اور روزمرہ کی معیشت سے جُڑا ہوا ہے۔ پٹرول پر مکمل کنٹرول حکومت کے پاس ہوتا ہے اور جب بھی بجٹ خسارہ یا آئی ایم ایف کی شرائط درپیش ہوں تو یہ کنٹرول عوام پر مہنگائی کے ہتھوڑے کی شکل اختیار کر لیتا ہے۔ مگر ریاستی خزانے میں آنے والے یہ ٹیکس براہ راست عوام پر خرچ نہیں ہوتے بلکہ حکمران اشرافیہ کی مفت سہولیات اور شاہانہ اخراجات میں جھونک دیے جاتے ہیں۔

سب سے اذیت ناک پہلو بجلی کا ہے۔ ملک میں بجلی پیدا کرنے والی بیشتر کمپنیاں نجی شعبے میں ہیں جن کے مالکان براہ راست سیاسی و انتظامی طاقتور طبقات سے وابستہ ہیں۔ یہ کمپنیاں بجلی پیدا کریں یا نہ کریں، انہیں "کیپسٹی پیمنٹس” کے نام پر عوامی خزانے سے اربوں روپے ادا کیے جاتے ہیں۔ اس کا بوجھ براہ راست عوام کے بلوں پر ڈالا جاتا ہے۔ اگر کوئی شہری 201 یونٹ بجلی استعمال کرے تو اس کا بل دس ہزار روپے سے تجاوز کر جاتا ہے، جبکہ انہی حکمرانوں، ججوں، جرنیلوں اور بیوروکریٹس کو بجلی، پٹرول اور دیگر سہولیات مفت فراہم کی جاتی ہیں۔

علاج معالجے کے میدان میں بھی یہی طبقاتی فرق نمایاں ہے۔ غریب شہری سرکاری ہسپتال میں پیناڈول کی گولی کے لیے ترستا ہے اور اگر کسی بڑے ٹیسٹ، بستر یا ڈاکٹر تک رسائی درکار ہو تو سفارش یا رشوت کی ضرورت پڑتی ہے۔ اس کے برعکس حکمران طبقے کے افراد معمولی بیماری پر بھی بیرون ملک علاج کے لیے روانہ ہو جاتے ہیں۔ ان کے لیے لندن، دبئی، نیویارک کے ہسپتال کھلے ہیں اور خرچ ہوتا ہے پاکستان کے غریب عوام کے ٹیکس کا پیسہ۔

یہ سب کچھ اس بنیادی حقیقت کو ظاہر کرتا ہے کہ اس ملک میں پیداوار تو عوام کرتے ہیں لیکن منافع اور کنٹرول طاقتور طبقے کے ہاتھ میں ہے۔ اشیاء کی قیمتیں معیشت کے اصولوں پر نہیں بلکہ اشرافیہ کے مفادات پر مبنی فیصلوں سے طے ہوتی ہیں۔ قانون صرف کمزور پر لاگو ہوتا ہے اور طاقتور قانون سے بالا تر ہوتا ہے۔
یہ نظام جمہوری نہیں، معاشی آمریت ہے ، ایک ایسا نظام جس میں عوام صرف ووٹر، ٹیکس دہندہ، بل دہندہ اور سائل ہے جبکہ حکمران طبقہ بادشاہ ہے جسے نہ احتساب کا خوف ہے نہ قانون کی پرواہ۔

سوال یہ نہیں کہ چینی مہنگی کیوں ہے۔سوال یہ ہے کہ طاقتور اپنی پیدا کردہ اشیاء کی قیمت خود طے کرنے کا اختیار کب تک رکھے گا؟اور غریب جو ہر شے کا خریدار ہے، کب تک صرف بل ادا کرتا رہے گا؟

اگر ہم واقعی جمہوریت کے دعوے دار ہیں تو جمہوریت کا مطلب صرف انتخابات نہیں بلکہ معاشی عدل بھی ہونا چاہیے۔ جمہوریت کا حسن عوام کے حقوق کے تحفظ میں ہے اور اگر وہ تحفظ صرف طاقتوروں کے لیے مخصوص ہو جائے تو یہ نظام جمہوریت نہیں بلکہ ایک "جمہوری آمریت” بن جاتا ہے۔

اب وقت آ گیا ہے کہ اس نظام کو چیلنج کیا جائے۔ جمہوریت کو اشرافیہ کے دامن سے نکال کر کسان، مزدور اور متوسط طبقے کے ہاتھ میں دیا جائے۔ معیشت کو عوامی مفادات کے تابع بنایا جائے۔ بصورتِ دیگر یہ معاشی آمریت ہر روز ہزاروں گھروں کے چولہے بجھاتی رہے گی اور ہم صرف تحریریں لکھتے، سوالات اٹھاتے اور احتجاج کرتے رہ جائیں گے۔

لگی ہے آگ پھولوں کو، جبر کے موسم میں سچ کون بولے گا؟
تحریر:شاہدریاض
یہ خاموشی کسی طوفان کا پیش خیمہ ہے۔ درختوں کی شاخیں ساکت ہیں، پرندے خاموش ہیں، اور فضا میں گھٹن ایسی ہے کہ سانس لینا بھی جرم لگتا ہے۔ چمن میں آگ لگی ہے، مگر کوئی نہیں بولتا۔ شاید اس لیے کہ جو بولتا ہے، وہ جلا دیا جاتا ہے، یا پھر کفن پہنا دیا جاتا ہے۔ اور اگر کوئی سانس لیتا بھی ہے تو اس کے لہجے میں خوف، تحریر میں احتیاط، اور آنکھوں میں وہ چمک باقی نہیں رہتی جو سچ کا پہلا تعارف ہوتی ہے۔کسی شاعر نے اپنی نظم میں جھنجھوڑتے ہوئے کہاکہ
لگی ہے آگ پھولوں کو، چمن میں کون بولے؟
ابھی زندہ ہوں، بولو تم، کفن میں کون بولے گا؟

صحافی کی زباں ہے یا قلم ہے ایک لکھاری کا،
یہ سب چپ رہے تو آخر، سچائی کون بولے گا؟

ہم ایک ایسے دور میں جی رہے ہیں جہاں سچ بولنے والوں کی زبانیں کاٹ دی جاتی ہیں۔ جہاں صحافت ایک پیشہ نہیں، بلکہ جرم بن چکی ہے۔ جہاں قلم چلانا، بندوق اٹھانے کے مترادف سمجھا جاتا ہے۔ جہاں لکھنے والے پر مقدمہ نہیں، فیصلہ سنایا جاتا ہے۔ جہاں سوال پوچھنے والا "غدار” قرار پاتا ہے اور خاموش رہنے والا "محب وطن” مانا جاتا ہے۔

کیا واقعی یہی وہ آزادی ہے جس کا خواب قائداعظم نے دیکھا تھا؟ کیا یہی وہ جمہوریت ہے جس پر ہم ہر سال ووٹ ڈالنے کی رسم ادا کرتے ہیں؟ کیا واقعی اس وطن میں صرف وہی زندہ ہے جو حکومت کی زبان بولے؟ اور جو عوام کی زبان بنے، وہ غائب، خاموش یا مردہ قرار پاتا ہے؟

آج جب مہنگائی آسمان چھو رہی ہے، بے روزگاری ہر دروازے پر دستک دے رہی ہے، سیلاب سے شہر کے شہر ڈوب رہے ہیں، تعلیم ایک خواب بن چکی ہے اور علاج ایک نایاب سہولت… تب اگر کوئی صحافی ان سوالات کو آواز دیتا ہے تو وہ "ریاست مخالف” قرار پاتا ہے۔ جب ایک لکھاری ظالم کے چہرے سے نقاب اتارنے کی کوشش کرتا ہے تو اسے عدالتوں کے چکر لگانے پڑتے ہیں۔ جب ایک شاعر خون کے آنسو روتے عوام کا نوحہ لکھتا ہے تو اسے "مذہب، ریاست یا اداروں” کے خلاف پروپیگنڈا کہہ کر چپ کروا دیا جاتا ہے۔

یہ جو اشعار ہیں "ابھی زندہ ہوں، بولو تم؛ کفن میں کون بولے گا؟” یہ صرف شاعری نہیں، ایک سوال ہے اس معاشرے سے، اس سسٹم سے اور ہم سب سے۔ اگر آج ہم چپ رہے تو کل ہماری خاموشی کا ماتم کرنے والا بھی کوئی نہیں ہوگا۔ ظلم کو دیکھ کر خاموش رہنے والے دراصل ظلم کے معاون ہوتے ہیں۔ اور اگر ہر درخت، ہر پنچھی، ہر دریا، ہر پہاڑ، ہر دیوار خاموش ہو جائے تو پھر سچ کے لیے کون بولے گا؟

سوال صرف یہ نہیں کہ زبانیں کیوں بند ہیں، اصل سوال یہ ہے کہ "کس نے بند کی ہیں؟” اور اگر ہم نے خود اپنے ہونٹ سِیے ہیں تو پھر ہم اس آگ کے ذمہ دار بھی خود ہیں جو چمن کو جلا رہی ہے۔

یہ بھی سچ ہے کہ صرف ایک شخص کے بولنے سے کچھ نہیں بدلتا، لیکن اگر سب خاموش رہیں تو کچھ بھی نہیں بچے گا۔ آوازیں کچلی جا سکتی ہیں، لیکن جذبے نہیں۔ قلم روکا جا سکتا ہے، لیکن خیالات کی پرواز کو زنجیر نہیں پہنائی جا سکتی۔ کاغذ جلا سکتے ہو، لیکن سوچوں کی آگ بجھانا تمہارے بس میں نہیں۔

لہٰذا اب بھی وقت ہے۔ ذرہ سی کھڑکیاں کھولو، ہوا آنے دو، سچ کو سانس لینے دو۔ صحافیوں، لکھاریوں، شاعروں، اور فنکاروں کو مت روکو — کیونکہ اگر یہ سب چپ رہے تو اس وطن میں کون بولے گا؟ اگر آج ہم سچ کے ساتھ نہ کھڑے ہوئے، تو کل ہماری نسلیں سچ کا چہرہ پہچاننے کے قابل بھی نہ رہیں گی۔

لگی ہے آگ پھولوں کو اور اگر ہم نے اب بھی لب نہ کھولے، تو نہ چمن بچے گا، نہ ہم۔

سیلاب، آفات، مہنگائی. عوام کا مقدر کیوں؟
تحریر: ڈاکٹر غلام مصطفیٰ بڈانی
پاکستان ایک ایسی ریاست بنتا جا رہا ہے جہاں عوام ہر سال قدرتی آفات، حکومتی نااہلی، اور معاشی بدحالی کے شکنجے میں کَس دیے جاتے ہیں۔ جونہی مون سون کی بارشیں شروع ہوتی ہیں، شہر ڈوبنے لگتے ہیں، نالے ابلنے لگتے ہیں اور انتظامیہ کی غفلت آشکار ہو جاتی ہے۔ 2025 کے حالیہ مون سون سیزن نے ایک بار پھر راولپنڈی، اسلام آباد، جہلم، چکوال اور آزاد کشمیر کے عوام کو بے رحم سیلاب کے رحم و کرم پر چھوڑ دیا ہے۔ ہزاروں افراد محفوظ مقام کی تلاش میں در بدر ہیں، کئی جانوں کا چراغ گل ہو چکا اور اربوں روپے کا مالی نقصان ہو چکا ہے۔ مگر ریاستی ڈھانچے میں کوئی لرزش، کوئی احتساب اور کوئی پائیدار حل اب تک دکھائی نہیں دیتا۔

راولپنڈی اور اسلام آباد میں 230 ملی میٹر سے زائد بارش نے نالہ لئی کو دھاڑتا دریا بنا دیا۔ کٹاریاں، گوالمنڈی اور ڈھوک کھبہ کے مکین پانی میں پھنس گئے۔ پانی کی سطح 20 فٹ تک جا پہنچی اور ندی نالوں کی طغیانی نے شہری نظام کو مفلوج کر دیا۔ خطرے کے سائرن بج گئے، ریسکیو ادارے متحرک ہوئے، فوج سے مدد طلب کی گئی اور ایک دن کی چھٹی کا اعلان کر دیا گیا۔ مگر سوال یہ ہے کہ اگر ہر سال یہی ہونا ہے تو پھر کیا ریاست نے ماضی سے کچھ نہیں سیکھا؟ کیا اربوں کے بجٹ صرف رپورٹوں اور اشتہارات کی نذر ہوتے رہیں گے؟

چکوال میں کلاؤڈ برسٹ سے 423 ملی میٹر بارش نے تباہی کی نئی داستان رقم کی۔ بچوں سمیت کئی افراد جاں بحق ہوئے، سینکڑوں زخمی اور مکانات زمین بوس ہو گئے۔ قدیم مذہبی مقام کٹاس راج مندر بھی پانی میں ڈوب گیا۔ علاقہ مکین چھتیں چھوڑ کر اونچی جگہوں پر پناہ لینے پر مجبور ہیں۔ ضلعی انتظامیہ نے اگرچہ دعویٰ کیا ہے کہ تمام ادارے فیلڈ میں موجود ہیں مگر سچ یہ ہے کہ عوام کی نظروں میں یہ اقدامات ہمیشہ دیر سے آتے ہیں اور ناکافی ثابت ہوتے ہیں۔ ہسپتالوں میں ایمرجنسی نافذ ضرور ہوتی ہے لیکن زخمیوں کو دوا، راشن اور رہائش کی سہولیات اب بھی عام آدمی کی پہنچ سے دور ہیں۔

این ڈی ایم اے کا بتانا ہے کہ 26 جون سے اب تک مون سون بارشوں کے نتیجے میں ملک بھر میں 178 افراد جاں بحق ہوئے جن میں 85 بچے بھی شامل ہیں جبکہ اس دوران 491 افراد زخمی ہوئے۔ صرف 24 گھنٹوں میں 63 اموات رپورٹ ہوئیں۔ لاہور، فیصل آباد، ساہیوال، پاکپتن اور اوکاڑہ جیسے شہروں میں یہ المناک واقعات پیش آئے۔ بارش کے پانی نے گھروں کو روند ڈالا، بچوں کو چھین لیا اور مویشیوں تک کو بہا لے گیا۔ مگر حکمران اشرافیہ صرف پریس کانفرنسوں اور رسمی دوروں تک محدود ہے۔

یہاں یہ سوال پیدا ہوتا ہے کہ ہر سال یہی کیوں ہوتا ہے؟ کیا نالہ لئی کی صفائی کے دعوے محض دکھاوا تھے؟ کیا واسا اور بلدیاتی ادارے صرف تنخواہوں کے لیے بنائے گئے ہیں؟ پاکستان میں مون سون کوئی نئی شے نہیں۔ ہر سال جون سے ستمبر تک بارشوں کی پیشگوئی پہلے ہی ہو جاتی ہے۔ مگر حیرت انگیز طور پر ہر سال حکومت "اچانک” جاگتی ہے۔ جب تک گلیاں ندی نالوں میں نہ بدل جائیں اور لوگ مدد کے لیے چیخ نہ اٹھیں، حکومتی مشینری متحرک نہیں ہوتی۔ ایسی صورتحال کسی آفت کا نہیں بلکہ ریاستی نااہلی کا ثبوت ہے۔

اگر ہم بھارت، بنگلہ دیش یا انڈونیشیا جیسے ممالک کی مثال دیکھیں تو وہاں بھی بارشیں ہوتی ہیں، مگر شہری منصوبہ بندی، ڈرینج سسٹم، ابتدائی وارننگ سسٹم اور انخلاءکا پلان اس قدر منظم ہوتے ہیں کہ جانی و مالی نقصان کم سے کم ہوتا ہے۔ پاکستان میں الٹا نظام ہے ،یہاں پہلے آفت آئے، پھر اجلاس بلائے جائیں، پھر بیان دیے جائیں اور آخر میں میڈیا سے کہا جائے کہ "صورتحال قابو میں ہے”۔ مگر عوام جانتے ہیں کہ حقیقت کیا ہےکیونکہ وہ ہر سال کیچڑ، مچھروں، وبائی امراض اور بے گھر ہونے کی اذیت جھیلتے ہیں۔

مہنگائی کا عذاب اس سے علیحدہ ہے۔ جن علاقوں میں سیلاب آیا ہے، وہاں سبزیاں نایاب، دودھ مہنگا اور پینے کا پانی خریدنا پڑ رہا ہے۔ تعمیر نو کا خواب ایک دور افتادہ وعدہ بن چکا ہے۔ امدادی پیکج اگر آتے بھی ہیں، تو ان میں سیاسی مداخلت، اقربا پروری اور کرپشن کا عنصر غالب ہوتا ہے۔ عوام بے بسی سے صرف یہی سوال دہراتے ہیں کہ آخر ہم کب تک آفات کا سامنا کرتے رہیں گے؟ کیا ہم محض موسمی قربانی کے بکرے ہیں؟ یا پھر یہ نظام ہی ہمیں قربانی کے لیے پیدا کرتا ہے؟

حقیقت یہ ہے کہ پاکستان میں آفات کو مواقع میں بدلنے کا کوئی ادارہ موجود نہیں۔ یہاں قدرتی آفات سے نمٹنے کے بجائے ان کا استعمال سیاسی فائدے کے لیے کیا جاتا ہے۔ ضلعی انتظامیہ کا فرض ہوتا ہے کہ پہلے سے نقشہ جات، خطرناک علاقوں کی نشاندہی اور بروقت نقل مکانی کے پلان تیار رکھے۔ مگر یہاں سب کچھ بعد میں ہوتا ہے اور اس تاخیر کی قیمت عوام اپنی جان، مال اور عزت سے ادا کرتے ہیں۔ اگر NDMAs اور PDMAs صرف رپورٹیں بنانے اور غیرملکی فنڈنگ کی وصولی تک محدود رہیں تو حالات کبھی نہیں بدلیں گے۔

پاکستانی عوام اب اس اذیت کو معمول سمجھنے لگے ہیں۔ سیلاب ہو یا زلزلہ، گیس کی لوڈشیڈنگ ہو یا مہنگائی، ہر سانحہ صرف "خبر” بن کر رہ جاتا ہے۔ اصل تبدیلی صرف اس وقت آئے گی جب ریاست اپنی ذمہ داری قبول کرے، مقامی حکومتوں کو فعال بنائے، وسائل کو شفاف طریقے سے استعمال کرے اور قدرتی آفات سے نمٹنے کے لیے جدید سائنسی اور ڈیجیٹل نظام اپنائے۔ بصورت دیگر، ہر مون سون، ہر زلزلہ اور ہر آفت ایک بار پھر یہی سوال دہراتی رہے گی کہ "سیلاب، آفات، مہنگائی… آخر عوام کا مقدر ہی کیوں؟”