Category: بلاگ

#سفیہِ برگ گل

انہوں نے کہا کہیں نظر نہ آنا
جواب ملا "ٹھیک ہے نہیں نظر آئیں گے لیکن کیوں” ؟
انہوں نے بتایا "تمہارا نام اور تمہارا ہر اچھا کام دنیا والوں کو چبھتا ہے”
جواب ملا "نام نہیں نظر آئے گا البتہ کام نہ رکنے والا ہے اور نہ رکے گا.”

پھر دنیا والوں نے دیکھا سب کچھ ختم کر دیا گیا . گھنے درختوں کی گھنی آور ٹھنڈی چھاؤں سے تمام مسافر اٹھا دئیے گئے اور اس سایہ چمن سے محروم کر دئیے گئے جو سالہا سال سے گرتے پڑتے تھکن سے چور مسافروں کو حوصلہ اور تسکین بخش رہا تھا.

اللہ کی مرضی اور اللہ کے فیصلے اللہ سے بڑھ کر اور کوئی نہیں جانتا
کرونا جنگ شروع ہوئی تو وہ گمنام مسافر اور بے نام راہی جو تپتے صحراؤں میں چلتے چلتے گھنی چھاوں والے درختوں سے محروم ہو کر ادھر ادھر بھٹک رہے تھے… منزل تک پہنچنے سے مایوس ہو رہے تھے نئے ولولوں کے ساتھ دوبارہ عازم سفر ہوئے. نیکی کبھی فنا نہیں کی جا سکتی. احسان کا بدلہ احسان سے بڑھ کر کچھ نہیں. وہ نیکی اور اچھائی کے درس جو امت کے نوجوانوں کے دل میں بٹھا دئیے گئے حالات کے اتار چڑھاؤ کے باعث اتنی جلدی مٹنے والے نہیں ہوتے. حکومتوں کے فیصلے بیشک بجا ہو گے لیکن یہ بھی تو حقیقت ہے
افراد کے ہاتھوں میں ہے اقوام کی تقدیر
ہر فرد ہے ملت کے مقدر کا ستارہ….!

کرونا وائرس کی اس جنگ میں جس وقت حکومتی ایوانوں میں ٹائیگرز فورس کے ابھی صرف مشورے چل رہے تھے…. اس وقت "تلہ گنگ کرونا فائیٹرز” میدان میں اتر چکے تھے . جس وقت ٹائیگرز فورس کی شرٹیں پرنٹ ہو رہی تھیں کرونا فائیٹرز ایک تاریخ رقم کر رہے تھے. تلہ گنگ کا ایک نوجوان….. ایک سرکاری سکول ٹیچر اٹھا اور اپنے چند رفقاء کے ساتھ ملکر کرونا وائرس کی اس جنگ میں ہراول دستہ بن کر سامنے آیا. اور میڈیا پر ایک بار پھر یہ تاریخی الفاظ گونج گئے کہ” کسی بھی حادثے میں جہاں ابھی فوج اور سرکاری ادارے نہیں پہنچتے یہ لوگ وہاں پہلے پہنچ جاتے ہیں ”

ایک سرکاری سکول ٹیچر کو کسی "اچھے کام” سے نہ تو روکا جا سکتا اور نہ ہی اس پر انگلیاں اٹھائی جا سکتی ہیں . کیوں کہ وہ سرکاری بندہ ہے. وہ "ہم” میں سے ہی ہے اس لیے جو اس کے ساتھ ہے وہ بھی” ہم” میں سے ہی ہے.

سفیہِ برگِ گل بنا لے گا قافلہ مورِ ناتواں کا
ہزار موجوں کی ہو کشاکش مگر یہ دریا سے پار ہو گا

خدا کے بندے تو ہیں ہزاروں بنوں میں پھرتے ہیں مارے مارے
میں اس کا بندہ بنوں گا جس کو خدا کے بندوں سے پیار ہو گا

(اللہ تعالیٰ عرفان صادق صاحب اور ان کے رفقاء کو ریاکاری اور ہر قسم کے فتہ و فساد سے محفوظ رکھے )

#رنگِ_سفیر

اصل حقدار کون؟؟؟

سورج ڈھل چکا تھا سائے لمبے ہوکر معدوم ہونے کے قریب تھے اور شام اپنا سحر طاری کرنے کو تھی ایسے میں راولپنڈی کے ایک غیر معروف چوک میں ایک دوست کا انتظار کرنے کیلئے جیسے ہی گاڑی روکی تو مختلف اطراف سے چند بظاہر مزدور نظر آنے والے لوگ میری گاڑی کے شیشوں سے مجھ سے مخاطب ہونے لگ گئے بھائی صبح سے بیٹھے ہیں مزدوری نہیں ملی کچھ راشن ہی دے دیں۔

چونکہ پچھلی سیٹ پر پڑے راشن کے پیک شاید ان کو نظر آ گئے تھے۔

میں ان کی مفلوک الحالی اور چہروں پر طاری مسکینیت سے متاثر ہوکر ان لوگوں کو راشن دینے کا ارادہ کر ہی چکا تھا لیکن اس سے قبل میں نے ان چاروں مزدوروں سے کہا کہ آپ سب میرے ساتھ گھر چلو تھوڑا سا کام ہے معقول مزدوری بھی دوں گا اور راشن بھی۔ بس میرا اس بات کا کہنا ہی تھا کہ وہ سب پیشہ ور بھکاری جو بظاہر مزردورں کے کیل کانٹوں سے لیس تھے مجھ سے پیچھے آکر رکنے والی پراڈو کے اردگرد ہوگئے اور چند منٹ میں اس گاڑی میں موجود خدا ترس خاتون سے بھاری بھرکم راشن کے پیک لیکر رفو چکر ہو چکے تھے۔

وہ راشن پیک دینے والی خاتون ان کو راشن تو دے چکی تھی لیکن نہ جانے کہاں سے چند لمحوں میں ہی درجنوں مانگنے والے مرد وزن اس کی گاڑی کو گھیرے کھڑے تھے اور اس خاتون سے اپنے بھوکے بچوں کا واسطہ دیکر راشن پیک مانگ رہے تھے۔ اور اس خاتون کے ہاتھ پیر پھول چکے تھے کہ ان مانگنے والوں سے کیسے جان چھڑائے۔ اور پھر اس خاتون کو اپنے پرس سے سو سو کے نوٹ نکال کر ان مانگنے والوں و دیکر بمشکل جان چھڑانے پڑی۔

یہ تو ایک چھوٹے سے چوک کا منظر تھا شہر کے مصروف چوکوں پر مزدوروں کی لگی لمبی لائنیں اور اسلام آباد کی سڑکوں کنارے بیٹھے یہ نام نہاد مزدور یقیناً ایسے سہل پسند خرچ کرنے والوں کے منتظر ہوتے ہیں جو آتے ہیں اور اپنی بڑی گاڑیوں کے شیشے کھول کر ان مزدوروں کے ہاتھوں میں پیسے تھما جاتے ہیں۔

یہ خرچ کرنے والے اپنے تئیں نیکی تو کر رہے ہوتے ہیں لیکن نہ جانے کتنے لوگوں کو پیشہ ور بھکاری بنا رہے ہوتے ہیں اور ان بھکاریوں کی وجہ سے وہ سفید پوش لوگ جو مانگ نہیں سکتے ان خرچ کرنے والوں کے تعاون سے محروم رہ جاتے ہیں۔

میری خرچ کرنے والے تمام احباب سے درد مندانہ اپیل ہے کہ آپ خرچ کریں ضرور کریں لیکن اس میں اپنی سہل پسندی تلاش نہ کریں بلکہ تھوڑی سی تکلیف برداشت کر کے سفید پوش افراد کو تلاش کر کے ان تک راشن پہنچائیں کہ وہ مانگ بھی نہیں سکتے اور انتہائی مجبور بھی ہیں۔ خرچ کرنا اصل کام نہیں ہے بلکہ صحیح جگہ خرچ کرنا اصل کام ہے۔

خیراتی اداروں اور فلاحی تنظیموں کے افراد سے گزارش ہے کہ کچی آبادیوں تک ضرور پہنچیں لیکن یہ بات بھی مدِ نظر رکھیں کہ ہر تنظیم یا ادارہ بظاہر ان کچی بستیوں کو ہی ہدف بناتے ہیں تو ایسے میں وہ سفید پوش گھرانے کہ جن کے کفیل موجودہ حالات کی وجہ سے بے روزگار ہوکر گھروں میں محصور ہیں اور ان کی عزتِ نفس گوارا نہیں کرتی کہ کسی سے سوال کریں ان تک اپنا تعاون بہر صورت پہنچائیں۔ کہ کہیں ایسا نہ ہو کہ حالات اس حد تک پہنچ جائیں کہ یہ سفید پوش طبقہ حالات سے تنگ آ کر کوئی انتہائی اقدام کرے۔ ہاں ہمیں پہچاننا ہوگا اس سفید پوش طبقہ کو اور بچانا ہوگا انہیں بھی بھکاری بنانے سے

پاکستان اپنی تاریخ کے شدید ترین بحران سے گزر رہا ہے

وزیرِ اعظم پاکستان کی تاریخ کے سب سے بڑے ریلیف پیکج کا اعلان کر چکے ہیں لیکن تاحال اسکی تقسیم کا طریقہ کار وضع نہیں کر سکے ہیں

ایسے میں ان خدائی خدمت گاروں کی بہت یاد ستاتی ہے کہ جنہیں جرم محبت کی سزا دی گئی ہے جن کے قائدین پابند سلاسل ہیں اور انہیں کام سے روک دیا گیا ہے

ہاں مجھے اقوام متحدہ کی طرف سے ان کو دی گئی زلزلہ میں امداد یاد آتی ہے کہ دنیا کے سب سے بڑے ٹھیکیدار ایسے افراد نہیں رکھتے کہ وہ ان دور دراز علاقوں میں امدادی سامان پہنچا سکے

ہاں مجھے اپنے کندھوں پر سامان اٹھا کر ناقابلِ رسائی علاقوں تک پہنچنے والے وہ افراد یاد آتے ہیں کہ جنہیں اس کام کے کرنے میں کوئی دنیاوی لالچ نہیں بلکہ رب کی رضاء کارفرماء تھی

مجھے ان پر امید چہروں کی خوشی سے چمکنے والی وہ آنکھیں یاد آتی ہیں کہ جو کئی دنوں بعد ان کے فیلڈ ہسپتالوں میں پہنچ جانے کے بعد بے فکر ہو جاتے ہیں کہ پاکستان کے نامور ڈاکٹر عامر عزیز اب انکے بچ جانے والے اعضاء کو کٹنے سے بچا لے گا

ہاں پھر منظر بدلتا ہے۔۔۔

2010 کے سیلاب میں ان خدمت گاروں کی امداد کے نتیجہ میں اور ان کے حسن سلوک سے متاثر ہوکر درجنوں ہندو خاندانوں کے اسلام قبول کرتے وقت کے وہ منظر یاد آتے ہیں۔

مشکل ترین وقت میں ان کی واٹر ریسکیو کرنے والی بے سرو سامان مگر بلند عزم و ہمت والے پہاڑوں جیسے بلند ارادے رکھنے والے دن رات ایک کرنے والی وہ ٹیمیں یاد آتی ہیں کہ جن کا مطمع نظر فقط اس ذاتِ باری تعالٰی کی بارگاہ میں سرخروئی ہے۔

نہ ختم ہونے والی یادوں کا ایک سلسلہ ہے کہ میں لکھنا چاہوں تو شاید لکھ نہ پاؤں۔ ہاں مگر ان پر پابندیاں تو لگا دی ہیں لیکن ان کو ہمارے دلوں کی دیواروں پر کنندہ یادوں سے کون کھرچ سکے گا؟؟؟

اب ایسے میں جب کہ حکومت امداد دینے اور پہنچانے میں بے بس نظر آرہی تو ان کی یاد شدید تر ہوتی جا رہی کہ وہ جن کے بے لوث کارکن ہر گلی محلہ میں موجود تھے اور اپنے ارد گرد کے غرباء اور سفید پوشوں سے واقفِ حال تھے کہ ایسے میں ان سے بہتر کوئی کام نہیں کر سکتا تھا۔

مگر نہیں بھائی آپ ان کا نام بھی نہیں لے سکتے ہیں ان کا نام لینے پر بھی پابندی ہے۔ لیکن ان کو یاد کرنے پر تو کوئی پابندی نہیں ہے نا کہ وہ تو ہمارے دلوں میں بستے ہیں نا۔

ہاں اے خدائی خدمت گارو۔۔
ہم مصیبت کے ہر لمحہ میں تمہیں یاد تو کریں گے۔۔۔

لیکن ہم مجبور ہیں کہ سرِ عام تمہارا نام نہ لے پائیں گے۔۔۔

پہاڑوں جیسے بلند حوصلے رکھنے والے ان خدائی خدمت گاروں سے میری مراد فلاح انسانیت فاؤنڈیشن ہے

شام 7 بجے کے بعد جونہی اندھیرا چھایا، میرے گاوں کی گلیوں میں موٹرسائیکلوں کی آوازیں آنے لگیں، اہل علاقہ نے نوجوانوں کو جلی کٹی سنائیں کہ ملک میں لاک ڈاون ہے اور انہیں گھر آرام نہیں، مگر یہ نوجوان اپنی تفریح کیلئے ہرگز نہ نکلے تھے، ان کے ہاتھوں میں تھیلے تھے اور وہ گاوں کے اندر گشت کررہے تھے

ان کے ہاتھ میں ایک فہرست تھی، وہ فہرست دیکھ کر دروازہ بجاتے اور اس سے قبل کہ اندر سے کوئی آتا، دروازہ کھول کر نیلے رنگ کا تھیلا اندر رکھتے اور آگے چل پڑتے، نہ تصویر، نہ پہچان، نہ دکھاوا نہ ہی احسان، یہ فاروقی سنت پر رمل پیرا نوجوان انتہائی رازداری سے آہستہ آہستہ 115 گھروں میں تھیلے پہنچا آئے۔

گاؤں سے تھوڑا ایک سائیڈ پر ایک گھر کا انتخاب کیا گیا جہاں راشن کی پیکنگ کی گئی، کسی کو خبر نہ ہوئی۔ اسکے بعد اندھیرے کا انتظار کرکے تقسیم کردیا گیا تب بھی کسی کو خبر نہ ہوئی۔ جس کسی نے دیکھا اس نے بھی صبح یہی بتایا کہ سفید ماسک والے نوجوان راشن دے گئے۔

ایک گاؤں میں اتنے ہی انتہائی ضرورت مند ہوتے ہیں جن کی ضرورت پوری ہوگئی۔ اس سے قبل ہمارے گاؤں میں ایک صاحب استطاعت نے 3 لاکھ روپے تقسیم کیے، مبلغ 2000 فی گھر دئیے گئے۔ یہ میرا گاؤں ہے جس میں گزشتہ پانچ سال سے زائد عرصہ سے ہر ماہ میں دوبار فری طبی کیمپ لگتے ہیں، یہاں بیماریاں کم ہیں، غربت کم ہے، پڑھے لکھے لوگ 90 فیصد سے زائد ہیں۔

اب اس گاؤں کو نہ ٹائیگر فورس کی ضرورت ہے نہ حکومت کی امدادی فنڈز کی۔ اخوت کی یہ مثال دوسروں کیلئے مشعل، حکومت کا انتظار کیے بغیر اپنے حصے کے دیپ جلائیں تاکہ کوئی بھوکا نہ سوئے، کوئی غربت سے تنگ و مجبور نہ ہو اور سب سے بڑھ کر عزت نفس مجروع نہ ہو۔

اقوام عالم کشمیریوں کے خلاف بھارت کی آئینی دہشت گردی کا نوٹس لے: الطاف حسین وانی

ڈومیسائل رولز بارے ترامیم کشمیر کی آبادی کے تناسب کو تبدیل کرنے کی سازش ہے

اسلام آباد: انسانی حقوق کے عالمی اداروں سے کشمیریوں کے خلاف ہندوستان کی آئینی دہشت گردی کا موثر نوٹس لینے کی اپیل کرتے ہوئے معروف سیاسی و سماجی رہنما اور نیشنل فرنٹ کے سینیر وائس چیرمین الطاف حسین وانی نے ڈومیسائل رولز میں ترمیم سے متعلق ہندوستانی وزارت داخلہ (ایم ایچ اے) کے حالیہ نوٹیفکیشن پر کڑی تنقید کا نشانہ بناتے ہوئے اس سے کشمیری عوام کے خلاف ایک گہری سازش قرارد دیا ہے جس کا مقصد مسلم اکثریتی ریاست کی جداگانہ حیثیت اور شناخت کو کمزور کرنا ہے۔

وانی نے بدھ کے روز یہاں جاری ایک بیان میں کہا، ‘کشمیر مخالف قانون دراصل بی جے پی حکومت کی اس گھناؤ نی سازش کی ایک کڑی ہے جس کے تحت مودی سرکار آر ایس ایس کے دیرینہ مطالبے پر عمل کرتے ہوئے مسلم اکثریتی ریاست جموں و کشمیر میں آبادی کے تناسب کو تبدیل کرکے مقبوضہ خطے کی منفرد اور جداگانہ حیثیت کو ختم کرناہے

یہاں یہ امر قابل ذکر ہے کہ، ڈومیسائل رولزمیں حالیہ ترامیمی ایکٹ کے تحت، کوئی بھی شخص جو 15 سال تک جموں و کشمیر میں مقیم رہا ہے یا اس نے ریاست میں سات سال تعلیم حاصل کی ہے، اور کلاس 10 یا کلاس 12 کی امتحان میں حاضر ہوا ہے، وہ ڈومیسائل سرٹیفکیٹ کے اہل ہوگا۔. نوٹیفکیشن کے مطابق، نئے قانون کے تحت وہ گیزیٹیڈ اور نان گیزیٹیڈ پوسٹ لیول کی سرکاری ملازمتوں کے لئے درخواست دے سکے گے۔

ایم ایچ اے کے آرڈر کو آرٹیکل 35 اے اور 370 کے خاتمے کا تسلسل قرار دیتے ہوئے وانی نے کہا کہ کشمیر کے ڈومیسائل قانون میں حالیہ ترمیم غیر کشمیری اور غیر ریاستی باشندوں کو کشمیر میں آباد کرنے کا ایک منظم منصوبہ ہے۔

وانی نے آرٹیکل 35 اے کو منسوخ کرنے کے پیچھے ہندوستان کے محرکات کا ذکر کرتے ہوئے کہا، ”جہاں تک ریاست میں غیر ریاستی باشندوں کو آباد کرنے کے ہندوستانی منصوبے کا تعلق ہے تو آرٹیکل 35-A واحد آئینی اور قانونی رکاوٹ تھا جس سے مودی سرکارکشمیر میں اپنے ایجنڈے کی تکمیل میں رکاوٹ سمجھتی تھی”۔ ”اس تازہ حکم کی بدولت، ہندوستان نے عملی طور پر بیرون ملک مقیم افراد کو ریاست میں مستقل طور پر آباد ہونے کے علاوہ جموں و کشمیر میں پہلے سے موجود ملازمتوں کے دعویدار بننے کے لئے بھی راہ ہموار کردی ہے، جہاں بڑھتی ہوئی بے روزگاری ایک سنگین مسئلہ بن کر ابھری ہے۔ جے کے این ایف رہنماؤں نے مزید کہا کہ یہ ایکٹ ان مقامی نوجوانوں کے مفادات کے خلاف ہے جن کو متعدد مشکل چیلنجوں کا سامنا ہے جن میں سے بے روزگاری وہ ایک بنیادی مسئلہ ہے جس کا وہ گذشتہ کئی برسوں سے سامنا کررہے ہیں۔

انکا کہنا تھا کہ نئے قانون کے متنازعہ علاقے جموں و کشمیر میں ملازمت حاصل کرنے والے بیرونی افراد ریاست میں زمین خریدنے کے حق کا بھی دعوی کریں گے۔ انہوں نے اسے ریاست میں آبادیاتی تبدیلیوں کا آغاز قرار دیتے ہوئے کہا کہ جموں وکشمیر سول سروسز ایکٹ میں ترمیم سے ہزاروں کشمیری بے روزگار ہوجائیں گے۔ جموں و کشمیر املاک کے حقوق کو کچی آبادیوں کے ایکٹ 2012 میں ہونے والی ترامیم کے بارے میں انہوں نے کہا کہ ”جموں و کشمیر کے مستقل رہائشیوں ” کے الفاظ کو ایکٹ میں جان بوجھ کرحذف کر دیا گیا ہے، اس کا مطلب ہے کہ جموں و کشمیر میں کچی آبادی کو مناسب مکانات مل سکتے ہیں۔

وانی نے کہا حالیہ ترامیمی ایکٹ ایک سنگین معاملہ ہے جس کے ذریعے بھارت اسرائیلی طرز پر کشمیر میں غیر ریاستی باشندوں کے لئے الگ کالونیاں قائم کرنا چاہتا ہے۔انکا کہنا تھات کہ۔ ہندوستانی حکومت کشمیریوں کو زیر اورانہیں اپنے تابع لانے کے لئے ان سے سب کچھ چھیننے پر تلا ہوا ہے۔ انسانی حقوق کے عالمی اداروں کو کشمیریوں کے خلاف ہندوستان کی آئینی دہشت گردی کا موثر نوٹس لینے کی اپیل کرتے ہوئے انہوں نے کہا کہ کشمیر مخالف قوانین نہ صرف انسانی حقوق کے عالمی اعلان کی خلاف ورزی ہے بلکہ اقوام متحدہ کی قرارداد کی بھی خلاف ورزی ہے۔ جو ہندوستان اور پاکستان دونوں کو متنازعہ علاقے کی حیثیت میں ردوبدل سے واضح طور پر منع کرتا ہے۔ انہوں نے کہا کہ ہندوستان ایک جابر ریاست کے طور پر دنیا کے سامنے ابھر رہی ہے جس کا بین الاقوامی قوا نین اور معاہدوں کی خلاف ورزی کرنا وطیر ہ بن چکا ہے
For more information, please contact Altaf Wani (+41 77 9876048 / saleeemwani@hotmail.com)