Category: جرائم و حادثات

حيدرآباد:اپنے حقوق کا رونا رونے والے دوسروں سے جینے کا حق بھی چھیننے لگے ، اطلاعات کے مطابق لیاقت میڈیکل ہسپتال جامشورو میں یونیورسٹی پروفیسر کی غفلت سے 65 سالہ مریم جان کی بازی ہار گئیں۔

ذرائع کے مطابق معدے کے کینسر میں مبتلا مریم کے پیٹ کا آپریشن کیا گیا جس کے بعد تکلیف میں مزید اضافہ ہوگیا۔آپریشن کے بعد خاتون کے پیٹ میں تکلیف بڑھ گئی تو حیدرآباد سول ہسپتال لایا گیا جہاں ایکسرے رپورٹ میں خاتون کے پیٹ میں قینچی ہونے کا انکشاف ہوا۔

دوسری طرف ڈھٹائی اور بربریت کا حال یہ ہے کہ ڈائریکٹر ایڈمن ستار جتوئی کے مطابق آپریشن یونیورسٹی کے پروفیسر نے کیا ہے اس لئے ہسپتال انتظامیہ خود کوئی کارروائی نہیں کر سکتی۔ہسپتال انتظامیہ نے لیاقت یونیورسٹی کے وائس چانسلر کو معاملے کی انکوائری کی سفارش کردی ہے

کراچی : یہ کراچی ہے جہاں کلفٹن کے علاقے گزری میں معاشی پریشانی سے تنگ اسٹیٹ ایجنٹ نے پھندا لگا کر خودکشی کر لی ۔تفصیلات کے مطابق گزری کے علاقے پی این ٹی کالونی کی رہائشی عمارت کی تیسری منزل پر قائم فلیٹ میں ایک شخص نے پھندا لگا کر خودکشی کرلی ، واقعے کی اطلاع ملتے ہی پولیس اور ریسکیو ادارے کا عملہ موقع پر پہنچ گیا۔

پولیس نے لاش کو اپنی تحویل میں لے کر قانونی کارروائی کیلئے جناح اسپتال منتقل کیا ، جہاں متوفی کی شناخت 40 سالہ ندیم خان ولد زمان خان کے نام سے ہوئی ہے۔ ایس ایچ او رضوان حیدر نے بتایا کہ متوفی اسٹیٹ ایجنٹ تھا اور معاشی پریشانی کے باعث بیوی بچوں کو آبائی گاؤں بھیج دیا تھا۔

دوسری طرف علاقہ مکینوں کا کہنا ہے کہ مقروض ہونے کی وجہ سے ذہنی طور پر پریشان تھا اور پیر کی رات کو دلبرداشتہ ہوکر پھندا لگا کر خودکشی کرلی ، پولیس نے ضابطے کی کارروائی کے بعد لاش ورثا کے حوالے کردی۔

لاہور :خاوند یا جلاد ، بیوی کو کلہاڑی کے وار کے مارنے کی کوشش ، اطلاعات کے مطابق کاہنہ میں گھریلو جھگڑے کے باعث خاتون پر اس کے شوہر اور سسر کا بیہمانہ تشدد ، خاتون پر کلہاڑیوں کے وار، پندرہ سے زائد جسم پر تشدد کے نشانات، خاتون ایک کان سے بھی محروم ہو گئی۔

ذرائع کے مطابق زخمی خاتون کو طبی امداد کے لیے جنرل ہسپتال منتقل کر دیا گیا۔ خاتون کا کہنا تھا کہ اسے پہلے بھی تشدد کا نشانہ بنایا جاتا رہا اور چند روز قبل اسکے خاوند اور سسر نے اسے کلہاڑیوں کے وار کر کے جان سے مارنے کی کوشش بھی کی۔

ڈاکٹروں کا کہنا تھا کہ کلہاڑی کے واروں سے خاتون شدید زخمی ہوگئی اور کان بھی کاٹ دیا گیا تھا، خاتون کو طبی امداد کے لیے انتہائی نگہداشت وارڈ میں رکھا گیا ہے۔

پولیس نے خاتون کے بھائی کی مدعیت میں اقدام قتل سمیت دیگر سنگین نوعیت کی دفعات کے تحت مقدمہ درج کر کے ملزم کو گرفتار کر لیا ہے۔