Category: بلاگ

موسم کافی سرد تھا۔ : بقلم جواد سعید
سردی سے تمام جاندار اپنے بلوں میں دبک چکے تھے۔ہر طرف ہو کا عالم تھا۔سناٹا ہلکی ہلکی آواز کو اونچا سنا رہا تھا۔سڑک پر ٹریفک ندارد۔
لیکن پھر بھی وہ ان سب سے بے پرواہ آستین چڑھائے سڑک پر خورد بین جیسی نطریں مرکوز کیے آوارہ گردی کررہا تھا۔
مشغلے کے طور پر بکھرے پتھر خالی بوتلوں کو وہ اپنی ٹھوکروں سے ہٹا رہا تھا۔
اسکی حرکات اسکے مضطربانہ چال کو واضح کر رہی تھیں۔دیکھنے پر محسوس ہوتا جیسے سوچ وبچار کے سمندر میں غرق ہے۔
حیرانگی تب ہوتی جب وہ خیالاتی سمندر سے منہ نکال کر اپنی دائیں بائیں طرف سلسلہ مکانات پر نظریں گھماتا۔
پھانسی پر لٹکے بلبوں کی بجھتی بجھتی لائیٹیں انکے مکینوں پر دلالت کررہی تھیں۔
اور میں تھا کہ مجھے یہ معمہ سمجھنے کا اشتیاق بڑھ رہا تھا۔
اب وہ نظروں سے اوجھل ہونے لگا۔میں نے بھی پیچھا کرنے کی ٹھان لی۔
انگلش فلموں کی طرح خود کو پروفیشنل جاسوس سمجھتے ہوئے مبالغہ آمیز احتیاط سے اسے فالو کرنے لگا۔
جتنا میں خود کو چھپا رہا تھا اتنا ہی انجانا سا ڈر ذہن میں سما رہا تھا۔چلتے چلتے اگر کسی روشنی کی زد میں آ جاتا تو اپنا ہیولہ ہی جان نکال دیتا ۔
اب وہ آخری مکانوں سے گزر رہا تھا۔اسکی چال قدرے سست ہو چکی تھی اور وہ مسلسل بے چین نظر آ رہا تھا۔اسکی بے چینی اسکی حرکتوں سے عیاں تھی کبھی سڑک پر نظریں گاڑ لیتا کبھی مکانوں کی روشنیوں کی سمت دیکھتا اور کبھی آگے پیچھ دیکھتا کوئی دیکھ تو نہیں رہا۔
یہ کیا۔۔۔
وہ سڑک پر جھک چکا تھا اور اپنے ہاتھوں سے کوئی چیز ٹٹول رہا تھا۔
میں مسلسل حیرانگی کو موجوں میں غرق تھا۔
اب وہ ٹانگوں کے وزن پر بیٹھا نظر آیا۔اور اپنے ہاتھوں ٹانگوں کے بل چوپائے مانند آگے سرکتا دکھائ دیا۔اور اچانک اسنے کسی چیز کو چھوا ہی تھا کہ وہ اچھل کر کھڑا ہو گیا جیسے کسی معصوم کے بیٹھنے سے پہلے اسکی سیٹ پر نوک دار چیز رکھ دی جائے۔جیسے وہ اچھلتا بالکل اسی طرح۔لیکن وہ تو تکلیف کی شدت سے اٹھتا ہے اور یہ صاحب خوشی سے جھوم رہے تھے۔
اسی دوران پون گھنٹہ گزر چکا تھا۔
تھک ہار کر فلمی دنیا سے باہر آیا اور نارمل ہو کر تیزی سے اس کے قریب جانے لگا۔
مجھے اپنے قریب پا کر وہ بوکھلا سا ہو گیا۔
وہ قدرے سانولا ہٹا کٹا نوجوان تھا۔
علیک سلیک کے بعد میں نے اسے کہا بھائ گھنٹے بھر سے آپ کو دیکھ رہا کیا ماجرا ہے۔کس پریشانی میں مبتلاء ہیں اور اس خوشی کی وجہ کیا ہے۔؟؟؟
وہ یوں گویا ہوا
میری آتے ہوئے موٹر سائیکل کی چابی گر گئ تھی۔
اس سے تھوڑا آگے میں نے چابی موٹر سائیکل کو لگی دیکھی تھی۔
اسلیے میں اسے ڈھونڈ رہا تھا۔😲۔

گھنٹہ خوار ہونے کے بعد اب میں واپسی نکل پڑا۔
مجھے اپنے حساس اور ویلے ہونے کا بخوبی اندازہ ہو رہا تھا۔
اور سوچ رہا تھا بیوی کا ڈنڈا کتنی عظیم نعمت ہے بندے کو ٹائم سے گھر تو پہنچا دیتا۔ چاہے راستے میں لاکھوں لڑائیاں حادثات نظر انداز کر کے ہی کیوں نہ پہنچنا پڑے۔
لیکن کیونکہ انگور کھٹے ہیں۔اسلیے کنوارہ پن عظیم نعمت ہے۔

مولانا فضل الرحمن سے بطور پاکستانی کچھ سوالات؟

(1)آپ کہتے ہیں کہ ہم پاکستان کے مفاد بقاء کیلئے دھرنا دیں گے۔
آپکو یاد ہو گا۔دوسال قبل جمیعت علمائے اسلام ہند کے قائم ہوئے سو سال گزرنے پر آپ نے ایک جشن منایا تھا۔؟؟؟؟
یاد رہے یہ وہی جمیعت ہے جس نے پاکستان بننے کی پرزور مخالفت کی تھی۔
اور انھوں نے ہی گیارہ ستمبر کو قراردادیں منظور کروائیں تھیں۔ایک کشمیر کی صورتحال بہتر کی جائے۔دوسری کشمیر معاملے میں مداخلت کسی کی بھی قبول نہیں۔چاہے پاکستان ہو۔کیونکہ کشمیر بھارت کا اٹوٹ انگ ہے۔
اور یہی 1951 1963. 2009 میں بھی کہا گیا اور اب بھی انکا اقرار یہی ہے کہ بھارت جیسا چاہے کرے پاکستان کو مداخلت کا حق نہیں ۔
تو ایسی جماعت کا جشن آپ کیوں مناتے جو بغض پاکستان مسلمان میں اندھی ہو چکی۔؟؟
آپ تو کشمیر کمیٹی کے چئیرمین بھی رہے پھر بھی ان سے اتنی محبت۔؟؟
دوغلا پالیسی یا ہم سے منافقت. ایک مطلب تو ہے
ان سب کے بعد بھی آپکو کب سے پاکستان کا مفاد دکھنے لگا؟؟؟؟

(2) جب نواز شریف نے قادیانیوں کا بھائ بہن کہا اور خدا تعالی اور بت بھگوان کو ایک کہا ۔تب آپ کدھر تھے آپکا علم کدھر تھا۔؟؟؟؟

(3)نواز حکومت نے جب ختم نبوت ترمیم کو چھیڑا تب آپکے بیان کدھر تھے۔؟؟؟

(4)کارگل جیسے فیصلے پر کیوں چپ رہے؟؟

(5)ن لیگی پرویز رشید نے جب مدارس کو جہالت کی فیکٹریاں کہا تب آپ کیوں نہ نکلے؟؟

(6)باجوڑ مدرسے شہادتیں ہوئیں تب آپکے بیانات اقدامات کیا تھے؟؟؟

(7)ٹی ٹی پی۔خوارج۔طالبان۔سب معصوم ۔فوج ظالم۔ ضرب عضب کے شہداء کو کبھی شہید کہہ سکتے ہیں؟؟ من پسند حکومت کے ہوتے ہوئے بھی دھماکوں سے شہید افراد پر آپکی کیا رائے تھی۔؟؟؟؟؟صرف ایک بیان خوارج ٹی ٹی پی کیخلاف دے دیجئے ہم آپکو مولانا مان لیں گے؟؟؟؟؟

ایسا نہیں ہے کہ عمران خان بڑا چنگا ہے اسکا دھرنا ٹھیک تھا برحق تھا وغیرہ وغیرہ ہمیں کسی سیاسی سے اندھی محبت نہیں۔
جو بھی اچھے عمل کرے گا ہم اسے سراہیں گے۔
اور جو بھی غلط عمل۔غلط قدم اٹھائے گا اسے ہم ٹوکے گیں روکے گیں۔

بابا جی جواد کہا کرتے ہیں۔
جب ماضی سب کا ایک جیسا ہو تو ماضی کا طعنہ دینا اور دوسرے کے غلط قدم کو دلیل بنا کر دوبارہ دہرانا بھی منافقت پاگل پن سے کم نہیں۔
(8)اگر عمران نے دھرنا دیا تھا تو وہ بقول آپکے چول غداری تھی تو آپ کے دھرنے کو کیا حج عمرے کا ثواب ملناہے۔؟؟؟؟؟؟

جوادسعید

کیسی بیماری کہ اجر بھی نہیں۔۔۔؟؟؟ تحریر:جویریہ چوہدری
قارئین!
ایک بندہ مومن کے لیئے اللّٰہ تعالی نے ہر تکلیف،پریشانی اور بیماری پر اجر رکھا ہے یہاں تک کہ اسے کانٹا بھی چبھے تو اس پر بھی اجر ہے۔
مگر یہ کیسی بیماری ہے کہ انسان اپنے آپ کو کھپا دے،گھلا دے مگر اجر بھی نہیں۔۔۔؟؟؟
کون سی ہے وہ بیماری؟
جی وہ بیماری ہے حسد کی۔۔۔!!!!
حسد کی بیماری ایک ایسی قدیم بیماری ہے جو جسم کو تیزاب کی طرح راکھ کر دیتی ہے،ڈیپریشن کا مریض بنا دیتی ہے،روگ لگا دیتی اور حسنات چھین لیتی ہے،
سکون معدوم،
خوشیاں مفقود کردیتی ہے۔۔۔
حاسد ہمیشہ محسود سے زوالِ نعمت کا متمنی رہتا ہے اور پھر بے سکونی،عدم برداشت،رنج وکدورت،بے مقصد زندگی معمول بن جاتے ہیں۔
کوئی فلاں کے پاس بیٹھا کیوں؟
فلاں سے بولا کیوں؟
فلاں کے ہاں کیوں گیا وغیرہ۔۔۔
اور یوں حسد کرنے والا سب سے پہلے خود کو ہی مار دیتا ہے۔۔۔ !
ڈاکٹر کارل مانینگز ایک نفسیاتی معالج کا کہنا ہے کہ:
"ڈاکٹر مانینگز تمہیں اضطراب سے بچنے کے قواعد نہیں بتائے گا بلکہ ایک وحشت ناک رپورٹ دے گا کہ کیسے ہم اپنے جسموں اور عقلوں کو قلق و اضطراب،حسد،خوف اور تحقیر جیسی آفتوں سے توڑ کر رکھ دیتے ہیں۔
حاسد کی مصیبت یہ ہوتی ہے کہ وہ رب کے انصاف پر شک کرتا ہے،وہ خود کو عبث تھکاتا ہے،خون جلا کر،نیند اُڑا کر خود کو تباہ کرتا ہے،
گھر ہو یا دفتر،
سکول ہوں یا ہسپتال،
جامعات ہوں یا مدارس،
حسد سے بندہ تب ہی محفوظ رہ سکتا ہے جب وہ "جیسا اور جسطرح "ہر حال میں الحمدللہ کی کیفیت کو اپنا لیتا ہے۔۔۔
اپنی صورت،لباس،گھر،روزگار،آسائشات کو من و عن تسلیم کر لینے پر آمادہ ہو،
اللّٰہ کی تقسیم پر راضی اور مطمئن ہو۔
کسی کے گھر،گاڑی،یا سہولیات پر نظر ہی نہ ہو۔۔۔۔
کہ یہ دنیا بہت عارضی اور ناپائدار ہے۔۔۔تو غم کیسا؟
یہاں بہت کچھ ادھورا رہ جاتا،اگر یہ سمٹ کر ایک انسان کے پاس بھی آ جائے تو بالآخر فنا ہی اس کا مقدر ہے۔
یوں سوچئے کہ بس میرے پاس جو کچھ بھی ہے،اللّٰہ نے مجھے جس قابل سمجھا اور دیا بس پرفیکٹ ہے۔۔۔ !!!
مجھے دنیا والوں سے کچھ نہیں لینا اور کچھ نہیں سوچنا۔۔۔۔
ذرا دیکھیئے!
صحابہ کرام کا دور بلاشبہ دنیا کا بہترین دور تھا اور قیامت تک کے لیئے ویسا دور دوبارہ نہیں لوٹنا،مگر ان کی زندگی کیسی تھی؟
آسانی،
سادگی،،
عدم تکلف،،،
بابرکت علم تھا اور عمل کی دولت تھی۔۔۔
متاع دنیا کم سے کم اور نتیجتاً راحت و سعادت اور اطمینان کی دولت تھی۔
انقلاب محمدی صلی اللّٰہ علیہ وسلم کے ابتدائی دور میں علم وحی اور ہدایت ربانی کا عَلم جن لوگوں نے اٹھایا وہ فقیر ومحتاج تھے اور دعوت حق کی مخالفت میں پیش پیش رہنے والے رئیس اور ثروت مند مگر رضوان کن کو ملی؟
یہ حسد حق پرست فقیروں سے بھی ہوتا رہا ہے
یہ دنیوی اسباب اللّٰہ کے ہاں مچھر کے پر جتنی حیثیت بھی نہیں رکھتے،
چنانچہ ان چیزوں کی چاہ میں خود کو حسد میں دھکیلنے کی بجائے اپنی زندگی میں نظم و ضبط کی عادت ڈالیئے۔
ولیم جیمس کہتا ہے:
"ہم انسان ان چیزوں کے بارے میں سوچتے رہتے ہیں جو ہماری ملکیت نہیں ہوتیں،اور جو پاس ہوں ان کی قدر نہیں کرتے۔۔۔؟
نبی کریم صلی اللّٰہ علیہ وسلم نے ارشاد فرمایا:
آدمی کے دل میں ایمان اور حسد جمع نہیں ہو سکتے۔(رواہ النسائی)
کبھی فرمایا:”لوگوں میں افضل وہ ہے جس کے دل میں بغض و حسد نہ ہو۔(ابن ماجہ)
تو سوچئے کہ اگر ہمیں حسد کا مرض لاحق ہو گیا تو پھر ایمان کی خیر منانی چاہیئے اور اگر ایمان کامل ہے تو پھر حسد کا جذبہ کبھی نہیں ابھرے گا،
کسی کا دکھ ہمارا دکھ،
کسی کی خوشی ہماری خوشی ہو گی۔۔۔
آئیے عہد کریں کہ اس تکلیف میں خود کو کیوں تڑپائیں جو ممنوع ہے،
اپنی زندگی میں جینے کا ہنر سیکھیں،
محبت،خوشبو اور پھولوں کی سوداگری کریں،
کانٹوں اور اذیتوں سے دامن چھڑا لیں اپنے حصے کا سفر طے کرتے جائیں کہ یہی سکونِ زندگی ہے۔۔۔ !اللّٰہ ہمیں اس بیماری سے بچائے جس کا کوئی اجر ہی نہیں۔۔۔۔ !!!
بقلم:جویریہ چوہدری۔

ریاست پاکستان اور سیاسی بازی گری
محمد نعیم شہزاد

ریاست پاکستان انعام خداوندی ہے اور صحیح معنوں میں اسلام کا قلعہ مانی جاتی ہے۔ اس میں کمال یقیناً اس ایقان و یقین کا ہے جو ہمارے ایمان کا حصہ ہے۔ اسی جذبہ ایمانی کی بدولت پاکستانی قوم دنیا میں اپنا ایک خاص تعارف رکھتی ہے۔ اور یہی قوت ہماری صلاحیتوں کو چار چاند لگاتی ہے اور کامیابیوں سے ہمکنار کرتی ہے۔ دوسری طرف پاکستان کے سیاسی نظام کی بات کی جائے تو پاکستان ایک ایسا جمہوری ملک ہے جہاں جمہوری نظریات پنپتے دکھائی نہیں دیتے ہیں اور ہر کوئی اپنی دوکان چمکاتا نظر آتا ہے۔ ہر صاحب اقتدار جمہوریت کا منتخب ہونے کا دعویدار ہے اور ہر مخالف منتخب حکومت میں سقم ثابت کرنے پر تلا نظر آتا ہے۔ اپنے مختصر عرصہ حیات میں میں نے ایک بھی ایسی حکومت نہیں دیکھی جس کو اپوزیشن نے جائز حکومت تسلیم کیا ہو۔ دھاندلی، سلیکٹڈ حکومت، پری پلان حکومت وغیرہ کے نعرے ہی بار بار سننے کو ملتے ہیں۔ مگر وقت گزرنے کے ساتھ ساتھ بجائے اس کے کہ سیاسی جماعتیں بالغ نظری کا مظاہرہ کرتیں، ان نعروں اور اعتراضات میں بھی جدت آئی ہے۔ انہی جدتوں میں ایک مخالف پارٹی پر مذہب کے نام پر الزام تراشی اور بہتان بازی بھی ہے۔

میری گزارشات کا مطمع نظر بعض ناپسندیدہ پہلوؤں کی نشاندہی اور اصلاح احوال کی کوشش ہے۔ اس امید پر کہ

شاید کہ تیرے دل میں اتر جائے میری بات

سابقہ تاریخ کو دہرانے میں وقت ضائع کرنے کی بجائے ہم موجودہ حکومت اور اس کے مخالفین کے طرز عمل سے چند مثالیں بیان کرنے پر اکتفا کریں گے۔

پاکستان تحریک انصاف کی حکومت اور وزیر اعظم عمران خان پر جہاں اور بہت سے اعتراضات کیے گئے وہیں ایک اعتراض "یہودی ایجنٹ” اور "قادیانی نواز” بھی ہے۔ عمران خان اپنے سیاسی کیریئر کے 22 سال بعد وزارت عظمی کے منصب پر فائز ہوئے ہیں۔ سوال یہ ہے کہ جب تک انھیں یہ وزارت نہ ملی تھی یا ان کی پارٹی ایک مضبوط عوامی طاقت کے طور پر سامنے نہ آئی تھی، یہ الزامی سیاست کہاں تھی؟ بظاہر معلوم ہوتا ہے کہ ان ہتھکنڈوں کا مقصد محض کسی کی عوامی مقبولیت کو کم کرنا اور شخصیت کو متنازع و داغدار بنانا ہے۔ اور اس کی ضرورت تب ہی ہو گی جب کوئی کسی اہم منصب پر پہنچ جائے۔ ورنہ سابقہ 22 برس کی سیاست میں یہ الزامات لگے ہوتے تو یہ شخص اس مقام پر پہنچنے سے پہلے ہی عوامی حلقوں میں تنقید کا شکار ہوتا۔ پھر وزیراعظم کی کارکردگی اور پالیسیوں کو دیکھا جائے تو بھی یہ تاثر زائل ہو جاتا ہے۔ ایک ایسا وزیر اعظم جو ایک شخص کو محض قادیانی ہونے کی بنا پر علی الاعلان مالی مشیر مقرر نہ کرے اور بین الاقوامی فورم پر اقوام متحدہ کی جنرل اسمبلی کے اجلاس میں اسلام اور پیغمبر اسلام کا دفاع کرے اس کے ایمان اور اسلام سے وفاداری پر حرف اٹھانا بعید از قیاس ہے۔ دین اسلام بھی یہی تعلیم دیتا ہے کہ دوسروں سے حسن ظن رکھا جائے تو یہ کیسا کمال ہے کہ ہم زبردستی خود ساختہ گستاخی کے فتوے اور اسلام دشمنی کے منصوبے کسی سے منسوب کر دیں۔ اسی دورہ امریکہ کے بعد اقوام متحدہ میں پاکستان کے مستقل مندوب کی تبدیلی سامنے آئی تو ایک بار پھر پورے زور سے منیر احمد شیخ کو قادیانی اور حکومت کو قادیانی نواز قرار دینے کی بھرپور کیمپین چلی مگر موثر ثابت نہ ہو سکی۔

آنے والے دنوں میں جمعیت علمائے اسلام کے رہنما مولانا فضل الرحمن صاحب اسلام آباد میں دھرنے کا پلان رکھتے ہیں۔ دھرنے کے مقاصد کو اسلام سے جوڑا جا رہا ہے اور یہ اعتراض سامنے آ رہا ہے کہ مولانا مذہب کارڈ استعمال کر رہے ہیں۔ مگر ساتھ ہی ان کو دھرنے سے روکنے کی کوششوں میں جن طریقوں توہین مذہب کو روا رکھا جا رہا ہے شاید وہ خان صاحب کے جنرل اسمبلی میں کیے گئے خطاب کا منہ چڑا رہے ہیں۔ سیاسی مقاصد یا کسی بھی طرح کے مفاد کے لیے مذہب کا استعمال قابل مذمت ہے تو سیاسی مخاصمت کی آڑ میں مذہب دشمنی اور توہین مذہب بھی قابل مذمت ہے۔ جس طرح سے مولانا کے دھرنے کے حوالے سے مبینہ ہدایت نامہ، شرائط نامہ اور پھر اسلام آباد انتظامیہ کی طرف سے نوٹیفکیشن سوشل میڈیا پر دکھا کر پروپیگنڈہ کیا جا رہا ہے اور دھرنے کے ممکنہ غیر اخلاقی مضمرات بیان کیے جا رہے ہیں کیا حکومتی جماعت کو ان مضمرات سے آگاہی اب حاصل ہوئی ہے؟

بہرحال کوشش کی جائے کہ معاملات کو باہم افہام و تفہیم سے حل کیا جائے اور اگر فریق مخالف پر تنقید و تنقیح کے بغیر چارہ کار نہ ہو تو بہر صورت اخلاقی حدود قیود کا خیال رکھا جائے اور معاشرے میں مثبت رویوں کو رجحان دیا جائے۔ الزامی سیاست، مذہب کارڈ اور مذہب مخالف سوچ سے گریز کیا جائے اور اپنی جماعت کو کارکردگی کی بنیاد پر عوام کے سامنے پیش کیا جائے نہ کہ دوسروں پر کیچڑ اچھال کر خود کو صاف ستھرا دکھانے کی کوشش کی جائے۔