Category: بلاگ

معزز مہمان جسکے جانے کا احساس صرف دو گھنٹے میں ہو جاتا ہے

تحریر: فیصل ندیم

میری طرح بیشمار لوگ اس سے محبت کا اظہار کرتے ہیں اس کی آمد سے پہلے اس کا انتظار کرتے ہیں ۔۔۔۔۔
ہر طرف اس کی باتیں اس کے ہی تزکرے ہوتے ہیں جیسے جیسے اس کی آمد قریب ہوتی ہے اس سے ملاقات کا اشتیاق بڑھتا چلا جاتا ہے ۔۔۔۔
وہ کبھی بھی خالی ہاتھ نہیں آتا ہمیشہ اس کے ساتھ بہت قیمتی تحائف ہوتے ہیں اتنے قیمتی کہ جن کی شائد دنیا میں دوسری مثال کوئی نہ ہو ۔۔۔۔
اس کی آمد کے بعد ہر شخص کا چہرہ خوشی سے دمک رہا ہوتا ہے ہر طرف اس کی آمد کی بات اور اس کے ساتھ آنے والے بیش قیمت تحائف کا ذکر ہوتا ہے ۔۔۔۔
بڑا عجیب ہے وہ اسے آتے ہی جانے کی جلدی ہوتی ہے اتنی محبت اتنا پیار اسے ہر طرف سے مل رہا ہوتا ہے لیکن وہ رکتا نہیں ہے چلا جاتا ہے ۔۔۔۔
وہ بڑا سخی ہے اپنے ساتھ لانے والے تمام قیمتی ترین تحائف ہمیشہ چھوڑ کر جاتا ہے کبھی بھی کچھ بھی ساتھ نہیں لے جاتا ۔۔۔۔
محبت کا دعوی اس سے سبھی کرتے ہیں لیکن اکثر لوگ اس کے تحائف کی ناقدری کرتے ہیں انہیں ضائع کرتے ہیں یہ وہ لوگ ہوتے ہیں جو ان بیش قیمت تحائف کی اصل قیمت سے واقف نہیں ہوتے ۔۔۔۔
چند لوگ ہی ایسے ہوتے ہیں جو اس کے لائے گئے تحائف سنبھالتے ہیں اور عجیب بات یہ ہے کہ جو اس کے تحائف سنبھال لیتا ہے ان سے وہ کبھی بھی جدا نہیں ہوتا دوبارہ آنے تک ہر لمحہ اس کا ان لوگوں کے ساتھ گزرتا ہے ۔۔۔۔
جی ہاں یہ رمضان ماہ غفران ہے جو ہر سال آتا ہے اور بڑی جلدی چلا جاتا ہے ….
آتے ہوئے اس کا دامن رحمتوں ،مغفرتوں ، برکتوں جیسے قیمتی ترین تحائف سے بھرا ہوتا ہے جنہیں یہ ہر ایک کو تقسیم کرتا ہے بہت تھوڑے ہوتے ہیں جو ان تحائف کو سنبھال لیتے ہیں ۔۔۔۔
رمضان کی آمد کا مقصود تقوی اس کے جانے کے بعد بھی ان کا ہمسفر ہوتا ہے اور جس کا ہمسفر یہ تقوی ہو اس سے رمضان کبھی نہیں جاتا یہ شوال سے شعبان تک اس بندے کے ساتھ ہوتا ہے جس نے رمضان کے لائے گئے بیش قیمت ترین تحفہ تقوی کو سنبھالا ہوتا ہے ۔۔۔۔
اور وہ لوگ جو یہ بیش قیمت تحفہ سنبھالنے میں ناکام ہوں ان کا رمضان ان کے روزے ان کی نمازیں ان کی تلاوتیں ان کی تراویحیاں اور ان کے اذکار اپنے ساتھ لیکر صرف ڈیڑھ گھنٹہ میں رخصت ہوجاتا ہے ۔۔۔
یقین نہیں آتا تو رمضان کی آخری مغرب اور شوال کی پہلی عشاء دیکھ لیں مغرب میں مساجد کی رونق اور عشاء میں مساجد کی ویرانی چلا چلا کر اعلان کررہی ہوتی ہیں جو رمضان کے بعد بھی رب کے حضور حاضر ہیں ان کا رمضان باقی ہے اور جو اس لازمی حاضری سے غیر حاضر ہیں ان کا رمضان چلا گیا ہے ۔۔۔۔
واضح رہے رمضان کی آخری مغرب اور شوال کی پہلی عشاء کے بیچ زیادہ سے زیادہ ڈیڑھ گھنٹہ کا وقت ہوتا ہے

خدمت انسانیت سے رضائے الہی کا حصول

حافظہ قندیل تبسم

اللہ تعالی نے اپنی آخری کتاب قرآن مجید میں فرمایا :
"واحسنوا ان اللہ یحب المحسنین”
اور اچھائی کرو بلاشبہ اللہ تعالی اچھائی کرنے والوں کو پسند کرتا ہے۔

رسول اللہ صلی اللہ علیہ وسلم نے فرمایا :
"اگر میں اپنے بھائی کے کسی کام آ جاؤں تو یہ مجھے اس سے زیادہ پسند ہے کہ میں اپنی اس مسجد میں ایک ماہ اعتکاف کروں۔
اور فرمایا :
"ومن کان فی حاجة اخيه ،كان الله فى حاجته”
” جو اپنے بھائی کے کام میں لگا رہتا ہے ہے اللہ اس کے کام میں لگا رہتا ہے۔”

رسول اللہ صلی اللہ علیہ وسلم راستے میں چل رہے ہوتے کوئی لونڈی آپ کو ٹھہرا لیتی اور کہتی :
مجھے آپ سے ایک ضروری بات کرنی ہے تو آپ کھڑے ہو کر اس کی بات سنتے۔ ایسا بھی ہوتا کہ آپ اس کے ساتھ اس کے آقا کے ہاں چلے جاتے اور اس کا مسئلہ حل کراتے۔

رسول اللہ صلی اللہ علیہ وسلم لوگوں سے میل جول رکھتے اور ان کے مصائب و آلام پر صبر کرتے تھے آپ کا لوگوں سے برتاؤ نہایت رحیمانہ تھا آپ انہیں اور اپنے آپ کو جسد واحد سمجھتے تھے غریب کی غربت، غمزدہ کے غم، مریض کے مرض اور محتاج کی محتاجی کا احساس رکھتے تھے۔

ایک دفعہ کا ذکر ہے کہ رسول اللہ صلی اللہ علیہ وسلم مسجد میں بیٹھے صحابۂ کرام سے باتوں میں مشغول تھے کہ دور سے چند لوگ آتے دکھائی دیے۔ وہ فقراء و مسکین تھے جو نجد کی جانب سے آئے تھے ان کا تعلق قبیلۂ مضر سے تھا۔ ناداری کی انتہا یہ تھی کہ انہیں کپڑے سلائی کرنے کو سوئی دھاگا بھی میسر نہیں تھا اور انہوں نے کپڑے درمیان سے چاک کر کے گردنوں میں لٹکا رکھے تھے اس ایک کپڑے کے علاوہ ان میں سے کسی کے پاس کوئی تہبند، عمامہ، شلوار یا چادر نہیں تھی۔
رسول اللہ صلی اللہ علیہ وسلم نے ان کی یہ عریانی، تنگ دستی اور بھوک دیکھی تو آپ کا رنگ فق ہو گیا فوراً کھڑے ہوئے گھر تشریف لے گئے لیکن کچھ نہ ملا آپ اس گھر سے نکلے اور دوسرے گھر میں داخل ہوئے ادھر بھی کچھ نہیں تھا پھر مسجد کی طرف چل پڑے۔ ظہر کی نماز پڑھائی اور منبر پر تشریف فرما ہوئے۔ اللہ تعالی کی حمدوثنا بیان کی اور فرمایا :
"اما بعد، اللہ تعالی نے اپنی کتاب میں فرمایا :
اے لوگو! اپنے رب سے ڈرو جس نے تمہیں ایک جان سے پیدا کیا اور اسی سے اس کی بیوی پیدا کر کے ان دونوں سے بہت سے مرد اور عورتیں پھیلا دیں۔ اللہ سے ڈرو جس کے نام پر ایک دوسرے سے مانگتے ہو اور رشتے ناتے توڑنے سے بچو بے شک اللہ تم پر نگہبان ہے۔ (سورۃ النسآء 1)
اے لوگو جو ایمان لائے ہو! اللہ سے ڈرتے رہو اور ہر شخص دیکھ لے کہ کل (قیامت) کے لیے اس نے( اعمال کا )کیا (ذخیرہ) بھیجا ہے اور (ہر وقت) اللہ سے ڈرتے رہو۔ یقیناً اللہ تمہارے سب اعمال سے با خبر ہے۔ (الحشر 18)

اسی طرح آپ آیات سنا سنا کے نصیحت کرتے رہے پھر فرمایا :
صدقہ کرو اس سے پہلے کہ تم صدقہ نہ کر سکو۔ صدقہ کرو اس سے پہلے کہ تمہیں صدقہ کرنے سے روک دیا جائے۔ ہر شخص اپنے درہم و دینار گندم اور جو کا صدقہ کرے اور کوئی صدقے کی کسی چیز کو حقیر نہ جانے۔
پھر آپ صدقے کی انوع گنواتے رہے۔ آخر میں فرمایا :
صدقہ کرو خواہ آدھی کھجور ہی کا ہو۔ اس پر انصار کا ایک آدمی اپنے ہاتھ میں ایک تھیلی لیے کھڑا ہوا اس نے وہ تھیلی منبر پر رسول اللہ صلی اللہ علیہ وسلم کو پکڑا دی۔ آپ کے مبارک چہرے پر خوشی کے آثار دکھائی دیے۔ مجلس برخاست ہوئی ۔ لوگ اپنے اپنے گھروں کو گئے اور صدقات لے کر آئے کوئی ایک دینار لے کر آیا تو کوئی ایک درہم۔ کوئی ایک کھجور لایا اور کوئی کپڑے۔ رسول اللہ صلی اللہ علیہ وسلم کے سامنے دو ڈھیر لگ گئے۔ ایک ڈھیر کھانے پینے کی اشیاء کا اور دوسرا کپڑوں کا۔ یہ منظر دیکھ کر آپ کا چہرہ دمکنے لگا گویا چاند کا ٹکڑا ہو۔ آپ نے یہ سارا سامان انہیں فقراء میں تقسیم کر دیا۔
جی ہاں!
رسول اللہ صلی اللہ علیہ وسلم لوگوں کی ضروریات پوری کر کے ان کے دل جیت لیتے تھے۔ آپ ان کے لیے اپنا مال، اپنا وقت اور اپنی کوشش صرف کرتے تھے۔
آپ بھی لوگوں کی ضروریات پوری کر کے اور ان کے کام آ کے اس راستے سے ان کے دلوں میں داخل ہو سکتے ہیں۔ بے لوث ہو کر کام آئیں وہ آپ سے محبت کریں گے۔ آپ کے لیے دعا گو رہیں گے اور جب کبھی آپ کو ضرورت پڑے گی آپ کی مدد کو آئیں گے۔

کسی عرب شاعر نے کہا تھا :
احسن الی الناس تستعبد قلوبھم
فظالما استعبد الانسان احسان
لوگوں سے اچھائی کرو تم ان کے دلوں کو اپنا غلام بنا لو گے۔ اکثر ایسا ہوتا ہے کہ احسان انسان کو اپنا بنا لیتا ہے۔

ایک عربی کہاوت بھی اسی حقیقت کی عکاسی کرتی ہے۔
(الانسان عبد الاحسان)
"انسان احسان کا بندہ ہے ۔”

الغرض پریشان اور ضرورت مند لوگوں کی حاجت براری کر کے ہم ان کے دلوں میں گھر کر سکتے ہیں اور مالک الملک کے پسندیدہ بندوں میں شامل ہو سکتے ہیں۔
بقول اقبال

خدا کے بندے تو ہیں ہزاروں، بنوں میں پھرتے ہیں مارے مارے
میں اس کا بندہ بنوں گا جسے خدا کے بندوں سے پیار ہو گا

"شاید کہ اُتر جائے تیرے دل میں میری بات ”

از قلم ایمان کشمیری

صد شکر کہ رمضان المبارک کا بابرکت اور سعادتوں والا مہینہ ہم پر پھر سے سایہِ فگن ہے ، یہ مہینہ اتنا بابرکت ہے کہ اس میں ہر نیکی کا اجر بڑھا کر سات سو گنا تک کر دیا جاتا ہے ، اس مہینے میں رب کی رحمت ، برکت اور مغفرت بے بہا ہو جاتی ہے ۔۔ اسی مہینے کے بارے میں ہی نبی پاک صلی اللہ علیہ وسلم کا فرمان ہے ناں کہ :

” اُس شخص کی ناک خاک آلود ہو ،جس پر رمضان آئے اور وہ گزر جائے مگر اِس کے گناہ معاف نہ ہوں ”

ناک خاک آلود ہونے سے مراد اللہ کی رحمت سے محرومی ہے، یعنی جس کے پاس رمضان کا مہینہ آیا مگر اُس نے اس مہینے میں رب کو راضی کر کے اپنے گناہ نہ بخشوائے تو وہ بہت بدقسمت ہے اور اللہ رب العزت کی رحمت سے محروم ہو جاتا ہے ۔۔۔
آپ سب جانتے ہیں کہ رمضان المبارک کے آنے سے پہلے ہم کرونا وائرس جیسی آزمائش میں مبتلا تھے، اِس نظر نہ آنے والے وائرس کا خوف اِس قدر طاری ہو چکا تھا کہ سب گھروں میں بند ہو گئے تھے ، سکول ، کالج، یونیورسٹیاں ،مدارس ، بازار یہاں تک کہ مساجد کو بھی بند کر دیا گیا تھا مبادا کہ کسی متاثرہ بندے سے دوسرے کو وائرس ٹرانسفر نہ ہو جائے ۔۔۔ قصہ مختصر کہ پوری دُنیا اس چھوٹے سے اور نظر نہ آنے والے وائرس کی وجہ سے سُنسان اور ویران ہو چکی تھی ۔۔ ہم مسلمان جو اس بات پر یقین رکھتے ہیں کہ کوئی مصیبت یا تکلیف نہ تو رب کی اجازت کے بغیر آ سکتی ہے اور نہ ہی جا سکتی ہے، چنانچہ ہم رمضان المبارک کا بڑی بے صبری کے ساتھ انتظار کر رہے تھے کہ جیسے ہی رمضان کا مبارک مہینہ شروع ہو گا رب اپنی بے پناہ رحمتوں اور برکتوں کے سبب ہم سے اِس آزمائش کو ختم کر دے گا ، ہم روزے کی حالت میں زیادہ رب کے قریب ہوں گے ، زیادہ سے زیادہ عبادت کریں گے ، رو رو کے اپنی عرضیاں رب کے حضور پیش کریں گے مطلب جتنی بھی سستی اور کوتاہی ہم سے گزشتہ زندگی میں ہو چکی ہم اِس مہینے میں اُس کا ازالہ کر لیں گے ۔۔۔
مگر افسوس ہوا کیا ،رمضان المبارک کا مہینہ تو شروع ہو گیا اور ہم جو رمضان المبارک کا بڑی بے صبری سے انتظار کر رہے تھے ترکی کے ایک سیریل ارطغرل میں مگن ہو گئے ، ہم بھول گئے کہ ہم کس مصیبت سے دو چار تھے اور ہمیں اِس مہینے کی کتنی ضرورت تھی ۔۔ آپ کے دل میں خیال آیا ہو گا کہ میں اِس سیریل کے دیکھنے پہ فتوٰی لگانے لگی ہوں ، ارے نہیں نہیں ۔۔۔ میں نہ تو کوئی عالمہ ہوں اور نہ ہی مفتیہ، میں اِس سیریل کو دیکھنے سے منع بھی نہیں کر رہی ،انڈین فلمیں اور ڈرامے دیکھنے سے تو بہتر ہے ایسے سیریل ہی دیکھ لیے جائیں ، مگر میں یہاں جس چیز کےلیے فکر مند ہو رہی ہوں وہ رمضان المبارک کا تیزی سے گزرتا ہوا مہینہ ہے ، ہاں وہی مہینہ جس کے روزوں کے بارے میں حدیثِ قدسی ہے کہ :

” روزہ میرے لیے ہے اور میں خود ہی اِس کا اجر دوں گا ”

مطلب رب نے سب عبادات کا اجر بتا دیا مگر روزے کا اجر چھُپا لیا اور کہا یہ میرا اور میرے بندے کا معاملہ ہے میں جتنا بھی چاہوں گا اُسے بڑھا چڑھا کے اجر دوں گا ، ذرا سوچیے جس روزے کا اجر رب نے اس طرح دینا ہو اُس کے کچھ تقاضے بھی تو ہوں گے ناں ۔۔۔
اب ہوا کیا ہم نے روزہ تو رکھ لیا مگر روزے کے تقاضوں کو یکسر بھول گئے ، ہم بھول گئے کہ ہمیں روزے کی حالت میں کن کن کاموں سے بچنا تھا ، ہم بھول گئے کہ ہمیں زیادہ سے زیادہ تلاوتِ قرآن پاک اور اذکار کی پابندی کرنی تھی ، ہم بھول گئے کہ ہمیں اپنی مناجات سے رب کو راضی کرنا تھا تاکہ وہ ہم پر آئی ہوئی آزمائش کو ختم کر دے ۔۔۔۔ ہمیں یاد رہا تو بس یہی کہ ارطغرل سیریل دیکھنا ہے تاکہ جذبہِ جہاد پیدا ہو ۔۔۔۔۔ ارے یہ کیسا جذبہِ جہاد ہے جس نے رمضان المبارک کی بابرکت ساعتوں کو کھا لیا ، یہ کیسا جذبہِ جہاد ہے جو رمضان المبارک کے مہینے میں لڑے گئے غزوؤں سے تو پیدا نہ ہوا اور اِس سیریل سے پیدا ہونے لگا ، یہ کیسا جذبہِ جہاد ہے کہ ہمارے مجاہدین روز دو ،دو ، چار کر کے شہید ہونے لگے اور ہمیں اُن کےلیے دُعا کی بھی فرصت نہ مل سکی ۔۔۔ ہمارے جوانوں کے ذہنوں میں تو حلیمہ کی ادائیں اور شاہینہ کی وفائیں ہی ثبت ہو کے رہ گئیں ، ہمارے جوانوں کو یاد رہیں تو بس شہناز خاتون کی عیاریاں اور عالیہ خاتون کی مکاریاں ۔۔۔
میں جانتی ہوں کہ میری بات بہت سے لوگوں کڑوی محسوس ہو گی مگر ساتھ یہ بھی دعوی سے کہتی ہوں کہ آپ کے ضمیر اِس بات کی گواہی دیں گے کہ سیریل کو دیکھتے ہوئے نوجوان کس چیز کی طرف زیادہ راغب ہوتے ہیں ،ارے دیکھنا ہی تھا تو رمضان کے بعد دیکھ لیتے مگر افسوس وہ لوگ جن کو اِس سیریل کی الف ب کا بھی نہیں پتہ تھا اُنہوں نے بھی عبادت سمجھ کے اِسے رمضان میں دیکھنا شروع کر دیا ۔۔۔۔ میں نے بغور مشاہدہ کیا کہ ہمارے نوجوان اِس سیریل کو دیکھنے کے بعد اِس میں موجود خواتین کا تذکرہ کرتے نظر آتے ہیں ، کچھ حضرات تو خواتین کی تصاویر اور ویڈیو کلپس اپنی ٹائم لائن پر لگا کر خود بھی لطف اندوز ہوتے ہیں اور دوسروں کو بھی کرتے ہیں ،،،،، میری بہنیں جنھوں نے کبھی اپنی تصویر فیس بک پر اپلوڈ نہیں کی تھی ،وہ بھی سیریل میں موجود خواتین کی تصاویر کو اپنی پروفائل پر لگا کر فخر محسوس کرتی ہیں ، عزیز بہنو!!! تھوڑا نہیں پورا سوچو کہ تمہاری پروفائل پہ لگی ایک غیر محرم عورت کی تصویر کو جب ہمارے جوان زوم کر کے دیکھیں گے اور اُن کے دِل میں بُرے خیالات پیدا ہوں گے تو کیا تمہیں ثواب ہو گا ؟؟؟
درست کہتے ہیں ہر چیز کے دو پہلو ہوتے ہیں ، اب یہ انسان پر منحصر ہے کہ وہ مثبت پہلو اپناتا ہے یا منفی ۔۔۔ جہاں تک میرا اندازہ اور مشاہدہ ہے تو ہمارا جھکاؤ اِس سیریل کے منفی پہلو کی طرف زیادہ ہے ، زیادہ دکھ اِس بات کا ہے کہ ہم نے اِس سیریل کو رمضانُ المبارک پر فوقیت دے دی ،،،، ارے سیریل تو رمضان کے بعد بھی دیکھا جاتا مگر کیا پتہ اگلا رمضان ہمیں نصیب ہو کہ نہ۔۔۔۔۔۔۔۔۔
دردِ دِل سے التجا کرتی ہوں ابھی بھی وقت ہے رمضانُ المبارک کی با برکت ساعتوں کا زیادہ سے زیادہ فائدہ اُٹھا لیں ، سیریل کو دیکھنا فی الحال ترک کر دیں ، رمضان کے بعد یہی کام ہوتے رہیں گے ، ابھی رب کو منانے کا وقت ہے ،ایسا نہ ہو کہ یہ قیمتی ساعتیں گزر جائیں اور ہم خالی ہاتھ ، نامراد رہ جائیں ۔۔۔۔۔۔۔۔ تو آئیے رب کی بارگاہ میں سب ہاتھوں کو اُٹھاتے ہیں ، سر کو جھکاتے ہیں ، اُسے مناتے ہیں کہ وہ ہم سے وائرس جیسی آزمائش کو دور کر دے ،،،،، میدانِ کارزار گرم ہے ہمارے کشمیری بھائی روز اپنے رب کو شہادتوں کے نذرانے پیش کر رہے ہیں ، ہم اُن کےلیے کچھ اور نہیں کر سکتے تو کم از کم رب سے اُن کی فتح ، نصرت اور مدد کےلیے التجا تو کر سکتے ہیں ناں ،،، اللہ ہمارے حال پر رحم فرمائے اور ہمیں سیدھے رستے پہ چلنے کی توفیق عطا فرمائے ۔۔۔۔۔ آمین یا رب المجاہدین، یا ارحم الراحمین ، ارحم لنا