Category: بلاگ

یومِ عاشور: وہ دن جب کربلا کی ریت لہو سے سیراب ہوئی
تحریر: سیدریاض حسین جاذب
کربلا کی وہ زمین، جہاں کبھی قافلوں نے پڑاؤ ڈالے ہوں گے، جہاں کبھی ہوائیں مہربان ہوں گی، دسویں محرم کی صبح ایک الم ناک سناٹے کے ساتھ طلوع ہوئی۔ سورج نے اپنی کرنیں نہیں بکھیریں بلکہ ایک مغموم اداسی کے ساتھ آسمان پر چمکا، جیسے جانتا ہو کہ آج انسانیت پر ایسا زخم لگنے والا ہے جو قیامت تک ہرا رہے گا۔ خیموں میں بےچینی، سکوت اور دعاؤں کا شور تھا۔ امام حسینؑ رات بھر سجدے میں گڑگڑاتے رہے، آنکھیں اشکبار، دل پر بار عظیم اور زبان پر بس ایک جملہ "یا رب ہمیں صبر دے۔”

علی اکبرؑ، قاسمؑ، عباسؑ، سب جان چکے تھے کہ آج جسم کٹے گا، سر جدا ہوں گے مگر حق کا پرچم جھکنے نہ پائے گا۔ بچوں کی سسکیاں، بیبیوں کی آہیں، اور بی بی زینبؑ کا بےتاب چہرہ فضا میں ایسا نوحہ بکھیر رہا تھا جو دلوں کے تار چیر دیتا تھا۔ مگر ان سب میں سب سے دل دہلا دینے والا منظر وہ تھا، جب امام حسینؑ نے اپنے معصوم، چھ ماہ کے لخت جگر علی اصغرؑ کو گود میں لیا۔ اس بچے کی آنکھیں خشک تھیں، ہونٹوں پر زخم، چہرے پر مٹی اور بدن پر کپکپاہٹ۔ امام نے دشمن کے لشکر کے سامنے آ کر نہ شمشیر اٹھائی، نہ کوئی خطبہ دیا، بس ہاتھ اٹھا کر علی اصغرؑ کو پیش کیا اور کہاکہ "اگر مجھے پیاسا رکھنا چاہتے ہو تو رکھو، مگر اس معصوم پر تو رحم کرو، اسے پانی دے دو۔”

مگر نہ دل پگھلے، نہ آنکھیں نم ہوئیں۔ حرملہ، یزیدی فوج کا ایک تیر انداز، تین شاخوں والا ایسا تیر چھوڑتا ہے جو سیدھا علی اصغرؑ کے نازک گلے کو چیر دیتا ہے۔ ایک لمحہ میں امام کے بازو میں تھرتھراتا بچہ خاموش ہو گیا۔ اس تیر نے صرف ایک گردن نہیں کاٹی بلکہ انسانیت، رحم، شفقت اور وفا کو بھی لہولہان کر دیا۔ امام حسینؑ کا دل چور چور ہو گیا، مگر زبان سے شکوہ نہ نکلا۔ انہوں نے ننھے شہید کا خون اپنے ہاتھوں میں لیا اور آسمان کی طرف اچھال دیا۔ روایات کہتی ہیں کہ زمین نے وہ خون قبول نہ کیا، آسمان نے تھام لیا کیونکہ یہ خون ایک معصوم کا نہیں، شہادت کا تاج پہنے ہوئے ایک عظیم پیغام کا تھا۔

پھر جب میدان خالی ہوا اور ایک ایک چراغ بجھ گیا، امام حسینؑ تنہا رہ گئے۔ جسم زخموں سے چور، پیاس سے نڈھال، دل زخمی، مگر نظریں بلند۔ انہوں نے خیموں کی طرف دیکھا، جہاں زینبؑ کا لرزتا وجود تھا، سکینہؑ کے آنسو، سجادؑ کی بےبسی اور ام کلثومؑ کی سسکیاں۔ امام نے وداعی کلمات ادا کیے، بچوں کو آخری بار گلے لگایا، بہن کو صبر کی تلقین کی اور میدانِ کربلا کی طرف روانہ ہو گئے۔ ان کے قدموں کے نیچے وہی ریت تھی جس پر ان کے یاروں کے لاشے پڑے تھے۔ دشمنوں نے چاروں طرف سے حملہ کیا، تلواریں، نیزے، تیر برسائے گئے، مگر امام حسینؑ کا سر نہ جھکا، ان کی زبان پر کلمہ جاری رہا۔ آخر کار جب سجدے میں گئے اور خدا کے حضور سر رکھا، شمر جیسے بدبخت نے ان کا سر تن سے جدا کر دیا۔

وہ سر، جسے رسول اللہؐ نے چوما تھا، آج نیزے پر بلند ہو چکا تھا۔ وہ سینہ، جس پر نبیؐ سوتے تھے، آج خاک پر روند دیا گیا۔ زمین خون سے بھر گئی، آسمان سیاہ ہو گیا اور مظلومیت نے اپنا پرچم کربلا کے میدان میں گاڑ دیا۔ مگر ظلم یہیں پر نہیں رکا۔ امام حسینؑ کی شہادت کے بعد خیموں پر حملہ ہوا۔ آگ کے شعلے بی بیوں کے پردوں سے ٹکرا گئے۔ سکینہؑ، رقیہؑ، ام کلثومؑ، سب جلتے خیموں سے نکل نکل کر دوڑنے لگیں۔ زینبؑ نے اپنے ہاتھوں سے بچوں کو سمیٹا، چادر کو سنبھالا اور خاک میں لپٹی عزت کو اٹھا کر اپنے ساتھ لے گئیں۔

وہ شام، جسے تاریخ نے "شامِ غریباں” کہا، وہ صرف اندھیرے کی نہیں تھی، وہ ایک قیامت کی رات تھی۔ بی بیوں کے سروں سے چادر چھین لی گئی، بچوں کو کوڑے مارے گئے، امام سجادؑ کو زنجیروں میں جکڑ دیا گیا۔ سکینہؑ بار بار پوچھتی کہ "میرا بابا کہاں ہے؟” مگر جواب میں صرف سسکیاں ملتیں۔ رقیہؑ جب قیدخانے میں بابا کے سر کو دیکھتی ہے تو اس سے لپٹ کر کہتی ہے، "بابا! مجھے کیوں چھوڑ گئے؟ میں آپ کے بغیر کیسے زندہ رہوں؟”

یہ منظر، یہ نوحہ، یہ قیامت آج بھی ہر دل کو لرزا دیتا ہے۔ عاشورہ ختم ہو چکا، مگر کربلا زندہ ہے۔ علی اصغرؑ کا خون آج بھی امت سے سوال کرتا ہے: "کیا تم نے ظلم کے خلاف آواز بلند کی؟” امام حسینؑ کی تنہائی، ان کا سجدہ، آج بھی ہر غیرت مند دل کو بیدار کرتا ہے۔ بی بی زینبؑ کی قیادت، ان کا صبر، ان کا خطبہ آج بھی بتاتا ہے کہ پردہ نشین عورت جب میدان میں اترتی ہے تو یزید جیسے تخت لرز جاتے ہیں۔

یہ کربلا کا پیغام ہے۔ یہ درد کا قصہ نہیں، یہ عشق کا دستور ہے۔ یہ وہ قربانی ہے جس نے دینِ محمدی کو ہمیشہ کے لیے زندہ رکھا۔ حسینؑ کا سر نیزے پر گیا، مگر جُھکا نہیں۔ اگر چاہو تو زندہ رہنے کا سلیقہ حسینؑ سے سیکھو اور مر مٹنے کا مفہوم علی اصغرؑ کے گلے سے سیکھو۔

جب زمین بھی روئی اور آسمان خاموش ہو گیا (9محرم)
تحریر:سید ریاض حسین جاذب
کربلا میں نو محرم کا سورج صرف روشنی نہیں، ایک اعلان تھا، یہ آخری دن ہے۔ یہ سورج افق پر نہیں، دلوں پر طلوع ہوا۔ اپنے ساتھ وہ سائے لے کر آیا جن کا نام فراق، پیاس اور وداع تھا۔ کربلا کی ریت تپ رہی تھی لیکن اس دن جو سورج طلوع ہوا، وہ صرف گرمی نہ لایا… وہ فیصلے کا سورج تھا، وہ آزمائش کی تپش تھا، وہ تاریخ کے عظیم ترین امتحان کا آغاز تھا۔

جب خیموں پر سائے چھوٹے ہونے لگے اور خطرہ بڑا ہوتا چلا گیا۔ جب بچوں کے لب خشک، ماؤں کی آنکھیں نم اور جوانوں کی پیشانیاں وضو کے پانی سے نہیں بلکہ آنسوؤں سے تر تھیں۔ یہ سورج عباسؑ کی بصیرت پر پڑا، جو خیموں کے گرد پہرہ دے رہے تھے۔ یہ سورج زینبؑ کے آنچل پر پڑا، جو جانتی تھیں کہ اب حجاب کی آخری ساعتیں ہیں۔ یہ سورج سکینہؑ کے چہرے پر پڑا، جس کے ہونٹوں پر پیاس سے زیادہ ایک ہی سوال تھا: "بابا! کل ہم کہاں ہوں گے؟”

نو محرم کی صبح عمر بن سعد نے لشکر کو تیار رہنے کا حکم دیا۔ خیموں کے گرد گھیرا مزید تنگ ہو گیا۔ اب لشکر کی تلواریں خیموں کی دیواروں کے سائے میں چمکنے لگیں۔ جیسے ظلم، خامشی کے پردے میں چلنے لگا ہو۔ حضرت عباسؑ گھوڑے پر سوار ہوئے، دشمن کے قریب پہنچے اور للکار کر پوچھا: "کس نیت سے آئے ہو؟” جواب آیا: "ہم جنگ کا آغاز کرنے آئے ہیں!” عباسؑ واپس امام حسینؑ کے پاس آئے اور امامؑ نے فقط ایک بات کہی: "بھیا، اُن سے کہو… ہمیں ایک رات کی مہلت دے دو!” یہ رات، عبادت کی رات تھی، رخصتی کی رات تھی، زندگی کا آخری چراغ تھی۔ ایک ایسی رات جس میں سجدوں کی نمی، رخصتی کے آنسو اور تقدیر کے فیصلے جمع تھے۔

شام ڈھلنے لگی۔ قافلۂ حسینؑ کے چراغ روشن ہوئے اور خیموں میں تلاوتِ قرآن، دعائیں، اذانیں اور نالے بلند ہونے لگے۔ ہر سانس کے ساتھ لگتا تھا جیسے موت قریب آ رہی ہو، مگر خیموں میں کوئی خوف نہیں تھا۔ امامؑ نے سب اصحاب کو جمع کیا، اور کہا "کل میرے ساتھ رہنے والوں کی گردنیں کٹیں گی۔ تم سب چلے جاؤ۔ میں تمہیں رخصت کرتا ہوں!” مگر ہر زبان سے ایک ہی جواب آیا: "اے فرزندِ رسولؐ! ہم آپ کے بعد کیسے زندہ رہ سکتے ہیں؟” یہ جملہ صرف وفاداری نہیں، عشق کی زبان تھا۔ حضرت عباسؑ خاموشی سے خیموں کے گرد چکر لگاتے رہے… ہر خیمے کا در کھٹکھٹاتے، زینبؑ کے خیمے کے سامنے رک جاتے… اور صرف دل ہی دل میں کہتے: "کل اگر میں نہ رہوں، تو یہ خیمے کیسے محفوظ رہیں گے؟” اُن کے چہرے پر کوئی خوف نہ تھا، صرف فرض، غیرت اور اہلِ حرم کا تحفظ تھا۔

رات گہری ہوئی… سکینہؑ امام حسینؑ کے سینے پر سوئی ہوئی تھی، مگر نیند بے چین تھی۔ اس معصوم بچی کے چہرے پر وہ پیاس لکھی تھی جو نہ صرف جسمانی تھی بلکہ دل کی بےچینی کا اظہار بھی۔ زینبؑ نے بھائی سے پوچھا: "کیا کل علی اکبرؑ بھی جائیں گے؟” امام خاموش ہو گئے۔ صرف آنکھ سے ایک آنسو گرا اور زمینِ کربلا نے اُسے اپنے سینے میں چھپا لیا۔ کوئی جواب نہ آیا، مگر خاموشی میں وہ صدمہ چھپا تھا جسے صرف بہنیں سمجھ سکتی ہیں۔

کربلا میں نو محرم کا سورج صرف دن نہ تھا، وہ چراغوں کا الوداع تھا، وہ عباسؑ کی پہرہ داری کا آخری دن، وہ سکینہؑ کی گود کا آخری سایہ، وہ زینبؑ کی چادر کی آخری بے فکری اور حسینؑ کے لبوں پر "رضاً بقضائک” کی آخری مہک تھا۔ وہ دن جب حسینؑ نے خالق سے کہا: "اے پروردگار! اگر یہی تیرا فیصلہ ہے تو ہمیں قبول ہے!”، یہ وہ عزم تھا جسے میدانِ کربلا میں کسی تلوار نے نہیں توڑا، کسی نیزے نے جھکایا نہیں۔

یہ سورج وہ سوال لے کر آیا جو آج بھی زندہ ہے، جب سچ تنہا رہ جائے، جب ظلم چاروں طرف ہو، جب وقت کا حسینؑ پکارے… تو کیا تم اُس کے ساتھ کھڑے ہو گے؟ کیا تم سکینہؑ کے سوال کا جواب دے سکو گے؟ کیا تم زینبؑ کی چادر بچانے کی ہمت رکھتے ہو؟

اسی شبِ عاشور، امام حسینؑ نے اپنے خیمے کے باہر تمام اصحاب اور اہلِ بیت کو جمع کیا۔ خیموں کے چراغ مدھم ہو رہے تھے، مگر حسینؑ کا لہجہ مثلِ آفتاب روشن تھا۔ انہوں نے فرمایا: "میں تمہیں رخصت کرتا ہوں۔ یہ اندھیری رات ہے، جسے جانا ہے، چلا جائے۔ میں اپنی بیعت تم سے اٹھاتا ہوں۔ کل میرے ساتھ ہر وہ شخص مارا جائے گا جو میرے ساتھ رہے گا۔” مگر جواب میں ہر طرف سے ایک صدا آئی: "ہم آپ کے ساتھ جینے نہیں، صرف مرنے کے لیے آئے ہیں۔” یہ وہ رات تھی جب وفا نے تاریخ کی سب سے روشن قسم کھائی کہ کل سورج کربلا سے ڈوبے گا، مگر حسینؑ کا کارواں حق کی روشنی بن کر رہ جائے گا۔

کراچی: گرتی عمارتیں، ہر اینٹ کے نیچے سے اٹھتی چیخ، مجرم کون؟
تحریر: ڈاکٹر غلام مصطفےٰ بڈانی
کراچی جو پاکستان کا معاشی ہب، صنعتی مرکز اور ملک کی سب سے بڑی آبادی والا شہر ہے، یہ شہر اب صرف کاروبار، روشنیوں اور شور کا استعارہ نہیں رہا بلکہ یہاں ہر گرتی عمارت ایک چیخ ہے جو ملبے سے نکل کر آسمان سے سوال کرتی ہے کہ آخر مجرم کون ہے؟

گزشتہ پانچ سالوں میں اس شہر میں کئی عمارتیں زمین بوس ہوئیں۔ کہیں پانچ منزلہ عمارت گری تو کہیں رہائشی اپارٹمنٹس یا فیکٹری کی چھت دھماکے سے نیچے آ گری۔ ان سانحات میں درجنوں زندگیاں چلی گئیں، سیکڑوں خواب دفن ہوئے اور ہر بار کچھ دن شور اٹھا، کچھ افسر معطل ہوئے، لیکن کوئی مستقل حل سامنے نہ آیا۔

4 جولائی 2025 کو لیاری کے بغدادی محلے میں گرنے والی عمارت محض ایک عمارت نہیں تھی بلکہ وہ کراچی کی بلڈنگ پالیسی، حکومتی نااہلی، بلڈرز کی حرص اور عوام کی بے بسی کا علامتی مجسمہ تھی۔ وہ عمارت جو 50 سال پرانی تھی اور خطرناک قرار دی جا چکی تھی، آخر کیوں خالی نہ کرائی گئی؟ کیوں ان سات جانوں کو موت کے منہ میں دھکیلا گیا؟

یہ پہلا واقعہ نہیں ہے بلکہ مارچ 2020 میں گلبہار میں 27 افراد ایک غیر قانونی عمارت کے نیچے دب کر مر گئے۔ اپریل 2023 میں نیو کراچی کی ایک فیکٹری میں چار فائر فائٹرز جان سے گئے۔ 2021، 2022، 2023 اور 2025 کے مختلف مہینوں میں شاہ فیصل کالونی، مچھر کالونی، بھینس کالونی اور کھارادر میں بھی یہی ملبہ گرا . کبھی مزدور، کبھی بچے اور کبھی ماں باپ اس ملبے میں ہمیشہ کے لیے خاموش ہو گئے۔

سندھ بلڈنگ کنٹرول اتھارٹی (SBCA) نے 578 سے زائد خطرناک عمارتوں کی نشاندہی کی مگر ان میں سے بیشتر آج بھی لوگوں سے آباد ہیں۔ SBCA کو نہ وسائل دستیاب ہیں، نہ سیاسی آزادی، نہ تکنیکی استعداد۔ اکثر عمارتوں کو نوٹس تو جاری ہو جاتا ہے مگر نہ انخلاء ہوتا ہے، نہ انہدام اور آخرکار ایک دن موت کا بلاوا آ جاتا ہے۔

ذمہ دار صرف ادارے نہیں بلکہ وہ بلڈرز بھی ہیں جو چند ٹکوں کی خاطر تعمیراتی اصولوں کو روندتے ہیں، وہ مالکان بھی جو خستہ حال عمارتوں میں کرایہ داری جاری رکھتے ہیں اور وہ رہائشی بھی جو غربت یا بے خبری میں خطرہ مول لیتے ہیں۔ سب اس جرم میں شریک ہیں، کچھ خاموشی سے، کچھ بے بسی سے اور کچھ جانتے بوجھتے۔

اب وقت آ گیا ہے کہ ہم کڑوے سچ کا سامنا کریں۔ ہمیں خود سے یہ سوالات پوچھنے کی ہمت کرنا ہوگی کہ سندھ بلڈنگ کنٹرول اتھارٹی نوٹس جاری کرنے کے بعد خاموش کیوں ہو جاتی ہے؟ بلڈرز کو قانون کے شکنجے میں کیوں نہیں کسا جاتا؟ ہر سانحے کے بعد چند افسران کی علامتی معطلی سے آگے کوئی قدم کیوں نہیں اٹھایا جاتا؟ غیر قانونی عمارتیں تعمیر ہونے سے پہلے کیوں نہیں روکی جاتیں؟ سیاسی سرپرستی ہر بار مجرموں کی ڈھال کیسے بن جاتی ہے؟ اور سب سے بڑھ کر یہ کہ کراچی جیسے بڑے شہر میں بلدیاتی ادارے، صوبائی حکومت اور خود شہری اپنی جان کے تحفظ کے لیے کب جاگیں گے؟ اگر آج ہم نے ان چیخوں کو نہ سنا تو آنے والا کل ہم سے بھی بدلہ لے سکتا ہے۔

کراچی کے شہریوں کی جان و مال کی حفاظت اب ایک عظیم امتحان بن چکی ہے، جس سے نظریں چرانا صرف آنے والی تباہی کو دعوت دینا ہے۔ یہ وقت عمل کا ہے، ورنہ ہر اینٹ ہماری خاموشی کی گواہ بن کر ہماری بے حسی کا ماتم کرتی رہے گی۔

آٹھ محرم۔ امام کا آخری خطاب: حسینؑ نے پکارا، مگر ضمیر سوئے رہے
تحریر:سید ریاض حسین جاذب

آٹھ محرم کی شام… کربلا کی پیاسی سرزمین پر سناٹا گہرے سائے کی مانند چھایا ہوا تھا۔ خیموں میں سسکیاں تھیں، خشک مشکیزے تھے، اور ہر چہرے پر اضطراب کی پرچھائیاں۔ چھوٹے بچے پانی کے ایک قطرے کو ترس رہے تھے، ماؤں کی گودیں اپنی تڑپتی اولاد کو خاموشی سے سینے سے لگا رہی تھیں، اور وقت جیسے تھم سا گیا تھا۔ آسمان پر سورج بھی جیسے شرمندگی سے جھک گیا ہو، اور زمین خاموشی سے اس اندوہناک منظر کی گواہی دے رہی تھی۔

انہی گھڑیوں میں امام حسینؑ خیمے سے باہر تشریف لائے۔ یزیدی لشکر نے ہر طرف سے نرغہ تنگ کر رکھا تھا، مگر حسینؑ کے قدموں میں لرزش نہ تھی۔ ان کی نگاہوں میں جلال، لہجے میں وقار اور دل میں وہ درد تھا جو صرف نواسۂ رسولؐ کے سینے میں انگاروں کی طرح دہک سکتا ہے۔

امامؑ نے دشمنوں سے مخاطب ہوکر وہ کلمات کہے جو رہتی دنیا تک مظلومیت کی بلند ترین صدا بن کر گونجتے رہیں گے:

"کیا تم نہیں جانتے کہ میں محمدؐ کا نواسہ ہوں؟ کیا تم بھول گئے کہ میری ماں فاطمہؑ وہی ہیں جنہیں تم خاتونِ جنت کہتے ہو؟ کیا تم ان احادیث کو جھٹلا سکتے ہو جو رسولؐ خدا نے میرے اور میرے بھائی حسنؑ کے بارے میں فرمائی تھیں؟ اگر تمہیں شک ہے تو جابر بن عبداللہ، زید بن ارقم اور انس بن مالک جیسے جلیل القدر صحابہ سے پوچھ لو، جنہوں نے یہ سب اپنی آنکھوں سے دیکھا اور اپنے کانوں سے سنا۔”

یہ خطاب صرف ایک تاریخی بیان نہ تھا، یہ وہ احتجاج تھا جو ایک مظلوم امامؑ اپنی امت کے ضمیر کو جھنجھوڑنے کے لیے کر رہا تھا… مگر ہر طرف سنگ دلی کے اندھیرے چھا چکے تھے۔

اسی دن پانی کا محاصرہ مزید سخت کر دیا گیا۔ نہر فرات بہہ رہی تھی، مگر اہلِ بیتؑ کے لیے اس کے پانی کا ایک قطرہ بھی حرام کر دیا گیا۔ حضرت عباسؑ کی غیرت سلگ رہی تھی، سکینہؑ کے لب خشک تھے، اور امامؑ کی پلکوں پر امت کی بےحسی کا درد جھلک رہا تھا۔

امام حسینؑ نے عمر بن سعد سے مذاکرات کیے۔ تین تجاویز پیش کیں:

1. مجھے واپس مدینہ جانے دیا جائے
2. کسی سرحدی مقام پر چلے جانے کی اجازت دی جائے
3. یا پھر مجھے یزید کے سامنے پیش ہونے دیا جائے
مگر یزیدی لشکر نے ہر دروازہ بند کر دیا۔

رات ڈھلنے لگی۔ خیموں میں موت کی چاپ سنائی دینے لگی۔ اصحابِ حسینؑ اپنی تلواریں درست کرنے لگے، اور امامؑ اپنے رب کے حضور سر بسجود ہو گئے:

"اے میرے رب! تُو جانتا ہے کہ ہم نے تیرے دین کی خاطر سب کچھ قربان کر دیا… بچوں کی پیاس، بہنوں کے آنسو، اصحاب کی جانیں… سب تیری رضا کے لیے نچھاور کر دیے۔”

آٹھ محرم وہ دن ہے جب دنیا نے ایک سچ کو اپنی آنکھوں سے دیکھا … جب سارا عالم خاموش ہو جائے، تو ایک حسینؑ کھڑا ہو کر تاریخ کو جگاتا ہے۔

یہ دن ہمیں سکھاتا ہے کہ صبر صرف خاموشی کا نام نہیں، بلکہ وہ عزم ہے جو پانی کی پیاس میں بھی سر نہیں جھکاتا۔ امام حسینؑ کا خطاب فقط احتجاج نہیں تھا، بلکہ وہ درد بھری آواز تھی جو ایک بیٹے کو اپنے باپ کی لاش اٹھاتے وقت محسوس ہوتی ہے۔ یہ وہ جلال تھا جو صرف حق پر قائم ولی کو نصیب ہوتا ہے۔

کربلا کی پیاسی شام میں امام حسینؑ نے صرف حجت تمام نہیں کی، بلکہ قیامت تک آنے والے انسانوں کو یہ سبق دیا کہ:

> ظلم کے سائے چاہے جتنے گہرے ہوں، ایک نواسۂ رسولؐ کا سچ ان سب کو چیر کر روشنی بن جاتا ہے۔

بڑھتی ہوئی مہنگائی اور عوام کی پریشانیاں
تحریر:ملک ظفراقبال
آج ہر خاص و عام کی زبان پر ایک ہی جملہ ہے کہ "مہنگائی کا جن بوتل سے باہر آ چکا ہے”، جسے قابو کرنا اب ناممکن نظر آتا ہے۔ اس کی بڑی وجہ وہ مافیاز ہیں جو ہر دور میں حکومتی اقدامات کو چیلنج کرتے آئے ہیں، اور نتیجتاً عوام کو لوٹنے کا یہ عمل تسلسل سے جاری ہے۔ افسوسناک امر یہ ہے کہ ان عناصر کو اکثر حکومتی سرپرستی بھی حاصل رہی ہے۔

مثال کے طور پر، ایک قصاب 800 روپے کی بجائے 1100 روپے میں گوشت فروخت کرتا ہے، جو سرکاری نرخ سے 300 روپے زیادہ ہے۔ سرکاری ادارے صرف 500 روپے کا چالان کرکے خانہ پری کر لیتے ہیں، اور قصاب محفوظ ہاتھوں سے اپنی مرضی سے کاروبار کرتا رہتا ہے۔ گویا جرمانہ ایک رسمی کارروائی بن کر رہ گیا ہے، جو ملی بھگت کا ایک خوبصورت مظہر ہے۔ عوام کو گویا اس بدعنوان نظام کو برداشت کرنے کا عادی بنایا جا رہا ہے۔

مہنگائی محض ایک لفظ نہیں بلکہ ایسا ناسور ہے جو غریب اور متوسط طبقے کی کمر توڑ رہا ہے۔ بجلی، گیس، پانی کے بل ہوں یا روزمرہ اشیاء کی قیمتیں، سب کچھ آسمان کو چھو رہا ہے۔ رہی سہی کسر ناجائز ٹیکسوں نے پوری کر دی ہے، جس سے عوام شدید اضطراب کا شکار ہیں۔

بلوں کا بوجھ اور ٹیکسوں کی بھرمار سے ہر پاکستانی شہری سر پکڑ کر بیٹھ گیا ہے۔ 200 سے 201 یونٹ بجلی استعمال کرنے پر اسپیشل اضافی چارجز، گرمیوں میں طویل لوڈشیڈنگ اور اوپر سے بجلی پر الگ سے ٹیکس، عوام کے لیے سوہان روح بن چکا ہے۔ گیس کے نرخوں میں ہوشربا اضافے نے سردیوں میں گزارا ناممکن کر دیا ہے۔

حکومت کی جانب سے لگائے گئے مختلف قسم کے ٹیکس، جن میں سے کئی غیر ضروری اور ناجائز محسوس ہوتے ہیں، عوام پر اضافی بوجھ کی شکل اختیار کر چکے ہیں۔ تنخواہ دار طبقہ ہو یا چھوٹے تاجر، ہر کوئی اپنی آمدنی کا بڑا حصہ ان بلوں اور ٹیکسوں کی ادائیگی میں جھونکنے پر مجبور ہے۔ اس پر فائلر اور نان فائلر کا مضحکہ خیز تماشا عوام کے ساتھ مزید ناانصافی ہے۔

مہنگائی نے عام آدمی کی زندگی کو جہنم بنا دیا ہے۔ قوت خرید اس حد تک کم ہو چکی ہے کہ دال، سبزی، آٹا، چینی، گھی جیسی بنیادی اشیاء بھی عام آدمی کی پہنچ سے دور ہوتی جا رہی ہیں۔ بچوں کی تعلیم، صحت اور روزمرہ ضروریات پوری کرنا ایک خواب بنتا جا رہا ہے۔ والدین نہ بچوں کو اچھے اسکول میں پڑھا سکتے ہیں، نہ بیماری کی صورت میں مہنگا علاج کرا سکتے ہیں۔

روزگار کے مواقع پہلے ہی محدود ہیں، اور مہنگائی نے زندگی کو مزید اجیرن بنا دیا ہے۔ لوگ قرض لے کر گھر کا چولہا جلا رہے ہیں، اور مالی مشکلات دگنی ہو گئی ہیں۔ اس ساری صورتِ حال کے برعکس، سرکاری سطح پر پروٹوکول اور عیاشیاں ویسے ہی جاری و ساری ہیں، جو عوام کے زخموں پر نمک چھڑکنے کے مترادف ہے۔

مہنگائی کا براہ راست اثر ملکی معیشت پر پڑتا ہے۔ جب عوام کی قوتِ خرید ختم ہوتی ہے تو مارکیٹ میں کاروبار ٹھپ ہو جاتے ہیں۔ چھوٹے کاروباری دیوالیہ ہو رہے ہیں، اور بڑے سرمایہ کار بھی سرمایہ کاری سے گریزاں ہیں۔ بے روزگاری میں اضافہ ایک سنگین سماجی مسئلہ بن چکا ہے۔ اطلاعات ہیں کہ کئی بڑی صنعتیں پاکستان سے بنگلہ دیش منتقل ہو رہی ہیں۔

یہ وقت کی پکار ہے کہ حکومت سنجیدگی کا مظاہرہ کرے۔ بیانات سے کام نہیں چلے گا، اب عملی اقدامات کی ضرورت ہے۔ سب سے پہلے ناجائز ٹیکسوں کا خاتمہ کیا جائے، بجلی و گیس کے بلوں میں ریلیف دیا جائے، اور ذخیرہ اندوزوں و منافع خوروں کے خلاف آہنی ہاتھوں سے کارروائی کی جائے۔

حکومت کو ایسی پالیسیاں وضع کرنی ہوں گی جن سے عام آدمی کی قوت خرید بحال ہو، اور وہ مہنگائی کے اس بوجھ سے نجات پا سکے۔ زراعت اور صنعت کو فروغ دے کر روزگار کے نئے مواقع پیدا کرنا ناگزیر ہے۔ یہی عوامی ریلیف ملکی معیشت کے استحکام اور سماجی ہم آہنگی کی ضمانت ہو سکتی ہے۔

عوام مہنگائی کے عفریت سے نجات چاہتے ہیں۔ یہ حکومتِ وقت کی آئینی، اخلاقی اور انسانی ذمہ داری ہے کہ وہ عوام کی چیخ و پکار سنے، اور ان کے لیے آسانیاں پیدا کرے۔ بصورت دیگر یہ سنگین مسئلہ سیاسی و سماجی انتشار کو جنم دے سکتا ہے، جس کے نتائج کسی کے قابو میں نہیں رہیں گے۔

تشنگی کی راتیں: کربلا کی ساتویں اور آٹھویں شب
تحریر:سید ریاض حسین جاذب
سلام ہو حسینؑ پر…
سلام ہو ان پر جو پیاسے رہے مگر سچائی کو تر رکھا،
سلام ہو عباسؑ پر… جو دریا کے کنارے تک پہنچے مگر وفا کے پیکر بن کر واپس لوٹ آئے۔

محرم کی ساتویں شب وہ لمحہ ہے جب کربلا کے آسمان پر تپتی دھوپ کا سایہ گہرا ہونے لگا، جب خیموں میں معصوم بچے پانی کو ترسنے لگے، اور جب صحرائے کربلا کے ذرے ذرے نے پیاس کے مارے لبوں کی صدائیں اپنے سینے میں دفن کر لیں۔ چھٹے محرم کے بعد ذخیرہ شدہ پانی ختم ہو چکا تھا۔ سات محرم کا سورج آگ برسا رہا تھا۔ ماؤں کی گود میں بلکتے بچے، پانی کی تلاش میں دوڑتی بچیاں، اور خالی مشکیزوں کو دیکھتے مردوں کی آنکھیں… یہ سب کچھ کربلا کے ماتمی منظر کو اور ہولناک بنا رہا تھا۔

امام حسینؑ جانتے تھے کہ پانی کا ایک ایک قطرہ اب امانت ہے۔ ان کی آنکھوں کے سامنے حضرت سکینہؑ پیاس سے نڈھال تھی، مگر ان کے لہجے میں شکایت نہیں تھی، فقط ایک سوال تھا: "بابا! کل پانی ملے گا نا؟”

شیعہ روایات اس بات پر متفق ہیں کہ امام حسینؑ کے قافلے کو ساتویں محرم سے دسویں محرم کی شب تک پانی میسر نہ تھا۔ تشنگی کی یہ حالت صرف جسمانی نہیں، بلکہ روحانی آزمائش بھی تھی۔ خیموں میں بڑوں کے ہونٹ خشک ہو چکے تھے، بچوں کی چیخیں دل چیر رہی تھیں، اور صبر کا وہ پہاڑ تھا جو صرف حسینؑ کے کارواں کو نصیب تھا۔

امامؑ کے ایک وفادار ساتھی، یزید بن حسین الحمدانی، نے بچوں کی بلکتی آوازیں سن کر امامؑ سے عمر بن سعد کے پاس جانے کی اجازت طلب کی۔ وہ دربار یزید کے اس نمائندے کے سامنے گئے اور کہا: "تم نے میرے سلام کا جواب نہیں دیا، کیا تم مسلمان نہیں ہو؟” ابن سعد نے جواب دیا، "کیوں نہیں، میں مسلمان ہوں!”
الحمدانی بولے: "تو پھر رسول اللہؐ کے نواسے اور ان کے ننھے بچوں کو پانی سے محروم رکھنا کون سا اسلام ہے؟ کیا تم قیامت کے دن رسولؐ کو کیا منہ دکھاؤ گے؟”

ابن سعد نے بڑی سفاکی سے کہا، "قیامت کی فکر بعد میں کروں گا، ابھی مجھے رے کی حکومت چاہیے!”

اس پر امام حسینؑ نے حضرت عباسؑ کو حکم دیا کہ بیس سواروں کے ساتھ دریا کی طرف جائیں اور پانی لانے کی کوشش کریں۔ جیسے ہی عباسؑ اپنے ساتھیوں کے ساتھ فرات کے کنارے پہنچے، یزیدی سپاہی حجاج نے انہیں روکا۔ دونوں جانب سے تلواریں چلیں، تیروں کی بوچھاڑ ہوئی۔ عباسؑ اور ان کے وفادار ساتھی چند مشکیزے بھرنے میں کامیاب ہوئے، لیکن واپسی پر ہجوم اور تیزی میں کچھ برتن الٹ گئے، پانی زمین پر بہہ گیا۔ جو پانی خیموں میں پہنچا، وہ پیاس بجھانے کے لیے ناکافی تھا، مگر سکینہؑ کے لب تر ہوئے تو ماں کی آنکھ بھیگ گئی۔

انھی لمحوں میں ایک اور واقعہ کربلا کی تپتی ریت پر رقم ہوا۔ یزیدی لشکر کا ایک سپاہی، عبداللہ بن حسین العزدی، فرات کے کنارے کھڑا ہو کر طنز کرتا ہے: "حسین! یہ دیکھو، یہ شفاف پانی! خدا کی قسم، ایک قطرہ بھی تمہیں نصیب نہ ہوگا!”
امامؑ نے ہاتھ اٹھائے اور دعا کی: "اے پروردگار! اسے زندگی میں ایسی پیاس دے جو کسی نے نہ چکھی ہو!”
راوی بیان کرتے ہیں کہ وہ سپاہی دریا سے پانی پیتا رہا، قے کرتا رہا، بار بار پیتا، یہاں تک کہ اس کا پیٹ پھٹ گیا اور وہ فرات کے پانی میں ڈوب کر ہلاک ہو گیا۔

یہ وہ لمحہ تھا جب ابن سعد کو غصہ آیا کہ حسینؑ کے سوار دریا سے پانی لا سکے۔ اس نے دریا کا پہرہ مزید سخت کر دیا، اب پانی کا ایک قطرہ بھی امامؑ کے کیمپ تک نہیں پہنچ سکتا تھا۔

آٹھویں شب کو امام حسینؑ خود چند ساتھیوں کے ساتھ ابن سعد سے گفتگو کے لیے نکلے۔ انہیں امید تھی شاید ضمیر کی کوئی چنگاری ابھی باقی ہو۔ امامؑ نے کہا: "کیا تو خدا سے نہیں ڈرتا؟ کیا تو نہیں جانتا میں رسولؐ کا نواسہ ہوں؟ کیا بنو امیہ کی خوشنودی کے لیے مجھے قتل کرو گے؟”

اسی رات، سکینہؑ پھر اپنی ماں سے لپٹ کر کہہ رہی تھی: "امّی! کل پانی ملے گا نا؟”
اور ماں… بس آسمان کی طرف دیکھ رہی تھی، جیسے دعائیں بھی پیاسی ہو گئی ہوں۔