Category: جرائم و حادثات


کراچی کے علاقے شرف آباد میں واقع عالمگیر ہائٹس میں پیش امام کے گھر چوری کی بڑی واردات سامنے آئی ہے، جہاں نامعلوم ملزمان کروڑوں روپے مالیت کا سونا اور 90 لاکھ روپے نقدی لے کر فرار ہو گئے۔
‎پولیس کے مطابق متاثرہ شخص نے نیو ٹاؤن تھانے میں مقدمہ درج کراتے ہوئے بتایا کہ 18 جنوری کی شام وہ اہلِ خانہ کے ہمراہ دھورا جی میں اپنی والدہ سے ملنے گئے تھے۔ رات ایک بجے کے بعد گھر واپس آئے تو پڑوسی نے اطلاع دی کہ فلیٹ کا دروازہ کھلا ہوا ہے۔
‎متاثرہ شخص کے مطابق گھر کے تمام تالے درست حالت میں تھے، تاہم کمرے میں سامان بکھرا پڑا تھا اور دو ہینڈ بیگز خالی حالت میں موجود تھے۔ الماریوں اور دیگر جگہوں کی تلاشی کے بعد معلوم ہوا کہ امانتاً رکھے گئے 90 لاکھ روپے نقد اور تقریباً 48 تولہ سونے کے زیورات غائب ہیں۔
‎پیش امام نے پولیس سے مطالبہ کیا ہے کہ واقعے کی مکمل تفتیش کر کے ملزمان کو گرفتار کیا جائے۔
‎دوسری جانب کراچی میں ایک مندر میں چوری کی واردات میں ملوث ایک ملزم کو پولیس نے سی سی ٹی وی فوٹیج کی مدد سے گرفتار کر لیا ہے، جبکہ اس کا ساتھی فرار ہو گیا۔ پولیس کے مطابق 14 جنوری کو ڈولی کھاتہ پیر ٹول مندر میں دو ملزمان نے مورتیاں، پوجا کا سامان، چاندی کی جیولری اور دیگر قیمتی اشیاء چوری کی تھیں۔
‎پولیس کا کہنا ہے کہ گرفتار ملزم کے قبضے سے لوٹا گیا سامان برآمد کر لیا گیا ہے جبکہ فرار ملزم کی تلاش جاری ہے۔

پولیس نے بروقت کارروائی کرتے ہوئے مندر سے مورتیاں، چاندی اور نقدی چرانے والے ملزم کو گرفتار کرلیا۔ پولیس کے مطابق جدید تفتیشی ذرائع اور سی سی ٹی وی فوٹیج کی مدد سے ملزم کو صدر کے علاقے سے حراست میں لیا گیا، جب کہ اس کے قبضے سے واردات میں لوٹا گیا سامان بھی برآمد کرلیا گیا ہے۔

پولیس حکام کے مطابق ڈولی کھاتہ پیر ٹول مندر میں 14 جنوری کو چوری کی واردات پیش آئی تھی، جس میں دو ملزمان مندر میں داخل ہوئے اور وہاں سے 5 قیمتی مورتیاں، پیتل اور تانبے کے برتن، زیورات کے ڈبے چرا کر فرار ہوگئے تھے۔ اس کے علاوہ مندر میں موجود چندہ بکس سے تقریباً 75 ہزار روپے نقدی بھی غائب پائی گئی تھی، جس پر مندر انتظامیہ نے فوری طور پر پولیس کو اطلاع دی۔

واقعے کے بعد پولیس نے مندر اور اطراف کے علاقوں میں نصب سی سی ٹی وی کیمروں کی فوٹیجز کا تفصیلی جائزہ لیا، جس کی بنیاد پر ایک ملزم کی شناخت ممکن ہوئی۔ پولیس نے کامیاب چھاپہ مار کارروائی کرتے ہوئے ملزم کو صدر کے علاقے سے گرفتار کیا اور اس کے قبضے سے چوری شدہ مورتیاں، چاندی، برتن اور نقدی برآمد کرلی۔پولیس کا کہنا ہے کہ گرفتار ملزم سے مزید تفتیش جاری ہے، جس کے دوران اہم انکشافات متوقع ہیں۔ پولیس کے مطابق واردات میں ملوث ملزم کا ایک ساتھی تاحال فرار ہے، جس کی گرفتاری کے لیے مختلف مقامات پر چھاپے مارے جا رہے ہیں اور تلاش کا عمل تیز کر دیا گیا ہے۔