Category: بلاگ

جارج فلوئڈ، جارحیت کا شکار معصوم بچوں کا عالمی دن اور ہمارا احتجاج
محمد نعیم شہزاد

اس دنیا کے رنگ نرالے ہیں، امریکہ میں ایک سیاہ فام پولیس سے کی انتظامی کاروائی سے ہلاک ہوتا ہے تو اس پر پوری دنیا میں احتجاج بپا کیا جاتا ہے۔ دنیا کرونا وائرس کی زد میں ہے اس کے باوجود لوگ گھروں سے نکلتے ہیں اور احتجاج ریکارڈ کراتے ہیں۔ پوری دنیا میں ہلچل مچ جاتی ہے۔ دوسری طرف دس ماہ سے زیادہ مدت سے کشمیری بدترین کرفیو اور لاک ڈاؤن کا سامنا کر رہے ہیں، وہی کشمیری جہاں بھارت گزشتہ 73 برس سے ناجائز قبضہ کیے ہوئے ہے۔ ابھی کل کی بات ہے کہ دوبارہ سے بدترین خود ساختہ encounter میں گزشتہ دو دن میں 18 افراد کو شہید کر دیا گیا۔ معلوم ہوتا ہے کہ یہ افراد کسی اقلیتی گروہ سے تعلق رکھتے ہیں مگر حقیقت اس کے بر عکس ہے یہ مظلوم افراد قریب 60 ممالک کے سرکاری مذہب کے ماننے والے کلمہ گو ہیں۔ اعداد و شمار کو دیکھا جائے تو دنیا کی ایک چوتھائی آبادی مسلمانوں پر مشتمل ہے مگر یہ کلمہ پڑھنے والے ایک دوسرے کے دکھ درد سے نا آشنا اور بیگانہ ہو گئے ہیں، انھیں فلسطین اور شام میں بے گھر اور بے سہارا بچے نظر نہیں آتے، ان کے دل ان کے دکھ سے نہیں پسیجتے اور یہ ان کے لیے ایک آواز بلند کرنے کی زحمت گوارا نہیں کرتے۔ آج کا دن ہم عالمی طور جنگ کا شکار معصوم بچوں کے نام سے موسوم کرتے ہیں۔ تاریخ کی ورق گردانی کیجیے تو معلوم ہو گا 19 اگست 1982 میں اقوام متحدہ میں کیوں قرارداد پاس کی گئی اور اس دن کے منانے کا آغاز کیا گیا۔ انتہائی کسمپرسی کا عالم ہے کہ یہ دن اسرائیلی جنگی جارحیت کا شکار ہونے والے معصوم فلسطینی اور لبنانی بچوں کے نام پر منایا گیا جو تاحال اسی کرب اور جارحیت کا سامنا کر رہے ہیں۔ ان کے شب و روز اب بھی ویسے ہیں اور ان کی شنوائی کسی فورم پر نہیں ہو پاتی۔ اور ہو بھی کس طرح جب اپنی قوم کے لوگ بیگانہ ہو گئے اور ان تکالیف پر بے چین نہ ہوئے تو دوسرا کوئی کیوں مضطرب ہو گا اور اس کا مداوا کرے گا۔ divide and rule کی پالیسی کا شکار مسلم ممالک اور شہریوں میں طرح طرح کی ناچاقیاں اور نا اتفاقیاں ہیں اور مسلم حکومتیں اور ایوان ان سازشوں کا شکار ہو کر رہ گئے ہیں۔ حالانکہ ان کو یہ سبق اللہ تعالیٰ نے اپنی الہامی کتاب کے ذریعے بھی سکھا دیا تھا کہ آپس کی ناچاقی اور بے اتفاقی کا نتیجہ دنیا میں کمزوری اور بے توقیری کی صورت بھگتنا پڑے گا۔
اتحاد کی کوششوں کو دیکھا جائے تو اس میں بھی واضح گروپ بندی اور بلاکس نظر آتے ہیں۔ کہیں لوگ اس قدر بے حس ہو گئے ہیں کہ ان کے لیے اپنے معاشی پلان اور پروگرام سب سے بڑھ کر ہیں۔ اپنے اتحاد و اتفاق کو پارہ پارہ کر کے آج ہم مغربی اقوام متحدہ کی جانب امید سے دیکھتے ہیں۔ مسلم کمیونٹی کی مظلومیت پر ان سے انصاف اور مساوات کا سوال کرتے ہیں کبھی بین الاقوامی تنظیموں اور اداروں سے سوال کرتے نظر آتے ہیں اور خود اس بات کا اظہار بھی کرتے ہیں کہ یہ ادارے رسمی کاروائی کرتے ہیں ان کی کارکردگی رپورٹس جاری کرنے سے بڑھ کر کچھ بھی حقیقت نہیں رکھتی تو پھر ہم کیوں انہیں اداروں کے سامنے اپنے مسائل اجاگر کرنے پر مجبور ہیں؟ کیا دھوکہ یہ عالمی ادارے دے رہے ہیں یا ہم خود کسی اور دھوکے میں مبتلا ہیں؟
اسی کتاب ہدی جس پر ہم ایمان رکھتے ہیں کہ لاریب ہے ہمیں یہ بھی سکھا دیا کہ اللہ تعالیٰ کبھی اس قوم کی حالت نہیں بدلتا جسے اپنی حالت بدلنے کی خود سے فکر نہ ہو۔ تو آخر ہم کب تک خواب غفلت میں پڑے رہیں گے؟ اللہ تعالیٰ کی پکڑ شدید اور اس کا عذاب بڑا دردناک ہے۔ کرونا کا وبال سب کے سامنے ہے۔ یہ وقت توبہ اور اللہ تعالیٰ کی طرف رجوع کرنے کا ہے۔ اپنی غلطیوں کا ازالہ کرنے اور متحد ہونے کا وقت ہے۔ جب تک اپنی صفوں میں اتحاد کی فضا قائم نہیں کی جائے گی اور امت اسی طرح بٹی رہے گی مسلم قوم کی حالت درست نہیں ہو سکے گی۔ ظالم کا ہاتھ پکڑنے والا کوئی نہ ہو گا اور رسول عربی کے ماننے والے ابتلاء کا شکار رہیں گے۔

پاکستان کے لیے لیہہ کی اہمیت
بدھ 03 جون 2020ء
تین ہفتوں سے بھارت اور چین کی فوجیں لدّاخ کے علاقہ لیہہ میں چار مختلف مقامات پرآمنے سامنے کھڑی ہیں۔اگر کسی بھی ملک کی فوج نے اپنی پوزیشن سے آگے بڑھنے کی کوشش کی تو یہ کشیدگی ایک بڑی جنگ میں تبدیل ہوسکتی ہے۔ دونوں ملکوں نے فوجوں کی تعداد میں اضافہ کردیا ہے ‘بھاری ہتھیار سرحد پر پہنچا دیے ہیں۔ جنگی طیارے اور ہیلی کاپٹر فضا میں نگرانی کے لیے چکر لگا رہے ہیں۔ جنگ نہ سہی لیکن یہ سرحدی تناؤ طویل عرصہ تک جاری رہ سکتا ہے۔لیہہ پر بھارت اور چین کا جھگڑا پاکستان کی سلامتی کے لیے بھی بہت اہمیت کا حامل ہے۔ بھارت کا مقبوضہ علاقہ لیہہ بہت اونچائی پر واقع ایک برفانی صحرا ہے جس میں ہمالیہ اور قراقرم کے پہاڑی سلسلے واقع ہیں۔ اس میں بہت بلند میدان اورگہری گہری گھاٹیاں ہیں۔ آبادی بہت کم ہے ‘ سوا لاکھ سے کچھ زیادہ جس میں ستّر فیصد بدھ مت کے ماننے والے ہیں‘ لدّاخی بولی بولتے ہیںجو تبتی زبان کا ایک لہجہ ہے۔سترہ فیصد آبادی مسلمان اور گیارہ فیصد ہندو ہیں۔ لوگ نسلی اعتبار سے تبتی ہیں‘انکا کلچر‘ رہن سہن بالکل تبت جیسا ہے جو لیہہ کے مشرق میں واقع ہے۔ چین لیہہ کو تبت کا ہی حصہ سمجھتا ہے اور اسے متنازعہ علاقہ قرار دیتا ہے۔تاہم بھارت نے اسے حال ہی میں اپنی ریاست قرار دیا ہے۔ انگریز دور میں یہ ریاست جموں و کشمیر کا حصہ تھا۔قانونی طور پر اسکا تصفیہ اقوام متحدہ کی قرار دادوں سے منسلک ہے۔لیہہ کے مغرب میں کشمیر کی وادی‘ شمال مغرب میں کارگل کا علاقہ ہے۔شمال میں مشرق کے جانب پاکستان کا علاقہ اسکردو(بلتستان) ہے۔سب سے اہم ‘اسکے شمال میں بالکل مشرق کی جانب چین میں واقع درّہ قراقرم ہے جہاں سے گزرنے والی سڑک چین کے صوبہ سنکیانگ کو تبت سے ملاتی ہے۔ اسی درّہ سے مزید آگے شمال کے جانب چین اور پاکستان کو ملانے والی شاہراہِ ریشم یاقراقرم ہائی وے گزرتی ہے۔جنوب میں بھارت کا صوبہ ہماچل پردیش ہے۔لیہہ شہر تک پہنچنے کے لیے سری نگر سے لیہہ تک ایک بڑی شاہراہ موجود ہے۔ دوسری دشوار گزارسڑک جنوب میں بھارت کے ہماچل پردیش کے شہر منالی سے شمال کی جانب چلتی ہو ئی لیہہ تک پہنچتی ہے۔ دلی اور چندی گڑھ سے مسافر طیارے لیہہ کے ائیر پورٹ پر آتے جاتے ہیں۔ پاکستان کے لیے پینتالیس ہزار مربع کلومیٹر پر پھیلا لیہہ کا علاقہ بہت اہمیت کا حامل ہے۔ہماری زراعت اور پانی کا سب سے بڑا وسیلہ دریائے سندھ تبت کے جنوب میں ایک جھیل سے شروع ہوکر لیہہ کے علاقہ میں داخل ہوتا ہے اورشمال کے جانب سینکڑوں کلومیٹر سفر کرتا ہو ا بلتستان میں داخل ہوتا ہے۔لیہہ کا چھوٹا سا شہر بھی دریائے سندھ کے بالکل قریب واقع ہے۔ دریائے سندھ کے کئی معاون دریا اور ندیاںجیسے دریائے شیوک‘ گلوان‘ زاسکروغیرہ لیہہ میں بہتے ہیں۔ یہ دریا گلیشیروں کے پگھلنے اور بارشوں سے پانی حاصل کرتے ہیں۔ بھارت ان دریاؤں اور ندی نالوں پر ڈیم بناکر دریائے سندھ کا بہاؤ کم کرسکتا ہے جیسا کہ اس نے چناب اور جہلم پر کیا ہے۔ گزشتہ دس بیس برسوں میں بھارت نے اس علاقہ میں اپنی سرگرمیاں تیزی سے بڑھا دی ہیں۔ دشوار گزار پہاڑی جگہوں پر نئی نئی سڑکیں ‘ فوجی چوکیاں‘جنگی طیاروں کیلیے ائیر فیلڈ بنائے ہیں۔ بھارتی لیڈرز بار بار پاکستان کو دریاؤں کا پانی روکنے کی دھمکیاں دے رہے ہیں۔ اس تناظر میں یہ خطرہ موجود ہے کہ بھارت جلد یا بدیر دریائے سندھ کے پانی سے چھیڑ چھاڑ کرسکتا ہے۔جب بھارت نے دریائے چناب پر منصوبے بنانے شروع کیے تو پاکستانی بے خبر سوتے رہے۔ جب پراجیکٹ مکمل ہوگئے تو پاکستان نے ان کے خلاف شور مچانا شروع کیا۔ اگرلیہہ میں دریائے سندھ اور اسکے معاون دریاؤںپر ہم نے کڑی نظر نہ رکھی تو یہاں بھی بھارت وہی کھیل دہرا سکتا ہے۔ بھارت نے لیہہ کے مشرقی کنارے کے قریب انجینئرنگ کا شاہکار سمجھے جانے والی بڑی بڑی نئی سڑکیں بنائی ہیں جو اسکے شمال مشرق میں واقع آخری فوجی اڈہ تک جاتی ہیں۔ اس فوجی پوسٹ کو دولت بیگ اولڈی (ڈی بی او)کہا جاتا ہے۔ یہ اڈ ہ چین میں واقع درّہ قراقرم سے صرف آٹھ کلومیٹر نیچے جنوب میں واقع ہے۔ مطلب ‘ بھارت اگر چاہے تو اس فوجی اڈہ سے کارروائی کرکے درہ قراقرم کو بند کرسکتا ہے جس سے تبت اور سنکیانگ کا رابطہ کٹ جائے گا۔ اسکا نقصان صرف چین کو نہیں بلکہ پاکستان کو بھی ہوگا کیونکہ ہماری شاہراہ قراقرم بھی غیر محفوظ ہوجائے گی۔یہ سڑک سی پیک منصوبہ کا اہم ترین حصہ ہے۔ لیہہ کے مشرقی کنارے پر تبت کی سرحد کے قریب بھارت کی بڑھتی ہوئی فوجی سرگرمیاںاس کے خطرناک عزائم کا پتہ دیتی ہیں۔ خاص طور سے جب وہ یکطرفہ طور پر جموں کشمیر ریاست اور لدّاخ کو اپنا باقاعدہ حصہ قرار دے چکا ہے۔ یہ خدشات موجود ہیں کہ دِلّی سرکار لیہہ میں امریکی فوجوںکو بھی سہولیات مہیا کرنا چاہتا ہے جنہیں چین کے خلاف استعمال کیا جاسکے گا۔ انہی خدشات کے پیش نظر چین نے لیہہ کے شمال مشرق میں واقع دریائے گلوان کے وادی میں پیش قدمی کرکے تقریبا چالیس مربع کلومیٹر کے علاقہ پر اپنی فوجی چوکیاں بنادی ہیں۔ پاکستان کے لیے لیہہ دفاعی اعتبار سے بھی اہم ہے کہ اسکے شمال میںقریب ہی اسکردو واقع ہے اور ذرا مغرب کی جانب سیاچن گلیشئیرکو بھی راستہ جاتا ہے۔لیہہ اور اسکردو شہر سوا دو سو کلومیٹر فاصلہ پر ہیں لیکن ان کے اضلاع کی سرحد متصل ہے۔ اس کے قریب ہی ہمارا دیا مربھاشا ڈیم تعمیر ہورہا ہے۔ بھارت نے گلگت بلتستان کو اپنا علاقہ قرار دیا ہوا ہے۔ اس کے وزیر داخلہ امیت شاہ اپنی پارلیمان میں کھڑے ہوکر یہ اعلان کرچکے ہیں کہ ان کا ملک گلگت بلتستان پر قبضہ کرے گا۔ دلی سرکار دیامر بھاشا ڈیم کی بھی مخالف ہے۔ بھارتی دفاعی ماہرین اکثر یہ کہتے ہیں کہ اُنکی فوج اسکردو پرآسانی سے قبضہ کرسکتی ہے۔ اس پس منظر میں بھارت کی لیہہ میں سرگرمیوں کا ایک بڑا ہدف پاکستان میں واقع بلتستان کا علاقہ بھی ہے۔چین کی موجودہ بروقت فوجی کارروائی صرف اسکی اپنی سلامتی ہی نہیں بلکہ پاکستان کے دفاع کے لیے بھی اہم ہے۔ بھارت کے توسیع پسندانہ عزائم کو ناکام بنانے کے لیے پاکستان کو بھی بلتستان میں اپنے دفاع کو مزید مضبوط بنانا پڑے گا۔