Category: بلاگ

کم سن بچوں سے زیادتی کرنے والا مجرم اور سزا
تحریر :سفیر اقبال

نہایت افسوس کی بات ہے کہ عرصہ ہائے دراز سے سب کے سامنے تسلسل کے ساتھ جرم ہو رہا ہے لیکن ریاست مدینہ کے دعویدار نہ تو اس کی روک تھام کے لئے کوئی ایکشن لے رہے ہیں اور نہ ہی جرم کرنے والوں کو سزائیں مل رہی ہیں. ہر گزرتے دن کے ساتھ جرم میں کمی کی بجائے اضافہ ہو رہا ہے لیکن "زمین جنبد نہ جنبد گل محمد” والی صورتحال بن چکی ہے.

ریاست اس قدر سنگین جرم پر کوئی قانون کیوں نہیں بنا رہی میرے خیال میں اس کی دو بڑی اہم وجوہات ہیں جو میں قارئین کے سامنے رکھنے کی کوشش کرتا ہوں.

پہلے یہ سمجھ لیں کہ پاکستان ایک اسلامی ریاست ضرور ہے لیکن فی الحال یہ خلافت نہیں. اس وجہ سے یہاں چوری کرنے والے کا ہاتھ نہیں کاٹا جاتا…. شادی شدہ زانی کو سنگسار نہیں کیا جاتا. اور نماز نہ پڑھنے والے کو مسلمانوں کے قبرستان سے دور دفن نہیں کیا جاتا. جب خلافت ہو گی تو ان شا اللہ یہ سارے کام کیے جائیں گے. لیکن فی الحال چونکہ ریاست عالمی دباؤ کے زیر اثر ہوتی ہے اس لیے حدود والی سزا میں کمی کر کے تعزیر جاری کر سکتی ہے تا کہ عالمی دباؤ اور اسلام کے خلاف پروپیگنڈہ دونوں سے بچا جا سکے.

یہ بالکل ایسے ہی ہے جیسے ایک کلاس میں استاد کسی بچے کو اس کی کسی اخلاقی غلطی یا ذہنی سستی کی بنیاد پر ہلکی پھلکی سزا خود تجویز کرتا ہے یہ بات سامنے رکھتے ہوئے کہ بچے کے والدین کو بھی اس سزا پر اعتراض نہ ہو اور سکول کے پرنسپل کو بھی.

اب آتے ہیں ان دو وجوہات کی طرف جن کی وجہ سے ریاست ابھی تک اس سنگین جرم کے خلاف سزا کے لیے مجرم کو چند دن سلاخوں کے پیچھے کھڑا کر کے اس کی تصاویر سوشل میڈیا پر وائرل کرنے کے علاوہ کوئی قانون نہیں بنا سکی.

پہلی وجہ یہ ہے کہ ہماری عوام میں مشترکہ طور پر اسلام کی قائم کردہ سزاؤں یا تعزیرات کے متعلق مکمل آگہی نہیں. ریاستی قوانین اور شرعی قوانین کے درمیان فرق نہیں معلوم اور ستم بالائے ستم ہمارے وزرا جن کو کام کچھ اور دیا جاتا ہے لیکن وہ اپنی انگلیاں کہیں اور پھنسانے کا شوق رکھتے ہیں اس موضوع پر جدت، روشن خیالی کے نام پر گمراہ کن فلسفے جھاڑتے رہتے ہیں اور عوام میں بے یقینی والی کیفیت پیدا کر دیتے ہیں.

سب سے پہلے ایسے” روشن خیال ” لوگوں کی طرف سے سزا کو وحشیانہ فعل قرار دیا جاتا ہے اور اس کے بعد یہ فرمایا جاتا ہے کہ مہذب قومیں ایسا ماحول قائم کرتی ہیں کہ جرم کیا ہی نہ جا سکے. (بات بہت خوبصورت ہے لیکن زمینی حقائق یہی بتاتے ہیں کہ دو سال ہونے والے ہیں اور ابھی تک ایسا ماحول نہیں بن سکا کہ جس میں رہتے ہوئے جرم کرنے کا موقع نہ ملے ). جہاں تک تعلق ہے سزا کے وحشیانہ فعل ہونے کا تو مسلمان ہونے کے ناطے یہ ایمان ہونا چاہیے کہ سزا مقرر کرنے والے اللہ کے نبی اور صحابہ کرام وحشی نہیں تھے اور انہوں نے جرم سے پاک معاشرے والا ماحول اسی وقت دیا جب وہ عوام الناس کے سامنے چند مجرموں کو ان کے جرم کی سزا دے چکے.

بہرحال انسان ہونے کے ناطے سے بھی دیکھیں تو یہی سمجھ آتی ہے کہ کسی کو نصیحت کرنے کا فائدہ اپنی جگہ پر ہے لیکن جرائم روکنے کے لیے نصیحت کی بجائے سزا کا خوف زیادہ موثر ہے اور اگر ایک جرم کے بدلے میں سب کے سامنے مجرم کو سزا مل جائے تو کافی لوگ اس جرم سے توبہ کر لیتے ہیں اور مجرم بھی گناہوں سے پاک ہو جاتا ہے. اس وال پر ان شا اللہ سلسلہ وار ساری اسلامی سزاؤں کی انسانی قوانین کی روشنی میں افادیت پر موقف پیش کروں گا لیکن فی الحال موجودہ ٹاپک کے لحاظ سے دیکھتے ہیں کہ کسی معصوم بچے کے ساتھ بدفعلی کر کے اسے قتل کر دینے کے جرم کی سزا دینا کسی بھی عالمی قانون یا عالمی مذہب کی روشنی میں مناسب عمل ہے کہ وحشیانہ فعل ہے….!

زنا یا لواطت خود ایک بہت بڑا جرم ہے اور کسی بھی معاشرے میں پسندیدہ نہیں لیکن زنا بالجبر جسے عالمی ڈکشنری میں ریپ کہا جاتا ہے انتہائی گھناؤنا جرم ہے اور ریپ کے بعد قتل اس سے بھی زیادہ سنگین. مقتول بچے کے والدین چاہے مسلم ہوں یا غیر مسلم اس قاتل کے لیے دل میں جذبہ انتقام پالتے ہیں اور یہ انتقام اسے قتل کرنے یا اس قاتل کے بچوں کے ساتھ بدفعلی کرنے کی صورت میں مکمل ہوتا ہے.

تو کیا ہی اچھا ہو کہ ریاست خود ہی اس قاتل کو اپنے انجام تک پہنچا دے یا کم از کم اس کے بچے پیدا کرنے کی صلاحیت ختم کر دے تا کہ اس کے جرم کی سزا اس کے بچوں کو نہ ملے. (کچھ دن قبل ایک خبر سنی تھی کہ ایسے مجرم کو سزا کے طور پر اس کی جنسی صلاحیت کو ختم کرنے کی تجویز زیر غور ہے لیکن ابھی تک کسی مجرم کو یہ سزا ہوئی ہے…. سننے میں نہیں آیا ). مان لیا کہ موجودہ صورتحال میں میرا جسم میری مرضی والوں کا ریاست پر بہت دباؤ ہو گا… اسی طرح باقی این جی اوز اور امریکی حکومت کا بھی دباؤ موجود ہو گا کسی حد تک…. لیکن کم از کم اس جرم پر نہیں کیوں کہ یہ جرم ہر مذہب اور ہر عالمی قانون کی نظر میں جرم ہی ہے.

عین ممکن ہے کہ ایک سزا کے بعد عالمی پریشر میں اضافہ ہو جائے اور اس "قدامت پسندی اور وحشیانہ فعل” پر عالمی سطح پر مذمت کی جائے لیکن حالات و واقعات کی سنگینی کی احساس دلا کر یہ دباؤ کم کیا جا سکتا ہے. پچھلے چند سالوں میں موجودہ حکومت کے پاس مقتول بچوں کی لاشوں کی اتنی تصاویر تو جمع ہو ہی چکی ہیں جنہیں دکھا کر روشن خیال اور جدت پسند نام نہاد آقاؤں کا منہ بند کروایا جا سکے .

اب دوسری وجہ ڈسکس کرتے ہیں اور یہ وجہ پہلی سے زیادہ بھیانک اور زیادہ مشکل بیان ہے. بس اتنا سمجھ لیجیے کہ جس ملک میں پارلیمنٹ سے بازارِ حسن تک جیسی کتابیں سرعام چھپتی اور بکتی ہوں…. جہاں ہیلی کاپٹر کے ذریعے سیاستدان عورتوں کی ننگی تصاویر پاکستان کے گلی کوچوں میں پھینکی جاتی ہوں…. جہاں ٹک ٹاک فاحشہ وزیراعظم کی کرسی پر بیٹھ کر سلیفیاں بنواتی ہو اور اس سنگین کیس کو بغیر کسی اعلان کے ہلکی سی ڈانٹ ڈپٹ کے بعد کلوذ کر دیا جاتا ہو اور جہاں کے پارلیمنٹ ارکان پانچ چھ وزارتیں کرنے کے بعد بھی کنوارے رہنا پسند کرتے ہوں ان سے بھلا ایسے قوانین یا تعزیرات کی امید رکھنا کہاں کی عقل مندی ہے…. ؟

اس تحریر کو بیشک اپنے نام سے یا بغیر نام سے کاپی پیسٹ اور شئیر کریں. یا اپنے الفاط اور اپنے انداز میں سوشل میڈیا پر اپنا احتجاج ریکارڈ کروائیں لیکن گزارش ہے کہ کچھ نہ کچھ ضرور کریں. اور اس وقت تک آواز اٹھاتے رہیں جب تک کوئی موثر قانون قومی اسمبلی سے پاس ہو کر نہیں آ جاتا اور ان سنگین جرائم میں ملوث افراد کو سزا نہیں مل جاتی.

ورنہ یقین کریں اگر سزا دینا جرم کو روکتا ہے تو سزا نہ دینا نہ صرف مجرم کے حوصلوں میں اضافہ کرتا ہے بلکہ عام انسان کو بھی جرم کرنے کی ترغیب دیتا ہے. جرائم کی جو آگ آپ کے شہر اور آپ کے گلی محلے میں لگ چکی ہے اگر اس پر سزا کا پانی ڈال کر ٹھنڈا نہ کیا گیا تو وہ دن دور نہیں جب اللہ نہ کرے آپ کا گھر اور آپ کے بچے بھی اس آگ سے محفوظ نہیں ہوں گے.
#رنگِ_سفیر

بجھی عشق کی آگ اندھیر ہے…!!!
[جویریہ بتول]۔
یہ بات تاریخ کے اوراق میں محفوظ ہو چکی ہے کہ مسلمان ایک مہذب،فیاضی،اور خدا ترسی و دردِ انسانیت سے مالا مال امت ہیں…
ان کی تعلیمات اس قدر ارفع ہیں کہ باقی اقوام بھی قوانین اور ضابطے یہاں سے مستعار لیتی رہی ہیں…
جب جب بھی مسلمانوں نے غلبہ حاصل کیا تب تب مفتوحہ علاقوں کے مکینوں کے ساتھ مسلمان لیڈرز کا حسنِ سلوک،رواداری اور فیاضی تاریخ کی روشن اور تابندہ مثالیں بنتا چلا گیا…!!!
لیکن ملتِ اسلامیہ پر ظلم و ستم کی خونچکاں داستاں اور خونِ مسلم کے ارزاں ہونے کی ایک الگ ہی کہانی ہے۔
اپنے تئیں مہذب کہلانے والی اقوام نے جب بھی غلبہ پایا تو اخلاقی گراوٹ اور ذہنی پستی اور درندگی کی انمٹ تاریخ رقم کر دی…!!!
ساٹھ کی دہائی میں عربوں کے سینے میں خنجر پیوست کرتے ہوئے اسرائیل اور یہودی آباد کاری کی بنیاد رکھی گئی اور فلسطین کے نہتے مظلوم مسلمانوں کی سر زمیں پر ناجائز قبضہ،مکانات کی مسماری،فصلوں کی تباہی اور بے در و گھر کر دینا اب ایک معمول کی بات بن چکی ہے…
مسئلہ کا دو ریاستی حل ایک خواب بنتا جا رہا ہے اور اسرائیلی ستم ظریفی بڑھتی ہی چلی جا رہی ہے…
گزشتہ روز گوگل اور ایپل ایپلیکیشن میپ سے فلسطین کا نام حذف کرنا کوئی معمولی بات نہیں ہے بلکہ یہ بہت پہلے کے آغاز کا ایک تسلسل ہے…
وہ قبلہ اوّل جو غیر مسلموں کے ہاتھوں تاریخ میں بار بار تاخت وتاراج ہوا،
پون صدی سے ایک بار پھر کسی عمررضی اللّٰہ یعنی اور صلاح الدین ایوبی رحمہ اللہ کی راہ تک رہا ہے…
کہ جب عمر اپنے غلام کو سواری پر بٹھائے اپنی چلنے کی باری پر سواری کی لگام تھامے پیوند زدہ لباس کے ساتھ بیت المقدس میں داخل ہوئے تو عیسائی سربراہان ششدر رہ گئے تھے کہ یہ ہے مسلمانوں کا خلیفہ؟
اور بیت المقدس کی چابیاں عمر کے حوالے کر دی گئیں۔
اے تاریخ کےورقِ روشن…
ہمیں تُجھ پر ناز ہے…!!!
تاریخ نے ٹھہر کر وہ داستان بھی اپنے سینے میں محفوظ کر لی تھی جب 1176ء میں ایک صلیبی سردار کی حرکات جو یروشلم کے عیسائی بادشاہ اور سلطان صلاح الدین ایوبی کے درمیان معاہدوں کی کھلی خلاف ورزی تھی تو سلطان حرکت میں آیا…
جو اس کی اخلاقی،سیاسی،ملی اور مذہبی نقطۂ نظر سے بہترین حکمتِ عملی تھی۔
اور اس نے یروشلم کو عہد شکن قوم کے شکنجے سے آزاد کروا لیا تھا۔
مگر فاتح بن کر ظلم و ستم اور انسانی حقوق کی پامالی کی داستانیں رقم نہیں کی گئی تھیں،بلکہ محکوم عیسائیوں کے ساتھ سلطان کا حسنِ سلوک تاریخ کا جھومر بن گیا اور عیسائی مؤرخین اس بات کا اعتراف کیئے بغیر نہیں رہ سکے کہ:
Even the Christian Europe,Saladin was justly celebrated and admired for his generous treatment of his defeated enemies…
(Bernard Lewis).
لیکن آج امت قحط الرجال کے دور سے گزر رہی ہے…
کڑا اور عجب وقت درپیش ہے،بحرانوں کا تسلسل ہے…اتحاد و اتفاق کا فقدان ہے اور زخم ہیں کہ بڑھے جا رہے ہیں…
حالیہ سالوں میں لاکھوں بے گناہ مسلمان موت کے گھاٹ اتر گئے،
اتنے بڑے انسانی المیے پر انسانی حقوق کے داعی بھی مہر بہ لب رہے…
ہاں یقینًا کہ ان کا کام صرف مشاہدہ ہے،دخل اندازی نہیں…!!!
کیا صرف مشاہدے کیئے جاتے رہیں گے اور مسلمان ممالک ایک ایک کر کے ظلم و تباہی کی نت نئی رنگینیوں میں رنگے جاتے رہیں گے…؟؟؟
دنیا کے نقشہ پر موجود حل طلب دیرینہ مسائل کو حل کرنے کی بجائے کیا نقشے سے ہی حذف کر دیا جائے گا…؟
ہمیں سمجھنا پڑے گا کہ اپنے مسائل کا حل ہمیں خود تلاشنا ہو گا…
انسانیت کے حقوق کا عَلم ہم نے خود تھامنا ہو گا…
تاریخ کی نظر کسی عمر و ایوبی کے حقوقِ انسانی اور حسن و فیاضی سے لبالب بھرے کردار کو تلاش رہی ہے…!!!
ہمیں آوازِ ضمیر کو شدت سے دبا دینے کی بجائے اسے دنیا میں بلند کرنا ہو گا تبھی ہم اپنا معیار،مقام اور وقار بچا اور بحال رکھ پائیں گے ورنہ سازشوں کا دیو ہیکل اژدھا آگے ہی آگے بڑھتا چلا جائے گا…!!!
حکیم الامت نے اس درد کو کیا خوب بیان کیا تھا:
بجھی عشق کی آگ اندھیر ہے،
یہ مسلمان نہیں راکھ کا ڈھیر ہے۔
اے لا الہ الا اللّٰہ کے وارث،باقی نہیں ہے تجھ میں…
گفتارِ دلبرانہ…کردارِ قاہرانہ…!!!
===============================

(Islamic concept of democracy)
"اسلام کا تصور جمہوریت”

نادیہ بٹ

اسلام ایک عالمگیر دین ہے جس کی منفرد اور جامع اقدار ہیں۔یہ دین کسی ایک فرد قبیلے گاؤں شہر یا ریاست کے لئے نہیں ہے بلکہ تمام کائنات کے لئے ذریعہ نجات و رہنمائی ہے ۔

اکثر مصنفین اسلامی سیاسی نظام کا مغربی تصور جمہوریت کے ساتھ موازنہ کرتے ہیں یا پھر اسلامی طرز حکومت کا اصل جمہوری طرز حکومت کو قرار دیتے ہیں۔
اسلام ایک مکمل ضابطہ حیات ہے اسلامی نظام کے تمام تر اصول و ضوابط قرآن میں تحریری شکل میں ملتے ہیں جبکہ ان اصول و ضوابط کی عملی شکل حضور *ﷺ* کی حیات طیبہ ہے اس لئے اسلام نے جو طرز معاشرت متعارف کروایا ہے وہ دنیا کے تمام نظاموں سے منفرد مرد اور اپنی مثال آپ ہے اس لئے اسلامی طرز حکومت کا مغربی تصور جمہوریت سے تقابل کرنا یا اسلامی نظام حکومت کو جمہوری قرار دینا اتنا صحیح معلوم نہیں ہوتا، کیوں کہ نہ تو قرآن میں اسلامی طرز حکومت یا سیاسی نظام کو جمہوریت کا نام دیا گیا ہے نہ بادشاہت کا بلکہ صرف اور صرف اسلامی نظام حکومت یا اسلامی طرز معاشرت یا اسلامی تہذیب و تمدن کے نام ہی تاریخی طور پر سامنے آئے ہیں ویسے بھی اگر بغور دیکھا جائے تو اسلامی نظام حکومت کو اصلی جمہوریت کہنا زیادتی ہوگی۔۔۔۔۔۔
کیونکہ اسلام نے خلیفہ یا امام کے چناؤ کے لیے نہ صرف امام کی خصوصیات بتائی ہیں بلکہ ووٹر یا سربراہ مملکت کا انتخاب کرنے والوں کی بھی خصوصیات بتائی ہیں۔۔۔۔۔

اسی طرح جمہوریت اکثریت کی حکومت ہے جبکہ اسلام میں اکثریت کی حکومت کا کوئی تصور نہیں ملتا
بلکہ صرف اللہ تعالی جو کہ واحد شریک ہے کے اقتدارِ اعلٰی کا تصور ملتا ہے اس لحاظ سے مغربی یا جدید جمہوریت میں عوام (نعوذباللہ) اللہ تعالیٰ کے ساتھ شریک ٹھہرتے ہیں۔
اسلامی نظامِ حکومت میں اللّٰہ تعالٰی کے احکامات کے نفاذ کے لیئے سربراہان اپنی خصوصیات اور کردار کی بنیاد پر چنا جاتا ہے…
اسی لئے اسلامی نظام حیات ایک منفرد نظام ہیں اس کو جمہوری نظام کہنا بالکل ٹھیک معلوم نہیں ہے

*دوسری دلیل……!*
جمہوریت میں پارلیمنٹ میں حزب اقتدار اور حزب اختلاف کا ہونا ضروری ہوتا ہے حزب اقتدار کا کام قوانین بنانا بھی اور انہیں نافذ کرنا ہے۔
جبکہ حزب اختلاف کا کام حزب اقتدار پر ہر حال میں تنقید جبکہ اسلامی نظام میں نہ تو کوئی حزب اقتدار ہے نہ ہی حزب اختلاف
بلکہ مجلس شوریٰ کا ہر رکن حزب اقتدار اور حزب اختلاف ہے۔

اسلامی طرز حکومت میں سربراہ مملکت کو براہ راست پرکھنا ہر فرد کا فرض ہے اور اگر وہ راہ راست پر ہے تو اس کی اطاعت بھی ہر فرد پر فرض ہے۔اختلاف کا جواز ہی پیدا نہیں ہوتا۔

اس سے ثابت ہوتا ہے کہ جمہوریت نام کی چیز اسلامی طرز حکومت میں موجود نہیں بلکہ اسلامی طرز حکومت جمہوریت سے بھی بہتر اور اعلی نظام حکومت ہے

*تیسری بڑی دلیل…!*
جمہوریت میں عالم اور ان پڑھ کا ووٹ ایک ہی وزن کا حامل ہے جو کہ فطرت کے خلاف بات ہے۔ جبکہ صدر یا وزیراعظم امور سلطنت کے سلسلے میں چپڑاسی یا کلرک سے مشورہ نہیں لیتا بلکہ متعلقہ ماہرین سے ہی مشورہ لیتا ہے
ظاہر ہے کہ ایک چپڑاسی قانون پر لیکچر نہیں سکتا ۔ مختصر یہ کہ اسلامی نظام میں سربراہِ مملکت کو منتخب کرتے وقت ہمیشہ دیانتدار، ایماندار
اور دانشمند لوگ آپس میں مشورہ کرتے ہیں ہیں کیونکہ قرآن میں ارشاد ہے۔
*”علم والے اور جاھل برابر نہیں ہیں”*
جبکہ جدید جمہوریت میں معاشرتی تفاوت کے باوجود عالم اور جاہل کا ووٹ ایک ہی حیثیت کا حامل ہے..!

*اسی پر اقبال رحمتہ اللہ نے کہا تھا*
*”جمہوریت اک طرز حکومت ہے کہ جس میں*
*بندوں کو گنا کرتے ہیں تولا نہیں کرتے”*

اگر اسلامی نظام کو جمہوریت قرار دیا جا سکتا ہے تو پھر اسلامی نظام کو اسلامی سوشلزم یا اسلام میں کمیونزم بھی کہہ دینا چاہیئے ۔
کیوں کہ سوشلزم میں بھی بہت سی اقدار اسلامی اقدار سے ملتی جلتی ہیں اسی طرح کمیونزم کی بہت سی اقدار بھی اسلامی نظام سے ملتی ہیں یہاں صرف یہ واضح کرنا ہے کہ دراصل اسلامی نظام جمہوری نہیں ہے
یہ صرف ایک اسلامی نظام ہے جس کی اپنی منفرد اقدار ہیں ۔
مساوات، رواداری اور قانون کی حاکمیت اپنی اصل حالت میں صرف اور صرف اسلامی نظام میں ہی دیکھی جاسکتی ہے

جو لوگ یہ کہتے ہیں کہ اقدار ایک جمہوری نظام کی خصوصیات ہیں تو وہ احمقوں کی جنت میں رہتے ہیں
کیونکہ یہ سب کہنے کی باتیں ہیں عملی طور پر ریاست میں نام نہاد کامیاب ترین جمہوریت برطانیہ میں دیکھی جا سکتی ہے ۔کیا وہاں پر ان کی اقدار یا قانون کی حاکمیت اصلی حالت میں موجود نہیں ہے؟؟
کیا وہاں پر کئی سالوں پر محیط گورے اور کالے کا فرق نہیں پایا جاتا ؟؟
مساوات کے اصولوں کی دھجیاں سب سے زیادہ برطانیہ میں ہی اڑائی جاتی ہیں۔قصہ مختصر یہ ہے کہ اسلامی نظام اپنے اندر ایک جامعیت رکھتا ہے جس کا اپنا ایک علیحدہ اور منفرد مقام ہے اور اسے دوسرے نظاموں کی مشابہت ثابت کرنا بالکل بیکار ہے۔

*اب کچھ مغربی مفکرین کی آراء پر بھی نظر ڈال لی جائے…….*

ماہر سیاسیات Burkeکا کہنا ہے:

*”اکثریت کے فیصلے کو تسلیم کرنا کوئی فطرت یا قانون نہیں ہے کم تعداد بعض اوقات سے زیادہ مضبوط طاقت بھی ہو سکتی ہے اور اکثریت کی حرص کے مقابلے میں اس کے اندر زیادہ مقبولیت بھی ہو سکتی ہے۔”*
جمہوریت کی شرائط اور خوبیوں پر بحث کرتے ہوئے ماہرین کہتے ہیں:

*”جمہوریتوں کی تاریخ بتاتی ہے کہ یہ شرائط شاذ و نادر ہی پوری ہوتی ہیں’عملی اعتبار سے جمہوریت دراصل جہالت کی حکمرانی کا نام ہے۔اس کی ساری توجہ تعداد پر رہتی ہے ‘کیفیت پر نہیں.اس میں ووٹ گنے جاتے ہیں ‘انہیں تولا نہیں جاتا۔”*

آخری بات:

مذکورہ دلائل سے یہ بات سامنے آتی ہے کہ اسلام کا طرز حکومت نہ تو جمہوری ہے اور نہ ہی شخصی ‘وہ اپنی مثال آپ ہے اور لازوال ہے۔جدید نظام اس کا مقابلہ کرنے کی اہلیت نہیں رکھتے بلکہ ان میں موجود چند ایک خوبیاں بھی اسی نظام سے مستعارلی گئی ہیں ۔جدید نظاموں سے قطع نظر اسلامی طرز حکومت ہر سقم اور کمزوری سے یکسر پاک قابل عمل نظام ہے۔۔۔!!!