Category: جرائم و حادثات

نعش پوسٹ مارٹم کے لیے ٹی ایچ کیو ہسپتال منتقل جسم پر کسی قسم کی انجری کے آثار نہیں، پوسٹ مارٹم رپورٹ موت کی اصل وجہ سامنے لائے گی
نعش کی شناخت کے لیے نادرا سے رجوع کر لیا ہے مقدمہ درج کرکے تفتیشی ٹیم نے تحقیقات کا آغاز کر دیا ہے سید دانیال حسن
گوجرخان (قمرشہزاد) گوجرخان کے علاقے ہاؤسنگ سکیم ٹو میں اقراء کالج کے قریب لنک روڈ سے ایک نامعلوم خاتون کی نعش برآمد ہونے پر علاقے میں سنسنی پھیل گئی۔ مقامی افراد کی اطلاع پر پولیس فوری طور پر حرکت میں آئی۔واقعے کی اطلاع ملتے ہی اے ایس پی سید دانیال حسن پولیس نفری کے ہمراہ موقع پر پہنچے پولیس ٹیم نے علاقے کو گھیرے میں لے کر شواہد محفوظ بنانے کا عمل شروع کیا۔بعد ازاں فرانزک ٹیم نے بھی جائے وقوعہ کا تفصیلی جائزہ لیا اور اہم شواہد اکٹھے کیے۔

اے ایس پی سید دانیال حسن نے میڈیا کو بتایا کہ خاتون کی تاحال شناخت نہیں ہو سکی۔اس سلسلے میں نادرا سے رجوع کر لیا گیا ہے تاکہ ڈیٹا کی مدد سے شناخت ممکن بنائی جا سکے۔ شناخت ہوتے ہی لواحقین سے فوری رابطہ کیا جائے گا۔ تاہم خاتون کے جسم پر بظاہر کسی قسم کی انجری کا کوئی نشان موجود نہیں، تاہم موت کی اصل وجہ کا تعین فرانزک اور پوسٹ مارٹم رپورٹ آنے کے بعد ہی ممکن ہوگا۔نعش کو قانونی کارروائی مکمل کرنے کے بعد تحصیل ہیڈکوارٹر ہسپتال گوجرخان منتقل کر دیا گیا ہے۔ واقعے کا مقدمہ درج کر کے تفتیشی ٹیم نے تمام ممکنہ زاویوں سے تحقیقات کا آغاز کر دیا ہے۔


گوجرانوالہ میں خاتون اور اس کے بیٹے کے قتل میں اہم پیش رفت سامنے آئی ہے۔ پنجاب پولیس نے بروقت اور مؤثر کارروائی کرتے ہوئے ملزم کو گرفتار کر لیا۔
‎دورانِ تفتیش ملزم نے 3 سالہ بچی اور 14 سالہ لڑکے کے قتل کا بھی اعتراف کیا۔ ملزم کی نشاندہی پر بچی کی لاش نہر سے برآمد کر لی گئی۔ پولیس کے مطابق ملزم واردات کے بعد ٹرین کے ذریعے کراچی فرار ہو رہا تھا، تاہم جدید ٹیکنالوجی اور بروقت کوآرڈینیشن کے ذریعے اسے ٹرین میں ہی گرفتار کر لیا گیا۔
‎پنجاب پولیس کا کہنا ہے کہ شہریوں کے جان و مال کے تحفظ کے لیے ہر ممکن اقدامات جاری ہیں اور قانون کے مطابق ملزم کے خلاف کارروائی کی جا رہی ہے۔


انجینئر محمد علی مرزا پر گزشتہ رات جہلم میں واقع ان کی اکیڈمی کے اندر حملہ کیا گیا، تاہم وہ اس واقعے میں محفوظ رہے جبکہ حملہ آور کو موقع پر ہی گرفتار کر لیا گیا۔
پولیس کے مطابق حملے کے وقت انجینئر محمد علی مرزا درس مکمل کرنے کے بعد شرکاء کے ساتھ فوٹو سیشن میں مصروف تھے کہ ایک نوجوان نعرہ لگاتے ہوئے خالی ہاتھ ان پر جھپٹ پڑا۔
‎پولیس حکام کا کہنا ہے کہ ملزم نے دونوں ہاتھوں سے ان کا گلا دبانے کی کوشش کی، تاہم وہاں موجود افراد نے فوری طور پر اسے قابو کر کے پولیس کے حوالے کر دیا۔
‎ابتدائی تحقیقات کے مطابق گرفتار ملزم ایبٹ آباد کا رہائشی ہے اور اس کا تعلق ایک کالعدم جماعت سے بتایا جا رہا ہے۔
‎واقعے کا مقدمہ تھانہ سٹی جہلم میں درج کر لیا گیا ہے، جبکہ پولیس مزید تفتیش جاری رکھے ہوئے ہے تاکہ حملے کے محرکات اور ممکنہ پس منظر کا تعین کیا جا سکے۔