Category: کاروبار

اسلام آباد: وزیراعظم پاکستان محمد شہباز شریف نے جولائی 2024 سے مارچ 2025 تک ٹیکسٹائل سیکٹر کی برآمدات میں 9.38 فیصد اضافے کا خیرمقدم کیا ہے اور اسے پاکستانی معیشت کے لیے ایک مثبت پیش رفت قرار دیا ہے۔ وزیراعظم نے کہا کہ اس وقت ٹیکسٹائل سیکٹر کی برآمدات 13.613 ارب ڈالر کی بلند ترین سطح پر پہنچ چکی ہیں، جو کہ نہ صرف خوش آئند ہے بلکہ ملکی معیشت کے لیے ایک مضبوط سنگ میل ثابت ہو رہی ہے۔

وزیراعظم شہباز شریف نے اس بات پر بھی زور دیا کہ مارچ 2025 میں ٹیکسٹائل سیکٹر کی برآمدات میں گزشتہ ماہ کے مقابلے میں 6.27 فیصد اضافہ اس بات کا غماز ہے کہ پاکستانی معیشت کی ترقی اور حکومتی پالیسیوں کی سمت درست ہے۔ انہوں نے کہا کہ یہ اضافہ پاکستان کی معاشی استحکام اور عالمی سطح پر ہمارے تجارتی شعبے کی پائیداری کا آئینہ دار ہے۔محمد شہباز شریف نے اس ترقی کو حکومت پاکستان اور نجی شعبے کے درمیان تعاون اور مشترکہ محنت کا نتیجہ قرار دیا۔ ان کا کہنا تھا کہ ٹیکسٹائل کے شعبے میں ہونے والا یہ مثبت اضافہ اس بات کی دلیل ہے کہ حکومت اور کاروباری ادارے ایک دوسرے کے ساتھ مل کر ملک کی معیشت کو مضبوط کرنے کی کوششوں میں کامیاب ہو رہے ہیں۔

وزیراعظم نے کہا کہ حکومت کی ٹیم ملک کی اقتصادی ترقی کی رفتار کو مزید تیز کرنے کے لیے دن رات محنت کر رہی ہے۔ انہوں نے اس عزم کا اعادہ کیا کہ حکومت ٹیکسٹائل سیکٹر سمیت تمام برآمدی شعبوں کی ترقی کے لیے ہر ممکن تعاون فراہم کرے گی اور اس بات کو یقینی بنائے گی کہ پاکستان کا کاروبار دوست ماحول مزید بہتر ہو تاکہ ملکی برآمدات میں مسلسل اضافہ ہو۔

وزیراعظم نے نجی شعبے کو یقین دلایا کہ حکومت ان کے ساتھ شراکت داری کی بنیاد پر ملکی معیشت کی ترقی کے لیے ہر ممکن وسائل فراہم کرے گی۔ انہوں نے کہا کہ حکومت کا مقصد ملک میں ایک مضبوط اقتصادی بنیاد قائم کرنا ہے تاکہ پاکستان عالمی سطح پر اپنی اقتصادی پوزیشن مزید مستحکم کر سکے۔اس کے ساتھ ہی، وزیراعظم نے اس بات پر زور دیا کہ ملکی ترقی کے اس سفر کو مزید تیز کرنے کے لیے حکومت اور نجی شعبے کے درمیان تعاون کو مزید مستحکم کیا جائے گا تاکہ پاکستان کو ترقی کی راہ پر گامزن رکھا جا سکے۔

وزیراعظم محمد شہبازشریف نے کہا ہے کہ قرضوں سے نجات حاصل کرنے کے لئے قومی آمدن بڑھانا ہوگی ،کارکردگی کے حوالے سے مختلف اداروں میں موجود سقم دور کرنا ہوں گے،معاشرے اور اداروں کی بہتری کے لئے جزا اور سزا کے تصور کو اپنانا ہو گا ، ایف بی آر کی ڈیجیٹائزیشن کے طویل سفر کا آغاز ہو چکا ہے، سرمایہ کار ہمارے سر کا تاج ہیں ، انہیں ہر ممکن سہولیات دیں گے، عدالتوں میں زیر التواء کھربوں روپے کے ٹیکس کیسز کے فوری فیصلے ناگزیر ہیں ۔

فیڈرل بورڈ آف ریونیو کے پر فارمنس مینجمنٹ سسٹم کےافتتاح کی تقریب سے خطاب کرتے ہوئے وزیراعظم نے کہا کہ ایف بی آر کے دورہ کے موقع پر ایک سال پہلے کئے گئے ایف بی آر کے نظام کو ڈیجیٹائز کرنے کے فیصلے پر عملدرآمد کے لئے پور ی ٹیم نے مل کر کاوشیں کیں اور ان بے پناہ کوششوں کی بدولت اس سفر کاآغاز ہو چکا ہے۔ یہ ایک لمباسفر ہے اور راستے میں بڑی رکاوٹیں آئیں گی جن کو اپنے غیر متزلزل عزم کے ساتھ دور کرنا ہے اور پاکستان کے روشن اور خوشحال مستقبل کے لئے شبانہ روز کوششیں کرنی ہیں، پاکستان کو قرضوں سے نجات دلانی ہے، ا س کا بوجھ آپ لوگوں کے کندھوں پر ہے۔ ہم آپ کے قابل ذہنوں کی بدولت یہ اہداف حاصل کریں گے۔ وزیراعظم نے کہا کہ گزشتہ سال کے مقابلہ میں ہمارے ٹیکس محصولات میں 27 فیصد اضافہ قابل ستائش ہے۔ اس کےلئے چیئرمین ایف بی آر اور ان کی ٹیم کو مبارکباد پیش کرتےہیں ۔ وزیراعظم نے کہا کہ یہ ایک طویل سفر ہے اور محصولات میں اضافہ بظاہر خوش آئند ہے لیکن مختلف ٹربیونلز یا دیگر عدالتوں میں کھربوں روپے کے مقدمات چل رہے ہیں۔ ان میں سے کئی مقدمات کئی دہائیوں سے چل رہے ہیں۔ ان مقدمات کے فوری فیصلے ناگزیر ہیں۔ یہ کوئی مبالغہ آرائی نہیں ہے۔وزیراعظم نے ایف بی آر کے افسران کی تعریف کرتے ہوئے کہا کہ یہ ایک چبھتا سوال ہے کہ ایک طرف ہمارے کھربوں روپے کے کیسز زیر التواء ہیں اور دوسری طرف ہم دن رات قرض لے رہے ہوتے ہیں یا ان کو رول اوور کرارہے ہوتے ہیں۔دوسری طرف انٹرنل ریونیو سروس ، کسٹم ، سیلزٹیکس ، جعلی رسید وں کی دردناک کہانیاں ہم سن چکے ہیں ۔ ہم نے ان کمزوریوں کو دور کرناہے اور انہی چیلنجز کا ہماری حکومت کو سامنا ہے۔ ماضی میں جو ہوا ہمیں اس سے سبق حاصل کرکے تیزی سے ان خامیوں پر قابوپانے کی ضرورت ہے۔ اسی لئے میں آپ کے پاس حاضر ہواہوں ۔ہم نے ایک سال میں اس کے لئے بڑی تگ و دو کی ہے۔ وزیراعظم نے کہا کہ چند سال قبل ٹریک اینڈ ٹریس سسٹم بنایا گیا جس کی کارکردگی انتہائی ناقص ہے لیکن سوچنے کی بات ہے کہ کیا یہ صرف اس کمپنی کی خطاہے یا اس نظام کا مؤثر استعمال نہیں کیا گیا۔ وزیراعظم نے کہا کہ ایک سال میں جو اچھاکام کیاگیا ہے اس پر ہم آپ کو دل کھول کرداد دیتے ہیں اور دعاگو ہیں کہ اللہ آپ کو مزید اچھاکام کرنے کی توفیق دے۔ وزیراعظم نے کہا کہ اگر ہم نے قرض سے نجات حاصل کرنی ہے تو ہمیں اپنے محصولات بڑھانا ہوں گے۔اس کے بغیر قرض بڑھتاچلاجائےگااور آئی ایم ایف سے کبھی چھٹکارا نہیں ملےگا۔ وزیراعظم نے کہا کہ ایف بی آر کے مختلف شعبوں میں ہمارے نوجوان شاندار کام کررہے ہیں۔ میری یہ استدعاہے کہ محنت کرکے محصولات میں اضافے سے اس قوم کی تقدیر بدلنے کی اپنی ذمہ داری پوری کریں۔ وزیراعظم نےکہا کہ وہ بینکوں کے ونڈ فال ٹیکس کامعاملہ عدالتوں میں لے کر گئے اور ایف بی آر کے چیئرمین اور اس کی قانونی ٹیم کی وجہ سے 23 ارب روپے قومی خزانے میں واپس آئے تاہم یہ رقم بہت کم ہے ، ہمارے کھربوں روپے کے ایسے مقدمات زیرالتواء ہیں۔ وزیراعظم نے کہا کہ قرضوں کی وجہ سے پاکستان کو بہت نقصان پہنچا ہے ، ہمیں اس حوالے سے اپنی ذمہ داریاں بھرپور اندازمیں کرتے ہوئے قرضوں سے نجات حاصل کرنا ہوگی۔ وزیراعظم نے کہا کہ انفورسمنٹ کے لئے کسٹمز اور دیگر اداروں میں جدید ٹیکنالوجی کومتعارف کرایا جا رہا ہے۔ یہ چیلنجز سے بھرپور طویل سفر کی شروعات ہے ، ہم نے ان چیلنجز سے نمٹنا ہے ، اس میں اپنے کام میں ماہر لوگوں کا بڑا کردار ہوگا۔ اشیاء کی مس ڈیکلیئریشن سے نجات کاخاطر خواہ انتظام نہیں ہوا، اس پر کام ہو رہا ہےتاہم اس کاحل یہ ہے کہ کنٹینر کو سکینرز سے گزاراجائے۔ سکینر مشینوں کے حصول میں تاخیر مجرمانہ غفلت ہے۔ہم جہاں کھربوں روپے کا نقصان برداشت کررہے ہیں تو کیوں چند کروڑ روپے اس کے لئے خرچ نہیں کررہے، اس کے لئے ہمارے وسائل حاضر ہیں ۔ وزیراعظم نے کہا کہ ہم تیزی سے اس منزل کی طرف بڑھ رہے ہیں جس کے لئے پاکستان معرض وجود میں آیاتھااور جس کے لئے قائد اعظم کی قیادت میں تحریک چلی اور لاکھوں لوگوں نے قربانیاں دیں۔ پاکستان کا دنیا میں ضرورت مقام بنے گا اور ابھی بھی تاخیر نہیں ہوئی ۔ انہوں نے کہا کہ تبدیلی کی شروعات ہو چکی ہیں، انفورسمنٹ پر کام ہو رہا ہے، ٹربیونلز کو پوری طرح ریفار م کیاجارہا ہے، میرٹ پر نئے قابل لوگوں کو بھرتی کیاجا رہا ہے، قابل وکلا ء کی خدمات لی جا رہی ہیں، پرفارمنس مینجمنٹ سسٹم بہت اچھا ہے ، اس میں مزید بہتری لانی ہے اور دیگر اداروں میں بھی اس کو متعارف کرانا ہے، ایف بی آر کواب اپنی ساکھ بنانا ہو گی۔جزا و سزا کے تصور کو ایف بی آر سمیت تمام اداروں میں فروغ دے رہے ہیں۔جو لوگ اچھا کام کریں گے ان کو عوامی پذیرائی اور مراعات دیں گے، اس حوالہ سے چیئرمین ایف بی آر نے اچھا فارمیٹ بنایا ہے۔ وزیراعظم نے کہا کہ اہم خدمات سرانجام دینے والوں کو وزیراعظم ہاؤس بلا کر انہیں شیلڈز اور مانیٹری ایوارڈ دیئے جو ملک بھر کے تمام اداروں کیلئے حوصلہ افزائی ہے۔ اسی طرح جو لوگ کام نہیں کریں گے انہیں سزا ہو گی۔معاشرے سزا اور جزا سے ہی بہتر ہوتے ہیں۔ وزیراعظم نے ایف بی آر کو ہدایت کی کہ وہ ٹیکس ادا کرنے والوں سے اچھا رویہ رکھیں، سرمایہ کار ہمارے سرکا تاج ہیں انہیں عزت اور ہر ممکنہ سہولت دینی ہے، اس سے ہمارے ملک میں سرمایہ آئے گا۔ وزیراعظم نے کہا کہ پرفارمنس مینجمنٹ سسٹم کو اسٹیبلشمنٹ ڈویژن نوٹیفائی کرے گا تاکہ ذاتی پسند و ناپسند کی بجائے کارکردگی کی بنیاد پر ملازمین کو صلہ ملے گا