Category: سیاست

سال دوہزار چودہ وہ سال ہے جب پاکستان میں دھرنوں اور لانگ مارچ اور لاک ڈاؤنز کی سیاست کا باقاعدہ آغاز ہوا اور تب سےآج کے دن تک ہم اس منحوس طرز سیاست سے نبردآزما ہیں۔ ذرا ذرا سی باتوں کو پکڑ کر جلا دوں گا, مار دوں گا, بھگادوں گا وغیرہ وغیرہ کا شورو غل بلند کرکے حکومتوں اور ریاستوں کے کیے کی سزا عوام کو دینا کہاں کی سیاست اور جمہوریت ہے؟

خان صاحب کے اچھے اورکرزمیٹک فیصلوں اور کاموں کی سراہنا کرنا اچھی بات ہےلیکن یاد رہے خان صاحب بھی ایک عوامی لیڈر ہیں جنہیں اپنے برے فیصلوں اور کاموں کا جواب دینے کے لیے عوام کی عدا لت میں آنا ہی پڑے گا۔

سال دوہزار چودہ کا دھرنا ہمیں 547 ارب میں پڑا تھا اور ملا کیا۔۔۔ گھنٹا؟

ایک بڑا قومی سانحہ دیکھا اور تب اس دھرنے کا اختتام ہوا لیکن دھرنا اور لانگ مارچ سیاست نے جو پنجے تب سے اس ملک پر گاڑے ہیں اس کا خمیازہ آج تک بھگت رہے ہیں۔ تب سےآج تک ناصرف تحریک انصاف بلکہ تمام مذہبی و سیاسی جماعتوں نے دھرنا اور لانگ مارچ سیاست کو ایک طلسماتی منتر سمجھ لیا ہے کہ جب جب حکومت اور ریاست کو انڈر پریشر لانا ہے تو عوام کا جینا دوبھرکردو اور ملکی معیشت کا بیڑا غرق کردو۔

اب کل توشہ خانہ ریفرنس میں عمران خان کو الیکشن کمیشن کے چار رکنی بینچ نے موجودہ مدت کےلیے نااہل قرار دے دیا تو آدھے گھنٹے کے اندر اندر پورے ملک کی عام شاہراؤں اور شہروں کے داخلی و خارجی راستوں پر تحریک انصاف کے عام سپورٹرز نےاحتجاج کے نام پر جو ہلڑ باز اور طوفان بدتمیزی برپاکیا اس کی ماضی میں کوئی مثال نہیں ملتی۔

اور اگر تحریک انصاف نے یہی سلسلہ آگے بھی جاری رکھا تو یقینا اس بار ملک 547 ارب کو بھول جائے گا کیونکہ اس دفعہ بات ملک کے ڈیفالٹ پر ہی ختم ہوگی کیونکہ ہماری حالت اس قدر ناگفتہ بہ ہے کہ ہم اب ہلکا سا بھی جھٹکا برداشت نہیں کرسکتے۔

دھرنا اور لانگ مارچ کی سیاست سے آج تک کیا فائدہ حاصل ہوا ہے؟

سوائے توڑ پھوڑ, گالم گلوچ, تصادم اور ملکی معشیت کو نقصان پہنچانے کے اس لغو انداز سیاست نےکیا دیا ہے؟

اور کل ہی ملک کی تاریخ میں پہلی بار ہوا کہ ایک اکثریتی سیاسی پارٹی کے کارکنان نے ریڈلائن لائن کراس کی اور فوج کے چیف جناب جنرل قمر جاوید باجوہ کے خلاف بھی بیہودہ نعرےبازی کی اور ملک کا تماشہ بنانے کا بھارتی میڈیا کو ایک اور سنہری موقع دیا۔

بھارت جو کہ ہمارا ازلی دشمن ہے اس کے پاکستان اور اسکی عوام کے خلاف تین بنیادی مشن یا ایجنڈے تھے جو کہ اب تقریباً پورے ہوچکے بیشک ملک ایف اےٹی ایف کی گرےلسٹ سےنکل چکا ہے۔

1-پاکستانی معشیت کا بیڑا غرق کرنا۔
2-افواج پاکستان اور عوام کی محبت ختم کرنا۔
3-دنیا میں پاکستان کو تنہا کرنا۔

کیا بھارت کے یہ تین مشن مکمل نہیں ہوگئے؟

اس کا سہرا بالترتیب آصف ذرداری, نواز شریف, مولانا فضل الرحمن اور عمران خان کے سربندھنا چاہیے کہ ان چار نفوس نے عرصہ بیس بائیس سال میں پاکستان اور اس کی عوام کو بھارت اور اقوام عالم کے سامنےپلیٹ میں رکھ کر پیش کردیا کہ لو بھئی جو کرنا ہے کرلو۔

خیر ملک اس طرح کی سیاست کا متحمل نہیں لیکن ہماری مقتدرہ و سیاسی اشرافیہ کو یہ بات اب بھی سمجھ نہیں آرہی۔ اللہ ہی پاکستان کی حفاظت کرے ورنہ ہم نےتو کوئی کسر نہیں چھوڑی۔

ایک ایسے وقت میں جب ملکی معیشت تنزلی کی جانب گامزن ہے، سیلاب کی وجہ سے پاکستان میں قیامت خیز تباہی ہوئی، لوگ پینے کے پانی کو ترس گئے، پٹرول کی قیمت میں مسلسل اضافے نے مہنگائی کی قدر اتنی بڑھا دی کہ غریب کے لئے دو وقت کی روٹی کھانا محال ہو چکا ایسے میں تحریک انصاف کی جانب سے لانگ مارچ ، احتجاج کی کال ملکی معیشت کو مزید زمین بوس کرے گی، یہ وقت احتجاج کا نہیں بلکہ میثاق معیشت کا ہے،پاکستان کوبچانے کا ہے، پاکستان کی سیاسی صورتحال مستحکم ہو گی تو معیشت بھی مستحکم ہو گی لیکن یوں لگتا ہے کہ عمران خان کا ایجنڈہ ہی یہی ہے کہ پاکستان کو معاشی طور پر عدم استحکام سے دو چار کیا جائے

پاکستان میں ہر بندہ مظلوم ہے اور سب سے زیادہ ہمارے سیاستدان مظلوم ہیں اور ان میں بھی سب سے زیادہ مظلوم ہیں ہمارے خان صاحب ۔۔۔ کیونکہ انہوں نے سیاست میں مظلومیت کے لگ بھگ 26 سال گزار دیے ہیں جن میں سے چار سال وہ پاکستان کے مظلوم وزیراعظم بھی رہے۔۔۔ وہ مظلوم کیوں ہیں اور وہ کن کے ظلم کا شکار رہے؟۔۔۔ یہ سوال جواب طلب ہے۔۔۔

لیکن پھر بھی اس کے لیے کہیں دور جانے کی ضرورت نہیں بس جب جب انہوں نے کسی پر بھروسہ کرکے کوئی عہدہ دیا، کسی کو عوام سے عزت دلائی اور کسی کو اپنا ہمراز و ہمنوا بنایا اور ان سب کی جانب سے جب خان صاحب کی پیٹھ میں خنجر گھونپا گیا تب خان صاحب نے جو غم و غصے اور دکھ کا اظہار عوامی سطح پر کیا وہ بیانات ہی سن پڑھ لیں تو تشفی ہوجاتی ہے کہ جی بلکل خان صاحب ایک زیرک اور ذہیں مگر مظلوم سیاستدان ہیں۔۔۔

جیسے کہ چار سال ملک کے سیاہ و سفید کے مالک رہے اور آج جب خان صاحب حکومت میں نہیں اور انکی آڈیو لیکس باہر آرہی ہیں جن میں ملکی سیاست، سفارت اور بلخصوص دفاعی معاملات سے متعلق انتہائی سیکرٹ باتیں ہیں تو خان صاحب نے روایت برقرار رکھتے ہوئے بڑی خوبصورتی سے مظلومیت کارڈ نکال لیا ہے۔۔۔

چیئرمین پاکستان تحریک انصاف عمران خان کا کہنا ہے کہ” آڈیو لیکس کے ذریعے پاکستان کی قومی سلامتی کی رازداری کو عالمی سطح پربےنقاب کیا گیا ہے”۔۔۔آڈیو لیکس کے معاملے پر بات کرتے ہوئے چیئرمین پی ٹی آئی عمران خان کا مزید کہنا تھا کہ ” بحیثیت وزیراعظم میرے فون کی محفوظ لائن بگ کی گئی، آڈیو لیکس قومی سلامتی کی سنگین خلاف ورزی ہیں”۔۔۔

اس کے علاوہ خان صاحب نے آڈیو لیکس کی صداقت جانچنے کے حوالے سے عدالت جانے کا جو عندیہ دیا تھا آج اس پر عمل کردیا ہے، آڈیو لیکس کی تحقیقات کے لیے جوڈیشل کمیشن یا جے آئی ٹی بنانے کی استدعا کے ساتھ آج عدالت کا دروازہ کھٹکھٹایا گیا ہے تاکہ مظلومیت کے رنگ پھیکے نہ پڑ جائیں۔۔۔ عمران خان کی جانب سے سپریم کورٹ میں دائر درخواست میں کہا گیا ہے کہ وزیراعظم ہاؤس اور آفس کی نگرانی، ڈیٹا ریکارڈنگ اور آڈیو لیکس کو غیر قانونی قرار دیا جائے، آڈیو لیکس کی تحقیقات کروا کر ذمہ داروں کو سزا دی جائے۔۔۔ لیکن یہاں ہمارے پیارے خان صاحب نے مظلومیت کی انتہا کردی کہ نام نہیں لیا کہ کون ذمہ دار۔۔۔

جب یہ ملک کے وزیر اعظم تھے تب ان کو خبر تھی نا کہ جی آفس کی نگرانی اور ڈیٹا ریکارڈنگ وغیرہ وغیرہ ہوتی ہے اور وہ کون کرتے ہیں؟ تب ہی کیوں نا اس پر سخت یا ضروری اقدامات کیے کہ آج آڈیو لیکس کی خفت مٹانے کی ایسی کوششیں کرنی پڑ رہی ہیں؟
خان صاحب سے پہلے بھی وزرائے اعظم اور صدور رہے ہیں جن کے ادوار میں آفس کی نگرانی اور ڈیٹا ریکارڈنگ وغیرہ وغیرہ ان کی موجودگی اور رخصتی کے بعد معمول کی ہی کاروائی رہی ہے، کوئی لیکس یا سیکیوریٹی بریچ جیسا واقع اس طرح رونما نہیں ہوا جیسے خان صاحب کی دفعہ ہوا یا ہو رہا ہے حالانکہ پورے دور حکومت میں خان صاحب اور انکی پارٹی کی جانب سے ایک صفحے والی کہانیاں بھی سنائی جاتی رہیں۔۔۔ کیا یہ ممکن نہیں کہ خان صاحب

خوب پردہ ہے کہ چلمن سے لگے بیٹھے ہیں
صاف چھپتے بھی نہیں سامنے آتے بھی نہیں

کہ مصداق اسی طرح مظلومیت، الزام تراشی اور اداروں سے نادیدہ تصادم کی سیاست کرتے کرتے دوبارہ اقتدار کا راستہ سیدھا کرنے کی پالیسی پر گامزن ہوں؟

ایک طرف ملک میں سیاسی اور معاشی بحران کے کالے سائے لہرا رہے ہیں، دوسری جانب ملک کی مکسچر اور کمزور ترین حکومت مردہ گھوڑے میں روح پھونکنے کی سبیلیں کر رہی ہے جبکہ عالمی سطح پر نئی بساط بچھ رہی ہے اور تمام قوتیں اپنے مہرے سیٹ کر رہی ہیں اور پاکستان جیسا اہم ملک اس منظر نامے میں اپنی جگہ طے کرنے سے جزوی طور پر قاصر ہے۔۔۔ ملکی اور عالمی سطح پر حالات کیا رخ اختیار کریں گے

ہم نصاب میں پاک بھارت تعلقات میں خرابی کی وجہ مسئلہ کشمیر بتاتے اور پڑھاتے ہیں اور یہ درست بھی ہے کیونکہ فی الحال اس کے علاوہ دونوں ملکوں کے درمیان اور کوئی بڑا تنازعہ نہیں ہے۔

البتہ اس مسئلے کو لے کر ایک دوسرے پر دباؤ ڈالنے کے لئے دیگر تنازعات جیسے پانی کی تقسیم کا تنازعہ یا ایک دوسرے کے ملک میں ریاست سے باغی جماعتوں کی حمایت اور درپردہ ان کی امداد کرنا وغیرہ شامل ہیں ۔

دونوں ممالک مسئلہ کشمیر کی وجہ سے اپنے بجٹ کا ایک بہت بڑا حصہ دفاع پر خرچ کرتے ہیں اگر دونوں ممالک میں مسئلہ کشمیر کا کوئی حل نکل آئے تو یہی دفاعی بجٹ عوام کی فلاح و بہبود اور معیشت کی بہتری پر خرچ کیا جا سکتا ہے ۔

اس وجہ سے دوست ممالک کی طرف سے دونوں اطراف کے ممالک پر مسئلہ کشمیر کے پائیدار حل کے لئے زور دیا جاتا ہے جس کے لئے دوست ممالک سنجیدہ کوششیں بھی کرتے ہیں۔

اکثر ایسی باتیں بھی سننے میں آتیں ہیں کہ دونوں ممالک بیک ڈور ڈپلومیسی کے ذریعے مسئلہ کشمیر کے حل کے قریب پہنچ گئے ہیں لیکن پھر دونوں اطراف جمود چھا جاتا یا کوئی ایسا واقعہ پیش آ جاتا کہ بہتری کی طرف گامزن تعلقات ایک دم انتہائی کشیدہ ہو جاتے۔

پاک بھارت مذاکرات نتیجہ خیز کیوں ثابت نہیں ہوتے،
آخر اس کی وجہ کیا ہے؟

ایک ویڈیو دیکھی جس میں نریندر مودی صاحب واضح کہہ رہے ہیں کہ میں دنیا کے کئی ممالک کے سربراہان سے ملا وہ سب اس بات پر متفق ہے کہ ہمیں آج تک یہ معلوم نہیں ہوا کہ پاکستان میں طاقت کا مرکز کون ہے ۔

پاکستان میں اختیارات کس کے پاس ہیں منتخب جمہوری حکومت یا کسی اور کے پاس، تو پہلے پاکستانی آپس میں فیصلہ کر لیں کہ اختیارات کا منبع کون ہے اس کے بعد ہم ان سے نتیجہ خیز مذاکرات کر لیں گے ۔

نریندر مودی کے یہ الفاظ ہماری جمہوریت کے منہ پر طمانچہ ہے اور جب تک ہماری سیاسی جماعتیں ووٹ کی طاقت کے بجائے بیساکھیوں کے سہارے حکومت میں آتیں رہیں گی ہمیں ایسے مزید طمانچے پڑتے رہیں گے۔

تو ہمیں نریندر مودی کے بیان پر ناراض ہونے کی ضرورت نہیں وہ تو گجرات کا قصائی مشہور ہے ویسے بھی بےعزتی ان کی ہوتی ہے جن کی عزت ہو تو مودی کے بیان کو نظر انداز کریں اور آنے والے انتخابات کے لئے جوڑ توڑ شروع کریں ۔

جی ہاں الیکشن کمیشن آف پاکستان اور چیف الیکشن کمشنر سکندر سلطان راجہ ایک بار پھر عمران خان اور تحریک انصاف کے نشانے پرہیں ، چیف الیکشن کمشنر سکندر سلطان راجہ کی سربراہی میں منعقدہ دو دو ضمنی انتخابات میں تاریخی فتح سمیٹنے والے عمران خان اور پاکستان تحریک انصاف نے چیف الیکشن کمشنر کیخلاف ہی ریفرنس دائر کر دیا، ریفرنس میں مؤقف اختیار کیا کہ چیف الیکشن کمشنر سکندر سلطان راجہ جانبدار ہیں، مبینہ جانبداری کے باعث وہ اس عہدے کے اہل نہیں، چیف الیکشن کمشنر کو اس کے عہدے سے ہٹایا جائے۔۔۔ اب فیصلہ سپریم جوڈیشل کونسل نے کرنا ہے۔

لیکن عمران خان اور تحریک ِ انصاف کے دوست قوم کو یہ بھی تو بتائیں اور سمجھائیں کہ جس چیف الیکشن کمشنر کو آپ نے خود تعینات کیا تھا اپنے دورِ حکومت میں وہ جانبدار کیسے؟ اور وہ کس کا جانبدار ہے؟

کیا اس عہدے پر تعیناتی کے وقت آپ کو معلوم نہیں تھا کہ "بھئی یہ تو جانبدار بندہ ہے”؟

یہ تو وہی بات ہوئی کہ” میٹھا میٹھا ہپ ہپ اور کڑوا کڑوا تھو تھو۔۔۔۔”

جن نشستوں پر تحریکِ انصاف جیتی وہاں جمہوریت کی جیت اور حق کی فتح جبکہ جن جگہوں پر بہت کم مارجن سے شکست ہوئی وہاں دھاندلی کا الزام اور چیف الیکشن کمشنر جانبدار۔۔۔؟

ایسے کیسے گلشن کا کاروبار چلے گا کہ آپ میدان میں اکیلے دوڑکے خواہش مند ہیں اور ریفری بھی اپنی مرضی کا چاہتے ہیں۔۔۔

حقیقی آزادی کی تحریک میں گیم فکسنگ کی اس کوشش کو کیا سمجھا جائے؟

کیونکہ آج آپ اپنے دور میں تعینات کیے گئے بیشتر عہدیداروں جن میں آرمی چیف، آئی ایس آئی چیف، چیف جسٹس اور اب چیف الیکشن کمشنر تک پر شکوہ کناں ہیں کہ کسی نے آپ کو عدم اعتماد کی تحریک میں ریسکیو نہیں کیا، کسی نے آئین کی مبینہ غلط تشریح کرکے پی ڈی ایم کو فائدہ دیا، کوئی مبینہ مسٹر ایکس وائے زیڈ بن گیا اور اب چیف الیکشن کمشنر بھی آپ کو جانبدار لگ رہا ہے۔۔۔

آٹا گوندھتی ہلتی کیوں ہو؟ والا یہ رویہ زیب نہیں دیتا لیکن اس کی پرواہ تحریکِ انصاف یا عمران خان کی جانب سے کب کی گئی ہے؟

اگر اسی چیف الیکشن کمشنر پر آمادگی ظاہر بھی کی تو ساتھ ہی کہہ دیا کہ اور چوائس ہی کہاں ہے؟ مطلب کوا سفید ہی ہے۔۔۔۔

دوسری طرف خربوزے کو دیکھ کر خربوزہ رنگ پکڑتا ہے کے مصداق جماعت اسلامی کراچی بھی چیف الیکشن کمشنر پر جانبداری کا الزام عائد کرکے برہم ہے۔۔۔ جماعت اسلامی کراچی کے امیر حافظ نعیم الرحمان نے بلدیاتی انتخابات ملتوی کرنے پر چیف الیکشن کمشنر پر جانبداری کا الزام عائد کیا اور ساتھ ہی مستعفی ہونے کا مطالبہ کردیا ہے۔

حافظ نعیم الرحمان کا کہنا تھا کہ الیکشن ملتوی کرانا پی ڈی ایم کامشترکہ ایجنڈا ہے، الیکشن کرانے والے بھی زرداری ڈاکٹرائن پرچل رہے ہیں۔ انہوں نے کہا کہ سندھ حکومت نے اہلکاروں کے حوالے سے کوئی تفصیل نہیں دی، الیکشن کمیشن کا یہ کام نہیں کہ الیکشن کیلئے سیاسی جماعتوں سے پوچھے، الیکشن کمیشن سیاسی جماعتوں کا سہولت کار بنا ہوا ہے، بلدیاتی انتخابات نہ کرانے کا مقصد صرف وسائل پرقبضہ برقراررکھناہے۔

حافظ نعیم کا کہنا تھاکہ جواز بیان کیا گیا سندھ میں سیلاب کی وجہ سے نفری کم ہے، ہم نے پوچھا کہ بتایا جائے نفری کہاں کہاں لگی ہے؟ چیف الیکشن کمشنر آپ کی پوزیشن نہیں کہ آپ پوچھتے رہیں، آپ سندھ حکومت کے سہولت کار بن رہے ہیں، بہتر ہے چیف الیکشن کمشنر استغفی دے دیں۔

خیال رہے کہ الیکشن کمیشن آف پاکستان نے کراچی میں بلدیاتی انتخابات ملتوی کردیے۔

آئینی اداروں کے پاس کیا اختیارات ہیں اور کس طرح وہ اپنی غیر جانبداری پر عوام اور سیاستدانوں کو مطمئن کرسکتے ہیں اس پر اداروں کو اب مل بیٹھ کر مشترکہ لائحہ عمل بنانے کی اشد ضرورت ہے کیونکہ اداروں پر سیاستدانوں اور عوام کے عدم اعتماد اورغم و غصے کا یہی مومینٹم رہا تو نظام اور ریاست مزید خرابی کے شکار ہو سکتے ہیں۔