Category: جرائم و حادثات

اوکاڑہ (نامہ نگار ملک ظفر) ایڈیشنل سیشن جج رینالہ خورد محمد مسرور انور خان کی عدالت نے منشیات فروش اظہر عباس کو مجموعی طور پر 35 سال قید اور 13 لاکھ روپے جرمانے کی سزا سنا دی۔ پولیس ترجمان کے مطابق مجرم کو چرس فروشی پر 20 سال قید اور 13 لاکھ روپے جرمانہ جبکہ افیون فروشی پر 15 سال قید کی سزا سنائی گئی۔

جرمانہ ادا نہ کرنے کی صورت میں مزید 6 ماہ قید کاٹنا ہوگی۔ مجرم کو 2024 میں تھانہ صدر رینالہ پولیس نے گرفتار کیا تھا اور اس کے قبضے سے بھاری مقدار میں چرس و افیون برآمد ہوئی تھی۔ ڈی پی او اوکاڑہ راشد ہدایت نے مقدمے میں بہترین کارکردگی دکھانے پر سب انسپکٹر نوید نزیر اور لیگل ٹیم کو شاباش دی۔

اوکاڑہ( نامہ نگار ملک ظفر)اوکاڑہ میں بڑھتے ہوئے ٹریفک حادثات نہ صرف ضلعی ٹریفک کنٹرول اتھارٹی کی کارکردگی پر سوالیہ نشان ہیں بلکہ اس کی نااہلی بھی کھل کر سامنے آ گئی ہے۔ رواں ماہ کے ابتدائی تین ہفتوں میں ضلع بھر سے 965 روڈ حادثات رپورٹ ہوئے جن میں 17 قیمتی جانیں ضائع ہو گئیں، جب کہ سینکڑوں مرد، خواتین اور بچے زخمی ہوئے۔

تفصیلات کے مطابق تحصیل اوکاڑہ میں 557، دیپالپور میں 274 اور رینالہ خورد میں 134 حادثات رپورٹ ہوئے۔ ان حادثات میں 90 سے 95 فیصد موٹر سائیکل شامل ہیں، جو تیز رفتاری اور بے ہنگم ٹریفک کی علامت ہیں۔

عوامی حلقوں کا کہنا ہے کہ ٹریفک کنٹرول اتھارٹی شاہراہوں پر قانونی حفاظت کے لیے ہر ماہ کروڑوں روپے خرچ کر رہی ہے، لیکن عملی کارکردگی صفر ہے۔ سڑکوں پر قانون کی حکمرانی دکھائی نہیں دیتی، جبکہ افسران صرف عہدوں کے تمغے سجائے بیٹھے ہیں۔

عوام نے ڈی پی او محمد راشد ہدایت سے سوال کیا ہے کہ اگر کسی اور جرم پر فوری نوٹس لیا جا سکتا ہے، تو روڈ حادثات میں ملوث نااہل عناصر کے خلاف کارروائی کیوں نہیں کی جاتی؟

عوامی مطالبہ ہے کہ فوری ہنگامی اقدامات کیے جائیں تاکہ قیمتی جانوں کے ضیاع اور عمر بھر کی معذوری جیسے حادثات سے بچا جا سکے اور ٹریفک قانون کی بالا دستی یقینی ہو۔

اوکاڑہ (نامہ نگار ملک ظفر)ڈپٹی کمشنر احمد عثمان جاوید کی ہدایت پر اسسٹنٹ کمشنر رب نواز نے عوام کو معیاری اشیائے خورونوش کی فراہمی یقینی بنانے کے لیے متحرک اقدامات کا آغاز کر دیا ہے۔ اس سلسلے میں انہوں نے محکمہ فوڈ اتھارٹی کے افسران کے ہمراہ شہر میں صفائی ستھرائی کے ناقص انتظامات اور فوڈ سیفٹی ایس او پیز کی خلاف ورزیوں پر کارروائیاں کیں۔

کارروائی کے دوران اسسٹنٹ کمشنر رب نواز نے مہر عظیم ہوٹل کے مختلف حصوں خصوصاً کچن کا معائنہ کیا، جہاں صفائی کے غیر معیاری انتظامات اور ایس او پیز کی خلاف ورزی پائی گئی۔ ان خلاف ورزیوں پر ہوٹل انتظامیہ کو 50 ہزار روپے جرمانہ عائد کیا گیا۔

اسی طرح نواحی علاقے ستگھرہ میں واقع کولڈ ڈرنکس فیکٹری میں بھی صفائی کے ناقص انتظامات پائے گئے، جس پر فیکٹری مالک کو 10 ہزار روپے جرمانہ کیا گیا۔

اس موقع پر اسسٹنٹ کمشنر رب نواز نے میڈیا سے گفتگو کرتے ہوئے کہا کہ ناقص صفائی، غیر معیاری اشیاء اور مضر صحت مٹیریل کے استعمال پر کسی قسم کا سمجھوتہ نہیں کیا جائے گا۔ عوام الناس کو محفوظ، معیاری اور صاف ستھری خوراک کی فراہمی حکومت کی اولین ترجیح ہے، اور اس سلسلے میں خلاف ورزی کے مرتکب کاروباروں کے خلاف سخت کارروائیاں جاری رہیں گی۔

اوکاڑہ (نامہ نگار ملک ظفر) ڈی پی او اوکاڑہ راشد ہدایت کی ہدایت پر ضلع بھر میں سرچ اینڈ کومبنگ آپریشن کیا گیا، جس کے دوران مجموعی طور پر 33 ملزمان کو گرفتار کیا گیا۔ پولیس ترجمان کے مطابق یہ کارروائیاں جرائم پیشہ عناصر کے خلاف جاری کریک ڈاؤن کا حصہ ہیں، جن کا مقصد امن و امان کی فضا کو یقینی بنانا ہے، خصوصاً محرم الحرام کے پیشِ نظر۔

کارروائی کے دوران گوگیرہ پولیس نے ڈکیت گینگ کے 3 ملزمان کو گرفتار کیا، جب کہ 4 خطرناک اشتہاری ملزمان کو بھی حراست میں لیا گیا۔ ناجائز اسلحہ رکھنے کے الزام میں 4 افراد کو گرفتار کر کے ان کے قبضے سے 3 پستول، ایک رائفل اور 15 گولیاں برآمد کی گئیں۔

منشیات کے خلاف کارروائی میں سٹی دیپالپور پولیس نے بڑی کامیابی حاصل کی، جہاں ایک منشیات فروش سے 2 کلو 200 گرام چرس برآمد کی گئی۔ اس کے علاوہ شراب فروشی میں ملوث 4 ملزمان کو گرفتار کرتے ہوئے 76 لیٹر شراب قبضے میں لے لی گئی۔

پولیس ترجمان کے مطابق سرچ آپریشن کے دوران جوا کھیلنے میں ملوث 11 افراد کو بھی حراست میں لیا گیا، جبکہ عارضی قیام گاہ ایکٹ کی خلاف ورزی پر ایک ملزم کو گرفتار کیا گیا۔

ڈی پی او راشد ہدایت کا کہنا ہے کہ یہ سرچ اینڈ کومبنگ آپریشنز آئندہ بھی تسلسل کے ساتھ جاری رہیں گے تاکہ امن و امان کو یقینی بنایا جا سکے اور جرائم پیشہ عناصر کا مکمل طور پر قلع قمع کیا جا سکے۔

اوکاڑہ (نامہ نگار ملک ظفر) اوکاڑہ کے علاقے خان کالونی میں واقع ایک سکریپ کے گودام میں اچانک آگ بھڑک اٹھی، جس کے نتیجے میں تقریباً 15 لاکھ روپے مالیت کا سکریپ جل کر خاکستر ہو گیا۔ آگ علی ٹرسٹ ہسپتال کے قریب واقع گودام میں لگی، جس کی اطلاع ملتے ہی ریسکیو 1122 کی موٹر بائیک سروس اور دو فائر وہیکلز فوری طور پر جائے وقوعہ پر پہنچ گئیں۔

ریسکیو ذرائع کے مطابق ٹیموں نے موقع پر پہنچ کر جارحانہ حکمت عملی اپناتے ہوئے پانی کی مدد سے فائر فائٹنگ شروع کر دی، اور کچھ ہی دیر میں آگ پر قابو پا لیا گیا۔ ریسکیو حکام کے مطابق فوری کارروائی کی بدولت گودام میں موجود 17 لاکھ روپے مالیت کا سکریپ جلنے سے محفوظ رہا۔

آتشزدگی کی وجوہات تاحال معلوم نہیں ہو سکیں، تاہم واقعے کی تحقیقات جاری ہیں۔ کسی جانی نقصان کی اطلاع نہیں ملی۔ ریسکیو 1122 کی بروقت اور مؤثر کارروائی پر مقامی افراد نے اطمینان کا اظہار کیا ہے۔