Category: بلاگ

بل: کفن اور زنجیر پہن کر بھی دیا جاتا ہے
تحریر: حبیب خان باغی ٹی وی نامہ نگار اوچ شریف
یہ کوئی کہانی نہیں ہے بلکہ اس ملک کے لاکھوں گھروں کی حقیقت ہے جہاں بجلی کا بل اب صرف ایک کاغذ نہیں بلکہ ایک کفن بن چکا ہے جو ہر ماہ غریب کے گلے میں پھندے کی طرح لٹکتا ہے۔ وزیر توانائی اویس لغاری اپنی پریس کانفرنسوں اور سوشل میڈیا پوسٹوں میں "بجلی سستی ہو گئی” کی رٹ لگائے ہوئے ہیں، لیکن زمینی حقیقت یہ ہے کہ صارفین کے بل ہر ماہ نئے ریکارڈ بنا رہے ہیں۔ ایک گھر جہاں صرف دو پنکھے، ایک بلب اور چند گھنٹوں کا واٹر پمپ چلتا ہو، وہاں 10 سے 20 ہزار روپے کے بل آ رہے ہیں۔ یہ کوئی رعایت نہیں، یہ معاشی قتل ہے، جو ایک ظالمانہ سلیب سسٹم کے ذریعے کیا جا رہا ہے جہاں 199 یونٹ تک رعایت ملتی ہے، لیکن 200 یونٹ پر تمام رعایتیں ختم ہو جاتی ہیں اور صارف پر 500 فیصد زیادہ نرخ لگ جاتے ہیں۔ ایک یونٹ کا یہ فرق ہزاروں روپے کے نقصان میں بدل جاتا ہے، گویا غریب کو سزا دی جا رہی ہو کہ اس نے بجلی استعمال کرنے کی جرات کیسے کی۔

اس سے بھی بڑھ کر، ڈیٹیکشن بلز کا عذاب ہے، جو بغیر کسی ثبوت یا تفتیش کے صارف کو "چور” قرار دے کر لاکھوں روپے کے بل تھوپ دیتا ہے۔ اگر صارف اپنی بے گناہی ثابت کرنا چاہے تو اسے تھانوں، عدالتوں اور نیپرا کے چکر لگانے پڑتے ہیں، لیکن نتیجہ وہی ذلت اور وہی بل ہوتا ہے۔ ریاستی بجلی کمپنیوں نے صارفین کی زندگی جہنم بنا دی ہے۔ ایک گھر میں چاہے کتنی ہی فیملیاں رہتی ہوں، دوسرا میٹر لگانے پر پابندی ہے، اور اگر میٹر خراب ہو جائے تو نیا میٹر لگوانے کے لیے صارف کو دفتروں کے چکر لگوانے پڑتے ہیں، جہاں اسے کہا جاتا ہے کہ پہلے تھانے جا کر اپنی بے گناہی ثابت کرو۔ یہ کون سا انصاف ہے جو شہری کو بغیر جرم کے مجرم بناتا ہے؟

عید کے موقع پر کئی شہروں سے دل دہلا دینے والی خبریں آئیں، جہاں ایک باپ نے بجلی کا بل دیکھ کر زہر کھا لیا اور ایک ماں نے اپنی بیٹی کے جہیز کے پیسے بل ادا کرنے میں خرچ کر دیے۔ یہ سب اس "ریلیف” کے دعوؤں کے باوجود ہو رہا ہے جو اویس لغاری ہر روز دہراتے ہیں۔ وزیر اعظم شہباز شریف نے نہ اس بحران پر قوم سے خطاب کیا، نہ کسی وزیر کو ہٹایا، نہ ہی ڈیٹیکشن بلز کی تحقیقات کا حکم دیا۔ یہ ایک منظم معاشی استحصال ہے، جہاں صارف کو پہلے مجرم قرار دیا جاتا ہے اور پھر اس سے جرمانہ وصول کیا جاتا ہے۔ لاہور ہائی کورٹ میں شہریوں نے ان ناجائز بلوں اور ڈیٹیکشن چارجز کو آئین کے آرٹیکل 9 یعنی زندگی کے حق کے خلاف قرار دیا ہے، اور نیپرا نے بھی اعتراف کیا کہ کئی کیسز میں کمپنیوں نے بغیر جائز طریقہ کار کے ڈیٹیکشن بلز عائد کیے۔ لیکن اس کے باوجود نہ کوئی سی ای او معطل ہوا، نہ کوئی پالیسی بدلی، نہ ہی کوئی وزیر جواب دہ ٹھہرا۔

یہ قوم عجیب ہے۔ وہ سسکتی ہے، روتی ہے، چیختی ہے، لیکن پھر بھی ووٹ ڈالنے قطاروں میں کھڑی ہوتی ہے۔ لیکن اب یہ زنجیر ٹوٹنے کے قریب ہے۔ دیہاتوں سے خواتین بجلی کے بل لے کر تھانوں کے باہر احتجاج کر رہی ہیں، بوڑھے بزرگ بل اور دوائیاں ہاتھ میں لے کر میڈیا کے سامنے اپنی داستان سنا رہے ہیں۔ یہ زنجیر اب خاموشی سے رقص نہیں کرنا چاہتی، یہ ٹوٹنا چاہتی ہے۔ اویس لغاری صاحب! اگر بجلی واقعی سستی ہوئی ہے تو بل ہر ماہ مہنگے کیوں آ رہے ہیں؟ اگر رعایت دی جا رہی ہے تو ڈیٹیکشن بلز کیوں بھیجے جا رہے ہیں؟ اگر عوام کو ریلیف مل رہا ہے تو خودکشیاں کیوں ہو رہی ہیں؟ آپ کی کرسی سے اتر کر کسی غریب کے گھر کا بل ہاتھ میں لیں، اس کی کہانی سنیں، شاید آپ کا ضمیر جاگ جائے۔ ورنہ تاریخ لکھے گی کہ 2025 میں ایک وزیر توانائی تھا جو عوام کا خون نچوڑتا رہا اور مسکرا کر کہتا رہا کہ ہم نے تو ریلیف دے دیا۔

یہ صرف بجلی کا بل نہیں، یہ اس قوم کی بے بسی کی داستان ہے۔ یہ زنجیر بجلی کی ہے، گیس کی ہے، آٹے کی ہے، دوائی کی ہے۔ لیکن اب یہ قوم خاموش نہیں رہے گی۔ یہ زنجیر اب ٹوٹے گی کیونکہ بل اب کفن اور زنجیر پہن کر بھی دیا جاتا ہے، لیکن اب یہ قوم اس کفن کو اتار پھینکنے کے لیے تیار ہے۔ حکومت کے ایوانوں میں بیٹھے وزراء سے گزارش ہے کہ عوام کی آواز سنیں، ان کے بل دیکھیں، ان کی چیخیں سنیں۔ ورنہ یہ زنجیر آپ کے ایوانوں تک پہنچے گی اور پھر نہ کوئی رعایت کام آئے گی، نہ کوئی پریس کانفرنس۔

سگریٹ ،غریب آدمی اور یہ معاشرہ
از قلم: لاریب اقراء
سگریٹ نوشی آج کے دور میں ایک عام عادت نہیں رہی بلکہ یہ ایک انتہائی خطرناک اور تیزی سے پھیلتی ہوئی معاشرتی، طبی اور معاشی بیماری بن چکی ہے۔ یہ بیماری غریب اور امیر دونوں طبقوں کو ایک جیسا نقصان پہنچا رہی ہے۔ افسوسناک امر یہ ہے کہ آج معاشرے کے ہر طبقے میں، چاہے وہ غریب ہو یا امیر، نوجوان ہو یا بوڑھا، مرد ہو یا عورت، سگریٹ کو نہ صرف پیا جا رہا ہے بلکہ کہیں نہ کہیں اسے ایک “رواج” اور “ضرورت” سمجھ کر قبول بھی کیا جا رہا ہے۔ اور اس بات کو نجانے کیوں ہلکا لیا جارہا ہے ۔

امیر طبقہ سگریٹ کو ایک “اسٹیٹس سمبل” یعنی عیش و آرام کی علامت سمجھ کر استعمال کرتا ہے، جبکہ غریب طبقہ ذہنی دباؤ، غربت، بے روزگاری یا ماحول کے منفی اثرات کے باعث اس کا شکار ہو جاتا ہے۔ امیر آدمی کے لیے شاید سگریٹ کے پیکٹ کی قیمت معمولی ہو، لیکن غریب کے لیے یہی سگریٹ روزانہ اس کی جیب سے روٹی، دوا، تعلیم، اور بچوں کی خوشی چھین لیتا ہے۔ سب سے زیادہ افسوس تب ہوتا ہے جب ایک شخص جو دن بھر محنت مزدوری کر کے چند روپے کماتا ہے، وہ انہی پیسوں کا کچھ حصہ سگریٹ میں جھونک دیتا ہے، اور یوں نہ صرف اپنی صحت بلکہ اپنے خاندان کا مستقبل بھی برباد کرتا ہے۔

ضرورت اس بات کی ہے کہ ہم اس مہلک لت کو صرف غریب طبقے سے نہیں، بلکہ پورے پاکستان سے ختم کرنے کی کوشش کریں۔ کیونکہ یہ عادت جہاں غریب کو فاقوں کی طرف لے جاتی ہے، وہیں امیر کو بیماریوں کی طرف دھکیلتی ہے۔ سگریٹ صرف ایک فرد کا مسئلہ نہیں بلکہ اس سے جُڑے ہر انسان، ہر خاندان، ہر محلے، ہر ہسپتال، اور ہر ملک کا مسئلہ بنتا جا رہا ہے۔

اس زہر کو معاشرے سے ختم کرنے کے لیے سب سے پہلا قدم یہ ہونا چاہیے کہ حکومت سگریٹ پر بھاری ٹیکس لگائے تاکہ یہ اتنا مہنگا ہو جائے کہ کوئی بھی اسے خریدنے سے پہلے کئی بار سوچے۔ غریب آدمی کو جب یہ احساس ہو کہ ایک سگریٹ کے بدلے وہ اپنے بچے کے لیے دودھ، کتاب یا دوا خرید سکتا ہے تو ممکن ہے کہ وہ اپنی لت پر قابو پانے کا فیصلہ کرے۔

حکومت کو سگریٹ فروشی پر بھی سخت قوانین لاگو کرنے چاہییں۔ دکانداروں کو پابند کیا جائے کہ وہ نابالغوں کو سگریٹ فروخت نہ کریں اور ایسی دکانوں کے خلاف کارروائی کی جائے جہاں یہ زہر عام مل رہا ہو۔ صرف یہی نہیں بلکہ دکانوں کے آس پاس اشتہارات، بورڈز یا ایسے پوسٹرز جو سگریٹ کو فروغ دیتے ہوں، انہیں مکمل طور پر ختم کر دینا چاہیے۔

اس کے ساتھ ساتھ عوام میں شعور بیدار کرنا بھی نہایت ضروری ہے۔ خاص طور پر غریب اور کم تعلیم یافتہ افراد کو سمجھایا جائے کہ سگریٹ کا ہر کش ان کے جسم کو دیمک کی طرح چاٹ رہا ہے، ان کے پھیپھڑوں، دل، دانت، اور دماغ کو آہستہ آہستہ تباہ کر رہا ہے۔ وہ نادانی میں صرف اپنی ہی صحت کو نہیں بلکہ اپنے بچوں، بیوی، والدین اور آس پاس کے لوگوں کی زندگیوں کو بھی خطرے میں ڈال رہے ہیں۔

اس مقصد کے لیے میڈیا، سوشل میڈیا، اسکول، مساجد، کمیونٹی سینٹرز اور فلاحی تنظیموں کو مل کر کام کرنا ہوگا۔ ایسے پروگرام ہونے چاہییں جن میں عوام کو آسان زبان میں، تصویروں اور مثالوں کے ذریعے بتایا جائے کہ سگریٹ کیسے خاموشی سے زندگی چھین لیتا ہے۔

حکومت اور فلاحی ادارے اگر نکوٹین چھوڑنے کے پروگرامز جیسے مفت مشاورت، دوا، نکوٹین پیچ اور سپورٹ گروپس فراہم کریں تو بہت سے لوگ اس عادت کو خیر باد کہہ سکتے ہیں۔ اصل ضرورت صرف ایک "سہارے” کی ہے — ایک ہمدرد آواز، ایک خالص نیت والا ہاتھ، جو ان لوگوں کو اس دھوئیں سے نکال کر صاف اور روشن زندگی کی طرف لے جائے۔

نوجوان طبقہ اس کا سب سے آسان شکار بنتا ہے۔ جب وہ اپنے بڑوں کو سگریٹ پیتے دیکھتے ہیں تو وہ اسے "معمول” سمجھ کر اپنانے لگتے ہیں۔ اس لیے والدین، اساتذہ اور کمیونٹی لیڈرز کو اپنا کردار ادا کرنا ہوگا اور نوجوانوں کو ابتدا سے ہی اس لت سے دور رکھنے کی تربیت دینا ہوگی۔

سگریٹ نوشی صرف ایک عادت نہیں بلکہ ایک زہر ہے جو جسم، دماغ، تعلقات، معیشت اور نسلوں کو خاموشی سے نگل رہا ہے۔ اگر ہم چاہتے ہیں کہ پاکستان کا کوئی بھی فرد ” چاہے وہ غریب ہو یا امیر ” اس زہر سے محفوظ رہے تو ہمیں پورے ملک میں اس کے خلاف ایک مضبوط، مسلسل، اور اجتماعی جدوجہد کرنا ہوگی۔ یہ صرف حکومت کی نہیں بلکہ ہم سب کی ذمہ داری ہے۔ اگر ہم نے آج قدم نہ اٹھایا، تو کل ہمارے بچے بھی اسی دھوئیں میں سانس لیں گے جسے ہم نظر انداز کر رہے ہیں۔ ایک بات جو سوشل میڈیا پر کچھ دنوں پہلے بہت وائرل تھی ۔
کہ سگریٹ مرد پیے تو پھپھڑے خراب اگر عورت پیے تو کردار خراب ۔۔۔۔ ایسا کیوں
یہ کہاوت ہمارے معاشرتی اور ثقافتی نظریات کی عکاس ہے جہاں مردوں کی سگریٹ نوشی کو عموماً صحت کے نقصان کے طور پر دیکھا جاتا ہے، جبکہ خواتین کی سگریٹ نوشی کو کردار کی خرابی اور سماجی بدنامی کے زمرے میں رکھا جاتا ہے۔ یہ فرق درحقیقت ہمارے معاشرے میں صنفی امتیاز اور قدامت پسند سوچ کی عکاسی ہے۔

حقیقت یہ ہے کہ سگریٹ نوشی مرد و زن، ہر انسان کے لیے ایک زہر ہے جو نہ صرف جسمانی صحت کو متاثر کرتا ہے بلکہ شخصیت، وقار اور زندگی کے ہر پہلو کو دھوئیں میں لپیٹ لیتا ہے۔

پیناڈول، رائزک اور جگر کے امراض: سچ کیا ہے؟
تحریر:ڈاکٹرغلام مصطفےٰ بڈانی
حال ہی میں سوشل میڈیا پر گردش کرنے والی ایک پوڈکاسٹ ویڈیو نے پیناڈول (پیراسیٹامول) اور رائزک (اومیپرازول) جیسی عام ادویات کے استعمال اور جگر کے امراض سے ان کے تعلق پر کافی بحث چھیڑ دی ہے۔ اس ویڈیو میں کچھ حیران کن دعوے کیے گئے جو ایک طرف تو عوامی صحت کے لیے تشویش کا باعث بنے تو دوسری طرف کئی غلط فہمیوں کو بھی جنم دیا۔ ان دعوؤں کا حقیقت کی کسوٹی پر جائزہ لینا ضروری ہے۔

ویڈیو میں دعویٰ کیا گیا کہ پاکستانیوں نے پچھلے سال رائزک نامی دوا پر تقریباً 8 ارب روپے خرچ کیے اور یہ دوا معدے اور جگر پر "تیزاب ڈالنے” جیسا اثر رکھتی ہے۔ حقیقت یہ ہے کہ رائزک دراصل اومیپرازول ہے جو کہ ایک پروٹون پمپ انہیبیٹر (Proton Pump Inhibitor) ہے اور اس کا کام معدے میں تیزاب کی پیداوار کو کم کرنا ہے۔ یہ سینے کی جلن، بدہضمی اور السر کے علاج کے لیے استعمال ہوتی ہے۔ یہ کہنا کہ یہ دوا معدے یا جگر پر تیزاب ڈالتی ہے، سائنسی طور پر درست نہیں، کیونکہ یہ دوا تیزاب کی پیداوار کو روکتی ہے۔ یہ بات درست ہے کہ پاکستان میں رائزک کا بے جا اور غیر ضروری استعمال عام ہے، جہاں لوگ بغیر ڈاکٹر کے مشورے کے اسے درد کش ادویات کے ساتھ یا معمولی تیزابیت کے لیے استعمال کرتے ہیں۔ سائنسی تحقیقات سے یہ بات سامنے آئی ہے کہ اس دوا کا طویل استعمال وٹامن B12 کی کمی، گردوں کے مسائل اور جگر کے افعال میں بگاڑ کا باعث بن سکتا ہے، تاہم اس کا براہ راست تعلق جگر کے کینسر سے ابھی تک ثابت نہیں ہوا۔ 8 ارب روپے کے خرچ کا دعویٰ بھی غیر مصدقہ ہے کیونکہ اس کی کوئی سرکاری رپورٹ دستیاب نہیں۔

پوڈکاسٹ میں پیناڈول کے بارے میں کہا گیا کہ یہ دوا آج کل "ٹافیوں” کی طرح استعمال ہو رہی ہے اور اس کا زیادہ استعمال فیٹی لیور اور جگر کی دیگر پیچیدہ بیماریوں کا سبب بن رہا ہے۔ یہاں تک کہ یہ بھی دعویٰ کیا گیا کہ یہ دوا دنیا میں بند ہو چکی ہے اور پاکستان میں بھی سات سال پہلے بین ہو چکی ہے۔ یہ دعوے مکمل طور پر غلط ہیں۔ پیناڈول (پیراسیٹامول) درد اور بخار کے علاج کے لیے دنیا بھر میں استعمال ہونے والی ایک انتہائی عام اور مؤثر دوا ہے۔ عالمی ادارہ صحت نے اسے بنیادی دواؤں کی فہرست میں شامل کر رکھا ہے اور پاکستان سمیت دنیا کے بیشتر ممالک میں یہ دوا آج بھی دستیاب ہے۔ البتہ، یہ بات سچ ہے کہ پیراسیٹامول کا زیادہ استعمال، خاص طور پر اگر روزانہ 4 گرام سے زیادہ مقدار لی جائے یا اسے شراب کے ساتھ استعمال کیا جائے تو یہ جگر کے لیے نقصان دہ ثابت ہو سکتی ہے۔ ایسے مریض جو پہلے سے ہی ہیپاٹائٹس یا جگر کی کسی بیماری میں مبتلا ہوں، ان کے لیے پیراسیٹامول کا بے احتیاط استعمال مزید پیچیدگیوں کا باعث بن سکتا ہے۔ تاہم، اس کا مطلب یہ نہیں کہ یہ دوا جگر کا کینسر پیدا کرتی ہے۔ جگر کے کینسر کی سب سے بڑی وجہ ہیپاٹائٹس B اور C کے وائرل انفیکشنز ہیں۔

ویڈیو میں یہ بھی دعویٰ کیا گیا کہ پاکستان میں جگر کے کینسر کی شرح خطرناک حد تک بڑھ چکی ہے اور اگلے 15 سالوں میں 30 لاکھ افراد اس مرض میں مبتلا ہو سکتے ہیں۔ یہ بھی کہا گیا کہ جن لوگوں کے PCR ٹیسٹ "نیگیٹو” آتے ہیں، وہ بھی کینسر کا شکار ہو سکتے ہیں۔ یہ بات درست ہے کہ پاکستان میں جگر کے امراض، خاص طور پر ہیپاٹائٹس B اور C ایک بڑا مسئلہ ہیں۔ عالمی ادارہ صحت کی رپورٹ کے مطابق پاکستان میں تقریباً 2 کروڑ افراد ہیپاٹائٹس کا شکار ہیں، اور ان کا بروقت علاج نہ کیا جائے تو جگر کے کینسر کا خطرہ بڑھ جاتا ہے۔ لیکن 30 لاکھ افراد کو کینسر ہونے کا دعویٰ مبالغہ آمیز ہے اور اس کی کوئی سائنسی رپورٹ یا ثبوت موجود نہیں۔ جگر کے کینسر کی اصل وجوہات میں غیر محفوظ انجیکشن، خون کی غیر معیاری منتقلی اور ناقص صفائی شامل ہیں۔ جہاں تک PCR ٹیسٹ کا تعلق ہے، یہ وائرس کی مقدار چیک کرتا ہے۔ اگر یہ نیگیٹو آتا ہے تو اس کا مطلب ہے کہ فی الحال وائرس موجود نہیں، لیکن یہ کینسر یا دیگر بیماریوں کی موجودگی کو رد نہیں کرتا۔ ویڈیو میں کینسر کے کچھ مخصوص ٹیسٹس (جیسے ایلفا فیٹوپروٹین، CA125، CA15-3، CA19-9، اور CEA) کا ذکر کیا گیا اور دعویٰ کیا گیا کہ ان سے اکثر میں کینسر کی ابتدائی علامات نکل آئیں گی۔ یہ ٹیسٹ مخصوص کینسرز کی نشاندہی میں مددگار ہو سکتے ہیں، لیکن ان کی تشریح صرف ماہر ڈاکٹر ہی کر سکتا ہے۔ یہ تمام ٹیسٹ ہر مریض پر لاگو نہیں ہوتے اور ہر مثبت نتیجہ کینسر کی حتمی تشخیص نہیں ہوتا۔ مزید براں CA125، CA15-3، اور CA19-9 جیسے ٹیسٹ بنیادی طور پر جگر کے کینسر کے لیے نہیں، بلکہ بالترتیب رحم/بیضہ دانی، چھاتی اور لبلبہ/گال بلیڈر کے کینسر سے متعلق ہیں۔

یہ پوڈکاسٹ اگرچہ کچھ غلط معلومات پر مبنی ہے، لیکن اس میں دواؤں کے غلط اور غیر ضروری استعمال کے بارے میں جو تشویش ظاہر کی گئی ہے وہ بالکل درست ہے۔ پاکستان میں عام لوگ اکثر معمولی بخار یا درد پر خود ہی دوا لے لیتے ہیں یا کسی کی رائے پر عمل کرتے ہیں۔ یہ رویہ خطرناک نتائج کا حامل ہو سکتا ہے، خاص طور پر جب بات جگر جیسے نازک عضو کی ہو۔ یہ معاملہ صرف ان دو دواؤں تک محدود نہیں بلکہ ہمارے مجموعی صحت کے نظام اور عوامی شعور کی کمی کو ظاہر کرتا ہے۔ حکومت کو چاہیے کہ اوور دی کاؤنٹر دواؤں کی فروخت پر سخت قوانین نافذ کرے، فارمیسیوں کی نگرانی کرے اور عوام کو دواؤں کے درست استعمال کے بارے میں آگاہی دے۔ ساتھ ہی میڈیا اور سوشل میڈیا پر چلنے والے طبی دعوؤں کی سچائی جانچنا اور ان پر اندھا یقین کرنے سے گریز کرنا بھی ضروری ہے۔

اس طرح کی ویڈیوز میں کئی بار خوف پھیلانے کا عنصر شامل ہوتا ہے اور وہ حقیقت سے دور ہو سکتی ہیں۔ یہ وقت ہے کہ ہم بطور قوم اپنی صحت کے معاملات کو سنجیدگی سے لیں، اپنی زندگیوں کو غیر ضروری دواؤں کے رحم و کرم پر نہ چھوڑیں اور اگر کسی دوا کا استعمال کریں تو مستند ڈاکٹر کے مشورے سے کریں۔ جگر ایک خاموش مگر نہایت اہم عضو ہے، جب یہ بولتا ہے تو اکثر دیر ہو چکی ہوتی ہے۔ اس لیے ہیپاٹائٹس B کی ویکسین لگوائیں، محفوظ انجیکشن استعمال کریں اور باقاعدہ چیک اپ کروائیں۔ سوشل میڈیا کے دعوؤں پر بھروسہ کرنے سے پہلے ڈاکٹر یا معتبر ذرائع سے تصدیق کرنا ہمیشہ بہتر ہے۔