Category: جرائم و حادثات

ایبٹ آباد: گیس لیکیج کے باعث دم گھٹنے سے 6 افراد جاں بحق،اطلاعات کے مطابق مانسہرہ کے علاقے لاری اڈہ پانو روڈ پر گیس اخراج کے باعث 6 افراد دم توڑ گئے۔

ذرائع کے مطابق مانسہرہ کے علاقے لاری اڈہ روڈ پر گیس لیکیج کے باعث 6 افراد جاں بحق ہوگئے، ریسکیو ذرائع کے مطابق گیس لیکج کے باعث مرنے والے افراد کا تعلق ایک ہی خاندان سے ہے جن میں دادی، میاں بیوی اور تین بچے شامل ہیں۔

ریسکیو ذرائع کا کہنا ہے کہ خاندان کے سارے افراد ایک ہی کمرے میں سورہے تھے اور شدید سردی کے باعث گیس ہیٹر بھی جلا رکھا تھا، تاہم لیکیج کی وجہ سے کمرے میں گیس بھر گئی جس کے باعث تمام افراد کی حالت تشویشناک ہوگئی، واقعے کی اطلاع ملتے ہی ریسکیو ٹیم نے اہل علاقہ کے ہمراہ تمام متاثرہ افراد کو کنگ عبداللہ اسپتال منتقل کردیا تاہم وہ جانبر نہ ہوسکے۔

لاہور: لاہورشہرمیں جگہ جگہ گندگی کے ڈھیر:ہرطرف بدبوہی بدبو: ذمہ دارکون ؟ ،اطلاعات کے مطابق لاہور میں جگہ جگہ گندگی کے ڈھیر نظرآرہے ہیں اورلاہوریئے پوچھتے ہیں کہ اس گندگی اوربدبوکے ذمہ دارکون ہیں ، یہ گندگی کے ڈیھرلاہورکے مشہورمقامات پرنظرآرہے ہیں‌

دوسری طرف لاہوریئے کہتے ہیں کہ سچ یہ ہے کہ لاہور میں صفائی بحران ختم نہ ہوسکا، گلی محلے گندگی سے اٹ گئے، جگہ جگہ پڑے کوڑا دان بھی بھر گئے، سڑکوں پر کوڑا کرکٹ پھیلنے سے شہریوں کو مشکلات کا سامنا ہے۔

لاہور میں‌ مختلف علاقوں میں جگہ جگہ گندگی کے ڈھیر برقرار ہیں۔ ماڈل ٹاون انٹرنیشنل مارکیٹ اورایسے ہی دیگر علاقوں میں کوڑا کرکٹ کے پہاڑ بن گئے۔ مغل پورہ، دھرم پورہ، شاد باغ، مکھن پورہ، تاج باغ، باغبانپورہ میں بھی گندگی ہی گندگی، بارش کے بعد کوڑا کرکٹ کے ڈھیر سے بدبو اور تعفن پھیلنے لگا۔

گندگی سڑکوں تک پھیلنے سے شہریوں کو آمدورفت میں بھی دشواری کا سامنا ہے۔

شہریوں کا کہنا ہے کہ کئی ہفتوں سے کوڑا کرکٹ کے ڈھیر لگے ہیں، بدبو آنے پر گزرنا بھی محال ہوچکا ہے، روزمرہ کے معمولات کے ساتھ ساتھ کاروبار بھی متاثر ہو رہے ہیں۔ انتظامیہ اور صفائی کمپنی کی جانب سے شہر کو زیرو ویسٹ کرنے کے متعدد دعوے کئے گئے مگر صفائی ستھرائی کے انتظامات بہتر نہ ہوسکے۔

اعلیٰ حکام کو فوری نوٹس لینا چاہیے ورنہ حالات مزید ابتر ہوسکتے ہیں۔

دوسری طرف لاہورئیے پوچھ رہے ہیں‌کہ کیا یہ گڈ گورننس ہے جہاں درجنوں محکمے ہونے کے باوجود گندگی کے ڈھیر ختم نہ کرسکے

کراچی :جس مدرسے میں بانی پاکستان پڑھے:اس کے بانی کے پوتے کوقتل کردیا گیا ،اطلاعات کے مطابق سندھ مدرستہ الاسلام کے بانی حسن علی آفندی کے پوتے کو مسلح افراد نے گھر میں گھس کر قتل کردیا ، پولیس کا کہنا ہے کہ واقعہ ٹارگٹڈ ہے یا ڈکیتی تفتیش جاری ہے۔

تفصیلات کے مطابق سندھ مدرستہ الاسلام کے بانی حسن علی آفندی کے پوتے کو کراچی میں قتل کردیا گیا، پولیس کا کہنا ہے کہ زین علی آفندی کو آج صبح مزار قائد کے سامنے گھرمیں گھس کر قتل کیا گیا ، 5ملزمان رات 3بجکر 25منٹ پر گھر میں داخل ہوئے اور 55 منٹ تک گھر میں موجود رہے۔

پولیس کے مطابق ملزمان سفید رنگ کی کرولا گاڑی میں آئے تھے ، مسلح افراد نے زین آفندی کے چہرے پر3 گولیاں ماریں، گھر میں موجود ملازم کو رسیوں سے باندھ دیا گیا تھا۔پولیس کا کہنا ہے واقعہ ٹارگٹڈ ہے یا ڈکیتی پر پہلو سے تفتیش جاری ہے۔

خیال رہے سندھ مدرسۃ الاسلام یکم ستمبر 1885ء کو قائم ہوا اس کے بانی حسن علی آفندی تھے جو ترک نژاد اور کراچی میں آباد تھے۔ سندھ مدرستہ الاسلام کا شمار جنوبی ایشیا کے قدیم ترین جدید مسلم تعلیمی اداروں میں ہوتا ہے۔ ادارے کا مقصد سندھ کے لوگوں کو جدید تعلیم سے بہرہ ور کرنا تھا۔ بانی پاکستان قائد اعظم محمد علی جناح نے بھی سندھ مدرسۃ الاسلام میں ابتدائی تعلیم حاصل کی تھی۔