لاہور: صوبائی دارالحکومت کے مصروف علاقے لٹن روڈ میں ڈکیتی کی ایک خوفناک واردات پیش آئی جہاں تین مسلح ڈاکوؤں نے اسلحہ کے زور پر ایک نجی ریسٹورنٹ کو لوٹ لیا۔
واردات کے وقت ریسٹورنٹ میں فیملیز اور بچے بھی موجود تھے، جس کے باعث موقع پر شدید خوف و ہراس پھیل گیا،عینی شاہدین کے مطابق تینوں ملزمان موٹر سائیکلوں پر سوار ہو کر ریسٹورنٹ میں داخل ہوئے اور آتے ہی عملے اور گاہکوں کو یرغمال بنا لیا۔ ملزمان نے اسلحہ لہرا کر سب کو خاموش رہنے کی دھمکیاں دیں اور کیش کاؤنٹر سے نقدی نکال لی۔ اس دوران انہوں نے متعدد شہریوں سے موبائل فون بھی چھین لیے۔ذرائع کا کہنا ہے کہ مسلح ڈاکوؤں کو اچانک سامنے دیکھ کر ریسٹورنٹ کے عملے میں شامل ایک خاتون ورکر کی حالت غیر ہو گئی جسے فوری طور پر ساتھی ملازمین نے سنبھالا۔ واقعے کے باعث بچوں اور خواتین میں شدید خوف پایا گیا ،واردات کے بعد ملزمان با آسانی موقع سے فرار ہونے میں کامیاب ہو گئے۔ اطلاع ملنے پر پولیس کی بھاری نفری موقع پر پہنچ گئی اور شواہد اکٹھے کر کے قریبی علاقوں کی ناکہ بندی کر دی گئی۔ پولیس حکام کے مطابق سی سی ٹی وی فوٹیج حاصل کر لی گئی ہے اور ملزمان کی شناخت کے لیے کارروائی جاری ہے۔
علاقہ مکینوں اور تاجر برادری نے شہر میں بڑھتی ہوئی اسٹریٹ کرائم کی وارداتوں پر تشویش کا اظہار کرتے ہوئے مطالبہ کیا ہے کہ ملزمان کو فوری گرفتار کر کے سخت قانونی کارروائی عمل میں لائی جائے تاکہ شہری خود کو محفوظ محسوس کر سکیں۔ پولیس کا کہنا ہے کہ جلد ہی ملزمان کو گرفتار کر لیا جائے گا۔
