تھانہ گوجرہ، ضلع منڈی بہاؤالدین میں ایک شہری کے مبینہ طور پر سرِعام برہنہ ہو کر دوڑنے اور عوامی مقام پر فحش حرکات کرنے کے الزام میں مقدمہ درج کر لیا گیا ہے۔ پولیس نے واقعے میں ملوث دیگر افراد کے خلاف بھی قانونی کارروائی شروع کر دی ہے۔
پولیس ریکارڈ کے مطابق مقدمہ نمبر 211/26 دفعات 5 اور 7 سمیت تعزیراتِ پاکستان کی دفعات 294، 509، 109 اور 34 کے تحت درج کیا گیا۔ ایف آئی آر کے مطابق واقعہ 18 مئی 2026 کی شام تقریباً ساڑھے چھ بجے پیش آیا جبکہ مقدمہ 20 مئی کی رات درج کیا گیا۔ایف آئی آر میں درج بیان کے مطابق پولیس موبائل گشت کے دوران قیچی چوک گوجرہ کے قریب موجود تھی کہ اطلاع ملی کہ شاہ پور صدر کے رہائشی عمر حیات نے مبینہ طور پر محمد احسان اور دو نامعلوم افراد کے ساتھ پانچ ہزار روپے کی شرط لگائی۔ شرط کے تحت عمر حیات نے اپنے کپڑے اتار کر مین سرگودھا روڈ پر تقریباً 100 قدم تک دوڑ لگائی۔پولیس کے مطابق اس دوران سڑک سے گزرنے والے شہریوں، خصوصاً خواتین، کو شدید ذہنی اذیت اور شرمندگی کا سامنا کرنا پڑا جبکہ ملزمان کی اس حرکت سے عوامی جذبات مجروح ہوئے۔ ایف آئی آر میں یہ بھی کہا گیا ہے کہ کسی نامعلوم شخص نے اس تمام واقعے کی ویڈیو بھی بنائی۔
پولیس نے مؤقف اختیار کیا کہ محمد احسان اور دیگر نامعلوم افراد نے عمر حیات کو اس حرکت پر اکسایا اور باہمی مشاورت سے سرِعام فحش حرکات کا ارتکاب کیا۔ مقدمے کے اندراج کے بعد تفتیش شروع کر دی گئی ہے جبکہ ویڈیو بنانے والے شخص کی تلاش بھی جاری ہے۔ایف آئی آر اے ایس آئی کلام عباس کی مدعیت میں درج کی گئی جبکہ مزید تحقیقات کے لیے مقدمہ دوسرے تفتیشی افسر کے سپرد کر دیا گیا ہے۔