Category: جرائم و حادثات

مری: مری ایکسپریس وے پر پیش آنے والے المناک ٹریفک حادثے کے بعد فرار ہونے والے ڈرائیور کو موٹر وے پولیس نے گرفتار کر لیا۔

ترجمان موٹر وے پولیس کے مطابق مفرور ڈرائیور کو خفیہ اطلاع کی بنیاد پر اسلام آباد کے پمز اسپتال سے گرفتار کیا گیا۔ گرفتاری کے بعد ملزم کو مزید قانونی کارروائی کے لیے مری پولیس کے حوالے کر دیا گیا ہے۔ترجمان کا کہنا ہے کہ موٹر وے پولیس کی مدعیت میں تھانہ مری میں ڈرائیور کے خلاف مقدمہ بھی درج کر لیا گیا ہے، جبکہ حادثے کی تحقیقات جاری ہیں۔

یاد رہے کہ مری ایکسپریس وے پر کجوٹ کے مقام پر پی ٹی ڈی سی ٹورسٹ اسپاٹ کے قریب ایک وین بے قابو ہو کر حفاظتی دیوار سے ٹکرا گئی تھی۔ حادثے کے نتیجے میں گاڑی کا فیول ٹینک پھٹ گیا اور وین میں آگ بھڑک اٹھی۔اس افسوسناک حادثے میں ملتان سے تعلق رکھنے والے ایک ہی خاندان کے 10 افراد جاں بحق ہو گئے تھے، جس پر ملک بھر میں گہرے دکھ اور افسوس کا اظہار کیا گیا تھا۔ پولیس حکام کے مطابق گرفتار ڈرائیور سے تفتیش جاری ہے اور واقعے کے تمام پہلوؤں کا جائزہ لیا جا رہا ہے۔

راولپنڈی پولیس نے کارروائی کرتے ہوئے لائیو اسٹریمنگ کے ذریعے نازیبا ویڈیوز انٹرنیٹ پر شیئر کرنے والے ایک گینگ کو گرفتار کر لیا۔

پولیس کے مطابق گرفتار گینگ میں 11 ملکی و غیر ملکی افراد شامل ہیں، جن میں ایک غیر ملکی خاتون سمیت 7 خواتین بھی شامل ہیں۔ کارروائی کے دوران ملزمان کے قبضے سے ایک پستول، گولیاں اور لائیو اسٹریمنگ میں استعمال ہونے والا موبائل فون، لیپ ٹاپ سمیت دیگر الیکٹرانک آلات بھی برآمد کر لیے گئے۔پولیس حکام کا کہنا ہے کہ ملزمان مبینہ طور پر غیراخلاقی ویڈیوز تیار کرکے مختلف ویب سائٹس پر اپ لوڈ کرتے تھے۔ گرفتار افراد کے خلاف مقدمہ درج کر کے تحقیقات کا آغاز کر دیا گیا ہے۔

پولیس کے مطابق گینگ کے دیگر ساتھیوں اور سہولت کاروں کی گرفتاری کے لیے تحقیقات کا دائرہ وسیع کر دیا گیا ہے، جبکہ مقدمے کی تفتیش کے سلسلے میں نیشنل سائبر کرائم ادارے (این سی سی آئی اے) سے بھی رابطہ کیا گیا ہے۔حکام کا کہنا ہے کہ معاملے کے تمام پہلوؤں کا جائزہ لیا جا رہا ہے اور تحقیقات مکمل ہونے کے بعد مزید تفصیلات سامنے لائی جائیں گی۔

کراچی کے علاقے کورنگی نمبر ڈیڑھ کی نورانی کالونی میں خواجہ سراؤں کے گھر پر حملے کے واقعے میں پولیس نے کارروائی کرتے ہوئے 2 ملزمان کو گرفتار کر لیا۔

پولیس کے مطابق واقعہ گزشتہ روز پیش آیا تھا، جس کی ویڈیو سوشل میڈیا پر وائرل ہونے کے بعد مقدمہ درج کر کے تحقیقات کا آغاز کیا گیا۔ وائرل ویڈیو میں دو افراد کو گھر میں زبردستی داخل ہو کر خواجہ سراؤں پر تشدد کرتے دیکھا جا سکتا ہے۔پولیس کا کہنا ہے کہ مقدمہ زمان ٹاؤن تھانے میں درج کر لیا گیا ہے، جبکہ گرفتار ملزمان کی شناخت انیس اور علی کے نام سے ہوئی ہے۔تحقیقات کے مطابق ملزمان نے اپنے دیگر ساتھیوں کے ہمراہ خواجہ سراؤں کے گھر پر دھاوا بولا، انہیں گھر خالی کرنے کا کہا اور دعویٰ کیا کہ مذکورہ مکان ان کی ملکیت ہے۔پولیس کے مطابق واقعے میں ملوث دیگر افراد کی گرفتاری کے لیے چھاپے مارے جا رہے ہیں، جبکہ مقدمے کی مزید تفتیش جاری ہے۔

لاہور کے علاقے اکبری گیٹ میں بیوی کو مبینہ طور پر آگ لگا کر شدید زخمی کرنے والے شوہر کو پولیس نے گرفتار کر لیا۔

پولیس کے مطابق تین روز قبل پیش آنے والے واقعے میں 25 سالہ خاتون بری طرح جھلس گئی تھی اور اسے تشویشناک حالت میں اسپتال منتقل کیا گیا تھا۔حکام کا کہنا ہے کہ متاثرہ خاتون نے اسپتال میں ہوش میں آنے کے بعد اپنا بیان ریکارڈ کرایا، جس میں الزام عائد کیا کہ اسے اس کے شوہر نے آگ لگائی تھی۔خاتون کے بیان کی روشنی میں پولیس نے کارروائی کرتے ہوئے ملزم کا سراغ لگایا اور اسے گرفتار کر لیا۔پولیس کے مطابق ملزم کے خلاف مقدمے کی تفتیش جاری ہے جبکہ واقعے کے تمام پہلوؤں کا باریک بینی سے جائزہ لیا جا رہا ہے۔ حکام کا کہنا ہے کہ تحقیقات مکمل ہونے کے بعد مزید قانونی کارروائی عمل میں لائی جائے گی۔

باپ بیٹے کا قاتل انجام کو پہنچ گیا گوجرخان پولیس کا جرات مندانہ مقابلہ، چھینا گیا موٹر سائیکل اور اسلحہ برآمد
پی او راولپنڈی کی گوجرخان پولیس کو شاباش سنگین مقدمات میں مطلوب خطرناک ملزم ہلاک، فرار ساتھیوں کی تلاش جاری
گوجر خان (قمرشہزاد) تھانہ گوجرخان کی حدود میں رات گئے پولیس اور جرائم پیشہ افراد کے درمیان ہونے والے مقابلے میں دوہرے قتل سمیت سنگین مقدمات میں مطلوب ملزم غلام رسول ہلاک ہو گیا، جبکہ اس کے دو ساتھی فائرنگ کرتے ہوئے فرار ہونے میں کامیاب ہو گئے۔ پولیس نے موقع سے گن پوائنٹ پر چھینا گیا موٹر سائیکل اور اسلحہ برآمد کر لیا ہے۔ تفصیلات کے مطابق گوجرخان پولیس نے رات گئے ناکہ بندی کر رکھی تھی کہ اس دوران موٹر سائیکل سوار تین مشکوک افراد کو رکنے کا اشارہ کیا گیا۔ ملزمان نے رکنے کے بجائے پولیس پارٹی پر اندھا دھند فائرنگ شروع کر دی۔ پولیس کی جوابی کارروائی اور ملزمان کی اپنی فائرنگ کی زد میں آکر ان کا ایک ساتھی موقع پر ہی دم توڑ گیا، جس کی شناخت غلام رسول کے نام سے ہوئی ہے۔ ہلاک ملزم کے دیگر دو ساتھی اندھیرے کا فائدہ اٹھاتے ہوئے فرار ہو گئے جن کی گرفتاری کے لیے علاقے میں سرچ آپریشن شروع کر دیا گیا ہے۔ پولیس ذرائع کے مطابق ہلاک ہونے والا ملزم غلام رسول انتہائی خطرناک ریکارڈ یافتہ تھا جو قتل، اقدامِ قتل اور ناجائز اسلحہ کے متعدد مقدمات میں مطلوب تھا۔ ملزم نے حال ہی میں عید کے روز تھانہ مندرہ کے علاقے میں فائرنگ کر کے ڈریال ماہندر کے رہائشی باپ جاوید اور اس کے بیٹے سبیل کو بے دردی سے قتل کر دیا تھا اور روپوش تھا۔ ملزم قبل ازیں بھی دوہرے قتل کے ایک مقدمے میں سزایافتہ رہ چکا تھا۔ واقعہ کی اطلاع ملتے ہی سینئر پولیس افسران بھاری نفری کے ہمراہ موقع پر پہنچ گئے۔ پولیس نے ملزم کی لاش کو پوسٹ مارٹم کے لیے ٹی ایچ کیو ہسپتال گوجر خان منتقل کر دیا ہے۔ ابتدائی تحقیقات میں معلوم ہوا ہے کہ ملزمان کے زیر استعمال موٹر سائیکل تھانہ ریس کورس کے علاقے سے اسلحہ کے زور پر چھینا گیا تھا۔ سی پی او راولپنڈی سید خالد محمود ہمدانی نے خطرناک ملزمان کا بہادری سے مقابلہ کرنے پر ایس پی صدر، اے ایس پی صدر، اور ایس ایچ او گوجر خان طیب ظہیر بیگ سمیت پوری ٹیم کو تعریفی اسناد اور شاباش دیتے ہوئے کہا کہ جرائم پیشہ عناصر کے خلاف آہنی ہاتھوں سے نمٹا جائے گا اور شہریوں کے جان و مال کا تحفظ ہر صورت یقینی بنایا جائے گا۔

‎راولپنڈی کے علاقے گوجر خان میں ایک افسوسناک واقعہ پیش آیا جہاں ایک خاتون نے مبینہ طور پر اپنے شوہر پر تیزاب پھینک دیا، جس کے نتیجے میں وہ شدید زخمی ہو گیا۔ پولیس نے فوری کارروائی کرتے ہوئے خاتون کو موقع سے گرفتار کر لیا۔
‎پولیس کے مطابق متاثرہ شخص کی شناخت کامران حسین کے نام سے ہوئی ہے، جو طلاق کے معاملے میں یونین کونسل آفس پہنچا تھا۔ ابتدائی اطلاعات کے مطابق خاتون بھی وہاں موجود تھی اور کارروائی مکمل ہونے کے بعد جب کامران حسین دفتر سے باہر نکلا تو اس پر تیزاب پھینک دیا گیا۔
‎واقعے کے بعد متاثرہ شخص کو فوری طور پر تحصیل ہیڈکوارٹرز اسپتال منتقل کیا گیا جہاں اسے طبی امداد فراہم کی جا رہی ہے۔ پولیس حکام کا کہنا ہے کہ زخمی شخص کی حالت خطرے سے باہر بتائی جا رہی ہے اور ڈاکٹرز اس کے علاج میں مصروف ہیں۔
‎ابتدائی تحقیقات کے دوران معلوم ہوا ہے کہ میاں بیوی کے درمیان کافی عرصے سے گھریلو تنازعات اور اختلافات چل رہے تھے۔ پولیس کے مطابق بظاہر یہی تنازعات اس افسوسناک واقعے کا سبب بنے، تاہم واقعے کے تمام پہلوؤں کی مکمل چھان بین جاری ہے۔
‎قانون نافذ کرنے والے اداروں نے ملزمہ کے خلاف مقدمہ درج کر کے باقاعدہ تفتیش شروع کر دی ہے۔ پولیس کا کہنا ہے کہ شواہد، بیانات اور فرانزک رپورٹ کی روشنی میں مزید قانونی کارروائی عمل میں لائی جائے گی۔
‎ماہرین کے مطابق تیزاب گردی ایک سنگین جرم ہے جس کے متاثرین کو جسمانی، ذہنی اور نفسیاتی مشکلات کا سامنا کرنا پڑتا ہے۔ سماجی حلقوں نے مطالبہ کیا ہے کہ ایسے واقعات کی روک تھام کے لیے سخت قوانین پر مؤثر عملدرآمد یقینی بنایا جائے اور گھریلو تنازعات کے حل کے لیے مؤثر مشاورتی نظام کو فروغ دیا جائے۔