Category: جرائم و حادثات

ڈسکہ (باغی ٹی وی ،نامہ نگار ملک عمران)ڈسکہ میں ضلعی انتظامیہ کی ہدایات پر عملدرآمد کو یقینی بنانے کے لیے اسسٹنٹ کمشنر عثمان غنی نے ڈیلائٹ مارکی سمیت شہر کے مختلف شادی ہالز پر اچانک چھاپے مارے۔ چھاپوں کے دوران صفائی کے ناقص انتظامات اور ون ڈش پالیسی کی کھلی خلاف ورزی سامنے آئی، جس پر متعلقہ شادی ہالز کو بھاری جرمانے عائد کر دیے گئے۔

معائنے کے دوران اسسٹنٹ کمشنر نے ہالز میں موجود کچن ایریا، واش رومز، کھانے کی تیاری و تقسیم کے مقامات اور مہمانوں کے بیٹھنے کے انتظامات کا بغور جائزہ لیا۔ انہوں نے واضح کیا کہ بعض ہالز میں صفائی کے انتہائی خراب حالات تھے، جبکہ متعدد جگہوں پر ون ڈش کی بجائے کئی اقسام کے کھانے پیش کیے جا رہے تھے جو حکومتی احکامات کی صریح خلاف ورزی ہے۔

عثمان غنی نے موقع پر موجود شادی ہالز کے منتظمین کو تنبیہ کرتے ہوئے کہا کہ حکومت کی جاری کردہ ون ڈش پالیسی اور صفائی سے متعلقہ قواعد کی خلاف ورزی کسی صورت برداشت نہیں کی جائے گی۔ انہوں نے کہا کہ یہ اقدامات نہ صرف غیر ضروری اسراف کو روکنے بلکہ عام شہریوں کو صاف ستھرا ماحول مہیا کرنے کے لیے کیے جا رہے ہیں۔

انہوں نے مزید کہا کہ ڈسکہ میں ضلعی انتظامیہ کی ہدایات پر مکمل عملدرآمد ہر صورت یقینی بنایا جائے گا اور اس حوالے سے کسی قسم کی غفلت یا کوتاہی برداشت نہیں کی جائے گی۔ خلاف ورزی کے مرتکب شادی ہالز کے خلاف آئندہ بھی سخت کارروائیاں جاری رہیں گی۔

شہری حلقوں کی جانب سے اسسٹنٹ کمشنر کی اس کارروائی کو سراہا جا رہا ہے اور توقع ظاہر کی جا رہی ہے کہ ان اقدامات سے نہ صرف قانون کی بالا دستی قائم ہوگی بلکہ شادی ہالز میں بے ضابطگیوں پر بھی قابو پایا جا سکے گا۔

سیالکوٹ (باغی ٹی وی، بیوروچیف شاہد ریاض) پسرور چونڈہ روڈ پر بٹر اسٹاپ کے قریب تیز رفتار کار نے رکشہ کو ٹکر مار دی، جس کے نتیجے میں رکشے میں سوار 5 افراد زخمی ہو گئے۔ حادثہ اُس وقت پیش آیا جب رکشہ پسروڑ سے چونڈہ جا رہا تھا کہ پیچھے سے آنے والی کار نے زور دار ٹکر ماری اور موقع سے فرار ہو گئی۔

زخمیوں میں فریحہ زوجہ قیصر (27 سال)، امیر علی ولد فقیر احمد (23 سال)، محمد بشیر ولد اللہ لوک (65 سال)، ابیحہ دختر محمد قیصر (5 سال) اور شہناز بی بی زوجہ محمد بشیر (55 سال) شامل ہیں، تمام کا تعلق گاؤں ڈھینگ سے ہے۔ ریسکیو 1122 نے زخمیوں کو فوری طور پر تحصیل ہیڈکوارٹر اسپتال پسروڑ منتقل کیا، جہاں ان کا علاج جاری ہے۔

پولیس نے موقع پر پہنچ کر کارروائی شروع کر دی ہے اور فرار ہونے والی کار کی تلاش جاری ہے۔

سیالکوٹ (باغی ٹی وی، بیوروچیف شاہد ریاض) تھانہ سبز پیر پولیس نے کنگرا بازار میں بیوٹی پارلر کی مالکہ خاتون پر تشدد کرنے والے ملزم عمر ٹھاکر کو گرفتار کر لیا ہے۔ واقعہ دو روز قبل پیش آیا تھا جہاں معمولی تلخ کلامی کے بعد ملزم نے خاتون کو تشدد کا نشانہ بنایا۔

ڈی پی او سیالکوٹ فیصل شہزاد نے واقعہ کا فوری نوٹس لیتے ہوئے متعلقہ پولیس کو سخت کارروائی کا حکم دیا تھا، جس پر سبز پیر پولیس نے فوری ایکشن لیتے ہوئے مقدمہ درج کر کے ملزم کو حراست میں لے لیا۔

ڈی پی او فیصل شہزاد کا کہنا ہے کہ خواتین پر تشدد کے واقعات کسی صورت برداشت نہیں کیے جائیں گے۔ خواتین کا تحفظ پولیس کی اولین ترجیح ہے، اور ایسے عناصر کو قانون کے مطابق عدالت سے سخت سزا دلوانے کیلئے ہر ممکن اقدام کیا جائے گا۔

سیالکوٹ (باغی ٹی وی، بیوروچیف شاہد ریاض) ایئرپورٹ پر ایف آئی اے کی بڑی کارروائی، قتل کے دو ملزمان بیرون ملک فرار کی کوشش میں گرفتار

ایف آئی اے امیگریشن سیالکوٹ ایئرپورٹ نے بڑی کارروائی کرتے ہوئے قتل کے مقدمے میں مطلوب دو ملزمان کی بیرون ملک فرار کی کوشش ناکام بناتے ہوئے انہیں گرفتار کر لیا۔

گرفتار ملزمان کی شناخت جمشید اشرف اور فہد جمشید کے نام سے ہوئی ہے، جو فلائٹ نمبر G9-533 کے ذریعے ملک سے فرار ہونے کی کوشش کر رہے تھے۔ ایف آئی اے حکام کے مطابق دونوں افراد تھانہ ٹانڈا ضلع گجرات کو قتل کے مقدمے میں مطلوب تھے۔

حکام نے گرفتار ملزمان کو مزید کارروائی کے لیے متعلقہ پولیس کے حوالے کر دیا۔ ایف آئی اے کی بروقت کارروائی کو سیکیورٹی اداروں اور عوامی حلقوں کی جانب سے سراہا گیا ہے۔

سیالکوٹ (باغی ٹی وی، بیوروچیف شاہد ریاض) سیالکوٹ شہر میں چوہوں کی تعداد میں خطرناک حد تک اضافہ ہو گیا ہے، جس نے شہریوں کی زندگی اجیرن بنا دی ہے۔ شہر کے مختلف علاقوں خصوصاً گھوئینکی، کوٹلی بھاگو، حاجی پورہ، رنگپورہ، کچہری روڈ، پیرس روڈ، اڈہ پسروریاں اور پرانے بازار چوہوں کی آماجگاہ بن چکے ہیں۔

شہریوں کا کہنا ہے کہ چوہے گھروں، گلیوں، بازاروں اور دفاتر میں کھلے عام گھومتے ہیں، خوراک، کپڑوں اور برقی آلات کو نقصان پہنچا رہے ہیں، جبکہ بچوں کو کاٹنے کے واقعات بھی سامنے آ چکے ہیں۔ چوہوں کی موجودگی نہ صرف شدید گندگی کا باعث ہے بلکہ ہیضہ، بخار اور دیگر متعدی بیماریوں کے پھیلاؤ کا خدشہ بھی بڑھ گیا ہے۔

ماہرین صحت کے مطابق اگر فوری اور مؤثر اقدامات نہ کیے گئے تو یہ صورتحال صحتِ عامہ کے بڑے بحران میں تبدیل ہو سکتی ہے۔ شہریوں نے ضلعی انتظامیہ سے مطالبہ کیا ہے کہ وہ اس سنگین مسئلے پر فوری توجہ دے اور چوہوں کی افزائش روکنے کے لیے ٹھوس اقدامات کرے۔ فی الحال انتظامیہ کی خاموشی شہریوں کے لیے مزید پریشانی کا باعث بن رہی ہے۔

ڈسکہ (باغی ٹی وی، نامہ نگار ملک عمران) تھانہ صدر ڈسکہ پولیس نے شہری غلام رسول کے گھر ہونے والی 90 لاکھ روپے مالیت کی بڑی چوری کا معمہ چند گھنٹوں میں حل کر لیا۔ واردات میں ملوث ملزم کو گرفتار کر کے تمام مال مسروقہ برآمد کر لیا گیا۔ چوری کی یہ واردات تھانہ صدر کے علاقہ شیرا دا کوٹ میں پیش آئی جہاں نامعلوم افراد نے 25 تولے سونے کے زیورات اور نقدی چرا لی تھی۔

ڈسٹرکٹ پولیس آفیسر سیالکوٹ فیصل شہزاد نے واقعے کا فوری نوٹس لیتے ہوئے ڈی ایس پی صدر سرکل کو ہدایات دیں کہ ملزمان کو جلد گرفتار کر کے چوری شدہ سامان اصل مالک کو واپس کیا جائے۔ ڈی پی او کی ہدایات پر ایس ایچ او تھانہ صدر نے جدید تکنیکی ذرائع اور پیشہ ورانہ مہارت کا استعمال کرتے ہوئے ملزم کو گرفتار کر لیا، جو متاثرہ شہری کا سگا بھتیجا نکلا۔ تفتیش کے دوران معلوم ہوا کہ ملزم نے گھر والوں کی غیر موجودگی میں واردات کی اور زیورات بینک لاکر میں چھپا دیے تھے۔

پولیس نے ملزم کی نشاندہی پر تمام مسروقہ مال، جس کی مالیت تقریباً 90 لاکھ روپے ہے، برآمد کر کے اصل مالک کے حوالے کر دیا۔ ڈی پی او فیصل شہزاد نے پولیس ٹیم کی فوری اور کامیاب کارروائی کو سراہتے ہوئے ٹیم کے لیے نقد انعام اور تعریفی اسناد کا اعلان کیا ہے۔ ان کا کہنا تھا کہ سیالکوٹ پولیس شہریوں کے جان و مال کے تحفظ کو اولین ترجیح دیتی ہے اور جرائم پیشہ عناصر کے خلاف بلا امتیاز کارروائیاں جاری رہیں گی۔