Category: کاروبار

اسٹیٹ بینک آف پاکستان نے ٹریژری بلز کی نیلامی سے 775 ارب 90 کروڑ روپے حاصل کیے۔

سرکاری خبر رساں ایجنسی اے پی پی کے مطابق اسٹیٹ بینک کی جانب سے جاری کردہ اعداد و شمار میں بتایا گیا ہے کہ 15 اکتوبر کو ہونے والی نیلامی کے لیے 750 ارب روپے کا ہدف مقرر کیا گیا تھا، تاہم مجموعی طور پر 1849 ارب 10 کروڑ روپے کی بولیاں موصول ہوئیں۔اعداد و شمار کے مطابق ایک ماہ مدت والے ٹریژری بلز کی نیلامی سے 182 ارب 40 کروڑ روپے، تین ماہ کی مدت والے بلز سے 321 ارب 80 کروڑ روپے، 6 ماہ کی مدت والے بلز سے 60 ارب 90 کروڑ روپے جبکہ ایک سالہ مدت والے ٹریژری بلز سے 210 ارب 80 کروڑ روپے حاصل ہوئے۔

مزید بتایا گیا کہ ایک سے چھ ماہ تک کی مدت کے حامل بلز پر منافع کی شرح میں گزشتہ نیلامی کے مقابلے میں 4 سے 5 بیسس پوائنٹس کمی ریکارڈ کی گئی، جبکہ ایک سالہ مدت والے بلز پر منافع کی شرح میں 6 بیسس پوائنٹس اضافہ ہوا.

سیالکوٹ: 235 کسانوں کو 60 فیصد سبسڈی پر سپر سیڈرز دینے کا اعلان

پاکستان اور امریکا کے درمیان ٹیرف معاہدے پر ہونے والے کامیاب مذاکرات پر وزیر خزانہ نے اطمینان کا اظہار کیا ہے۔

وزیر خزانہ سینیٹر محمد اورنگزیب آئی ایم ایف اور ورلڈ بینک کے سالانہ اجلاسوں میں شرکت کے لیے واشنگٹن میں موجود ہیں جہاں اُن کی امریکی محکمہ خزانہ کے اعلیٰ حکام سے ملاقات ہوئی ہے۔اس حوالے سے جاری ہونے والے اعلامیے کے مطابق پاکستان کے مضبوط معاشی اشاریوں پر وزیر خزانہ نے بریفنگ دی اور امریکی کمپنیوں کو تیل و گیس، معدنیات، زراعت اور آئی ٹی میں سرمایہ کاری کی دعوت دی۔یو ایس پاکستان بزنس کونسل کے رہنماؤں اور ارکان سے وزیر خزانہ کی ملاقات ہوئی جس میں معیشت کے استحکام اور نجی شعبے کے قائدانہ کردار پر زور دیا گیا۔

اعلامیے میں امریکی حکام سے تجارتی معاہدے کو پاکستان کے لیے اہم سنگِ میل قرار دیا گیا ہے جبکہ ریکوڈک منصوبے کے مالیاتی معاملات جلد طے کرنے پر بھی اتفاق کیا گیا ہے۔علاوہ ازیں آئی ایف سی کے ریجنل نائب صدر ریکارڈو پولیتی سے بھی وزیر خزانہ کی ملاقات ہوئی ہے جس میں اسلام آباد میں آئی ایف سی کے علاقائی دفتر کے قیام کا خیرمقدم کیا گیا۔

عالمی مارکیٹ میں سونے کی قیمت نے تاریخ رقم کر دی، پہلی بار فی اونس قیمت 4 ہزار ڈالر کی حد عبور کر گئی۔

ماہرین کے مطابق سونے کی قیمت میں اس غیرمعمولی اضافے کی بنیادی وجہ عالمی اقتصادی بے یقینی، جغرافیائی تنازعات اور مرکزی بینکوں کی پالیسیوں کے حوالے سے غیر واضح صورتحال ہے۔بین الاقوامی خبر ایجنسیوں کے مطابق سرمایہ کاروں نے حالیہ مہینوں میں محفوظ سرمایہ کاری کے طور پر سونا بڑے پیمانے پر خریدنا شروع کر دیا ہے۔ اس رجحان نے عالمی مارکیٹ میں طلب کو مزید بڑھا دیا ہے، جس کے نتیجے میں قیمتوں میں تیزی سے اضافہ دیکھا جا رہا ہے۔مالیاتی ماہرین کا کہنا ہے کہ امریکی فیڈرل ریزرو کی جانب سے آئندہ مہینوں میں شرحِ سود میں کمی کے امکانات بھی سونے کی قیمت میں اضافے کا ایک اہم سبب بنے ہیں۔ شرح سود میں کمی کے بعد ڈالر کی قدر میں کمی متوقع ہے، جس سے سونا مزید پرکشش سرمایہ کاری تصور کیا جا رہا ہے۔

اعداد و شمار کے مطابق 2025ء کے دوران اب تک سونے کی قیمت میں عالمی سطح پر 52 فیصد اضافہ ریکارڈ کیا گیا ہے، جبکہ 2024ء میں سونا 27 فیصد مہنگا ہوا تھا۔ ماہرین کے مطابق اگر یہی رجحان برقرار رہا تو رواں سال کے اختتام تک سونا نئی بلند ترین سطح پر پہنچ سکتا ہے۔ عالمی مارکیٹ میں سونے کی قیمت میں اس تیزی نے دیگر قیمتی دھاتوں مثلاً چاندی اور پلاٹینم کی طلب میں بھی اضافہ کیا ہے، تاہم سرمایہ کاروں کی توجہ فی الوقت زیادہ تر سونے پر مرکوز ہے۔

ماہرین کے مطابق اگر عالمی سطح پر جغرافیائی کشیدگی اور معاشی غیر یقینی صورتحال میں بہتری نہ آئی تو سونا آئندہ مہینوں میں 4,200 سے 4,500 ڈالر فی اونس تک پہنچ سکتا ہے، جو عالمی معیشت کے لیے ایک نیا چیلنج ثابت ہوگا۔

گورنر اسٹیٹ بینک جمیل احمد نے شرح سود میں کمی کو سیلابی نقصانات اور آئی ایم ایف کے جائزے سے مشروط کردیا۔

غیر ملکی میڈیا سے گفتگو کرتے ہوئے گورنر اسٹیٹ بینک جمیل احمد نے کہا کہ مجموعی طور پرمہنگائی مرکزی بینک کے ہدف میں رہے گی، مہنگائی کی شرح قلیل مدت میں 5 سے 7 فیصد ہدف سے زائد رہ سکتی ہے، سخت مانیٹری پالیسی نے مہنگائی کمی میں کلیدی کردار ادا کیا ہے اور ایسی ہی سخت مانیٹری پالیسی سے آئندہ بھی فائدہ مند ہوگی تاہم شرحِ سود میں کمی کا فیصلہ سیلابی نقصانات کے تخمینے اور آئی ایم ایف کے جائزے پر منحصر ہوگا،مانیٹری اور اقتصادی پالیسیوں میں ہم آہنگی اچھے نتائج دے رہی ہے۔

کراچی میں کاروباری برادری کو بھتہ خوری اوردھمکیوں کا سامنا،کراچی چیمبر نےاراکین کو سیکورٹی ایڈوائزری جاری کردی

کراچی چیمبر کی جانب سے کہا گیا ہے کہ بھتہ طلبی کےخطوط کیساتھ گولیاں موصول ہونے کےواقعات رپورٹ ہوئے ہیں،کراچی میں امن وامان کی صورتحال سنگین خدشات جنم دے رہی ہے،کاروباری طبقے کو نشانہ بنانے کا خطرناک رجحان سامنے آیا،اپنے دفاتر اورگھروں پر سی سی ٹی وی کیمرے نصب کریں،سی سی ٹی وی کیمروں کی ریکارڈنگز شواہد کے طور پر کام آئیں گی،سکیورٹی اقدامات کاروبار،جائیداد اور خاندان کے تحفظ کیلئے ناگزیر ہے، دھمکی کی صورت میں قانون نافذ کرنے والے اداروں کوفوری معلومات فراہم کریں،کاروباری برادری کے اتحاد سے صورتحال پر قابو پایا جا سکتا ہے،حکومت اداروں کیساتھ مکمل رابطے میں ہیں،اراکین سکیورٹی انتظامات میں ہرگز غفلت نہ برتی جائے،کراچی چیمبرنےبھتہ خوری کیخلاف قانون نافذ کرنے والے اداروں سے فوری کارروائی کی اپیل کر دی

پاکستان میں عالمی سرمایہ کاری کے لیے ایس آئی ایف سی کی کوششیں بارآورثابت ہو رہی ہیں

ایس آئی ایف سی کی مؤثر کاوشوں نے زراعت، کان کنی سمیت دیگر شعبوں میں عالمی سرمایہ کاروں کا اعتماد جیت لیا ،سعودی عرب کی ویژن 2030 اور پاکستان کی ترقیاتی ترجیحات کی بنیاد پر اقتصادی راہداری کی منصوبہ بندی جاری ہے،پاکستان اور سعودی عرب تاریخی دفاعی معاہدہ کے بعد پاک سعودی اکنامک کوریڈور کا قیام زیر غورہے،پاک سعودی شراکت داری، گوادر پورٹ کے ذریعے جنوبی ایشیا اور مشرق وسطیٰ کے روابط کا نیا سنگِ میل ہے،پاک سعودی اکنامک کوریڈور سی پیک کی طرز پر ترقی اور سرمایہ کاری کے نئے مواقع فراہم کرے گا،پاک سعودی اکنامک کوریڈور خطے میں سرمایہ کاری کے فروغ، روزگار کے مواقع اور جدید ٹیکنالوجی کی منتقلی کا ضامن بنے گا

رواں مالی سال میں پاکستان کی سعودی عرب کو برآمدات 700 ملین ڈالر سے تجاوز کر گئیں،سعودی سرمایہ کار زراعت، کان کنی، توانائی اور آئی ٹی کے شعبے میں اقتصادی روابط مضبوط کرنے کے خواہشمند ہیں،ماہرین اقتصادیات کے مطابق نیا معاہدہ سرمایہ کاروں کو طویل المدتی سرمایہ کاری کیلئےاعتماد فراہم کرے گا،یہ اہم منصوبہ کارپوریٹ فارمنگ، ڈیری اور گوشت کی پیداوار کے منصوبوں کی راہ ہموار کر ےگا،پاک سعودی اقتصادی تعاون کے ذریعے حکومت اور ایس آئی ایف سی نے معاشی استحکام کے لیے اقدامات تیز کر دیے