Category: سیاست

دہشت گردی ،قتل و غارت گری، سماجی معمول کا درجہ اختیار کر جائیں، رشتے مٹ رہے ہوں، احساس ماند پڑ جائے، بیروزگاری، ناخواندگی عام ہو ۔۔کوئی راستہ کوئی منزل نظر نہ آئے ۔ بدعنوانی اور منافقت اخلاقیات کا درجہ اختیار کر لیں تو سیاست اور جمہوریت کیسی؟ ان حالات میں ریاست کی حالت کیا ہوگی؟ تاہم بدترین داخلی انتشار کے باوجود پاک فوج اور جملہ اداروں نے ریاست کے ساتھ ساتھ دفاع کو بھی اپنی حفاظت میں لیا ہوا ہے۔ یاد رکھیئے! ریاست کے نگہبانوں کو فساد اور انتشار کا سدباب کرنا آتا ہے ریاست کے استحکام پر کسی فرد واحد کو اہمیت حاصل نہیں ہوتی۔ ریاست کے استحکام کے لئے پاک فوج اور جملہ ادارے دیوار چین کی طرح کھڑے ہیں۔

قوم نے طویل تین مارشل لاء دیکھے موجودہ صدی کے پیروں، نام نہاد گدی نشینوں ، ججز، وڈیروں، سیاستدانوں، نام نہاد دانشوروں، سرمایہ داروں نے ان مارشل لاء لگانے والوں کا بھرپور ساتھ دیا ،میڈیا نے بھی بھرپور ساتھ دیا الزام صرف فوج پر نہیں لگایا جا سکتا۔ میاں محمد نوازشریف کو تین بار حکومت سے علیحدہ کیا گیا اس کی ذمہ داری سیاستدانوں پر ہی آتی ہے۔ سیاستدانوں کے ساتھ ساتھ ان کی اپنی جماعت میں نہ سیاست اور نہ جمہوریت ہے، پانامہ لیکس ایک غلط اور بے بنیاد مقدمہ بنا کر نوازشریف اور اسکے خاندان کو بدنام کیا گیا اس مقدمے کے پیچھے سیاستدان ہی تھے، عمران خان جو آج جمہوریت آئین کی بات کرتے تھکتے نہیں کیا وہ بتا سکتے ہیں کہ وہ ایک جمہوری حکومت کیخلاف سازش میں کیوں شامل ہوئے؟ 2018ء کے الیکشن میں انہوں نے کس طرح کامیابی حاصل کی وہ کن ملاحوں کی مدد سے اقتدار کی کرسی پر بیٹھے ،نوازشریف کا اس وقت گناہ کیا تھا؟ 2024ء کے الیکشن پر سینہ کوبی کرنے والے بتا سکتے ہیں 2018ء کا الیکشن ہی تھا؟

یاد رکھیئے۔ پاکستان کی سیاست سیاستدانوں اورنام نہاد جمہوریت سے امریکہ سمیت عالمی دنیا آگاہ ہے سوشل میڈیا جھوٹ بولنے کی فیکٹریاں ہیں بدقسمتی سے الیکٹرانک میڈیا بھی سوشل میڈیا کا اسیر بن چکا ہے۔ کلمہ پڑھ کر جھوٹ بولتے ہیں سیاستدانوں کی اکثریت نام نہاد پیروں اور گدی نشینوں، نام نہاد عالم دین، خدا کے عذاب سے ڈرتے نہیں روز محشر خدا کی عدالت میں کس منہ سے کھڑے ہوں گے پاکستان کی سرزمین بھی خدا پاک کی ملکیت ہے اس سرزمین پر بسنے والے خدا پاک کی مخلوق ہے اپنے اقتدار اور اختیارات کی خاطر مذہبی تاویلیں دے کر خدا پاک کو ناراض نہ کریں دین اسلام پر عمل کریں

ملک میں جاری عدم استحکام ،سیاسی جماعتوں کے آپس میں تنازعات ،ان تنازعات سے پاکستان بطور ریاست اور بے بس لاچار عوام ۔جمہوریت سیاسی رہنمائوں کو پکار رہی ہے اب اس میں فتوے لگانے والوں نے بھی شمولیت اختیار کرلی ہے۔ فتویٰ تو ملاوٹ شدہ خوراک ادویات فروخت کرنے والوں پر لگانا چاہئے۔ فتویٰ صفائی نصف ایمان ہے ،جو اپنی دکانوں گلی محلوں کی صفائی نہیں کرتے جس کی وجہ سے آلودگی میں اضافہ ہوتا ہے۔ مخلوق خدا کی زندگیوں سے کھیلتے ہیں ان کے خلاف فتوے جاری کرنے کی ضرورت ہے۔ مگر افسوس علمائے کرام اور مشائخ ایک حدیث پر عمل کروانے سےقاصر ہیں ’’جس نے ملاوٹ کی ، وہ ہم میں سے نہیں۔‘‘ دین اسلام کا ذمہ اگر اللہ تعالیٰ نے نہ لیا ہوتا تو آج کا مسلمان اسے کب کا گنوا چکا ہوتا ۔مسلم امہ کا ہدف دین اسلام کی سربلندی نہیں ،اپنی ذاتی نفسیات خواہشات ذاتی مفادات کے گرد گھومتا ہے مسلم امہ کا ہر کام مذمت تک محدود ہے۔

بین الاقوامی سیاستدان نئے امریکی صدر ٹرمپ کو اور ان کے دنیا کے ساتھ معاملات کو دیکھ رہے ہیں وہ نئے امریکی صدر بل کلنٹن بھی نہیں بائیڈن بھی نہیں ٹرمپ ہنری کسنجر کی طرح دانشور یا جمی کارٹر کی طرح شائستہ نہیں ہو سکتے لیکن کاروبار، سرمایہ کاری کے پس منظر سے آنے والے امریکہ جیسے سرمایہ دار ملک میں ان کے فائدے میں ہے، نئے امریکی صدر ٹرمپ تجزیہ کاروں کی زبان استعمال نہیں کرتا اور تجزیہ کار سیاستدانوں کی شائستگی یا چالبازی کے لئے نہیں جانا جاتا، ٹرمپ نے اپنے سابقہ دور صدارت میں دنیا بھر کے مسلمان ممالک کی حمایت حاصل کرنے کے لئے سعودی عرب کا انتخاب کیا تھا ٹرمپ کو اس وقت امریکی سیاستدانوں کی طرف سے تنقید کا سامنا بھی کرنا پڑا تھا ایک بار پھر امریکہ اور سعودی عرب کے تعلقات مستحکم ہوں گے ٹرمپ دعویٰ کرتے ہیں کہ روس یوکرین جنگ، غزہ، لبنان کی جنگ کو ختم کروا سکتے ہیں تو امید کی جا سکتی ہے کہ ٹرمپ مشرق وسطیٰ کو نئی شکل دیں گے معاہدوں اور پابندیوں کے ذریعے دیکھیں گے جنگوں سے نہیں دیکھیں گے۔ مشرق وسطیٰ میں امن کی صورت میں پاکستان کا کردار بہت اہم ہوگا مشرق وسطیٰ میں امن قائم کرنے کے لئے سعودی عرب سمیت دیگر عرب ممالک میں پاکستان کا کردار بہت اہم ہوگا۔ مشرق وسطیٰ کو نئی تبدیلیوں کے لئے تیار رہنا چاہئے۔ یاد رہےموجودہ امریکی صدر ٹرمپ نے اپنے پہلے ادوار میں دنیا میں بغیر جنگ کے حکومت کی ہے

امریکی صدارتی ا نتخابات اور ٹرمپ کی کامیابی کے بعد ہمارے الیکٹرانک میڈیا پر ہمارے دانشور اور سیاسی جماعتوں کے رہنمائوں نے ایسے ایسے تبصرے شروع کردئیے ان تبصروں سے نہ تو امریکہ کو فرق پڑتا ہے نہ پاکستانی معاشرے پر ان تبصروں سے کوئی نقصان یا فائدہ ہوتا ہے جس معاشرے کو تباہ کرتے ہیں، نجومی درہم و دینار کے عوض فتویٰ فروش ، جھوٹے راوی ، غنڈے خود ساختہ حق اور سچ کے دعویدار زائچے بنانے والے خوشامدی موقع پرست سیاستدان افواہ پھیلانے والوں کی بہتات ہو ،الیکٹرانک میڈیا پر معاشرے کو سدھارنے کی باتیں کی جائیں، خوراک اور ادویات میں ملاوٹ کے خلاف جہاد کریں، مخلوق خدا کی زندگیوں سے کھیلنے والوں کے خلاف جہاد کریں۔ امریکی صدر کو کسی نجومی ، کسی زائچے بنانے والے نے کامیاب نہیں کروایا امریکہ میں موجود مخلوق خدا نے کامیاب کروایا ہے۔

امریکہ بطور ریاست اور ٹرمپ بطور امریکی صدر کو بین الاقوامی تنازعات کا سامنا ہے ، امریکی پالیسی اُسی راستے پر چلتی رہے گی تاہم امریکی پالیسی کا انداز اور لہجہ مختلف ہو سکتا ہے۔ ٹرمپ کی جیت ایک خبر کی کہانی اور سیاسی پنڈتوں کے لئے موضوع بحث ہے کچھ زیادہ نہیں۔ ٹرمپ کی کامیابی سعودی حکمرانوں کے لئے بھی اچھی خبر ہے ٹرمپ کے ساتھ سعودی حکمرانوں کے اچھے تعلقات ہیں تاہم دیکھنا ہوگا کہ اسرائیل فلسطین ،لبنان ،ایران کے درمیان جاری جنگ کو ٹرمپ اور سعودی حکمران کیا کردار ادا کرتے ہیں ، بائیڈن کی رخصتی اورٹرمپ کی آمد دنیا میں جاری جنگی ممالک میں کیا رُخ دیتی ہے ٹرمپ کے مزاج و انداز میں کیا کوئی تبدیلی آئے گی؟تاہم پاکستان کے لئے ٹرمپ انتظامیہ کی پالیسی کیا ہوگی اس کے لئے چند ماہ انتظار کرنا پڑے گا

ترقی یافتہ اقوام کی ترقی کا راز میرٹ ،وقت کی پابندی ،رائٹ مین فار رائٹ جاب ہے ۔بلاشبہ وزیراعلیٰ پنجاب مریم نواز نے ان راستوں کا انتخاب کر کے صوبے پنجاب میں انقلاب برپا کر دیا ہے لیکن یہ بات سمجھ سے بالاتر ہے پنجاب کی سول بیورو کریسی کن راستوں پر چل پڑی ہے چیف سیکرٹری پنجاب سمیت صوبائی سیکرٹریوں نے اپنے الگ راستوں کا انتخاب کر لیا ہے، ڈینگی کو لے کر سول بیورو کریسی اور پنجاب کی انتظامیہ جو اقدامات کر رہی ہے وہ نہ صرف وزیراعلیٰ پنجاب بلکہ عوام سے کھلے مذاق کے مترادف ہے۔ ترقی یافتہ اور ترقی پذیر ممالک میں وبائی امراض یا دیگر امراض قابو پانے کی تمام تر ذمہ داری محکمہ صحت کے افسران اور فیلڈ سٹاف کی ہوتی ہے اور وہ کامیابی سے مستعدی سے ان امراض پر قابو پاتے ہیں۔ مگر ڈینگی کو لے کر پنجاب بھر کی سول انتظامیہ کمشنرز، ڈپٹی کمشنرز کے دفاتر تمام محکموں کے ضلعی سربراہان کی بے سود میٹنگز اور فوٹو سیشن کاوشوں نے کیا ڈینگی کے بے قابو جن پر کنٹرول کر لیا ہے ہفتے میں چار پانچ دن ڈینگی کی میٹنگ سے دیگر محکموں کی کارکردگی متاثر ہو رہی ہے دیگر محکموں کے افسران عام آدمی کو میسر نہیں ہوتے بلکہ ان روزانہ کی میٹنگز سے خود کمشنرز اور ڈپٹی کمشنرز، عوام اور ان کے مسائل کے حل سے بہت دور ہو چکے ہیں۔

ضرورت اس امر کی ہے کہ محکمہ صحت کے افسران کو مکمل ذمہ داریاں ایک ہی بار سونپ کر فیلڈ سٹاف سے کارکردگی مانگی جائے اور دیگر محکموں کو اپنے اپنے دائرہ کار میں پرفارم کرنے کا موقع دیا جائے نہ کہ تعلیم، بلڈنگ، سماجی بہبود اور دیگر محکمے اپنے اپنے فوکل پرسن کے ذریعے فوٹو سیشن کی تصاویر بھیج کر ڈینگی کی سب اچھا کی رپورٹ صوبائی حکومت کو ارسال کریں پنجاب کے ہسپتالوں کے وارڈز ڈینگی مریضوں سے بھرے پڑے ہیں عملی طور پر نہ تو مکمل سپرے کیا جا رہا ہے اور نہ ہی گندے و صاف پانی کے گڑھوں کو ختم کیا جا رہا ہے قد آدم سے بلند گھاس بوٹیاں ڈینگی مچھروں کی آماجگاہ بنی ہوئی ہیں، صفائی کے ایس او پیز تو ضلعی انتظامیہ کی ذمہ داری ہے جبکہ ہسپتالوں میں بھی صفائی کا انتظام نہیں نظر آرہا۔ ضرورت اس امر کی ہے کہ محکمہ صحت کے افسران بشمول سیکرٹری صحت وزیر صحت کو فیلڈ میں نکل کر انسپکشن کر کے وزیراعلیٰ پنجاب کو ضلعی افسران انتظامیہ و صحت کی کارکردگی کی رپورٹ پیش کریں

شنگھائی تعاون تنظیم کی توجہ آہستہ آہستہ رکن ممالک کے اقتصادی روابط اور ترقی کی طرف منتقل ہو رہی ہے جبکہ رکن ممالک کے ساتھ پائیدار اقتصادی تعلقات قائم کرنے کی منتقلی سے فائدہ اٹھانے کا یہ ایک اچھا موقع ہے، شنگھائی تعاون تنظیم ایک علاقائی فورم کے طور پر ابھری ہے جس کا مقصد تیزی سے عالمی اقتصادی، سماجی اور سفارتی تبدیلیوں کے درمیان تمام رکن ممالک کی تعمیر اور مضبوطی ہے جس کے نتیجے میں طاقت کا ڈھانچہ تبدیل ہوتا جا رہا ہے، جہاں چین سب سے طاقتور معاشی کھلاڑیوں میں سے ایک کے طور پر نمودار ہواہے اور عالمی اقتصادی اور انتظامی نظام کو بہتر بنانے کے لئے اصلاحات کے لئے آواز اٹھانے میں پیش پیش رہا ہے۔

شنگھائی تعاون تنظیم کا قیام سرحدی انتظام اور سلامتی سے متعلق معمولی مسائل کو حل کرنے کے لئے عمل میں لایا گیا لیکن بعد میں اس میں توسیع کردی گئی، شنگھائی تعاون تنظیم حجم اور آبادی کے لحاظ سے سب سے بڑی علاقائی تنظیم ہے اس کے ارکان دنیا کی آبادی کا تقریبا40 فیصد پر مشتمل ہیں اور ان کی جی ڈی پی 24 بلین امریکی ڈالر ہے، ان کے پاس 20 فیصد تیل اور 44 فیصد گیس کے ذخائر ہیں،سعودی عرب اور دیگر خواہش مندوں کی شمولیت سے مارکیٹ کا حجم، توانائی کے وسائل کا حصہ (تیل اور گیس)اور اقتصادی حجم میں مزید اضافہ ہوگا،یہ واحد تنظیم ہے جو چار جوہری ہتھیاروں سے لیس ممالک (چین، روس، بھارت اور پاکستان) اور اقوام متحدہ کی سلامتی کونسل کے دو ارکان کی میزبانی کرتی ہے، 2004 میں چینی وزیر اعظم نے ایس سی او کے تمام ممالک پر زور دیا تھا کہ وہ شنگھائی تعاون تنظیم کے ممالک کے درمیان آزاد تجارتی معاہدوں کے لئے کام کریں،2005 میں چین نے اس پر مزید غور و خوض کے لیے 100 ایکشن دستاویز بھی پیش کی تھیں،2018 میں سربراہان مملکت کے اجلاس میں اس بات پر زور دیا گیا تھا کہ بین العلاقائی تجارت کے لیے تجارتی طریقہ کار کو آسان بنایا جائے، 2019 میں شنگھائی تعاون تنظیم کے اعلامیے میں ایک بار پھر ممالک سے کہا گیا تھا کہ وہ اقتصادی تعاون اور تجارت بڑھانے کے لیے اپنی کوششیں تیز کریں،2024 میں ارکان نے سربراہ مملکت کے اجلاس میں دوسری ترقیاتی حکمت عملی کی منظوری دی،اراکین نے تجارت، سرمایہ کاری سمیت متعدد شعبوں میں تعاون پر بھی اتفاق کیا اور سرمایہ کاری تعاون کو فروغ دینے میں نجی شعبوں کو شامل کرنے کے لئے خصوصی پہل کی،چین اقتصادی تعاون کو فروغ دے رہا ہے اور ٹیکنالوجی سمیت مختلف شعبوں میں سرمایہ کاری اور تجارتی روابط کو فروغ دے رہا ہے اور مثالی طور پر آگے بڑھ رہا ہے،گزشتہ چند سالوں میں اس نے شنگھائی تعاون تنظیم کے ساتھ اپنی تجارت میں اضافہ کیا ہے،س وقت چین شنگھائی تعاون تنظیم کے تمام ممالک کا سب سے بڑا تجارتی شراکت دار ہے،شنگھائی تعاون تنظیم کے رکن کی حیثیت سے پاکستان کے پاس شنگھائی تعاون تنظیم کی اقتصادی صلاحیت، اس کے پلیٹ فارمز اور اس کے رکن ممالک کے اقدامات سے فائدہ اٹھانے کا بہترین موقع ہے۔

وسطی ایشیائی ریاستوں کے لئے پاکستان کی برآمدات اور درآمدات کے اعداد و شمار بہت زیادہ نہیں ہیں کیونکہ پاکستان کی ازبکستان کو مجموعی برآمدات 27.91 ملین امریکی ڈالر، قازقستان کو 107.2 ملین ڈالر، تاجکستان کو 32 ملین ڈالر اور کرغزستان کو 10.6 ملین امریکی ڈالر ہیں، امپورٹ کے محاذ پر صورتحال ایک بار پھر ویسی ہی ہے،ا
زبکستان سے پاکستان کی درآمدات 32.3 ملین امریکی ڈالر، قازقستان سے 1.9 ملین ڈالر، تاجکستان سے 202 ملین ڈالر اور کرغزستان سے 309 ملین امریکی ڈالر ہیں، روس ایک اور بہت اہم ملک ہے اور شنگھائی تعاون تنظیم کے اہم معماروں میں سے ایک ہے روس معروف معیشتوں اور ترقی یافتہ ممالک میں سے ایک ہے،یہ ایک سپر پاور تھی اور اب بھی بین الاقوامی معاملات میں فیصلہ کن کردار ادا کرتا ہے، بین الاقوامی تجارتی اعداد و شمار کے مطابق پاکستان کی روس کو کل برآمدات صرف 88 ملین امریکی ڈالر ہیں اور اس کی درآمدات کی مالیت 885 ملین امریکی ڈالر ہے، تاہم اچھی خبر یہ ہے کہ پاکستان اور روس اپنی پریشان کن تاریخ پر قابو پانے اور اپنے تعلقات کو بہتر بنانے کی کوشش کر رہے ہیں،شنگھائی تعاون تنظیم اور چین نے دونوں ممالک کو برف پگھلانے کا موقع فراہم کیا اور اب دونوں ممالک مزید بہتری پر کام کر رہے ہیں، روس گوادر بندرگاہ کو تجارت اور رابطے کے لیے استعمال کرنے میں بھی دلچسپی رکھتا ہے، ان اقدامات سے تجارت کو بہتر بنانے میں مدد ملے گی،

سب سے پہلے پاکستان کو شنگھائی تعاون تنظیم کے تمام ممالک کی منڈیوں کا مطالعہ کرنا ہوگا، اس مقصد کے لیے پاکستان کو ان ممالک کی منڈیوں اور انتظامی ڈھانچے کا مطالعہ کرنے کے لیے مستقل ادارے قائم کرنے چاہئیں، تمام ممالک کی منڈیوں اور گورننس کے ڈھانچے کی جامع تفہیم سے پاکستان کو ایک دانشمندانہ اور معروضی پالیسی وضع کرنے میں مدد ملے گی، دوسرا یہ کہ پاکستان کو تجارتی روابط کو بہتر بنانے کے لیے جدید طریقے تلاش کرنے چاہئیں، بھارت پاکستان کا پڑوسی ملک ہے، کشیدگی ضرور ہے مگر بھارت کے ساتھ تعلقات کو بہتر کر کے تجارت بحال ہونی چاہئے، بھارت کے ساتھ روابط کو بہتر کرنے کے لئے پاکستان کے پاس سنہری موقع ہے.

تحریر:محمد راشد