Category: بلاگ

سقوط ڈھاکہ۔۔۔۔۔۔ ایک جائزہ

سیاست کا المیہ نظام نہیں مفاد پرستی ہے ہمارے نزدیک سیاست کو مفاد پرستوں کے قبضے سے آزادی دلا کر وولینٹئرز سیاسی لیڈر شپ کے حوالے کرنے کا عمل اہم ترین مشن کا درجہ رکھتا ہے۔
ہم سمجھتے ہیں کہ نظام اچھا ہو یا برا اسے چلانا بہرحال انسانوں نے ہی ہوتا ہے سیاست اور اختیار جن ہاتھوں میں ہو ان کا کردار اچھے یا برے نتائج پیدا کرتا ہے اچھے لیڈرز برے نظام میں بھی اچھا پرفارم کر لیتے ہیں جبکہ مفاد پرست لیڈرز اچھے نظام میں بھی اپنے مفاد کو ترجیح پر رکھنے کی وجہ سے برے نتائج دیتے ہیں لہذا ملک بچانے ، اسے مستحکم رکھنے اور عوامی حقوق یقینی بنانے کے لئے ملک کا اختیار بے لوث ، مخلص اور باصلاحیت قیادت کے ہاتھوں میں منتقل کرنے کے علاوہ کوئی دوسرا حل نہیں ہے۔
بانیان پاکستان نے مسلمانوں کی آزادی عمل کے لئے الگ وطن حاصل کرنے کے مشن کے لئے اپنا مستقبل ، اپنی جائیداد ، اپنا کیریئر ، اپنی خانگی زندگی سب کچھ نثار کردیا قائد اعظم محمد علی جناح ، محترمہ فاطمہ جناح ، نواب لیاقت علی خان ، سردار عبدالرب نشتر سمیت دیگر ہیروز قربانی کی داستانیں رقم کر کے لازوال ہوگئے ہمارےان بے لوث ہیروز کے سیاسی منظر سے ہٹتے ہی مفاد پرست اقتدار پر قابض ہو گئے جنہوں نے اپنی ہوس اقتدار کی خاطر ملک کو تختہ مشق بنا ڈالا بانیان پاکستان کے برعکس سول اور فوجی بیورو کریٹس غلام محمد ، سکندر مرزا ، جنرل ایوب خان ، جنرل یحیی’ خان نے ملک کو ڈی ٹریک کیا ، اپنے اقتدار کی خاطر قومی یکجہتی کی جگہ انتشار کو پروان چڑھا کر نفرتوں کی جانب دھکیل دیا انکے خود غرض ، مفاد پرست اور اخلاقیات سے عاری طرز عمل نے ملک کے دو بازووں میں سے ایک کو کاٹ ڈالنے میں اہم کردار ادا کیا۔
16 دسمبر 1971 کے سانحے کے اصل محرک بھی دراصل یہی مفاد پرست کردار ہیں جنہوں نے مشرقی پاکستان کو بنگلہ دیش بننے کی راہ ہموار کرنے میں کوئی کسر نہیں چھوڑی لیکن اس گناہ عظیم کے باوجود وہ پوتر کے پوتر ہی ہیں۔
ہوشیار اور طاقتور سول و فوجی بیورو کریٹس نے بہت صفائی سے پاکستان توڑنے کا سارا ملبہ سول سیاسی لیڈر ذولفقار علی بھٹو جیسے چھوٹے مجرم پرڈال کر خود کو اس الزام سے بری الذمہ کر لیا۔
سوال یہ ہے کہ کیا پاکستان محض بھٹو سے منسوب ” ادھر ہم ادھر تم” کے تحقیق طلب بیان کی وجہ سے ٹوٹ گیا ؟ کیا کبھی ایسا ہوا کہ کسی شخص کے ایک بیان کی بنیاد پر اچانک ملک دولخت ہوگئے ہوں؟ تاریخ کا سبق یہ ہے کہ ملکوں کے ٹوٹنے میں سالہا سال کے منفی روئیے اور عوامل کارفرما ہوتے ہیں ایک وقت ایسا آتا ہے جب پس پردہ پنپنے والا نفرتوں کا لاوا پک کر اچانک پھٹ پڑتا ہے اور پھر ملک ٹوٹ جاتے ہیں۔
پاکستان سے بنگلہ دیش بننے کاجرم بھٹو کی گلے منڈھ دیا جائے یا انڈین مداخلت کو جواز بنا کر دل کی تسلی کا سامان کرلیا جائے کیا کبھی مشرقی پاکستان کے باسیوں کے دلوں میں پروان چڑھنے والی نفرتوں کے اندرونی اسباب کو بھی تلاش کرنے کی کوشش کی جائے گی۔
جمہوری طریقے سے قائم ہونے والے ملک سول یا فوجی ڈکٹیٹر شپ کے جبری اقتدار کی وجہ سے یکجا اور مستحکم نہیں رہ سکتے دونوں کے خمیر میں اپنے اقتدار کا مفاد رچا بسا ہوتا ہے جس سے حق داروں کے حقوق غصب ہوتے ہیں جو نفرتوں کو جنم دیتے ہیں۔
مشرقی اور مغربی پاکستان کے شہریوں کے معیار زندگی ، سیاسی ، سماجی اور معاشی حقوق میں عدم مساوات کو پاکستان ٹوٹنے کے عوامل سے کسی بھی طرح الگ نہیں کیا جا سکتا بالکل اسی طرح جیسے متحدہ ہندوستان میں مسلمانوں کے حقوق کو لاحق خطرات کو جواز بنا کر الگ وطن کی ضرورت محسوس کی گئی تھی۔
1970 کے الیکشن میں محترمہ فاطمہ جناح کی جمہوریت کی بحالی کی تحریک کے سپاہی اور مشرقی پاکستان کے عوام کی محرومیوں کی زبان بن کر ابھرنے والے شیخ مجیب کی سیاسی بالا دستی کو جنرل ایوب خان کے جانشین جنرل یحیی خان نے تسلیم نہیں کیا بلکہ الٹا قوم کی محسنہ محترمہ فاطمہ جناح کی طرح محب وطن شیخ مجیب کو بھی غدار وطن کے منصب تک پہنچانے میں کوئی کسر نہیں چھوڑی ایسا دوسری مرتبہ ہورہا تھا جب عوام کی مرضی کے خلاف اقتدار پر قابض ہونے والے محب وطن اور عوام کی رائے سے منتخب ہوکر ابھرنے والے سیاسی لیڈر غدار ٹھہرائے گئے۔
کیا ایسا ہوسکتا ہے کہ جس سرزمین پر حصول پاکستان کی تحریک کی بناء پڑی ہو اسی سرزمین کے لوگ بلاوجہ اپنے حاصل کردہ وطن کو توڑنے کے گناہ میں شریک ہو جائیں؟
ناانصافی اور محرومیاں نفرتوں کو جنم دیتی ہیں پھر ان پر آواز بلند کرنے والے مجرم ٹھہرائے جاتے ہیں کیا مشرقی پاکستان پر لشکر کشی کرنے اور انکا ساتھ دینے والے کرداروں کو ان پہلووں پر غور کرکے اپنے طرز عمل پر ندامت کا احساس ہو سکے گا؟
کیا موجودہ پاکستان سے وہ عوامل جن کی وجہ سے پہلے ملک دولخت ہوا کا تدارک ہو گیا ہے ؟ کیا مفاد پرست عناصر سے ملک محفوظ ہو گیا ہے؟ کیا ملک کے تمام علاقوں کا معیار زندگی برابر ہو گیا ہے؟ کیا ملک سے ناانصافی اور محرومیاں ختم ہو گئی ہیں؟ کیا ملک کے تمام شہریوں کو آئین کے مطابق انسانی احترام ، تعلیم ،علاج ،روزگار، تحفظ اور سیاسی مساوی حقوق حاصل ہوگئے ہیں؟
اگر ایسا نہیں ہے تو کیا ایک مرتبہ پھر نانصافیوں کے خلاف آواز بلند کرنے والوں اور آئین میں دئے گئے حقوق مانگنے والوں کو غدار ٹھرایا جائے گا اور ان پر لشکر کشی کی جائے گی؟
غور طلب پہلو یہ ہے کہ کیا صرف مشرقی پاکستان کے لوگ ہی غلط اور غدار تھے اور موجودہ پاکستان کے کرتا دھرتا درست اور محب وطن؟
سوال یہ ہے کہ کیا ہم اپنے ماضی سے کچھ سبق حاصل کر پائیں گے یا اسی ڈگر پر چلتے رہیں گے #
(خلیل احمد تھند )

موسم، جلسہ اور کورونا

موسم بھی اب تو شدید ہونے لگا ہے، جسم و روح پر ٹوٹنے والی مصیبتوں میں ایک اور افتاد کا اضافہ ہو گیا ہے۔ سردی کا موسم ہمیشہ سے ہی درویش کے جسم پر بھاری گزرتا ہے، امام الہند یعنی مولانا ابوالکلام آزاد سے شدید انسیت کے باجود بھی سرد موسم نہیں بھاتا۔ غبارِ خاطر میں مولانا لکھتے ہیں کہ صبحِ صادق کے وقت اگر آتش دان کے سامنے بیٹھ کر چائے کے جام پر جام میسر ہوں تو کون کم بخت ہو گا جو کسی اور چیز کی تمنا کرے گا، مولانا کے ہاں چائے سے مراد کچھ اور تھا۔ دودھ، پتی اور چینی کے ملاپ کو مولانا ملغوبہ کہتے تھے، فرماتے تھے کہ یہ انگریزوں کی بدعت ہے کہ انہوں نے چائے میں دودھ شامل کر دیا اور اب تو حالات اس قدر بگڑ چکے ہیں کہ دودھ میں چائے شامل کی جاتی ہے۔ عبدالرزاق ملیح آبادی راقم طراز ہیں کہ مولانا چائے خود بناتے تھے اور پینے والا عش عش کر اٹھتا تھا۔ خیر اب تو دودھ، پتی اور چینی کا ملغوبہ ہی چائے بن چکی ہے اور یہی ملغوبہ اب جسم کی فرحت کا سامان کرتا ہے، مگر کچھ امراض کا علاج بھلا دواؤں سے کہاں ہوتا ہے، ایک طرف تو اس کم بخت سردی نے بستر کے زندان میں قید کر دیا ہے تو دوسری طر لوگوں کی مستعدی میں اضافہ ہو گیا ہے۔ مجال ہے جو لوگ سردی اور کورونا کے ملاپ سے بھی خوفزدہ ہوں، عاشقوں کے محلے میں لاہور کے جلسے کی دھوم ہے، لوگ نعرہ مستانہ بلند کر رہے ہیں کہ پاکستانی سیاست کا رخ بدل جائے گا، اپنی تمام تر عقل کو بروئے کار لانے کے باوجود بھی درویش سمجھنے سے قاصر ہے کہ پاکستانی سیاست کا رخ پہلے کیا تھا اور اب کیا ہو گا، اور جو رخ بدلنے کی تگ و دو میں ہیں وہ تو خود گردشِ ایام میں الجھے ہوئے ہیں، موجِ حوادث کے تھپیڑوں نے ان کا سفینہ بہت پہلے ڈبو دیا تھا، مگر داد تو دینی پرے گی کہ سفینہ ڈوب گیا مگر وہ لوگ سفینے کے تختوں پر بیٹھ کر ٹائی ٹینیک پر سوار مخالفوں کا مقابلہ کر رہے ہیں، نا ہنجار لوگ اگر اس مقابلے کو بیوقوفی کہیں تو ان پر درویش کی طرف سے کوئی قدغن نہ ہو گی، اس مقابلے کا نجام کیا ہو گا ، پیشن گوئیاں تو کی جا سکتی ہیں مگر ختمی طور پر کچھ نہیں کہا جا سکتا۔ بازگشت لاہور کے جلسے کی ہو رہی ہے، ایک کالم نگار تو عوام کے لیے اس جلسے میں شرکت کو فرض قرار دے چکے ہیں، ان صاحب کی معصومیت کے کیا کہنے، ان کو کچھ پروا نہیں کہ کورونا پھیلے یا کم ہو، یہ بات دھیان میں رہے کہ موصوف خود بھی کورونا کا شکار ہو چکے ہیں، "ان کی آنکھوں، کانوں اور دلوں پر مہریں لگا دی جاتی ہیں”، درد مندانہ سوال ہے کہ عوام کو جلسے میں شرکت کی ترغیب دینے والے کالم نویس کیا خود اس جلسے میں شرکت کریں گے؟ پہلے سیاست دان ہم ایسے عوام کو انسان نہیں سمجھتے تھے اب تو شاید ان کالم نگاروں کے لیے بھی ہم انسان نہیں رہے۔ گزشتہ دنوں ریحان احمد یوسفی (جن کا قلمی نام ابو یحییٰ ہے) کا ناول "قسم اس وقت کی” زیرِ نظر تھا، ناوال میں لکھا ہوا پایا کہ ذہانت کی ایک حد ہوتی ہے مگر حماقت کی کوئی حد نہیں ہوتی، اب ہم باشندگانِ پاکستان بھی شاید وہی لوگ ہیں جن کی حماقت کی کوئی حد نہیں، جو باربار ایک ہی سوراخ سے ڈسے جاتے ہیں لیکن پھر بھی اس سوراخ سے پاؤں نہیں ہٹاتے، رسالتمآبﷺ نے کہا تھا کہ مومن کو ایک سوراخ سے دو بار نہیں ڈسا جا سکتا، ہمارا بحثیتِ قوم یہ حال ہے کہ
میں چوٹ بھی کھاتا جاتا ہوں اور قاتل سے بھی کہتا جاتا ہوں
توہین سے دست و بازو کی وہ وار کہ جو بھرپور نہ ہو
رؤف کلاسرا پہ خدا رحم کرے، کمال انسان ہیں، مشرف دور میں لندن میں ہونے والی ملاقاتوں کے چشم دید گواہ ہیں، اپنے کالموں میں اکثر وہ ان ملاقاتوں کی روداد بیان کرتے ہیں، روداد پڑھ کر آنکھوں میں لالی اتر آتی ہے اور سر ندامت سے جھک جاتا ہے کہ یہ ہمارے لیڈران تھے اور ان ایسوں کے بچے ہمارے رہ نما ہوں گے جنہوں نے ہماری مشکلات سے کبھی چشم ہی چار نہیں کیے، خدا بھلا کر ہم پاکستانیوں کا بھی جو غیر ضروری چیزوں کی طرف دل کھول کر متوجہ ہوتے ہیں، کل رات ایک استادِ محترم فیس بک پر شکوہ کر رہے تھے کہ جب میں آن لائن کلاس لیتا ہوں تو کلاس میں تیس طالبعلم بھی نہیں ہوتے مگر جب گل پانڑہ فیس بک پر لائیو آتی ہے تو دیکھنے والوں کی تعداد لاکھوں میں چلی جاتی ہے، پس ثابت ہوا کہ اس قوم کو تعلیم کی نہیں بلکہ گلوکاروں کی ضرورت ہے، اگر ہمارے ہاں تعلیم کا راج ہوتا تو مجال ہے کہ لوگ جلسے میں شرکت کرتے، مگر چوں کہ نیم خواندہ لوگوں کی ذہنیت ہی ایسی ہوتی ہے کہ وہ کسی بھی بات کا اثر قبول کر لیتے ہیں، اس لیے جلسے میں شرکت کرنے والوں سے بھی درویش کوئی شکوہ روا نہیں رکھے گا، ہماری طرح آپ بھی دعا کیجیئے کہ جلسے کے بعد کورونا پھیلنے کی شرح میں اضافہ نہ ہو، مگر صرف لبوں سے نکلی ہوئی دعائیں کب قبول ہوتی ہیں، اعمال کرنے پڑتے ہیں قبولیت کے لیے اعمال کرنے پڑتے ہیں۔

تھوہا محرم خان میں طالبات کا استحصال

ہر حکومت نے اپنے دور میں مفت اور معیاری تعلیم کا نعرہ لگایا ہے لیکن تعلیم محض پانچ جماعتیں پڑھنے کا نام تو نہیں (UPE)یونیورسل پرائمری ایجوکیشن کے نعرے دل کے خوش رکھنے کو غالب یہ خیال اچھا ہے کہ مصداق پر کشش تو ہیں لیکن کچھ نہ سمجھے خدا کرے کوئی۔ آج کل کے دور کا تقاضا محض پرائمری تعلیم نہیں بلکہ دور حاضر کی جدت ہم سے ہر شعبہ زندگی کی طرح تعلیم میں بھی Do Moreکا مطالبہ کرتی ہے۔مقابلے کی اس فضا میں جب ملک میں ایم اے لوگ تو کسی گنتی میں نہیں ایم فل اور پی ایچ ڈی بھی تگ و دو کا شکار ہیں کیسے اس بات کو جوا ز مہیا کیا جا سکتا ہے کہ حکومت پرائمری تک تعلیم دے کر بری الذمہ ہے؟پھر اس میں بھی ایک تلخ خقیقت یہ ہے کہ پرائمری ایجوکیشن میں تمام زور لڑکوں کے لیے ادارے بنانے میں ہے۔
تھوہا محرم خان میں بھی یہ امتیازی سلوک روا رکھا گیا ہے 30سے زائد سکولوں میں لڑکیوں کے سکول پانچ یا چھ ہوں گے۔لاوہ تحصیل کے بعد موضع تھوہا محرم خان ایشیاء کا دوسرا بڑا قصبہ ہونے کا اعزاز رکھتا ہے۔اس کا رقبہ اورآبادی دونوں غیر معمولی ہیں۔ ضلع چکوال میں یہ شائدواحد گاؤں ہے جہاں نہ صرف دو یونین کونسلز ہیں بلکہ 30سے زائد سرکاری سکول بھی کام کر رہے ہیں۔ بادی النظر میں تو ایک گاؤں میں 30سکول کافی سے زیادہ ہیں لیکن یہاں حقائق انتہائی تلخ ہیں۔مرکزی شہر تھوہا محرم خان کے ساتھ ملحق کئی ڈھوکیں ایسی ہیں جہاں نہ صرف لوگ زندگی کی بنیادی سہولیات سے محروم ہیں بلکہ ان کے لیے تعلیم خاص طور پر لڑکیوں کی تعلیم ایک سراب کی حیثیت رکھتی ہے۔ تھوہا محرم خان سے ڈھرنال کی جانب جانے والے پختہ راستہ پر دو موڑ ایسے ہیں جہاں سے راستہ آپ کو لیجاتا ہے ان آبادیوں میں جہاں بجلی کسی حد تک 2020میں مہیا کر دی گئی ہے لیکن دیگر ضروریات زندگی سے کوسوں دور،تعلیم اور صحت کی بنیادی سہولیات سے محروم کئی چھوٹی چھوٹی بستیاں کسی مسیحا کی منتظر ہیں۔ ڈھوک کنڈ میاں محمد،ڈھوک تلہ جابہ،ڈھوک دابڑ ڈھبہ یہ تین علاقے تھوہامحرم خان کی یونین کونسل 58میں شامل ہیں یہاں ہر ڈھوک پر ایک ایک بوائز پرائمری سکول موجود ہے۔ ڈھوک ڈابڑ ڈھبہ سکول میں طلباء کی تعداد 95ہے جس میں لڑکیاں 49ہیں۔ گورنمنٹ پرائمری سکول کنڈ میاں محمد میں طلباء کی تعداد 175ہے جس میں 70 سے زائد لڑکیاں زیر تعلیم ہیں۔ جبکہ گورنمنٹ پرائمری سکول تلہ جابہ میں تعدادطلباء 94ہیں ان میں لڑکیوں کی تعداد42ہے۔کل مِلا کر ان تین سکولوں میں لڑکیوں کی تعداد 161ہے۔لیکن اسی علاقے میں تین سکولوں کے UPEسروے میں یہ بات بھی سامنے آئی ہے کہ درجنوں لڑکیوں کے والدین گرلز سکول نہ ہونے کی وجہ سے بچیوں کو مدارس میں بھیج رہے ہیں یا پھر گھر بٹھا رکھا ہے۔یعنی بنیادی تعلیم تک بھی لڑکیوں کی رسائی 100فی صد نہیں ہے جبکہ حادثے سے بڑا سانحہ یہ ہواکے مصداق المیہ صرف یہ نہیں بلکہ اس سے آگے یعنی ایلمنٹری ایجوکیشن تک رسائی تمام طالبات کے لیے نہایت مشکل ہے۔ نہ تو والدین کے معاشی وسائل اتنے ہیں کہ وہ لڑکیوں کے لیے ٹرانسپورٹ کا انتظام کرسکیں اور نہ ہی علاقہ کا محل وقوع اجازت دیتا ہے کہ لڑکیاں اکیلی گھر سے دور روزانہ آئیں جائیں۔ان علاقوں میں عام طور پر پنجم جماعت کے بعد لڑکیوں کی تعلیم کا فی تصور کرتے ہوئے ان کو گھر بٹھا لیا جاتا ہے۔ علاقہ کا نزدیک ترین گرلز پرائمری سکول ڈھبہ ہرمل ہے جہاں کسی حد تک ڈھوک دابڑ ڈھبہ کی آبادی کو اس کا فائدہ ہے لیکن اس کا دائرہ کار چند نزدیکی گھروں تک محددود ہے۔تلہ جابہ سے گرلز سکول ڈھبہ ہرمل کا فاصلہ 8کلومیڑ جبکہ کنڈ میاں محمد سے یہ فاصلہ12کلومیٹر ہے۔ یہ فاصلہ ایک سکول تا دوسرے سکول ماپ کر لکھا گیا ہے۔ اصل مسائل ہر سکول سے ملحق آبادیوں کے لیے ہیں۔ جو ان سکولوں کا فیڈنگ ایریا تصور کی جاتی ہیں۔ڈھوک کنڈ میاں محمد پرائمری سکول میں بچے اور بچیاں ڈھوک سڑیا،ڈھوک گوچھڑشمالی حصہ، ڈھوک چھوئی مجید ڈھوک، گلی،ڈھوک ولاوئیں، ڈھوک کنڈ،ڈھوک ککڑ،ڈھو ک ڈ نگا گاٹا سے پڑھنے کے لیے ایک تا چار کلومیٹر جبکہ بعض دور کی ڈھوکوں سے پانچ تا چھ کلومیڑ تک پیدل چل کر آتے ہیں۔ تلہ جابہ پرائمری سکول میں بھی صورتحال یہی ہے ڈھوک گوچھڑ کاجنوبی حصہ، ڈھوک وچھوال، ڈھوک لیٹاں، ڈھوک ڈانڈا، ڈھوک پٹیاں، ڈھوک مہلی، ڈھوک کاچھل، سے بچے ایک تا چھ کلومیٹر پیدل سفر کرکے سکول پڑھنے آتے ہیں۔ان تما م علاقوں کو لڑکیوں کی پنجم سے آگے تعلیم کے لیے دو سکول میسر ہیں ایک کا ذکر پہلے کیا جاچکا ہے یعنی گرلز ایلمنٹری سکول ڈھبہ ہرمل جس کا فاصلہ ان ڈھوکوں سے 10کلومیٹر سے کم نہیں، جبکہ دوسرا سکول ان علاقوں سے پندہ کلومیٹر دور تھوہا محرم خان گرلز ہائی سکول ہے۔علاقے کی جغرافیائی ساخت سے نا واقف معزز قارئین کو ممکنہ طور پر بیان کیا گیا فاصلہ کم محسوس ہو لیکن واقفانِ حال جانتے ہیں یہ نیم پہاڑی علاقہ ہے جس کے75فیصد راستے محض ٹریکٹر یا جانوروں اور موٹر سائیکل سواروں کی گزر گاہ ہیں۔علاقے کو ایک نیم پختہ سڑک تھوہا محرم خان سے ملاتی ہے لیکن اس پر پبلک ٹرانسپورٹ بالکل نہیں چلتی علی الصبح چند گاڑیاں تلہ گنگ جاتی ہیں جو شام ڈھلے گاؤں کا رخ کرتی ہیں۔اس طرح طلبہ کو علاقائی ٹرانسپورٹ کا کوئی فائدہ نہیں ہے۔ پرائمری پاس لڑکے تو موٹر سائیکل، سپیشل گاڑیوں پر (اکثر چھتوں پر یا سائیڈ پر لٹک کر) تھوہا محرم خان بوائز ہائی سکول یا کھوڑ بوائز ایلمنٹری سکول تک رسائی حاصل کر لیتے ہیں لیکن ان کا بہت سا وقت اور توانائی آنے جانے میں صرف ہو جاتی ہے۔اس پر مرے کو ماریں شاہ مدار کے مصداق زرعی پس منظر کی وجہ سے سکول سے واپسی پر کافی وقت کھیتی باڑی اور مال مویشی سنبھالنے میں گزر جاتا ہے۔جبکہ لڑکیاں تو 5یا 10سے زیادہ پنجم سے آگے پڑھنے بھیجی ہی نہیں جاتیں۔ان 5یا10میں سے بھی کئی ایک کو 8جماعتیں پوری ہونے سے پہلے سکول سے نکلوا لیا جاتا ہے۔ضرورت اس امر کی ہے کہ کنڈ میاں محمد پرائمری سکول کو نہ صرف اپ گریڈ کر کے ایلمنٹری کیا جائے بلکہ علاقے میں لڑکیوں کا ایک ایلیمنٹری سکول بھی بنایا جائے جس کو داخلے کا رجحان اور نتائج سے مشروط کر کے ہائی کرنے کی بھی امید دلائی جائے۔اہل علاقہ پر یہ حکومت وقت،سیاسی معززین اور سرکردہ شخصیات کا ایک ایسا احسان ہو گا جس کا ثمر ان کو اللہ کے ہاں تو ملے گا ہی ان شا اللہ آنے والی نسلوں تک دنیا میں بھی اس اہم ترین کاوش کو یاد رکھا جائے گا۔ قارئین آنے والا ہر دن ہمیں اس طرف لیجا رہا ہے جب انسان وہی کامیاب اور دولت مند ہو گا جس کے پاس علم ہو گا۔عالمی اداروں میں پیشہ وارانہ مہارتوں کو جس شرح سے ترجیح دی جا رہی ہے آنے والے چند سالوں میں تعلیم سے بڑا نہ تو کوئی خزانہ ہو گا اور نہ اس کا کوئی نعم البدل ہوگا۔تھوہا محرم خان ضلع چکوال کے ان چنیدہ علاقوں سے ہے جہاں ٹیلنٹ کی بہتات ہے لیکن یہ تمام تر ہونہار،ذہین اور قابل طلبہ و طالبات مناسب مواقع نہ ملنے کی وجہ سے دن بدن ضائع ہو رہے ہیں۔یہ تحریر تھوہا محرم خان کے خواص و عوام کے منجمد احساسات و خیالات کی جھیل پر پہلا کنکر ہے۔ان شاللہ علاقہ میں بچوں کا مستقبل محفوظ بن جانے تک ہر سماجی،سیاسی اور معاشرتی دہلیز پر بذریعہ قلم دستک جاری رہے گی کیوں کہ ہم صبح پرستوں کی یہ ریت پرانی ہے ہاتھوں میں قلم رکھنا یا ہاتھ قلم رکھنا۔

(کاشف شہزاد تبسم،مبشر حسن شاہ)

قیام امن کے لئے کورٹ مارشل کا دائرہ کار وسیع کیا جائے، ازقلم غنی محمود قصوری

جب تک امن و امان قائم نا ہو قومیں ملک اور معاشرے ترقی نہیں کر سکتے

انسان خطا کا پتلا ہے اور اس سے کئی طرح کی خطائیں ہوتی رہتی ہیں جن کی اصلاح کیلئے احتسابی نظام بنایا جاتا ہے تاکہ خطاء پر سزا دے کر اصلاح کی جاسکے اور آگے سے دوبارہ خظا نا ہو

ہمارے معاشرے میں ہر فرد کے احتساب کا قانون موجود ہے جس کے تحت سزائیں و جرمانے کئے جاتے ہیں

جیسا کہ سویلین کے لئے کئی طرح کی عدالتیں قائم ہیں جن میں مقدمات چلا کر سزائیں دی جاتی ہیں تاہم سب سے مشکل اور کٹھن احتساب فوج کا ہے جسے کورٹ مارشل ( عسکری عدالت) کہتے ہیں جو کہ 1951 کو شروع کیا گیا اور آج بھی موجود ہے اور اسی کے ذریعے فوجی ججوں پر مشتمل عدالت میں مسلح فوج کے افسروں و جوانوں پر جنگی نظم و ضبط کی خلاف ورزی کی صورت میں مقدمات چلا کر سزائیں دی جاتی ہیں تاہم سویلین پر بھی کورٹ مارشل لاگو ہے کیونکہ فوج کے اندر بہت زیادہ سویلین بھی کام کرتے ہیں جیسا کہ ڈاکٹرز ،پیرا میدیکل سٹاف اور دیگر شعبوں میں سویلین تعینات ہیں اس لئے ان کا بھی کورٹ مارشل کیا جاتا ہے جیسا کہ 2018 میں آرمی ہسپتال میں تعینات سویلین ڈاکٹر وسیم اکرم کو آفیسرز سیکرٹ ایکٹ کے تحت سزائے موت کی سزا سنائی گئی اسی طرح بریگیڈیئر راجہ رضوان کو ملک دشمن ایجنسی را سے معاونت پر آفیسرز سیکرٹ ایکٹ کے تحت سزائے موت سنائی گئی

کورٹ مارشل کا ٹرائل زیادہ تر دو سے چھ دن میں کر دیا جاتا ہے اور دوران ٹرائل ملزم کو اپنے دفاع کا پورا موقع فراہم کیا جاتا ہے

عسکری عدالت سے سزا یافتہ فوجی دوبارہ ڈیوٹی نہیں کر سکتا اور اس کو مراعات بھی نہیں دی جاتیں اور کریمنل ریکارڈ بنا کر پوری زندگی کسی بھی سرکاری محکمے میں نوکری کرنے سے روک دیا جاتا ہے اور اس کی سزا کو مکمل کئے بغیر ختم نہیں کیا جاتا

سول اور عسکری احتساب میں کافی فرق ہے جیسا کہ سویلین مقدمے میں سزا پانے والے قیدی کو اپنی سزا پر التجاء کرنے کا حق ہوتا ہے جیسا کہ سزائے موت کا قیدی اپنی سزا کو عمر قید میں یا صدر پاکستان سے رحم کی اپیل کی صورت میں کم کروا سکتا ہے جبکہ عسکری عدالت سے سزا پانے والا قیدی ایسے طریقے سے مستفید نہیں ہو سکتا

سول گورنمنٹ ملازمین پر کرپشن و بدعنوانی کے مقدمات سول کورٹس و محکموں کی کمیٹیوں میں نمٹائے جاتے ہیں جن کا دائرہ کار بہت لمبا ہوتا ہے بعض دفعہ سالوں سال لگ جاتے ہیں اور جرم ثابت ہونے پر معمولی سزا دی جاتی ہے مگر جبکہ کریمنل ریکارڈ بھی نہیں بنایا جاتا زیادہ تر تو معطل ملازمین کو چند ماہ بعد ہی باعزت بری کر دیا جاتا ہے اور ساری رکی ہوئی مراعات بھی دی جاتی ہیں جس سے ان کرپٹ عناصر کو مذید شہہ ملتی ہے

اس وقت پاکستان کے محکموں میں کرپشن کی انتہا ہے خاص طور پر محکمہ پولیس میں بغیر رشوت کے کام ایک معجزہ ہی تصور کیا جاتا ہے اور سب سے زیادہ قانون شکنی بھی محکمہ پولیس میں ہوتی ہے حالانکہ آئین پاکستان 1973 کی دفعہ 8 کے تحت پولیس کا کام امن و امان کی بحالی ہے مگر پاکستان کی کل ساڑھے 4 لاکھ پولیس رشوت کا گڑھ اور لوگوں کے لئے خوف کی علامت ہے جبکہ آئے روز پولیس ملازمین کی طرف سے لوگوں سے پیسے لے کر مخالفین کا ماورائے آئین و عدالت قتل کرکے پولیس مقابلہ قرار دیا جاتا ہے

پولیس کے خلاف مقدمات سول عدالت میں چلتے ہیں کمزور عدالتی نظام اور گواہوں کو ڈرا دھمکا کر یہ صاف بچ نکلتے ہیں زیادہ تر عدالتوں سے مقدمات میں سے بچ نکلنے والے پولیس اہلکاران و افسران مذید دہشت و خوف کی علامت بن جاتے ہیں جیسا کہ سندھ پولیس کا راؤ انوار جعلی پولیس مقابلوں کے باعث خوف کی علامت بنا ہوا ہے اور اسی کمزور نظام کے باعث ہر بار صاف بچ جاتا ہے حالانکہ نقیب اللہ معسود کے قتل کے کافی شوائد بھی اسے سزا نا دلوا سکے

اس لئے وقت کا تقاضہ ہے کہ سول محکموں خاص طور پر پولیس اصلاحات کیلئے کورٹ مارشل کا دائرہ کار وسیع کرتے ہوئے آئین پاکستان 1973 کی دفعہ 8 ،(3) میں ترمیم کی جائے اور پولیس اہلکاران کا کورٹ مارشل کیا جائے تاکہ معطل ملازم دوبارہ بحال نا ہو اور دوسرے اس سے عبرت حاصل کریں

جس دن پولیس نظام ٹھیک ہو گیا اسی دن ملک پاکستان سنورنا شروع ہو جائے گا کیونکہ جب کسی کی چوری ہوتی ہے تو اسے اپنی ایف آئی آر درج کروانے کیلئے پولیس کو مذید رشوت دینی پڑتی ہے سو مجبوراً وہ بندہ رشوت دیتا ہے اس کی چوری چاہے ملے نا ملے رشوت کے بغیر کام نہیں چلتا سو وہ بندہ اپنی چوری و رشوت کی کمی پوری کرنے کیلئے کسی دوسرے کو مالی نقصان پہنچاتا ہے اگر وہ تاجر ہے تو اپنے دام تیز کر دے گا اگر وہ ملازمت پیشہ ہے تو لوگوں سے جائز کام کے عیوض رشوت لے گا اور اسی طرح آگے سارا نظام خراب ہوتا جائے گا

موجود حالات کا تقاضہ ہے کہ سی سی پی او لاہور عمر شیخ کی پیش کردہ سمری کے مطابق قیام امن کے لیے کورٹ مارشل کا دائرہ کار وسیع کیا جائے