Category: بلاگ

ایک بل، ایک لاش اور وزیروں کی مسکراہٹ
تحریر: ڈاکٹر غلام مصطفیٰ بڈانی
پاکستان اسٹاک ایکسچینج نئی بلندیوں کو چھو رہی ہے۔ انڈیکس ایک لاکھ اکتیس ہزار پوائنٹس کی حد پار کر چکا ہے اور سرمایہ دار طبقے کے چہروں پر خوشی کی لہر دوڑ گئی ہے۔ لیکن اس معاشی پیش رفت میں ایک سوال ہے جو دماغ پر ہتھوڑے برسا رہا ہے اور ضمیر کو جھنجھوڑ رہا ہے کہ کیا یہ ترقی عام پاکستانی کے لیے بھی ہے یا یہ صرف چند مخصوص خاندانوں، اشرافیہ اور مالیاتی مافیاز کی جیبیں بھرنے کا ذریعہ ہے؟ جب غریب کا چولہا بجھا ہوا ہو، بچے فاقوں پر ہوں اور گھر کا مالک بجلی، پانی، آٹا اور دوائی کے اخراجات سے تنگ آ کر دیوار سے سر ٹکرا رہا ہو، تو سٹاک ایکسچینج کا یہ جشن سراسر تماشہ معلوم ہوتا ہے۔

ملک کا عام شہری آج مہنگائی، بیروزگاری اور معاشی ناہمواری کی دلدل میں دھنستا جا رہا ہے۔ بجلی کے بلوں نے اس کا ذہنی سکون چھین لیا ہے۔ پیٹرول کی قیمتیں عام سواری کو بھی لگژری بنا چکی ہیں۔ ریلویز نے کرایوں میں اضافہ کر دیا، بسوں نے کرائے بڑھا دیے اور گڈز ٹرانسپورٹرز نے ہڑتال کی دھمکیاں دے رکھی ہیں۔ ملک شہزاد اعوان جیسے نمائندے ٹیکسوں اور ٹولز ٹیکس سے تنگ آ کر احتجاج کر رہے ہیں اور ملک کے مختلف حصوں میں ان کی گاڑیاں نذرِ آتش اور لوٹ مار کا شکار ہو رہی ہیں۔ یہ صرف ٹرانسپورٹ کا بحران نہیں، یہ ہر اس شہری کا درد ہے جس کی روزمرہ اشیاء ان گاڑیوں سے جُڑی ہوئی ہیں اور جب ان اشیاء کی قیمتیں بڑھتی ہیں تو ان کا بوجھ بھی عوامی کمر پر آ گرتا ہے۔

یہ معاشی دباؤ صرف تاجر یا ٹرانسپورٹر نہیں بلکہ ہر عام پاکستانی کی گردن پر ہے۔ گوجرانوالہ میں انور نامی محنت کش کا بجلی کا بل صرف 3800 روپے کی عدم ادائیگی پر کاٹ دیا گیا۔ جب اس نے ہمسائے سے بجلی لی تو گیپکو نے اس پر چوری کا مقدمہ درج کرا کے جیل بھجوا دیا اور 700 یونٹ کابل بنادیا۔ یہی مقدمہ اس وقت قیامت بن گیا جب اس کا بیٹا فراز تیزاب پی کر زندگی سے منہ موڑ گیا۔ ماں کی فریاد "میرا بیٹا بلوں کے دفتر کے چکر لگاتا رہا اور آخر مر گیا” صرف ایک بین نہیں، پورے سسٹم پر ایک تھپڑ ہے۔کچھ عرصہ قبل اسی شہر میں ایک بھائی نے بجلی کے بل کے جھگڑے پر اپنے ہی بھائی کو قتل کر دیا۔ ڈسکہ کی نسرین بی بی نے بیس ہزار روپے کے بل سے تنگ آ کر خود کو جلا لیا۔ یہ خبریں نہیں، ماتم ہیں، جن پر پورا معاشرہ آنکھیں بند کیے بیٹھا ہے۔

وزیر اعظم شہباز شریف کی طرف سے بجلی کی قیمت میں سات روپے فی یونٹ کمی کا اعلان کیا تھا مگر یہ کمی بنیادی ٹیرف میں نہیں بلکہ عارضی فیول ایڈجسٹمنٹ میں کی گئی، جو اپریل سے جون تک محدود تھی۔ اب وہ ریلیف ختم ہو چکا ہے اور عوام پھر اسی ظلم کے شکنجے میں آ چکی ہے۔ وفاقی وزیر اویس لغاری کا یہ کہنا کہ "ہم نے مستقل ریلیف دیا ہے”، گویا ان ماں باپ کے زخموں پر نمک پاشی ہے جنہوں نے اپنے بچوں کو بجلی کے بلوں کے بوجھ تلے کھو دیا۔ آج ایک دو کمروں کے گھر کا بجلی بل آٹھ سے دس ہزار روپے تک پہنچ چکا ہے، جو ایک تنخواہ دار یا مزدور کے لیے موت کا پروانہ ہے۔

قانون دان اور ماہرنفسیات بار بار خبردار کر رہے ہیں کہ یہ مہنگائی نہ صرف معاشی تباہی کا پیش خیمہ ہے بلکہ معاشرتی تنزلی، تشدد اور ذہنی بیماریوں کا سبب بن رہی ہے۔ گھروں میں جھگڑے، طلاقیں، قتل، خودکشیاں…یہ سب سلیب گردی کے بدترین نتائج ہیں۔ اگر یہی تسلسل جاری رہا تو ہم ایک ایسا معاشرہ بن جائیں گے جہاں انسانیت صرف کتابوں میں رہ جائے گی۔

اور اب وہ خونی سوال جو ہر دل کو چیر رہا ہے کہ جب سٹاک ایکسچینج نئی بلندیوں کو چھو رہی ہے تو کیا اس کا کوئی فائدہ عام پاکستانی کو مل رہا ہے؟ جب ایک غریب محنت کش کا بیٹا بجلی کے بل کی وجہ سے خودکشی کر لیتا ہے تو اس کا ذمہ دار کون ہے؟ جب بھائی بھائی کا قاتل بن جاتا ہے اور خواتین خودسوزی پر مجبور ہوتی ہیں تو کیا یہ نظام کی ناکامی نہیں؟ وفاقی وزیر برائے توانائی سردار اویس لغاری، آپ کے فیصلوں نے عوام کی زندگیوں کو عذاب بنا دیا ہے۔ آپ اس "سلیب گردی” کے نتیجے میں معصوم پاکستانیوں کی اور کتنی جانیں لیں گے؟

کیا کوئی ادارہ یا لیڈر اس معاشرتی تباہی کو روکنے کے لیے آگے بڑھے گا یا ہم صرف اعدادوشمار کی چمک دمک میں کھوئے رہیں گے جبکہ عام آدمی کی چیخیں دبتی رہیں گی؟ اربابِ اختیار سے سوال ہے کہ آپ کے پاس اس درد کا کوئی مداوا ہے یا بس وعدوں اور عارضی ریلیف کے جھانسوں سے عوام کو مزید ٹھگتے رہیں گے؟ کب تک اویس لغاری کے غلط فیصلوں کی وجہ سے بچے یتیم، عورتیں بیوہ اور مائیں اپنے لخت جگر کی لاشوں پر بین کرتی رہیں گی؟ اس ظلم کے خلاف کون بند باندھے گا؟ کب تک سلیب گردی کی بھینٹ چڑھ کر جنازے اٹھتے رہیں گے؟ کیا کوئی آج کے دور کا عمر پیدا ہوگا جس نے کہا تھا کہ اگر فرات کے کنارے ایک کتا بھی پیاسا مر گیا تو اس کا جوابدہ عمر ہوگا؟

اب ان بھوکے، بے بس اور اویس لغاری کی سلیب گردی کی وجہ سے مرنے والوں کے خون کا ذمہ دار حاکم وقت وزیر اعظم میاں شہباز شریف نہیں تو اور کون ہے؟

بل نہیں دیا؟ مر جاؤ!، ریاست کے ہاتھوں ایک اور قتل
تحریر: حبیب اللہ خان
گوجرانوالہ کے چھوٹے سے علاقے ونیہ والا میں ایک ایسا واقعہ رونما ہوا ہے جس نے صرف ایک خاندان کو نہیں، بلکہ پورے ریاستی نظام کو بےنقاب کر دیا ہے۔ محض 38 ہزار روپے کے بجلی کے بل کی عدم ادائیگی پر ایک محنت کش باپ کو گرفتار کر لیا گیا ، وہ بھی ایسے حالات میں جب اس کے گھر کی بجلی تین دن سے منقطع تھی اور حالات شدید غربت کی چغلی کھا رہے تھے۔ یہ کہانی انور اور اس کے بیٹے فراز کی ہے۔ بجلی کامیٹر کٹ گیا، گھر میں تاریکی چھا گئی اور اسی دوران گیپکو نے ہمسایوں سے عارضی بجلی لینے پر انور کو بجلی چوری کے الزام میں گرفتار کروا دیا۔ ریاستی مشینری نے اپنی چال چل دی مگر شاید اسے اندازہ نہ تھا کہ اس بار شکار صرف قید و بند تک محدود نہیں رہے گا۔

فراز … ایک حساس دل رکھنے والا نوجوان تھا جو والد کی گرفتاری اور گھریلو تاریکی سے اندر ہی اندر جل رہا تھا، وہ ہر ممکن کوشش کرتا رہا کہ گیپکو کے دفتر جا کر کسی حل تک پہنچے۔ لیکن جب مایوسی حد سے بڑھ گئی تو اس نے تیزاب پی کر اپنی زندگی کا خاتمہ کر لیا۔ وہ زندگی جس نے شاید کبھی سکون کا سانس ہی نہ لیا ہو، اُسے ریاست کی بےحسی نے ہمیشہ کے لیے خاموش کر دیا۔ ہم سب نے بچپن میں سنا ہے کہ "ریاست ماں کی طرح ہوتی ہے”۔ لیکن سوال یہ ہے کہ کیا کوئی ماں اس طرح اپنے بھوکے بچے کو سزادیتی ہے؟ کیا ماں بجلی نہ ہونے پر اپنے بیٹے کو موت کی طرف دھکیلتی ہے؟ فراز کی خودکشی ایک عام خبر نہیں بلکہ یہ ہمارے اجتماعی ضمیر پر ایک ایسا طمانچہ ہے جس کی گونج دیرپا ہونی چاہیے۔

جب وفاقی وزیر توانائی اویس لغاری بجلی چوروں کے خلاف "ریکوری مہم” پر فخر کرتے ہیں تو کیا ان سے یہ پوچھا نہیں جانا چاہیے کہ کیا یہ "ریکوری” انسانی جان سے زیادہ قیمتی ہے؟ کیا ان کی مہم نے غربت کو جرم بنا دیا ہے؟ کیا صرف اس لیے کہ انور ایک محنت کش تھا، اسے جیل میں ڈالنا جائز تھا؟ اور کیا فراز کی موت کا مقدمہ اب صرف والدین کے آنسوؤں میں دفن کر دیا جائے گا یا وزیرِ توانائی کو بھی کٹہرے میں بلایا جائے گا؟ یہ محض ایک افسوسناک واقعہ نہیں، یہ اس پالیسی کا نتیجہ ہے جس نے ہر قیمت پر ریکوری کا نعرہ لگا کر انسانیت کو پچھلی صف میں دھکیل دیا ہے۔ کیا اویس لغاری کی وزارت اس موت کی شریک مجرم نہیں؟ کیا ان کے اقدامات سے جنم لینے والے سانحات کا کوئی حساب نہیں ہونا چاہیے؟

آج ملک بھر میں اربوں روپے کے بل ادا نہ کرنے والے طاقتور سیاستدان، تاجر، افسران اور اشرافیہ دندناتے پھر رہے ہیں۔ ان کے خلاف نہ ایف آئی آر درج ہوتی ہے، نہ گرفتاری، نہ ذلت۔ مگر ایک محنت کش انور، جو شاید 38 ہزار کی قسط بھی مانگتا ہوگا، اسے جیل میں ڈال دیا جاتا ہے۔ کیا یہی قانون ہے؟ کیا یہی انصاف ہے؟ کیا یہی وہ پاکستان ہے جس کا خواب قائداعظم نے دیکھا تھا؟ فراز کی موت ایک نوحہ ہے، ایک احتجاج ہے، ایک سائلانہ چیخ ہے ، وہ کہتا ہے "میرا جرم کیا تھا؟ کہ میں غریب تھا؟”

یہ سب کچھ ایک لمحاتی جذباتی ردعمل نہیں بلکہ ریاست کے لیے ایک آئینہ ہے جس میں وہ اپنی پالیسیوں، اپنی ترجیحات اور اپنی بےحسی کا عکس دیکھ سکتی ہے۔ گیپکو حکام کے خلاف فوری انکوائری ہونی چاہیئے اور وفاقی وزیر توانائی اویس لغاری کو اس واقعہ پر ایوان میں طلب کیا جانا چاہیے۔ وزارتِ توانائی کی "ریکوری پالیسی” کا ازسرِنو جائزہ لیا جانا ضروری ہے۔ ایسے تمام کیسز میں جہاں غربت کی وجہ سے بل ادا نہ کیے جا سکے، ریاستی ریلیف، اقساط یا سماجی تحفظ کی اسکیمیں متعارف کروائی جائیں۔ فراز کی خودکشی پر عدالتی کمیشن قائم کیا جائے تاکہ یہ طے کیا جا سکے کہ ذمہ دار کون ہے . صرف بجلی چوری کرنے والا یا وہ نظام جو انسان کو جینے کا حق نہیں دیتا۔

اگر ہم نے اب بھی آنکھیں بند رکھیں اگر ہم نے فراز کے آنسوؤں کو نظرانداز کیا، تو شاید کل کو کسی اور کا بیٹا، کسی اور کا باپ اسی ریاستی ظلم کی بھینٹ چڑھ جائے گا۔ تب ہم صرف کفِ افسوس ہی ملتے رہ جائیں گے۔ کیا ہم ایک زندہ قوم ہیں؟ یا پھر ہم صرف زندہ لاشیں ہیں جو ہر دن ایک نیا ماتم سن کر تھوڑا سا افسوس کرتے ہیں اور پھر اگلے سانحے تک خاموش ہو جاتے ہیں؟ فراز چلا گیا، انور شاید رہا بھی ہو جائے، لیکن یہ سوال ہمارے دل و دماغ پر نقش ہونا چاہیے کہ کیا ہم واقعی ایک زندہ ریاست ہیں؟ اگر ہم خاموش رہے، تو یہ خاموشی صرف ایک قتل پر نہیں ہو گی ، یہ ہمارے ضمیر کے قتل پر مہرِ تصدیق ہو گی۔

پیاس کے صحرا میں صبر کا دریا بہتا رہا.مکہ سے کربلا تک کا سفر،6محرم
تحریر: سیدریاض حسین جاذب
چھ محرم الحرام، وہ لمحہ جب سورج کربلا کی پیاسی زمین پر یوں ڈھل رہا تھا گویا افق پر خون پھیلنے لگا ہو، اور ہوا ایسی ساکت ہو چکی تھی جیسے پوری کائنات امام حسینؑ کے صبر اور استقلال کو دم سادھے دیکھ رہی ہو۔ کربلا کے اس بے در و دیوار میدان میں نہ کوئی بازار تھا، نہ دروازہ، صرف خیمے تھے، سجدے تھے، سسکیاں تھیں، اور آنکھوں میں انتظار کی نمی۔

اسی دن ابن زیاد نے ظلم کا تاج پہن کر عمر بن سعد کو وہ آخری پیغام بھیجا، جو تاریخ کے ہر صفحے کو لہو سے رنگین کر گیا:
"حسینؑ سے یزید کے حق میں بیعت لو، ورنہ فرات کے کنارے اُن کا خون بہا دو۔”

یوں چھ محرم وہ دن بن گیا جب دریا سے پانی چھن گیا، مگر اہلِ بیتؑ کے صبر کا چشمہ چھلکنے لگا۔ عمر بن سعد نے پانچ سو سپاہیوں کو فرات پر تعینات کر دیا۔ وہ پانی جو درختوں کی جڑیں تر کرتا تھا، جانوروں کی پیاس بجھاتا تھا، آج حسینؑ کے معصوم علی اصغرؑ پر حرام ٹھہرایا گیا۔ یزیدی لشکر کے سائے میں معصوم چہرے پیاس کی شدت سے زرد ہونے لگے۔ بی بی سکینہؑ کی لرزتی آواز خیمے کے سکوت میں یوں گونجی جیسے کسی روح نے فریاد کی ہو:
"اماں… پانی…”

ماں نے آسمان کی طرف نگاہ کی، مگر لبوں پر شکوہ نہ آیا۔ صرف خاموشی سے اشک بہہ نکلے، کہ شکوہ صبر والوں کا شیوہ نہیں ہوتا۔

مقتل کی روایت ہے کہ شام کے وقت بی بی سکینہؑ خیمے سے نکلی، شاید پانی کی تلاش میں، یا شاید چچا عباسؑ کی راہ تکتی ہوئی۔ امام حسینؑ نے اُسے واپس لا کر اپنی گود میں لیا، چادر میں لپیٹا، اور آسمان کی طرف خاموش نظروں سے دیکھا… گویا وقت کو گواہ بنا رہے ہوں، جیسے رب سے کہہ رہے ہوں:
"پروردگار! یہ تیرے حبیبؐ کی نواسی ہے، اور آج اسے امتِ محمدؐ نے پیاسا کر دیا۔”

اسی شام، جب افق پر غروبِ شمس کے سائے زمین پر لہو کی چادر کی طرح پھیل رہے تھے، امام حسینؑ نے اپنے جانثار اصحاب کو بلایا۔ خیموں کے درمیان خاموشی ایسی تھی جیسے موت بھی رک گئی ہو، مگر فضاؤں میں وفا کی سرگوشیاں گونج رہی تھیں۔
امامؑ نے فرمایا:
"یہ لوگ صرف مجھے چاہتے ہیں، تم میں سے جو جانا چاہے، رات کی تاریکی میں نکل جائے، میں کسی پر بار نہیں رکھتا۔”

مگر وہ اصحاب صرف محبتِ حسینؑ سے جیتے تھے۔ حبیب بن مظاہر، زہیر بن قین، مسلم بن عوسجہ نے یک زبان ہو کر کہا:
"مولا! اگر ہمیں سو بار قتل کیا جائے، پھر زندہ کیا جائے، اور پھر قتل کیا جائے، تب بھی ہم آپ کو تنہا نہ چھوڑیں گے۔”

خیموں میں بی بی زینبؑ کی آنکھوں میں وہ بے قراری تھی جو آندھی سے پہلے درختوں پر چھا جاتی ہے۔ حضرت علی اصغرؑ کی سانسیں ڈول رہی تھیں، ہونٹوں پر خشکی جم چکی تھی، اور بی بی سکینہؑ کی نیند پیاس سے روٹھ چکی تھی۔ ماں کی گود میں بچہ بے سدھ پڑا تھا، مگر زبان پر فریاد نہ تھی، کیونکہ یہ خیمے اب سجدہ گاہ بن چکے تھے۔ ان کی خاموشی فریاد سے بڑھ کر تھی۔

یزیدی فوج بڑھتی جا رہی تھی، کمک ہر سمت سے آ رہی تھی، اور خیموں کا محاصرہ لمحہ بہ لمحہ سخت ہوتا جا رہا تھا۔ مگر امام حسینؑ کے چہرے پر نہ مایوسی تھی، نہ خوف۔ ان کی آنکھوں میں وہ روشنی تھی جو وقت کے اندھیروں کو چیر رہی تھی۔ ان کا عزم تاریخ کے ہر ظالم پر حجت بن چکا تھا۔ ان کے سکوت میں بھی ایک للکار تھی:
"ہم جھکنے نہیں آئے، ہم سر کٹانے آئے ہیں… مگر باطل کے در پر نہیں، حق کے علم کو بلند رکھنے کے لیے!”

چھ محرم وہ دن تھا جب فرات بند ہوا، مگر حسینؑ کا دریا جاری ہو گیا۔ جب سکینہؑ کی پیاس نے تاریخ کی پیشانی پر آنسو کا نشان چھوڑا۔ جب زینبؑ کے ضبط نے کربلا کی شام کو شکست دی۔ جب حسینؑ کا سجدہ وقت کے تختوں کو لرزانے لگا۔ جب ماں نے بیٹے کو پیاسا دیکھا، اور پھر بھی رب کا شکر ادا کیا۔
جب صبر نے موت کی آنکھوں میں آنکھیں ڈال کر کہاکہ"تو آ سکتی ہے، مگر ہمیں شکست نہیں دے سکتی!”

یہی چھ محرم ہے، جہاں ریت تپ رہی تھی مگر سجدے ٹھنڈے تھے، جہاں زخم برس رہے تھے مگر ماتھا سجدے سے نہ اٹھا، جہاں پانی چھن گیا مگر وقار باقی رہا۔ یہ دن ہر سال آتا ہے تاکہ ہم جان سکیں کہ عزت صرف تلوار سے نہیں، پیاس سے بھی بچائی جاتی ہے۔
اور سچ صرف بول کر نہیں، کٹ کر بھی لکھا جاتا ہے۔

بینظیر انکم سپورٹ پروگرام میں خواتین کی مشکلات اور تذلیل ، ایک افسوسناک منظرنامہ
تحریر: آمنہ خواجہ ملتان
بینظیر انکم سپورٹ پروگرام (BISP) حکومت پاکستان کی جانب سے کم آمدنی والے خاندانوں، خصوصاً خواتین کی مالی معاونت کے لیے ایک اہم فلاحی اقدام ہے۔ تاہم، اس عظیم مقصد کے باوجود، زمینی حقائق نہایت افسوسناک اور شرمناک ہیں۔ اوپر دی گئی تصویر میں جو منظر نظر آ رہا ہے، وہ صرف ایک تصویر نہیں بلکہ معاشرتی ناانصافی اور انتظامی ناکامی کی عکاسی ہے۔

تصویر میں درجنوں خواتین ایک مرکز کے باہر قطار میں کھڑی یا زمین پر بیٹھی نظر آتی ہیں، جن میں معمر خواتین، بیمار و کمزور خواتین اور نوجوان لڑکیاں شامل ہیں۔ ان کے چہروں پر پریشانی، تھکن اور بے بسی واضح دکھائی دے رہی ہے۔ کچھ خواتین دھوپ اور گرمی کی شدت سے نڈھال ہوکر فرش پر بیٹھ گئی ہیں، جبکہ باقی اپنی باری کے انتظار میں کھڑی ہیں۔ یہ وہ خواتین ہیں جو سرکاری امداد کی حقدار ہیں، مگر ان کے ساتھ جو سلوک کیا جا رہا ہے، وہ کسی بھی مہذب معاشرے کے لیے باعث شرم ہے۔

▪️ مشکلات کا آغاز کہاں سے ہوتا ہے؟
BISP کے تحت خواتین کو مالی امداد حاصل کرنے کے لیے اکثر گھنٹوں لمبی قطاروں میں کھڑا ہونا پڑتا ہے۔ نہ کوئی مناسب بیٹھنے کی جگہ ہے، نہ سایہ، نہ پانی کی سہولت اور نہ ہی ٹوکن یا نظام کا کوئی شفاف طریقہ۔
بعض اوقات خواتین کئی دن انتظار کے بعد بھی رقم حاصل کرنے میں ناکام رہتی ہیں، کیونکہ یا تو رقم ختم ہو چکی ہوتی ہے یا سسٹم کام نہیں کرتا۔ عملے کا رویہ بھی اکثر تحقیر آمیز ہوتا ہے، جس سے خواتین کی عزتِ نفس مجروح ہوتی ہے۔
ساتھ میں رشوت بھی کی جاتی ہے جو پیسے دے اسکے پیسے جلدی دیتے ہیں جو نا دے اسکے یا تو پیسے نہیں اے یا پھر بغیر ویرفکیشن کے بول دیتے کہ فنگر پرنٹ میچ نہیں ہوتےـ

▪️ عزت یا خیرات؟
یہ پروگرام خواتین کی مدد کے لیے بنایا گیا تھا، مگر اس امداد کی وصولی کے لیے جن ذلت آمیز مراحل سے انہیں گزرنا پڑتا ہے، وہ اُن کی عزتِ نفس پر کاری ضرب ہے۔ بزرگ خواتین جو کہ شاید چل بھی نہ سکتی ہوں، ان کے لیے اس طرز کا انتظام مزید پریشانی کا باعث بنتا ہے۔ اکثر جگہوں پر مردوں کی موجودگی میں خواتین کا گھنٹوں قطار میں لگنا اُن کے لیے ذہنی اذیت کا باعث بنتا ہے۔

▪️ حل کیا ہو؟
ضرورت اس امر کی ہے کہ حکومت اور متعلقہ ادارے اس پروگرام کے نظام کو بہتر بنائیں۔ خواتین کے لیے علیحدہ، باعزت اور آرام دہ مراکز قائم کیے جائیں۔ آن لائن یا موبائل ٹوکن سسٹم متعارف کروایا جائے تاکہ غیر ضروری ہجوم سے بچا جا سکے۔ خواتین کو قطاروں میں کھڑا ہونے کے بجائے ڈیجیٹل ادائیگیوں یا ATM کارڈز کے ذریعے رقم فراہم کی جائے۔ عملے کی تربیت کی جائے تاکہ وہ مستحق خواتین کے ساتھ عزت و احترام سے پیش آئیں۔

بینظیر انکم سپورٹ پروگرام کا اصل مقصد خواتین کو بااختیار بنانا اور غربت کے خلاف جنگ میں ان کی مدد کرنا تھا۔ لیکن اگر یہ امداد تذلیل، تھکن اور پریشانی کی قیمت پر ملے تو یہ سوال پیدا ہوتا ہے کہ کیا ہم واقعی ان خواتین کو "سپورٹ” کر رہے ہیں یا صرف اپنی ذمہ داریوں سے جان چھڑا رہے ہیں؟ یہ وقت ہے کہ ہم صرف امداد نہ دیں بلکہ ان خواتین کی عزتِ نفس کا بھی تحفظ کریں۔

سوات کا سانحہ . ایک معصوم کی خاموشی، ایک قوم کی بے حسی
عبدالرشید ترابی(جنرل سیکرٹری پاکستان مرکزی مسلم لیگ، بلتستان ڈویژن)
قدرتی آفات جب آتی ہیں تو صرف زمین، مکانات اور فصلیں نہیں بہاتیں بلکہ انسانوں کے ارمان، خواب، رشتے اور زندگیوں کو بھی اپنے ساتھ لے جاتی ہیں۔ ان آفات کا قہر جہاں قدرت کی طاقت کا مظہر ہوتا ہے، وہیں ہماری ریاستی کمزوری، ناقص منصوبہ بندی اور اجتماعی بے حسی کو بھی بے نقاب کرتا ہے۔ سوات کا حالیہ واقعہ، جس میں ایک ہی خاندان کے دو معصوم بچے دریا کی بے رحم موجوں کی نذر ہو گئے اور کل اٹھارہ افراد اپنی جان سے ہاتھ دھو بیٹھے، صرف ایک حادثہ نہیں بلکہ ایک ایسا المیہ ہے جو ہمارے قومی ضمیر پر سوالیہ نشان چھوڑ گیا ہے۔

یہ سانحہ صرف ایک خاندان کا دکھ نہیں، یہ پوری قوم کے لیے ایک آئینہ ہے جس میں ہم اپنی غفلت، لاپرواہی اور ترجیحات کا عکس دیکھ سکتے ہیں۔ یہ المیہ ہمیں یہ سوچنے پر مجبور کرتا ہے کہ ہم نے اپنی ریاستی ذمہ داریوں کو کتنا سنجیدہ لیا ہے؟ کیا ہمارے لیے انسانی جانیں واقعی اہم ہیں؟ یا ہم صرف تب جاگتے ہیں جب کسی ماں کی گود خالی ہونے کے بعد کوئی معصوم، ہمارے دلوں کو ہلا دے؟

جب تعزیت کے لیے ڈسکہ جانا ہوا، تو دل بوجھل تھا۔ الفاظ جیسے ساتھ چھوڑ چکے تھے۔ گھر میں ایک عجیب سی خاموشی طاری تھی—نہ قہقہے، نہ بچوں کی کلکاریاں، نہ روزمرہ کی چہل پہل۔ اس خاموشی میں سب سے نمایاں وہ بچہ تھا جو ایک اجنبی کی گود میں سر رکھے، موبائل پر نظریں جمائے بیٹھا تھا۔ شاید موبائل کی چمکتی اسکرین میں وہ دنیا تلاش کر رہا تھا جہاں اس کے بھائی بہن اب بھی زندہ ہوں، ہنستے کھیلتے ہوں۔

یہ وہ عمر ہے جہاں بچے کھلونوں کے لیے روتے ہیں، مگر یہ معصوم اپنے بہن بھائیوں کے لیے دل ہی دل میں رو رہا تھا۔ ہر چند لمحوں بعد وہ سر اٹھا کر ایک ہی سوال دہراتا: "بھائی کب واپس آئیں گے؟” یہ سوال صرف ایک بچے کا نہیں، یہ سوال اس قوم سے ہے جو آفات کے بعد تصویریں کھینچتی ہے، سوشل میڈیا پر کمنٹس کرتی ہے، اور پھر اگلے حادثے تک سب کچھ بھول جاتی ہے۔ وہ بچہ جو کل تک اسکول جانے کی تیاری کر رہا تھا، آج خاموش بیٹھا اپنی ننھی یادوں میں اپنے بچھڑ جانے والوں کو تلاش کر رہا ہے۔ کیا ہم واقعی ایک ایسی قوم بن چکے ہیں جس کے جذبات بھی وقتی اور مصنوعی ہو چکے ہیں؟

اصل سوال یہ نہیں کہ سیلاب کیوں آیا، بلکہ یہ ہے کہ ہمیں کب سے معلوم تھا کہ سیلاب آ سکتا ہے؟ کیا ہمارے پاس بروقت وارننگ سسٹم موجود تھا؟ کیا مقامی انتظامیہ نے خطرے کے پیشِ نظر لوگوں کو محفوظ مقامات پر منتقل کیا؟ کیا ہم نے وہ تمام اقدامات کیے جن سے ان قیمتی جانوں کو بچایا جا سکتا تھا؟ افسوس، ان سب سوالوں کا جواب "نہیں” ہے۔

سوات جیسے پہاڑی علاقوں میں بارش اور لینڈ سلائیڈنگ معمول کا حصہ ہیں۔ وہاں کے لوگ ہر سال اس خطرے کے سائے میں جیتے ہیں۔ دریا کے کنارے آبادیاں، بغیر کسی حفاظتی بند یا فلڈ پروف انفراسٹرکچر کے، ہمیشہ خطرے کی زد میں رہتی ہیں۔ حکومت نے ماضی میں بھی دعوے کیے، فنڈز منظور کیے، لیکن عملی طور پر کچھ نہیں ہوا—صرف تصاویر، بیانات اور رسمی دورے۔

بارہا یہ ثابت ہو چکا ہے کہ ہم صرف حادثات کے بعد متحرک ہوتے ہیں۔ آخر کیوں ہم ایک مؤثر نیشنل ڈیزاسٹر مینجمنٹ سسٹم قائم نہیں کر سکے؟ کیا مقامی حکومتوں کو اس سلسلے میں وسائل اور اختیارات دیے گئے؟ کیوں اسکولوں، اسپتالوں اور رہائشی علاقوں کو محفوظ مقامات پر منتقل نہیں کیا گیا؟ یہ سانحہ یاد دلاتا ہے کہ قدرت کی مہلت ہمیشہ نہیں ملتی۔ اگر ہم اب بھی نہ جاگے، تو کل کو کوئی اور بچہ یہی سوال پوچھے گا—اور شاید تب بھی ہمارے پاس کوئی جواب نہ ہو۔

ایک اور پہلو جو اس سانحے کو مزید المناک بناتا ہے، وہ ہے ریاست کی غیر موجودگی۔ جب حادثہ ہوا، تو ابتدائی گھنٹوں میں نہ کوئی ریسکیو ٹیم پہنچی، نہ کوئی حکومتی اہلکار۔ مقامی لوگوں نے اپنی مدد آپ کے تحت لاشیں نکالیں، زخمیوں کو اسپتال پہنچایا، اور بے یار و مددگار متاثرین کی دلجوئی کی۔ یہ کس کی ذمہ داری تھی؟ کیا متاثرین کو حکومت کے رحم و کرم پر چھوڑ دینا ہی ہمارا نیا قومی اصول بن چکا ہے؟

میڈیا کا کردار بھی اس حوالے سے تنقید کا مستحق ہے۔ چند گھنٹوں کی کوریج کے بعد اس خبر کو یوں نظرانداز کر دیا گیا جیسے کچھ ہوا ہی نہ ہو۔ افسوس، ریٹنگز کی دوڑ میں انسانیت کہیں پیچھے رہ گئی ہے۔ ہمارے عوام کا اجتماعی حافظہ بھی حد درجہ کمزور ہو چکا ہے۔ ہم سانحات کو صرف اس وقت یاد رکھتے ہیں جب وہ سوشل میڈیا پر ٹرینڈ بن جائیں۔ جیسے ہی کوئی نئی خبر آتی ہے، پرانی فراموش ہو جاتی ہے۔ یہی وجہ ہے کہ ہم بار بار انہی المیوں کو دہرا رہے ہیں، بغیر کسی سبق کے۔

اگر ہم واقعی ایک باشعور اور مہذب قوم بننا چاہتے ہیں تو ہمیں صرف اظہار افسوس سے آگے بڑھنا ہوگا۔ ہمیں ایک جدید، مربوط اور فعال ڈیزاسٹر مینجمنٹ سسٹم قائم کرنا ہوگا۔ ہر قدرتی آفت کی بروقت اطلاع کے لیے جدید ٹیکنالوجی پر مبنی الرٹ سسٹم ہونا چاہیے، جو مقامی آبادی کو فوری خبردار کرے۔ دریا کے کناروں پر حفاظتی بند، فلڈ چینلز اور مضبوط پل بنائے جائیں تاکہ سیلاب کے خطرات کم ہوں۔ NDMA اور PDMA کی ٹیموں کو مقامی سطح پر بااختیار اور متحرک بنایا جائے۔ ہر ضلع کی انتظامیہ کو فنڈز، ساز و سامان اور عملہ مہیا کیا جائے تاکہ وہ مقامی طور پر ان آفات سے نمٹنے کے قابل ہو۔ عوام کو قدرتی آفات سے نمٹنے کے لیے شعور دیا جائے، خاص طور پر اسکولوں اور کالجوں میں، تاکہ بچے نہ صرف خود محفوظ رہ سکیں بلکہ دوسروں کی بھی مدد کر سکیں۔

سوات کا یہ سانحہ صرف ایک خبر نہیں، ایک چیخ ہے۔ ایک دردناک یاد دہانی ہے کہ ہمیں اب جاگنا ہوگا۔ یہ وقت ہے کہ ہم انسانی زندگی کو اعداد و شمار کے بجائے حقیقی قیمت دیں۔ وہ بچہ جس نے سوال کیا: "بھائی کب واپس آئیں گے؟” اس کا جواب ہماری آئندہ نسلوں کے مستقبل سے جڑا ہے۔ اگر ہم نے اب بھی کچھ نہ کیا، تو یہ سوال ہمیشہ کے لیے ہماری اجتماعی بے حسی کا آئینہ بن کر رہ جائے گا۔