بجٹ منظوری کے بعد
تحریر: عدنان عادل

نئے مالی سال کے بجٹ کی منظوری سے پہلے میڈیا میں ایک سنسی خیزی کا ماحول تھا۔ قیاس آرائیاں زوروں پر تھیں کہ حکومت کو قومی اسمبلی میں بجٹ پاس کرانے کے لیے مطلوبہ ووٹ ملنا مشکل ہونگے۔ نتیجہ یہ ہوگا کہ عمران خان بطور وزیراعظم اپنے عہدہ پر قائم نہیں رہ سکیں گے کیونکہ بجٹ مسترد ہونے کو پارلیمانی طرز حکومت میں وزیر اعظم پر عدم اعتماد تصور کیا جاتا ہے۔ اپوزیشن اور حکومتی اتحادیوں دونوں نے حکومت کے خلاف ماحول بنانے میں اپنا اپنا کردار ادا کیا گو بجٹ منظور ہونے کے بعد پتہ چل گیا کہ شور شرابا زیادہ تھا‘حقیقت میںمعاملہ کچھ خاص نہ تھا۔ یہ بات صحیح ہے کہ اپوزیشن نے بجٹ کے موقع کو اپنے حق میں بہت مہارت سے استعمال کیا۔ ایک تو حزب اختلاف کی تمام جماعتیں ایک دوسرے کے قریب آگئیں۔ سب نے مل کربجٹ کے خلاف ایک اعلامیہ جاری کردیا۔ یوں اپوزیشن جو گزشتہ بیس ماہ سے اکٹھی نہیں ہورہی تھی پہلی بار متحد ہوکر کھیلی۔ حکومت کو اسکا دباؤ محسوس ہوا۔ پیپلز پارٹی کے سربراہ بلاول زرداری نے اس صورتحال کا سب سے زیادہ فائدہ اٹھایا۔ انہوں نے اپوزیشن رہنماؤں کو ٹیلی فون کرکے اور بعد میں انکا مشترکہ اجلاس بُلاکر خود کو سب سے اہم اپوزیشن لیڈر کے طور پرپیش کیا‘ پارلیمان میں حکومت اور وزیراعظم کے خلاف دھواں دھار تقریریں کیں۔چونکہ موجودہ دورِ حکومت میں پارلیمان کی کارروائی پارلیمنٹ کے لیے مختص سرکاری ٹی وی پر براہ راست نشر ہوتی ہے اس لیے دونوں طرف کے ارکانِ اسمبلی خوب تیاری کرکے آتے ہیں‘ایک دوسرے پر گرجتے برستے ہیں تاکہ عوام میں انکا اِمیج بنے‘ انکی واہ واہ ہو۔ پرائیویٹ ٹیلی ویژن چینل بھی اپوزیشن اور حکومت کے اہم رہنماوں کی تقریریں براہِ راست نشر کرتے ہیں۔ یہ پاکستان میں جمہوری کلچر کی پختگی کی علامت ہے۔ مسلم لیگ (ن) کے دور میں حال یہ تھا کہ اپوزیشن رہنما خورشید شاہ کی تقریر بھی کسی ٹیلی ویژن چینل پر براہِ راست نہیںدکھائی جاتی تھی۔ اگراپوزیشن کو ٹیلی ویژن پر کوریج دینے کی روایت جڑ پکڑ جائے تو ملک میں ایک دوسرے کے مخالف نقطہ نظر کو سمجھنے اور برداشت کرنے کا ماحول بننے لگے گا۔ اچھا ہے کہ اپوزیشن اپنی بھڑاس پارلیمان میںنکالے نہ کہ سڑکوں پرفساد پھیلائے۔ پارلیمانی جمہوریت میں اپوزیشن کا یہی کام ہوتا ہے کہ وہ عوام تک اپنا نقطہ نگاہ موثر طریقے سے پہنچائے ‘ اپنے موقف کے لیے نئے الیکشن تک رائے عامہ ہموار کرتی رہے۔ اپوزیشن کی سخت تنقید کا ہرگز یہ مطلب نہیں کہ حکومت کی چھٹی ہونے والی ہے۔ البتہ ہمارے میڈیا کو ایک چسکا پڑا ہُوا ہے کہ پیشین گوئیاں کرتا رہے کہ حکومت اب گئی یا تب گئی۔ اپوزیشن کی موجودہ تیز رفتاریوں کے پیچھے بیرونی عوامل کا بھی عمل دخل ہے۔پاکستان کے اندرونی معاملات میں امریکہ بھی دخیل رہتا ہے۔ امریکی لابی ہمارے ملک میں خاصی مضبوط ہے۔ ان دنوں امریکہ افغانستان سے اپنی فوجیں نکالنے میں مصروف ہے۔ پاکستانی ریاست امریکی انخلا میں اسکی مدد کررہی ہے۔ امریکہ پاکستان کی حکومت کو دباؤ میں رکھنا چاہتا ہے تاکہ وہ افغانستان میں امریکہ کی شرائط پر اسکی مدد کرتی رہے۔ امریکہ کو پاکستان اور چین کے تزویراتی (اسٹریٹجک) اتحاد پر بھی شدید اعتراض ہے۔ امریکہ چاہتا ہے کہ پاکستان سی پیک کو ختم کرے اور امریکہ کے انڈو پیسیفک اتحاد میں شریک ہوجس میں جنوبی ایشیا میںبھارت کا قائدانہ کردار ہوگا۔امریکہ اپنے ایجنڈے کو آگے بڑھانے کے لیے پاکستان کی سیاسی جماعتوں میں اپنی لابی کو استعمال کررہا ہے۔ ہماری سیاسی پارٹیوں میں ایسے عناصر موجودہیں جن کے امریکی اداروں سے گہرے روابط ہیں۔ کچھ اپوزیشن لیڈرزامریکہ کے ساتھ تعاون کررہے ہیں تاکہ پاکستانی ریاست کو بلیک میل کیا جاسکے ۔ چھپا ہوا پیغام یہ ہے کہ انکی پارٹی کے لیڈروں کے خلاف کرپشن کے مقدمات ختم کیے جائیں یا کم سے کم انہیں کولڈ اسٹوریج میں ڈال دیا جائے ورنہ وہ ریاست کے لیے مسائل پیدا کریں گے۔ اپنی ناجائز دولت کو بچانے اور اقتدار کی ہوس میں ہمارے بعض سیاستدان کسی حد تک بھی جاسکتے ہیں۔ ان کا نہ کوئی نظریہ ہے نہ اُصول۔ اسکا اندازہ تو اس بات سے بھی لگایا جاسکتا ہے کہ ماضی میں ایک دوسرے پر سنگین الزامات لگانے والی مسلم لیگ (ن) اور پیپلزپارٹی آج ایک دوسرے کی حلیف بن چکی ہیں۔ حکومت کے خلاف ماحول بنانے میں اپوزیشن پارٹیوں کے ساتھ ساتھ حکومت کے کچھ ناراض اتحادیوں کا بھی ہاتھ تھا۔ بجٹ پیش ہونے کے موقع پراختر مینگل کی بلوچستان نیشنل پارٹی حکومتی اتحاد سے الگ ہوگئی جو تحریک انصاف کی مخلوط حکومت کے لیے ایک دھچکا تھا۔ رہی سہی کسرمسلم لیگ(ق) نے پوری کردی جس نے وزیر اعظم کی دعوت میں شرکت سے صاف انکار کردیا۔ حکومت کی بچت یہ ہوئی کہ ق لیگ نے اعلان کیا کہ وہ بجٹ میں حکومت کے حق میں ووٹ دے گی۔سرکاری ارکانِ اسمبلی کا کہنا ہے کہ ق لیگ کے چار ارکان قومی اسمبلی کے لیے نئے مالی سال میں سترہ ارب روپے کے ترقیاتی منصوبے رکھے گئے ہیں لیکن وہ پھر بھی خوش نہیں۔ دراصل جب بھی مخلوط حکومت بنتی ہے چھوٹی جماعتیںوزیراعظم کو دباؤمیں رکھتی ہیں۔ وہ اپنے زیادہ سے زیادہ مطالبے منوانا چاہتی ہیں کیونکہ انہیں علم ہوتا ہے کہ اگر وہ حمایت سے ہاتھ کھینچیں گے تو حکومت گِرجائے گی۔ مونس الہی چودھری برادران کے سیاسی جانشین ہیں ۔ چودھری شجاعت حسین اور چودھری پرویز الہٰی اپنے سیاسی وارث کو قومی سطح پراہم کردار ادا کرتے ہوئے دیکھنا چاہتے ہیں۔ بجٹ پاس ہونے سے حکومت کے خلاف مہم کمزور تو پڑ گئی ہے لیکن کرپشن مقدمات سے تنگ اپوزیشن آنے والے دنوں میں اپنا دباؤ پھر بڑھائے گی۔ بلاول زرداری جلد ہی اپوزیشن کی کل جماعتی کانفرنس بلانے کا اعلان کرچکے ہیں۔ جب تک عمران خان احتساب کے معاملہ پر حزب اختلاف کا موقف تسلیم نہیں کرتے اُنکے مخالفین انہیں سکون کا سانس نہیں لینے دیں گے۔ عمران خان کی مشکل یہ ہے کہ وہ کرپشن کے خلاف اتنا سخت بیانیہ اختیار کرچکے ہیں کہ اگر وہ اس سے پیچھے ہٹیں گے‘ کوئی سمجھوتہ کریں گے تو انکی ساکھ اور سیاست کو بہت نقصان ہوگا۔ ان حالات میںقومی سیاست ہچکولے کھاتی رہے گی۔جب تک وزیر اعظم عمران خان کوچھوٹی اتحادی جماعتوں خصوصاً ایم کیو ایم (پاکستان) اور ق لیگ کا تعاون حاصل ہے انکی حکومت چلتی رہے گی ۔

سٹاک ایکسچینج مارکیٹ، دہشت گردی کے خلاف جنگ اور پاکستان کی فتح
صدائے اسد
اسد عباس خان

جب گیدڑ کی موت آتی ہے تو وہ شہر کا رخ کرتا ہے آج اس ضرب المثل کو سمجھنے میں اس وقت آسانی ہوئی جب کراچی اسٹاک ایکسچینج پر چار دہشتگردوں نے حملہ کیا اور آناً فاناً مارے گئے۔ اس واردات کی ذمہ داری ایک کالعدم دہشتگرد تنظیم نے قبول کی جس کی ڈوریں ہمارے مشرقی ہمسائے کے ہاتھوں میں اور تربیتی مراکز مغربی ہمسایہ ممالک میں ہیں۔ آئیے اس حملہ کے محرکات کو سمجھنے کی کوشش کرتے ہیں۔ ہندوستان کی مودی سرکار روز اول سے ہی یک نکاتی ایجنڈا پاکستان دشمنی پر قائم ہے۔ الیکشن جیتنے کے بعد پوری دنیا میں پاکستان مخالف جھوٹا پروپیگنڈہ کرنے کے لیے ایڑی چوٹی کا زور لگایا۔ اقوام عالم میں اپنے سفارتی مشن، ملکی اور بین الاقوامی میڈیا، سوشل نیٹ ورکنگ، غرض ہر پلیٹ فارم کو خوب استعمال کیا۔ مودی نے بذات خود بیرونی ممالک کے پے در پے دورے کیے اور ہر ملک میں جا کر دہشتگردی اور اس سے پاکستان کو نتھی کر کے ایک ہی رونا روتا رہا۔ مغربی ممالک کے علاوہ پاکستان کے دوست خاص طور پر عرب ریاستوں کو چنا گیا۔ ایک سو بیس کروڑ افراد کی بڑی عالمی منڈی اور تجارت کا لولی پاپ کسی حد تک کارگر بھی ثابت ہوا۔ کمزور پاکستانی معیشت اور عالمی ادارے ایف اے ٹی ایف کی یک طرفہ غنڈہ گردی کے ذریعے وہ محب وطن جماعتیں جو کشمیر پر آواز بلند کرتی تھیں ان پر پابندیاں لگوائیں اور بزرگ رہنما پابند سلاسل ہونے لگے۔ ادھر پاکستان کو جنگ کی کھلی دھمکیوں کے ساتھ سرحدوں پر روزانہ کی چھیڑ چھاڑ، کشمیر میں جاری مظالم میں شدت اور پھر دلی سے یکطرفہ قانون سازی کے ذریعے کشمیر ہڑپ کرنے کے اقدامات اٹھائے گئے۔ پہلے سرجیکل سٹرائیک کے جھوٹے دعوے اور پھر بالا کوٹ اسٹرائیک کی ڈرامہ بازی رچائی گئی۔ حالانکہ واقعہ بالا کوٹ کے دوسرے روز دن کی روشنی میں نہ صرف دو جہاز تباہ کروا لیے بلکہ اپنے ہی ایک ہیلی کاپٹر کو خود ہی اڑا کر جگ ہنسائی مول لی۔ ابھینندن کا Fantastic tea والا جملہ تاریخ کا حصہ بن کر ہندوستان کے لیے تا قیامت ذلت و رسوائی کی مثال بن چکا ہے۔ ایشیاء کی تمام چھوٹی ریاستوں کو رعب و دبدبے اور غنڈہ گردی سے اپنے زیر اثر رکھنے والے ہندوستان کی دھوتی چائنہ نے لداخ میں سرعام کھول دی۔گھس کر مارنے والے فلمی ڈائیلاگ بولنے والوں کی سرزمین پر چین گھس آیا اور مودی برگیڈ کو اپنے ہی ملک میں کہیں گھس کر چھپنے کی جگہ بھی نہیں مل رہی
پیپلز لبریشن آرمی نے بغیر گولی چلاۓ ڈنڈوں، گھونسوں اور مکوں سے بہار رجمنٹ کو اڑا کر رکھ دیا۔ ہندوستانی کرنل سمیت 20 فوجی جوان بشمول دیگر افسران مارے گئے اور 80 سے زیادہ شدید زخمی اور ایک لیفٹیننٹ دو میجرز سمیت باقی ماندہ گرفتار کر لیا گیا جن کی رہائی ابھینندن کی طرح بعد میں عمل میں آئی۔ شاید بی جے پی سرکار اور دن رات مودی کی مدح خوانی میں مصروف ہندوستانی میڈیا کے وہم و گمان میں بھی چین کی طرف سے اس شدید رد عمل کی توقع نہ تھی۔ بات بات پر پاکستان کا راگ الاپنے والے مودی کے ہونٹ سِل گئے۔ ریاست نے چپ کا روزہ رکھ لیا اور پاکستان پاکستان بول کر ہلکان ہونے والا میڈیا اُف تک بولنے کی جرات نہ کر سکا۔ مردہ کانگریس پارٹی میں یکخت جان پڑ گئی راہول گاندھی اور سونیا گاندھی نے مودی کو آڑے ہاتھوں لیا خودساختہ طاقت و غرور کا گھمنڈ ٹوٹا اور "56 کا سینہ "5,6 کا نکلا۔ ملکی داخلی سیاست میں "مودی ہے تو ممکن ہے” نامی غبارے سے ہوا نکل گئی۔ خالصتان تحریک مضبوط سے مضبوط تر ہو کر ریفرنڈم کی جانب گامزن ہے۔ بین الاقوامی سطح پر معاملہ سبکی سے بھی زیادہ خراب صورتحال تک پہنچ گیا۔ عرب ممالک کی عوام مودی کی مسلم کش پالیسیوں کے خلاف اٹھ کھڑی ہوئی۔ نیپال کے ساتھ سرحدی حدود کا معاملہ گرم ہوا۔ اور آنے والے امریکی انتخابات کی ریلیوں میں بھی کشمیر کا ذکر سنائی دینے لگا۔ پاکستان دو دہائیوں سے دہشتگردوں کے خلاف جاری جنگ میں کامیاب و کامران ہو کر معاشی معاملات کو بہتر بنانے کی تگ ودو میں لگ چکا تھا کہ کروناء نے پوری دنیا سمیت پاکستان کی معیشت کو بھی متاثر کیا۔ ایسے وقت کراچی اسٹاک ایکسچینج پر حملہ سے دشمن نے جہاں ایک طرف اپنی داخلی ناکامیوں سے توجہ موڑنے کے لیے زبردست چال چلی اور اس واقعہ کے ذریعے مودی بھگت میڈیا کا رخ پاکستان کی طرف موڑ دیا۔ وہیں پاکستان کے معاشی حب کراچی اور تمام تر کاروباری سرگرمیوں کے مرکز پاکستان اسٹاک ایکسچینج کو نشانہ بنا کر ملکی اور غیر ملکی سرمایہ کاروں کو ڈرانے اور خوف و ہراس سے معیشت کا پہیہ روکنے کی کوشش کی۔ الطاف حسین، منظور پشتین، ٹی ٹی پی، جسقم، اور بی ایل اے جیسے دہشتگرد جو آپریشن ضرب عضب اور آپریشن رد الفساد سے مکمل تباہی کا شکار ہو چکے ہیں ان سب کو ایک پلیٹ فارم پر اکٹھا کر کے دوبارہ روح پھونکے کی کوشش بھی کی گئی۔ حملہ آوروں سے ملنے والا جدید اسلحہ اور وافر مقدار میں گولہ بارود و کھانے کا سامان یہ ظاہر کرتا ہے کہ ممبئی حملوں کی طرز پر حملے کا منصوبہ بنایا گیا تھا۔ لیکن سالہا سال کی محنت اور منصوبہ بندی فقط آٹھ منٹ میں ڈھیر ہو گئی۔ سندھ پولیس کے شیر دل جوانوں نے پرفیکٹ ہیڈ شارٹ لے کر دشمن کو پیغام دیا کہ سندھ دھرتی کے بیٹے اپنے ملک کا دفاع کرنا بہت اچھے طریقے سے جانتے ہیں۔ سندھ رینجرز اور باقی سیکورٹی فورسز کے اداروں نے بھی اتنی برق رفتاری سے آپریشن کو مکمل کیا کہ ٹریڈنگ فلور پر کسی قسم کا اثر تک نہ ہوا۔ نہ تو کاروباری سرگرمیوں میں خلل پڑا اور نہ ہی اسٹاک مارکیٹ کریش ہوئی بلکہ اس کے بازار حصص میں اضافہ ہوا۔ دشمن کے منصوبے خاک میں مل گئے اور وہ ہر میدان میں پٹ چکا تھا۔ کراچی اسٹاک ایکسچینج کے باہر زمین پر پھیلی دہشت گردوں کی بدبودار لاشیں ہندوستان کو پیغام دے رہی تھیں کہ پاکستان ⁦دہشتگردی کے خلاف جنگ جیت چکا ہے۔ الحمد للہ

عالمی مافیا کااالائینس اور تقسیم در تقسیم عوام

اس وقت ملکی اور عالمی سیاست کی صورتحال یہ ھے کہ ایک طرف رائیٹ ونگ ھے جو جناعت در جماعت تقسیم ھو کر اپنے سبز جھنڈے تلے طرح طرح کی آوازیں اور نعرے بلند کر رھا ھے اور دوسری طرف لیفٹ ونگ کے لوگ ھیں وہ بھی جماعت در جماعت تقسیم ھیں اور ھر گروہ سرخ سلام پیش کر رھا ھے اور دونوں کا یہ دعوی ھے کہ ھم ایک عظیم انقلابی جدوجہد کر رھے ھیں اور ان کا مقابلہ کن قوتوں کیساتھ ھے تھوڑا سا اسکا بھی تجزیہ کر لیتے ھیں ۔

آپ نے ملکی سیاست میں ” ملا ملٹری الائنس ” کا نام تو یقینا سنا ھوگا اور جہاد افغانستان کا ایک کردار جنرل اختر عبدالرحمن بھی آپکو یقینا یاد ھوگا جس پر "خاموش مجاھد” نامی کتاب بھی لکھی گئی آج اس خاموش مجاھد کا بیٹا ھمایوں اختر پاکستان میں ایک ملٹی نیشنل پروڈکٹ ” پیپسی کولا ” کی فرنچائس چلا رھا ھے اور دوسری طرف ھمارے ملک کا مفتی اعظم تقی عثمانی عالمی سودی نظام کا محافظ بنکر بینکنگ کے عالمی سودی نظام پر ” مہر شریعیت ” ثبت کر رھا ھے یہ ملا ملٹری الائنس سے بھی بہت بڑا ملٹی نیشنل الائنس ھے دنیا کے بڑے بڑے مالیاتی ادارے ، دنیا کی بڑی بڑی ملٹی نیشنل کمپنیاں اور انٹر نیشنل میڈیا سب ان کے کنٹرول میں ھے یہ بے پناہ طاقت ور ھیں اور ان چند ھزار خاندانوں نے اسوقت دنیا کی تقریبا %75 دولت پر قبضہ جما رکھا ھے اور بقیا %25 دولت پر زندہ رھنے کیلیئے،6 ارب انسان ایک دوسرے کو نوچ رھے ھیں-

ملک میں حالیہ پیٹرول بحران کے دوران آپ نے دیکھا کہ پاکستان کی آئل کمپنی PSO تو لوگوں کو پیٹرول دے رھی تھی لیکن غیر ملکی کمپنیوں نے آئل دینے سے انکار کر دیا اور پھر اپنے مطلوبہ ریٹ یعنی 100 روپئے سے زائد کرنے کے بعد ھی پیٹرول مہیا کیا ھم نے واضع طور پر اپنی حکومت کو بھی ان مافیا کے سامنے بے بس پایا بعض لوگ حسب عادت اسکا الزام اپنی فوج کے سر تھوپنے کی کوشش کرینگے حالانکہ فوج تو عوام کیساتھ چلتی ھے –

جب فوج نے افغان جہاد میں حصہ لیا تو یہ پوری قوم خود طالبان کیساتھ تھی یقینا فوج کے مٹھی بھر لوگوں اور مولویوں نے مال بھی بنایا لیکن فوج کے اکثر لوگوں نے جانوں کا نذرانہ پیش کیا اور عوام نے بھی جانیں دیں لیکن آج عوام کا شعور اجاگر ھو چکا ھے اور وھی اسامہ بن لادن جسے پوری پاکستانی قوم ھیرو کہتی تھی آج اگر وزیر اعظم اسے شہید بھی کہتا ھے تو اس پر اعتراض ھوتا ھے آج اگر یہ قوم مذید شعور اور سمجھداری کا مظاھرہ کرے اوراپنی گروہ در گروہ تقسیم سے بالاتر ھوکر ملک کو غربت اور قرضوں کے چنگل سے نکالنے کیلیئے کوئی مشترکہ لائحہ عمل مرتب کرے تو یقینا فوج بھی انکا ساتھ دے گی ورنہ اگر ھمیں ملکی مفاد سے زیادہ اپنا جماعتی اور گروھی مفاد عزیز ھے تو پھر جعلی لیڈر جعلی نعرے لگاتے رھینگے کوئی تبدیلی نہیں آئے گی اور یہی سب کچھ ھوتا رھے گا –
اجمل ملک ایڈیٹر نوشتئہ دیوار