Category: بلاگ

میں پاکستان ہوں…!!!
[تحریر:مریم وفا]۔
14 اگست کی روشن صبح اور ایک گہری یاد…
قربانیوں کی طویل داستاں اور آزادی کی فریاد…
وطن عزیز پاکستان کے قیام
کے پیچھے قربانیوں کی ایک انمٹ داستان پوشیدہ ہے….جوانوں نے اپنی جوانیاں لٹائیں،ماوں نے اپنے جگر گوشے قربان کئے….معصوم پھول انیوں میں پروئے گئے….عفت مآب آبگینے کرچی کرچی ہوئے….گھر بار قربان ہوئے….مال ودولت سے ہاتھ دھونے پڑے….ہجرت کی صعوبتیں سہنا پڑیں….غرضیکہ ہر دکھ درد کے راستے سے گزر کر یہ ملک خداداد پاکستان ہمارا مقدر بنا…
وطن عزیز کے قیام کے پیچھے ایک لمحے، دن، ہفتوں یا پھرمہینوں کی جدوجہد پوشیدہ نہیں بلکہ عشروں کی جہدمسلسل کے بعد یہ آذاد وطن معرض وجود میں آیا….لیکن دو قومی نظریے کی بنیاد پر حاصل کی گئی یہ ارض وطن اپنے قیام سے لےکر آج تک ایک ایسے المیے سے دوچار رہی کہ جس کے رد کے لیے ہمارے آباواجداد نے قربانیاں دیں….اور آج بھی اسی غلط سوچ کی تشہیر بڑے شدومد سے کی جاتی ہےاور یہ بات ازبر کروانے کی ایک سعی لاحاصل کی جاتی ہے کہ الگ قیام کے بغیر بھی پڑوسی ملک کے ساتھ رہا جا سکتا تھااور وہی غیر اسلامی وغیراخلاقی رسومات بڑےپیمانےپر پروان چڑھانے کی کوشش کی جاتی ہے جن سے نجات کے لئے خون کی ندیاں عبور کی گئیں….دشمنان وطن،وطن عزیز کی بنیادوں کو کھوکھلا کرنے کے لیےقیام پاکستان سے لےکر آج تک ہر میدان میں سرگرداں ہیں کہ کسی نہ کسی طرح اس اسلامی قلعے کی بنیادوں کو کھوکھلا کر کے اپنے عزائم کی تکمیل کی جائے….اب یہ اہلیان وطن کی ذمہ داری ہے کہ وہ دشمن کے ہر وار کاشدومد سے ہی مقابلہ کریں وہ وار چاہے اسلامی اقدار پر ہو،رنگ ونسل کی بنیاد پر کیا جائے یاصوبائیت کی آگ بھڑکا کر کیا جائے،ہمیں ہر حال میں اس دھرتی کی حفاظت کا عزم لے کر آگے بڑھنا ہے کہ یہ پاک وطن ہے تو سب کچھ ہے ورنہ ہماری سب پہچان نا مکمل ہے…..یہ وطن قربانیوں کی بدولت ملا اب اسے سنبھالنے کے لیے بھی قربانیاں ہی درکار ہیں….یہ قربانیاں چاہے اغیار کی رسومات کے بائیکاٹ کی صورت دینا پڑیں….چاہے یہ مالی ہوں یا جانی….ہمیں ہر صورت اپنی ملی ومذہبی اقدار کوسینے سے لگا کر آگے بڑھنا ہے چہ جائیکہ اپنے اور اسلام کے دشمنوں کی اندھی تقلید میں اندھے ہو کر اپنی پیاری روایات کو پس پشت ڈالا جائے…. وطن عزیز کی یہی صدا ہے…!!!
میں پاکستان ہوں!
اپنوں کا مان ہوں
غیروں کی آنکھ میں
کٹکھتا تھان ہوں
میں بنا شہیدوں کے خوں سے
میں بڑھا شہیدوں کے خوں پہ
میں قربانیوں کی اک
عظیم داستان ہوں
میں پاکستان ہوں
میں پاکستان ہوں
میرے محسن مجھ پہ واری ہیں
میرے دشمن مجھ سے عاری ہیں
میں اپنوں کی چاہت کی اک
روشن پہچان ہوں
میں پاکستان ہوں
میں پاکستان ہوں!!!
====_====_====__====

تنقید ہو یا تعریف ملے، فیض کا سلسلہ منقطع نہ ہو

تحریر :عمر یوسف

گھنی چھاوں والے درخت کا کام مسلسل آکسیجن اور چھاوں فراہم کرنا ہے ۔۔
اب یہ لوگوں کی مرضی ہے کہ وہ چھاوں سے فائدہ حاصل کریں یا نہ کریں۔۔۔
اور یہ لوگوں کا ظرف ہے کہ وہ اس چھاوں کی تعریف کریں یا نہ کریں ۔۔

بہتے ہوئے سمندر دریا نہروں کا کام تو بہتے ہی جانا ہے اب یہ لوگوں کی مرضی ہے کہ وہ بہتے پانی کو قابل استعمال بنائیں یا نہ بنائیں اور پانی جو عظیم نعمت ہے اس پر مشکور ہوں یا نہ ہوں ۔۔۔

مضبوط پہاڑوں نے زمین کو ہلنے سے روکنا ہے اور زمین پر توازن و بیلنس قائم کرنا ہی ہے لوگ اس کو برا کہیں یا بھلا کہیں ۔۔

سورج کی تمازت نے سردیوں میں لوگوں کو گرمائش فراہم کرنی ہی ہے اور گرمیوں میں لوگوں کی فصلوں پکانا ہی ہے چاہے لوگ تعریف کریں یا نہ کریں ۔۔۔

چلتی ہواوں نے انسانیت کو آکسیجن فراہم کرنی ہی ہے وہ ہوائیں لوگوں کو اچھی لگیں یا نہ لگیں ۔۔۔

یہ سب مخلوقات اللہ کی فوجیں ہیں جو صرف انسانیت کو فائدہ پہنچانے میں محو ہیں ۔۔۔
انہیں تعریف وتنقید سے کوئی سروکار نہیں ۔۔۔

تم بھی اگر کوئی اچھا کام کررہے ہو تو نیت کو خالص کرو اخلاص پیدا کرکے لوگوں کو فائدہ پہنچاتے رہو اور خدائی فوجوں میں شامل ہوجاو ۔۔۔

تنقید تمہارے حوصلے پست نہ کرے ۔۔
تعریف تمہارے اندر گھمنڈ پیدا نہ کرے ۔۔۔
حوصلہ افزائی کا نہ ملنا تمہیں بددل نہ کرے ۔۔

لوگ برا کہہ رہے ہیں یا لوگ تعریف نہیں کررہے ہیں ۔۔۔
یہ سب سوچیں آپ کو اچھے کام سے روکتی ہیں ۔۔

خدا کی نشانیوں کو دیکھتے ہوئے یہ عزم مسلسل کر لو کہ جیسے یہ چیزیں انسانیت کو فائدہ پہنچاتی ہیں تمہارے فیض کا سلسلہ بھی منقطع نہ ہو

غلط راستوں پر بھٹکتے مسافر

عمر یوسف

انسان عزت چاہتا ہے اس لیے تکبر کو اپناتا ہے تاکہ لوگ میری عزت کریں
حالانکہ عزت غرور میں ہے ہی نہیں بلکہ عزت تو عجز و انکساری اور تواضع میں ہے ۔۔۔۔۔۔

انسان چاہتا ہے کہ میرا مال محفوظ و سلامت رہے اور بڑھتا ہی جائے اس لیے وہ پیسہ سنبھال سنبھال کر رکھتا ہے اور خرچ نہیں کرتا مال کا حق ادا نہیں کرتا ۔
حالانکہ مال کا محفوظ ہونا اور اس کے بڑھنا کا راز صدقہ کرنے میں ہے ۔۔۔۔۔۔

انسان چاہتا ہے کہ میرے سارے کام حل ہوجائیں میرے پاس فراغت ہو اور ایک وقت میں زیادہ کام نمٹا لوں اس لیے وہ اپنے رب کی یاد اور عبادت سے غفلت و سستی برتتا ہے۔۔
حالانکہ کاموں کا احسن طریقے سے انجام پانا اور فراغت ملنا یہ اللہ کی عبادت میں ہے اللہ وعدہ کرتے ہیں کہ۔جو بندہ کام چھوڑ کر عبادت کی طرف مشغول ہو اس کے سارے کام حل کردیے جاتے ہیں اور اسے کے دل کو غنی اور بے پرواہ کردیا جاتا ہے ۔۔۔۔۔۔

انسان چاہتا ہے کہ روحانی سکون حاصل ہو دماغ پرسکون رہے اس لیے وہ موسیقی سنتا ہے۔۔۔۔

حالانکہ روح کو سکون پہنچانے کا حقیقی راز تو ذکر خدا اور تلاوت قرآن میں ہے موسیقی تو ایسے ہی ہے جیسے شراب ہے وقتی نشہ دیتی ہے لیکن بعد میں شراب جگر کو کسی قابل نہیں چھوڑتی اسی طرح موسیقی بھی دل پر ایسی مہریں لگاتی ہے کہ بعد میں انسان غور و فکر اور تدبر سے محروم کردیا جاتا ہے ۔۔۔۔

بدقسمتی سے میرے معاشرے میں ان جائز چیزوں کے حصول کا غلط راستہ اپنایا جاتا ہے منزل تو ملتی نہیں الٹا انسان ذہنی و روحانی بیماریوں کا شکار ہوجاتا ہے

آئیے!دلوں کو زندہ کریں…!!!
(بقلم : مریم وفا)
دل،انسانی جسم کا بادشاہ…یہ شاداں و فرحاں ہو تو پورا جسم خوش باش،اور اگر یہ ملول وغمزدہ تو سارا جسم پریشاں حال…!!!
لیکن آج ہم میں سے اکثر کا یہی شکوہ ناں کہ کیا کریں کہ اللہ کا دیا بہت کچھ لیکن نہ جانے کیوں دل بہت پریشان،
کسی چیزکی کمی نہیں لیکن دل کو قرار نہیں ،اور یہی حقیقت بھی ہے کہ آج ہمارےگھروں میں کسی چیز کی کمی نہیں…مال ودولت کی فراوانی،آرائش و زیبائش کی کثرت،الیکٹرانک و پرنٹ میڈیا کی بھرمار،سوشل میڈیاکا چسکا اور نہ جانے کیا کچھ کہ سب نعمتیں اور لذتیں بیان سے باہر…لیکن ذہنی سکون اور دلی قرار سے ہم پھر بھی تہی دست…مگر کیا ہم نے کبھی سوچا کہ یہ سب کچھ کیوں ہے کہ اتنا کچھ ملنے کے باوجود بھی ہم بے قرار…؟؟؟
ذہنی آسودگی ہم سے دور بھاگتی ہے…دل کی آلائشیں برھتی ہی جارہیں…لیکن ہم پھر بھی دنیاوی لذات میں سکون ڈھونڈنے کے متلاشی…
حقیقت سے پھر بھی منہ موڑے ہوئے ہیں کہ قلب کی آسودگی اور ذہنی اطمینان کا علاج آخر کوئی تو ہو گا…نعمتوں کی بارش کرنے والا رب ہمیں یہ بھی تو یاد کروا رہا ہے ناں کہ نعمتوں کی کثرت کے باوجود بھی دل کی زمین پر بہار لانے کے لئےایک نسخہ لاجواب ہے،کہ میری یاد سے ہی تمہارے خزاں رسیدہ دلوں پر بہار آئے گی…تمہاری زندگیوں میں سکون در آئے گا…میری نعمتیں تمہارے لیے باعث صد سکون ثابت ہوں گی…بس میری یاد کی شمع اپنی زندگی میں روشن کرو, تمہاری زندگی کی اندھیر نگری چمک اٹھے گی…خزاں زدہ دلوں پر بہاریں لوٹ آئیں گی…کہ یہی توایک نسخہ!شافی ہے,بے سکون زندگیوں میں سکون و قرار کی روح پھونکنے کا…کرب واضطراب سے مضمحل دلوں میں راحت ونشاط کے گل کھلانے کا…!!!
یہ مال و دولت کے انبار،یہ سونے چاندی کے ڈھیر مانا کہ دنیاوی نعمتوں میں عظیم سہی لیکن قلبی سکون و اطمینان کے لیے ہمیں نعمتوں کے عطاکرنے والے رب کی یاد سے دلوں کو بسانا ہے کہ یہی ایک صورت ہے ہماری زندگیوں میں سکون و اطمینان لانے کی،ورنہ دنیاوی لذات کی کثرت ہمارے لئے کبھی بھی قلبی سکون کا موجب نہیں بن سکتی جب تک کہ ہم اپنے دلوں کو اپنے رب کی یاد سے نہ بسالیں….!!!

خلیل اللّٰہ کی یاد…!!!
[تحریر:جویریہ بتول]۔
ذو الحجہ کا چاند طلوع ہونے والا ہے اور یہ وہ حرمت والا مہینہ ہے کہ جس کی عظمت فضیلت اور اس میں بجا لائے گئے اعمال کی اہمیت بہت ارفع ہے…
استغفار و انابت…
تسبیح و تہلیل اور تحمید…
مالی قربانی…
اللّٰہ کی رضا کے لیئے سب کچھ قربان کرنے کے عہد…
حج بیت اللّٰہ…
اور یومِ عرفہ کا روزہ…
جس کے بارے میں رسول اللہ صلی اللّٰہ علیہ وسلم نے فرمایا:
یکفر السنۃ الماضیۃ والباقیۃ…(صحیح مسلم)۔
یعنی” گزشتہ اور آئندہ سال کے گناہوں کا کفارہ ہے…!!!”
لیکن یہ مہینہ اور اس کےان دس ایام میں بجا لائی جانے والی عبادات اللّٰہ تعالٰی کے نزدیک کسی بھی دن میں کیئے گئے عمل سے اس قدر محبوب اور افضل ہیں کہ اللّٰہ کی راہ میں لڑنے والا بھی اس فضیلت کو نہیں پا سکتا،لیکن رسول اللہ صلی اللّٰہ علیہ وسلم نے فرمایا:
جو اپنے مال و جان کے ساتھ نکلا اور لوٹ کر نہ آیا تو وہ لاریب بہت فضیلتوں کا مستحق ہے۔
کیونکہ یہ وہ فضیلت بھرے ایام ہیں جن میں تمام عبادات نماز،روزہ،حج،مالی قربانی،تسبیحات و تکبیرات جمع ہو جاتی ہیں…!!!!
یہ مہینہ ہمیں خواہشاتِ نفس کی قربانی،اللّٰہ کی رضا کی خاطر سب کچھ قربان کر دینے کا عہد کرنے والے ابراہیم علیہ السلام کی یاد بھی دلاتا ہے…
وہ ابراہیم علیہ السلام جن کے بارے میں اللّٰہ تعالٰی نے فرمایا:
ولقد اتینا ابراھیم رشدہ من قبل…
[الانبیآء]۔
"اور یقینًا ہم نے ابراہیم علیہ السلام کو اس سے پہلے ہی سوجھ بوجھ عطا کی تھی…”
وہ لڑکپن میں ہی غور و فکر کے عادی…
رب کی وحدانیت کا پرچار کرنے والے…
جو اپنے باپ اور قوم سے سوال کرتے کہ یہ مورتیاں جنہیں تم پوجتے ہو…تمہارے نفع و نقصان کی مالک ہیں؟
وہ جواب دیتے کہ ہم نے اپنے آباؤ اجداد کو اسی طریقہ پر پایا ہے،
تب ابراھیم علیہ السلام پکار اٹھتے کہ تم اور تمہارے آباء سبھی گمراہ ہو…!!!
اللّٰہ تعالٰی کو اپنے ابراھیم کی یہ ادائیں اس قدر پسند آئیں کہ ابراہیم علیہ السلام کو آزماتا چلا گیا…
اور رب کا موحد بندہ اور پیغمبر ان تمام آزمائشوں پر پورا اترتا چلا جاتا ہے تاوقتیکہ امام الناس اور خلیل اللّٰہ کے منصب پر فائز دکھائی دیتا ہے…!!!
وہ جوانی میں قوم کے تراشیدہ بتوں کو کلہاڑے کی ضرب سے پاش پاش کرنے والا بت شکن ان سے سوال کرتا کہ تمہیں کیا ہو گیا ہے کہ کھاتے نہیں ہو؟
تمہیں کیا ہے کہ بولتے بھی نہیں؟
تب ابراہیم اپنی انہی اداؤں سے قوم کو لاجواب کر دیتا ہے،اور وہ آنکھیں جھکائے یہ سوچنے پر مجبور ہو جاتے ہیں کہ بات تو اس کی واقعی ٹھیک ہے لیکن اس کو مان لینا اَنا پر گہری ضرب تھی…!!!
وہ ابراہیم جو انتہائی بڑھاپے میں اولاد کی نعمت سے سرفراز کیئے جانے کے بعد امتحانات کے ایک تسلسل سے گزرتے ہیں…
یہاں تک کہ اپنے لاڈلے بیٹے اسماعیل علیہ السلام کو ذبح کرنے کا خواب آتا ہے…
وہ ابراہیم جن کے امتحانات کا تذکرہ اللّٰہ تعالٰی نے خود یوں فرمایا کہ:
"جب ابراہیم علیہ السلام کو ان کے رب نے کئی کئی باتوں میں آزمایا اور انہوں نے سب کو پورا کر دیا تو اللّٰہ نے فرمایا میں تمہیں لوگوں کا امام بناؤں گا…”
(البقرۃ)۔
وہ نو مولود کو اپنے سے دور تنہا بے آب و گیاہ وادی میں بیوی سمیت چھوڑنے سے لے کر اب اسماعیل علیہ السلام کو ذبح کرنے تک کا سفر ابراہیم علیہ السلام نے، نہایت صبر،کمال استقامت اور حوصلے سے کاٹا تھا…
اب اس آزمائش پر بھی پورا اترنے کے بعد اللّٰہ تعالٰی نے اس بہت بڑی آزمائش قرار دے کر اس پر پورا اترنے پر ابراہیم علیہ السلام کو سرخرو فرمایا اور اسماعیل علیہ السلام کے فدیہ میں مینڈھا نازل فرما دیا…!!!
ذرا سوچو کہ وہ بیتِ عتیق،نور و رحمت کے گھر کی طرف دیوانہ وار لپکتے لوگوں کا رش بھلا کس کی دعا کا ثمر ہے؟
وہ کعبہ کی بنیادوں کو بلند کرنے والے ابراہیم اور اس کی آبادی کے لیئے اللّٰہ کے حضور دعائیں مانگنے والے ابراھیم کی یاد کے مناظر…
واذ یرفع القواعد من البیت…
"اورجب وہ اس گھر کی بنیادیں بلند کر رہے تھے…
واتخذو من مقام ابراھیم مُصَلًّی…
"اور تم مقامِ ابراہیم کو جائے نماز مقرر کر لو…(البقرۃ)۔
وہ صفا و مروہ کے چکر کس عظیم گھرانہ کی یاد سے وابستہ ہیں…؟
ان الصفا والمروۃ من شعائر اللّٰہ…
بھلا یہ جانوروں کی قربانی کس کا فدیہ قرار پائی تھی؟
آہ…!!!
وہ جو سارے کا سارا گھرانہ صبر و ثبات ،عزم و حوصلہ،برداشت و استقامت اور ایمان و عمل کی واضح نشانی تھا…
رب کی وحدانیت اور رضا پر سب کچھ لٹا دینے کا عہد کیئے جانبِ منزل رواں دواں رہا کہ امر ہو گیا…
وہ ابراہیم جس نے قوم کو شروع میں ہی کھرا کھرا جواب دے دیا تھا کہ:
انی ذاھبٌ الی ربی سیھدین¤
"میں تو ہجرت کر کے اپنے رب کی طرف جانے والا ہوں،وہ ضرور میری رہنمائی کرے گا…(الصفّٰت)۔
اور پھر تا قیامت رہبری اور امامت کا تاج سج گیا…
ملتِ ابراہیم کے حقیقی پیروکار رب کے محبوب کہلائے…
آگ کے گلزار بننے سے ابد تک سلامتیاں ہی سلامتیاں ابراہیم علیہ السلام کا خاصہ کہلائیں:
"ابراہیم علیہ السلام پر سلام ہو،
ہم نیکو کاروں کو اسی طرح بدلہ دیتے ہیں،بے شک وہ ہمارے ایمان دار بندوں میں سے تھے…”
(الصفّٰت)۔
اللّٰہ تعالٰی ہمیں بھی ان ایام میں بہترین طریقے سے عبادات بجال لانے اور ابراہیم علیہ السلام سےوابستہ خصوصی یادوں کو اپنا ایمان و عمل بنانے کی توفیق نصیب فرمائے کہ خواہشات کے حصار نے ہمیں اپنے جالوں میں پھنسا رکھا ہے…
آج ہم منزل سے بہت دور بھٹکتے مسافر اور مقصدِ حیات سے کوسوں دور دکھائی دیتے ہیں…
امامت کے منصب پر فائز ہونے کے لئی کن راستوں پر سے ہو کر گزرنا ہوتا ہے؟سیرتِ ابراہیم اس کی بہتر راہ نما ہے…!!!
یہ دَور اپنے براہیم کی تلاش میں ہے…
صنم کدہ ہے جہاں،لا الہ الا اللّٰہ…
یہ مال و دولت،دنیا یہ رشتۂ پیوند…
بتانِ وہم و گماں،لا الہ الا اللّٰہ…!!!
=============================
[جویریات ادبیات]۔
¤¤¤¤¤¤¤¤¤¤¤¤¤¤¤¤¤¤¤¤¤¤¤