Category: جرائم و حادثات

سیالکوٹ (باغی ٹی وی بیوروچیف شاہد ریاض) تحصیل بابوزئی، ضلع سوات میں پیش آنے والے المناک حادثے کے بعد ڈسکہ میں سوگ کی فضا چھا گئی۔ جی قربان ریسٹورنٹ بائی پاس روڈ کے قریب دریائے سوات میں ڈوبنے والے ایک ہی خاندان کے 10 افراد کی ہلاکت پر ڈپٹی کمشنر سیالکوٹ محترمہ صبا اصغر علی نے متاثرہ خاندان سے ان کے گھر جا کر تعزیت کی اور اس دل دہلا دینے والے سانحہ پر گہرے دکھ اور افسوس کا اظہار کیا۔

ڈپٹی کمشنر نے کہاکہ”یہ سانحہ پوری قوم کے لیے ایک صدمہ ہے۔ ہم دکھ کی اس گھڑی میں متاثرہ خاندانوں کے ساتھ کھڑے ہیں۔ اللہ تعالیٰ مرحومین کو جوارِ رحمت میں جگہ دے اور لواحقین کو صبرِ جمیل عطا فرمائے۔”

اس موقع پر ایڈیشنل ڈپٹی کمشنر ریونیو محمد اقبال سنگھیڑا اور اسسٹنٹ کمشنر ڈسکہ عثمان غنی بھی ان کے ہمراہ تھے۔ ضلعی انتظامیہ نے سانحے میں جاں بحق ہونے والوں کی میتیں گزشتہ شب وصول کیں اور تدفین سمیت تمام تر انتظامی امور کی نگرانی کی۔

یاد رہے کہ یہ سانحہ اُس وقت پیش آیا جب ڈسکہ سے تعلق رکھنے والا خاندان سیر و تفریح کے لیے سوات گیا ہوا تھا۔ سوات بائی پاس کے مقام پر ایک ہوٹل کے قریب دریا کنارے ناشتہ کرتے ہوئے اچانک دریا میں تیز ریلا آ گیا جس نے فیملی کو دریا کے خشک حصے میں بیٹھے ہوئے اچانک اپنی لپیٹ میں لے لیا۔ ریسکیو آپریشن کے دوران آٹھ لاشیں نکال لی گئیں جبکہ مزید دو افراد لاپتہ تھے۔

ضلعی انتظامیہ کے مطابق دریائے سوات میں اچانک ریلے کے باعث مختلف مقامات پر 70 افراد پھنس گئے تھے، جن میں سے 55 کو بحفاظت نکال لیا گیا۔ آج ہونے والی تازہ پیش رفت میں مزید ایک سیاح کی لاش دریا سے نکال لی گئی ہے، جس کے بعد جاں بحق افراد کی تعداد 10 ہو چکی ہے جبکہ 3 افراد تاحال لاپتہ ہیں۔

آج ڈسکہ میں آٹھ جاں بحق افراد کی نمازِ جنازہ ادا کی گئی، جس میں شہر بھر سے لوگوں نے شرکت کی۔ جنازوں کے موقع پر ہر آنکھ اشکبار تھی اور غم کی کیفیت چھائی رہی۔

شہریوں نے حکومت سے مطالبہ کیا ہے کہ سیاحتی مقامات اور دریا کنارے ہوٹلوں پر حفاظتی انتظامات کو یقینی بنایا جائے تاکہ مستقبل میں ایسے ہولناک سانحات سے بچا جا سکے۔ اس افسوسناک واقعے نے نہ صرف ایک خاندان کو غم میں مبتلا کیا بلکہ پوری قوم کو سوگوار کر دیا ہے۔

ڈسکہ (باغی ٹی وی، نامہ نگار ملک عمران) سانحہ سوات، ایک ہی خاندان کے 10 افراد جاں بحق، 8 کی نمازِ جنازہ ادا

تفصیلات کے مطابق ڈسکہ سے تعلق رکھنے والے ایک ہی خاندان کے افراد کے ساتھ سیر و تفریح کا سفر قیامت بن کر ٹوٹ پڑا، جب دریائے سوات کی بے رحم موجوں نے خوشیوں کو غم میں بدل دیا۔ سوات کے مقام پر پیش آنے والے سانحہ میں خاندان کے 15 میں سے 10 افراد دریا میں ڈوب گئے، جن میں سے آٹھ کی لاشیں نکال لی گئیں۔ ان آٹھ افراد کی نماز جنازہ آج ڈسکہ میں ادا کر دی گئی جس میں شہر کی بڑی تعداد نے شرکت کی اور پورا شہر سوگ میں ڈوبا رہا۔

سانحہ گزشتہ روز اُس وقت پیش آیا جب سیالکوٹ کے نواحی شہر ڈسکہ سے تعلق رکھنے والا خاندان سیر کے لیے سوات گیا ہوا تھا۔ سوات بائی پاس کے مقام پر خاندان کے افراد ایک ہوٹل کے قریب دریا کے کنارے ناشتہ کر رہے تھے کہ اچانک دریا میں تیز ریلا آ گیا اور دریا کے خشک حصے میں اتری تمام فیملیز کو اپنی لپیٹ میں لے گیا۔ اس واقعے میں ایک ہی خاندان کے دس افراد پانی کی نذر ہو گئے۔

ریسکیو ذرائع کے مطابق امدادی کارروائیاں فوری طور پر شروع کی گئیں، جن کے دوران دریا سے آٹھ لاشیں نکال لی گئیں جبکہ مزید دو افراد کی تلاش جاری تھی۔ ضلعی انتظامیہ کے مطابق دریائے سوات میں ریلے کے باعث مختلف مقامات پر 70 افراد پھنس گئے تھے جن میں سے 55 کو بحفاظت نکال لیا گیا، باقی کی تلاش کے لیے سرچ آپریشن جاری ہے۔

آج تازہ پیش رفت میں مزید ایک سیاح کی لاش نکال لی گئی ہے، جس کے بعد جاں بحق افراد کی تعداد 10 ہو چکی ہے جبکہ اب بھی تین افراد لاپتہ ہیں جن کی تلاش کے لیے ریسکیو آپریشن جاری ہے۔

خوفناک حادثے نے جہاں سیاحت کے خوشنما خواب کو المیے میں بدلا، وہیں ڈسکہ شہر میں غم و اندوہ کی لہر دوڑا دی۔ جنازوں کے موقع پر ہر آنکھ اشکبار تھی اور ہر دل دکھی۔ شہریوں نے حکومت سے مطالبہ کیا ہے کہ دریا کنارے ہوٹلوں اور تفریحی مقامات پر حفاظتی اقدامات کو یقینی بنایا جائے تاکہ مستقبل میں ایسے سانحات سے بچا جا سکے۔

سیالکوٹ(باغی ٹی وی ،بیوروچیف شاہدریاض)سوات میں سیلابی ریلے سے ایک ہی خاندان کے 18 افراد دریا میں بہہ گئے، 3 زندہ بچا لیے گئے، 7 کی لاشیں برآمد

سیالکوٹ سے تعلق رکھنے والا ایک ہی خاندان سیر کے لیے سوات گیا جہاں دریائے سوات پر افسوسناک سانحہ پیش آیا۔ دریا کے کنارے ناشتہ کرتے ہوئے اچانک آئے سیلابی ریلے میں خاندان کے 18 افراد بہہ گئے۔ ریسکیو اہلکاروں نے فوری کارروائی کرتے ہوئے 3 افراد کو زندہ بچا لیا جبکہ اب تک 7 افراد کی لاشیں نکالی جا چکی ہیں۔ باقی 8 افراد کی تلاش کے لیے ریسکیو آپریشن جاری ہے۔

ریسکیو ذرائع کے مطابق حادثہ صبح 8 بجے کے قریب پیش آیا، جب سیاح ناشتہ کر رہے تھے اور کچھ بچے دریا کے قریب تصویریں بنا رہے تھے۔ اسی دوران بارش کے باعث دریا میں اچانک پانی کا بہاؤ تیز ہو گیا، جس نے سب کو اپنی لپیٹ میں لے لیا۔ ریسکیو کے پہنچنے میں تاخیر پر متاثرہ خاندان نے افسوس اور غم کا اظہار کیا ہے۔

ڈپٹی کمشنر سوات کے مطابق دریا کے قریب جانے پر پہلے ہی دفعہ 144 نافذ ہے، تاہم سیاحوں کی جانب سے اس پابندی کی خلاف ورزی جاری ہے۔ متاثرہ سیاح کا کہنا ہے کہ بچے سیلفی لے رہے تھے، دریا میں اچانک پانی آیا اور ان کی موجودگی میں بچے ڈوب گئے، ریسکیو ٹیم تاخیر سے پہنچی اور بروقت مدد نہ دے سکی۔

سیر و تفریح کی غرض سے سوات جانے والا سیالکوٹ کے علاقے ڈسکہ سے تعلق رکھنے والا ایک ہی خاندان دریاۓ سوات کے بے رحم سیلابی ریلے کی نذر ہو گیا۔ المناک سانحہ اس وقت پیش آیا جب خاندان کے 18 افراد دریا کے کنارے ناشتہ کررہے تھے کہ اچانک دریا میں طغیانی آ گئی اور تمام افراد پانی میں بہہ گئے۔

ریسکیو حکام کے مطابق واقعہ صبح آٹھ بجے کے قریب پیش آیا، جب اہلِ خانہ بائی پاس کے قریب دریا کے کنارے بیٹھے تھے اور موسم خوشگوار ہونے کے باعث ناشتہ کررہے تھے۔ اس دوران اچانک پانی کے بہاؤ میں غیرمعمولی تیزی آئی جس کے نتیجے میں 18 افراد دریا میں بہہ گئے۔ واقعے کی اطلاع ملتے ہی ریسکیو ٹیمیں موقع پر پہنچیں اور آپریشن کا آغاز کیا گیا۔

اب تک 3 افراد کو زندہ بچا لیا گیا ہے جبکہ 9 افراد کی لاشیں نکال لی گئی ہیں۔ باقی 6 افراد کی تلاش تاحال جاری ہے۔ ریسکیو ٹیموں کے مطابق پانی کا بہاؤ شدید ہے جس کی وجہ سے تلاش میں مشکلات پیش آ رہی ہیں۔

حادثے کا شکار ہونے والے افراد میں ڈسکہ کے رہائشی محسن غوری کی چار کمسن بیٹیاں بھی شامل ہیں۔ میرب (17 سالہ، سیکنڈ ایئر کی طالبہ)، عجوہ (15 سالہ، میٹرک کی طالبہ)، شال (12 سالہ، ساتویں جماعت) اور انفال (7 سالہ، تیسری جماعت)۔ ان میں سے عجوہ اور میرب کی لاشیں مل چکی ہیں جبکہ دیگر کی تلاش جاری ہے۔

متاثرین میں محسن غوری کی بیوی، سالی توبینہ اسلام، ایک خالہ زاد بہن، ایک ڈاکٹر، اور چھ سالہ بچہ ایان شبباز بھی شامل ہیں جن کی لاشیں بھی شناخت ہو چکی ہیں۔ محسن اپنے سسرالی رشتہ داروں، دوستوں کی فیملیوں اور عزیزوں سمیت ایک ہی کوسٹر میں سیر کے لیے گئے تھے۔ گاڑی میں کل 35 افراد سوار تھے جن میں بیشتر کا تعلق محلہ لالاریاں اور پرانا ڈسکہ سے تھا۔

واقعہ چشم زدن میں خوشیوں بھرے سفر کو المیے میں تبدیل کر گیا۔ ایک متاثرہ سیاح نے جیو نیوز سے گفتگو کرتے ہوئے بتایا کہ ہم ناشتہ کرکے چائے پی رہے تھے اور بچے دریا کنارے سیلفی لینے گئے۔ پانی کم تھا، لیکن اچانک ریلہ آیا اور سب کو بہا لے گیا۔ ریسکیو کو فوری اطلاع دی گئی لیکن وہ ڈیڑھ سے دو گھنٹے بعد پہنچے، ان کی موجودگی میں ہی کئی بچے ڈوبے اور بچائے نہ جا سکے۔

ڈپٹی کمشنر سوات کے مطابق دریا کے قریب جانے اور نہانے پر دفعہ 144 نافذ ہے، مگر سیاح احتیاط نہیں کرتے۔ انہوں نے عوام سے اپیل کی کہ وہ ضابطوں کی پابندی کریں تاکہ ایسے واقعات سے بچا جا سکے۔

دوسری جانب ڈسکہ شہر میں واقعے کی خبر جنگل میں آگ کی طرح پھیل گئی، پورا شہر سوگوار ہے، ہر آنکھ اشکبار اور ہر دل افسردہ ہے۔ اہل علاقہ اور سوشل میڈیا صارفین نے حکومت سے مطالبہ کیا ہے کہ دریا کنارے سیرگاہوں میں سخت حفاظتی اقدامات کیے جائیں اور سیاحوں کی حفاظت کے لیے مستقل سیکیورٹی اور نگرانی کا بندوبست کیا جائے۔